Ijităn n-inĕmmušal 5

1Dăɣ-a-wen-dăɣ a dd-iggăd Ănanyas ĕnta d-hănne-s Săfiɣa, ižžĕnša-hin ašĕkrĕš-net 2măšan, ănmănnăk d-hănne-s făll-ad-hin-iṭṭĕf aɣil n-ălqim n-inăzzan-net, awĕy-dd a-wa iyyăḍăn i-inĕmmušal. 3Osă-dd ɣas, inn'-as Bĕṭrus: "Ănanyas! Mafăl tĕyyĕd Iblis itajj erk ĕnniyăt ogdăhăn d-a-wa-dăɣ dăɣ ulh-năk? Ma kăy-isawănnen bahu i-Unfas Šăddijăn a-s hin-taṭṭăfăd aɣil n-ălqim n-ašĕkrĕš-năk? 4Mi kăy-ăšhăššălăn inăzzan-net? Ajăn wădden jer-inša-hin wăla, i n-năk ɣas, tăddobed ad-has-tĕjĕd a-wa s-tărhed. Ma dd-orăwăn săr-k erk ĕššăɣĕl-wa-dăɣ? Ǝlmĕd a-s wădden dăgg-adĕm a-s tĕnned bahu, Măssinăɣ a-s tăn-tĕnned." 5Islă Ănanyas i-tifer-tin-dăɣ ɣas, oḍa, ĕjmăḍăn-t iman. Ămoos a-wen isĕksaḍ i-ăddinăt wi ĕslănen i-a-wen-dăɣ. 6Osăn-dd hărăt dăɣ-imawaḍăn, ĕssĕlsăn-in tafĕkka-net, ĕglăn dăr-s, ĕnbălăn-t-in. 7Okăy a iwwăḍăn kăraḍ ăssaɣătăn ḍarăt-a-wen ɣas, tosă-dd hănne-s n-Ănanyas, wăr tăt-tĕha tijya n-a-wa ijăn. 8Tĕjjăš-dd ɣas, issĕstăn-tăt Bĕṭrus, inn'-as: "Săfiɣa, lăɣăt-ahi, ak ajăn ălqim-wa-dăɣ a-s hin-tĕžžĕnšăm ašĕkrĕš meɣ?" Tĕnn'-as: "Ǝyya!" 9Inn'-as Bĕṭrus: "Ma săr-wăn dd-orăwăn tanmĕnnakt šund-ta-dăɣ, tiirĕmĕm Unfas Šăddijăn? Ǝnhĕy adăriš n-ăddinăt wi s-iket hin-ĕnbălăn ăhalĕs-năm, ĕqqalăn-dd, ĕbdadăn dat-emm n-ehăn i-ad-kăm-awĕyăn kămm-dăɣ." 10Toḍă ălwăqq-wen-dăɣ daw-iḍarăn n-Bĕṭrus, tămmut ĕnta-dăɣ s-iyyăt. Ǝḍkălăn-tăt imawaḍăn, ĕẓkăn-tăt edes i-ăhalĕs-net. 11Orăw-dd a-wen-dăɣ taksăḍt-i-dăɣ măqqărăt făll-ălkănisăt iket-net d-ăddinăt wi iyyăḍnen ĕslănen i-a-wa ijăn. 12Ǝjăn inĕmmušal ijităn n-Măssinăɣ d-hărătăn ăssuksăḍnen ăjjootnen dat-ăddinăt. Tažămmaɣăn imumĕnăn n-Ɣisa hak ašăl dăɣ-ehăn n-ămudd wa măqqărăn edes i-tăfala ta s-itawănna ta n-Sulăyman. Ǝknan tassaɣt, ĕṭṭafăn iyyăn n-emm, 13wădden ere dd-iggădăn-dăɣ, ad-fălla-săn dd-iwwaḍ, ăssiimɣărăn-tăn ăddinăt. 14Tiwwaḍăn-dd fălla-săn meddĕn d-tiḍeḍen ăjjootnen omannen s-Emăli. 15Tiwĕyăn-dd săr-săn ăddinăt imarhinăn, săns'-en-tăn făll-isĕftaɣ dăɣ-ittus n-ad-tăn-tăls kud-dăɣ tele n-Bĕṭrus afăl okăy, ed ere tĕlsa tele-net dăɣ, ad-izzĕy. 16Tĕffalăn-dd ăddinăt iɣărman wi ohăẓnen, tišĕlĕn-dd s-Yărussălam ăwwayăn imarhinăn d-imĕlšan, zizuyăn-tăn inĕmmušal iket-dăɣ-năsăn. 