Ijităn n-inĕmmušal 4

1Ămmiijrăd Bĕṭrus d-Exya hărwa i-tamĕtte a-s tăn-dd-osăn hărăt dăɣ-kăl-tikutawen, ăddewăn d-emănnăhăḍ n-ehăn n-ămudd wa măqqărăn d-kăl-sadus. 2Ăsɣăf-tăn asĕɣăr wa tăjjăn inĕmmušal i-tamĕtte ed, jannen i-ăddinăt a-s Ɣisa Ălmasex, inkăr-dd jer-inĕmmuttan, 3ărmăsăn-tăn, jăn-tăn dăɣ-takărmut har ăffăw ed a-s ităjj a-wen-dăɣ, ijjaš-dd ehăḍ. 4Omănăn ăddinăt ăjjootnen ĕslanen i-măjrăd wa jăn, a-wa ătubăn dăɣ-ašăl-wen-dăɣ, iwwăḍ sĕmmos afḍăn n-ăwadĕm. 5Ăffăw ɣas, ĕžžĕmmăɣăn-dd imizărăn n-kăl-Ălyăhud d-inušămăn d-ălɣulam n-Ăṭṭăwrăt wi hănen Yărussălam 6d-Hĕnnan wa n-ămănokal n-kăl-tikutawen d-Qayăf d-Exya d-Ălxaḍer d-kăl-ehăn n-ămănokal n-kăl-tikutawen iket-năsăn. 7Ǝssĕbdădăn-dd Exya d-Bĕṭrus jere-săn, ĕnnăn-asăn: "Kăwăneḍ, ma tămoos tărna d-isĕm wa s-tăjjăm a-wa tăjjăm?" 8Ăzzubbăt-dd Unfas Šăddijăn s-ăṣṣahăt făll-Bĕṭrus ăssaɣăt-wen-dăɣ, inn'-asăn: "Imizărăn n-kăl-Ălyăhud, kăwăneḍ-i n-inušămăn, 9asĕstan a hanăɣ-tajjăm ašăl-i-dăɣ, dăɣ-isălan n-a-wa ăhusken ătwăjjăn i-anăbdon d-ĕmmĕk wa s-iɣlăs. 10Nărha ad-tĕlmĕdăm iket-năwăn, kăwăneḍ hakd kăl-Iṣrayil wi iyyăḍnen a-s tărna n-isĕm n-Ɣisa Ălmasex wa n-Năṣirăt tĕṣlăbăm făll-tajĕttewt măšan, issĕnkăr t-dd Măssinăɣ jer-inĕmmuttan, tărna-net ĕnta-en-dăɣ a tăzozăyăt ăhalĕs wa hannăyăm ibdad data-wăn. 11Ɣisa, ĕnta a-s tăhunt ta hin-jărăm kăwăneḍ-i n-ălbănnatăn măšan, tămoos-dd tăhunt ta n-aɣmăr făll-insa ehăn iket-net. 12Wăr t-illa ĕlɣĕllas ar s-isĕm wa-net făl-a-s wăr t-illa isĕm ikfa Măssinăɣ daw-išĕnnawăn i-ĕlɣĕllas n-dăgg-adĕm săl wa-net." 13Islă ălžămaɣăt i-ĕṣṣuhu n-măjrăd wa hasăn-ija Bĕṭrus d-Exya ɣas, tof'-en tăkunt-năsăn, ed jan-tăn ăddinăt ĕžhalnen wăren ĕɣra măšan, ĕlmădăn a-s Bĕṭrus d-Exya, ămoosăn inalkimăn n-Ɣisa. 14Ḍarăt-a-wen daɣ, anăbdon-wa izzăyăn, ĕnta-da-dăɣ ibdădăn edes-hasăn, ăbas ĕssanăn a mad-ĕnnĕn. 15Ǝzzĕzjărăn Bĕṭrus d-Exya ehăn wa dăɣ-ɣattăsăn ăššăreɣa iket-di d-tamănhayăn ĕntăneḍ. 16Dăɣ-taɣimit-năsăn, ĕnnăn: "Wi ăddinăt, ma hasăn-e-năj? Iji n-Măssinăɣ wa ijăn, wăr t-iha ăššăk ed ĕssanăn săr-s kăl-Yărussălam iket-dăɣ-năsăn, wăr năddoobăt akuddĕl-net. 17Ămăra, i-ad-wăr sĕmĕlsin isălan-wi-dăɣ făll-tamĕtte, nĕsĕmmăhăḍet fălla-săn i-ad-ăbas ilkam ad-jan isălan n-isĕm n-Ɣisa i-ăwadĕm wăl' iyyăn, olasăn ɣas, ămminănhayăn d-iman-năsăn." 