17Iggăd-dd ămănokal n-kăl-tikutawen, osăm hullan ĕnta d-iyyăḍ săr-s oraknen n-taggayt ta tĕglăt făll-tidĕt n-iman-net, s-itawănna ta n-kăl-sadus, ănmănnakăn i-ad-ĕjrĕwăn ĕmmĕk s-ăɣšădăn hărăt i-inĕmmušal. 18Ăstărmăsăn-tăn, ĕjăn-tăn dăɣ-takărmut ta măqqărăt. 19Măšan, osă-dd ănjălos dd-ăšimašăl Măssinăɣ s-ehăḍ, ora tishar n-takărmut, izzĕzjăr-tăn-dd tĕzzar, inn'-asăn: 20"Ăkkăt ehăn n-ămudd wa măqqărăn, tăxṭĕbăm i-tamĕtte isălan n-tămudre ta tăɣlălăt." 21Ǝjăn inĕmmušal a-wa hasăn-ătwănnăn, ĕnšăyăn ehăn n-ămudd wa măqqărăn ad-dăɣ-s saɣren ăddinăt. Ălwăqq wa dd-osa ămănokal n-kăl-tikutawen ĕnta d-ăddinăt wi săr-s orăknen, issăɣră-dd kăl-Sinhidrin wi n-imizărăn n-kăl-Ălyăhud ɣattăsnen ăššăreɣa, d-inušămăn n-kăl-Iṣrayil wi iyyăḍnen, omărăn s-ad-dd-ăttălwăyăn inĕmmušal dăɣ-takărmut. 22Ǝglăn ĕssărdusa măšan wăr tăn-in-ogeẓăn dăɣ-sĕllul-năsăn, ĕqqălăn-dd, ĕjăn isălan dăɣ-ălžămaɣăt wa ăqqimăn, ĕnnăn-asăn: 23"A-s hin-nosa takărmut, ăṭṭubben imawăn-net, ĕbdadăn ĕssardusa wi tăt-ăɣlăfnen dăɣ-idăggan-năsăn măšan, ălwăqq wa d-nora sĕllul, wăr t-tĕha tiṭṭ." 24Islă kumănda wa ănniihăḍăn dăɣ-ĕssărdusa wi jănen ĕnniyăt i-ehăn n-ămudd wa măqqărăn d-ămănokal n-kăl-tikutawen i-a-wen ɣas, ăqqănăn iɣăfawăn-năsăn har ăbas ĕssanăn a mad-ĕnnĕn. 25Osă-dd ămaway n-isălan, inn'-asăn: "Meddĕn wi jăm dăɣ-takărmut, han ehăn n-ămudd wa măqqărăn, saɣren dăɣ-s tamĕtte." 26Iggăd-dd kumănda ăddew d-ejhăn n-ĕssărdusa, ĕlwăyăn-dd inĕmmušal s-tilăqqad, ed ăksuḍăn ad-fălla-săn dd-tĕggĕd tamĕtte ĕntăneḍ-en-dăɣ, tăkf'-en sămmăjori n-tihun. 27Osăn-dd ɣas, ăššojăšăn-tăn ehăn wa dăɣ-ăqqiima ălžămaɣăt wa n-imănokalăn. Iḍkăl ămănokal n-kăl-tikutawen măjrăd, innă i-inĕmmušal: 28"Ajăn wădden ăru d-fălla-wăn năsmăhăḍ i-ad-ăbas ilkam ad-tăssiɣrăm ăwadĕm wăl' iyyăn s-isĕm-wa-dăɣ? Ǝnhĕywăt ɣas a-wa jăm ămăra, tĕḍkărăm-anăɣ Yărussălam iket-net teɣăre-năwăn, tărham daɣ ḍarăt-a-wen, ad-hanăɣ-sĕwĕrĕm iman n-ăhalĕs wa s-jannem." 29Ăwwežăb-asăn Bĕṭrus d-inĕmmušal: "Ufa amišĕl n-a-wa innă Măssinăɣ uhĕn asjĕd i-a-wa jănnen dăgg-adĕm. 30Măssi-s n-abbatăn-nănăɣ, ad-dd-issĕnkărăn Ɣisa wa s-jăm iman-net a-s t-tĕṣlăbăm făll-tajĕttewt, 31tĕzzar iḍkăl-t s-iman-net, ăsɣăym'-e daw-aɣil-net i-ad-imnukĕl, umas Ămaɣlas făll-hărăt iket-net. A-wen ij'-e Măssinăɣ i-ad-utabăn kăl-Iṣrayil, ĕjrĕwăn tenăšše n-ibăkkaḍăn-năsăn. 32A-wen, năjjĕyh'-as iket-net, ăjjĕyh'-as daɣ Unfas Šăddijăn-i ikfă ăddinăt wi tamašalnen erhet-net." 33Ăfḍănḍărrăy ălžămaɣăt dăɣ-ălhăm a-s islă i-a-wen-dăɣ, ad-tattărăn ĕmmĕk s-tăn-in-olămăn făll-ărori n-ăkall. 34Kittĕwăn a-wen-dăɣ a-s, dd-ibdăd jere-săn iyyăn dăɣ-săn la taggayt ta n-kăl-faris s-isĕm-net Gamălyăl, ălɣalim ăzizăbben alămăr wa n-ănnăbi Mosa a ămoos, tăssiimɣăr-t daɣ tamĕtte iket-net. Omăr s-ad-zĕzjărăn inĕmmušal i-hărăt n-ăssaɣăt tĕzzar, inn'-asăn: 35"Kăl-Iṣrayil, ăjăt ĕnniyăt i-a-wa s-tăbokăm ad-t-tĕjĕm i-meddĕn-wi-dăɣ; 36ĕktĕwăt-dd ɣas Tadi wa s-a ilan ăzzăman dd-osa, iji iman-net hărăt dat-ăddinăt, ăslăl ḍara-s a iwwăḍăn ĕkkoẓăt timaḍ n-ăwadĕm măšan, wăr-ăhoja a-s ătwăjjăn iman-net, ĕmmăhăšăn inalkimăn-net, ăbă-dd isălan-năsăn ḍarăt-a-wen. 37Ḍara-s daɣ, dăɣ-ăzzăman wa n-tăḍint n-ăddinăt, osă-dd Yăhudĕs wa n-Galila, ăslăl ĕnta-dăɣ tamĕtte tăjjeet ḍara-s măšan, ămmut ĕnta-dăɣ, ĕmmăhăšăn inalkimăn-net. 38Ămăra, ăyyăt-ahi ad-hawăn-ăjăɣ ăddăbara: ĕjmăḍăt isălan n-ăddinăt-wi-dăɣ, ăkfăt-tăn ălɣafyăt, tĕyyĕm-tăn ad-ĕglun făl-a-s tiyyăt-i-dăɣ, kunta a-wa tăn-išlăn, erhet n-ăgg-adĕm meɣ a dd-ifalăn dăgg-adĕm, adiš, ad-t-in-iba 39măšan, kunta Măssinăɣ ad-dd-ifal a-wa tăn-išlăn, adiš, wăr has-lem tărna. He kăwăneḍ! Wăr-itumaset a-s Măssinăɣ a dăr-tăt-jam." Ăsjăd ălžămaɣăt iket-net i-ăddăbara-wen-dăɣ hasăn-ija Gamălyăl. 40Ǝssăɣrăn-dd inĕmmušal, ăswăjjăn dăɣ-săn tiwit s-ibărtăkăn, ăsmăhăḍăn dăɣ-săn i-ad-ăbas ilkam ad-ămmijrădăn s-isĕm n-Ɣisa tĕzzar, ăswăyyăn-tăn-in. 41A-s fălăn inĕmmušal ehăn-en-dăɣ, ĕknan dăɣ-tedăwit făl tĕssĕba n-turhajăt ta tăn-ikfa Măssinăɣ n-ad-ĕnhĕyăn erk ĕmmĕk šund wa-dăɣ, dăɣ-idĕm n-Ɣisa. 42Tažămmaɣăn ḍarăt-a-wen hak ašăl dăɣ-ehăn n-ămudd wa măqqărăn, d-ihănan n-imumĕnăn wi iyyăḍnen. Wăr t-illa edăgg s-wădden xaṭṭăbăn dăɣ-s, saɣren dăɣ-s Ălĕnžil n-Ɣisa Ălmasex.

will be added

X\