18Ǝssăɣrăn-dd Bĕṭrus d-Exya ḍarăt-a-wen, ăsmăqqăn fălla-săn i-ad-ăbas ilkam ad-ăɣran wăla ăssiɣrăn isĕm n-Ɣisa i-ăwadĕm wăl' iyyăn. 19Ăwwežăbăn-asăn, inn'-asăn Bĕṭrus d-Exya: "Ǝssĕnăt kăwăneḍ iman-năwăn kunta ma ufăn asjĕd-hawăn kăwăneḍ, meɣ asjĕd i-Măssinăɣ? 20Dăɣ-a-wa hanăɣ-dd-iqqălăn năkkăneḍ, wăr năddobăt asusĕm făll-isălan nĕnhay, nĕsl'-asăn." 21Olăs ălžămaɣăt asĕmmăhĕḍ dăɣ-săn tĕzzar, oyyăn-tăn-in ed wăr t-illa uḍlem fălla-săn ĕjrawăn. Tăqqăl-dd tamĕtte iket-net, tiimĕl Măssinăɣ făl tĕssĕba n-a-wa ija. 22Anăbdon-wa izzăyăn, ăhalĕs ilan a okăyăn ĕkkoẓăt timĕrwen n-awătay. 23Ătwăyyăn-in inĕmmušal ɣas, ĕkkăn imidiwăn-năsăn, ĕjăn dăɣ-săn isălan n-a-wa ĕnnăn imănokalăn n-kăl-tikutawen d-inušămăn. 24Ǝslăn i-isălan-en-dăɣ ɣas, ĕṭṭăfăn iyyăn n-emm, ad-tĕddalăn Măssinăɣ s-afălla, jannen: "Emăli, kăyy a dd-ixlăkăn išĕnnawăn d-ăkall d-ejărew wa sĕmmăn d-a-wa tăn-ihăn iket-net, 25kăyy a innăn s-tărna n-Unfas Šăddijăn s-emm n-abba-nănăɣ Dawĕd-i n-akli-năk: 'Ma dăɣ-ĕdgaẓnăt tiwsaten? Ma ijan ăddinăt dăɣ-a wăren infa hărăt?' 26Ma ăsihălăn imănokalăn ĕššĕnju-năk, tihĕrĕn d-imănnăhăḍăn emm făll-Emăli d-Ălmasex-net. 27Itbat a-s ijăḍ Bunĕs Bilatĕs d-Harudĕs akli-năk Ɣisa Wa n-Emĕššeddĕj tăsnăfrănăd i-ad-umas Ălmasex. Ohărăn fălla-s emm ĕntăneḍ d-tiwsaten ti n-inĕẓẓulam d-kăl-Iṣrayil dăɣ-Yărussălam. 28A-wen jăn-t i-ad-itbat erhet-năk d-a-wa s-ăru t-dd-tăɣtăsăd. 29Ămăra Emăli, agĕẓ-anăɣ dăɣ-ăššar-năsăn, tĕkfĕd eklan-năk ĕnniyăt ozjan s-ăxṭăbăn măjrăd-năk. 30Ilal-anăɣ s-tărna n-ăfuss-năk i-ad-nĕzizuy ăddinăt, năj tikunen d-tišušab s-isĕm n-akli-năk Ɣisa Wa Šăddijăn." 31Diha-dăɣ d-ĕssĕmdăn tamădilt n-Măssinăɣ, ad-ăškăḍkăḍ edăgg-wĕnnin-dăɣ dăɣ-ăžžiimmăɣăn, iḍnay-tăn Unfas Šăddijăn iket-năsăn, ad-xaṭṭăbăn măjrăd n-Măssinăɣ s-ĕnniyăt ozjan. 32Iṭṭaf ălžămaɣăt wa n-imumĕnăn iyyăn n-ulh d-iyyăn n-ĕnniyăt, wăr tăn-iha făw ere ijannen a-wa i-nin wăla a-wa i-nin, ănn-ak tihĕrĕn a-wa lăn iket-net jer-iman-năsăn. 33Tajăyhen inĕmmušal s-tărna tăṣṣohet, xaṭṭăbăn i-ăddinăt tanăkra-ta dd-ija Emăli Ɣisa jer-inĕmmuttan, ăssinsa daɣ Măssinăɣ ănnuɣmăt-net s-ăṣṣahăt fălla-săn iket-năsăn. 34Wăr tăn-iha făw ere ămiɣatărăn s-hărăt, žănš'-en-in dăɣ-săn wi lănen išĕkraš d-ihănan, 35tiwĕyĕn-dd ălqim n-a-wa tăn-in-ĕžžĕnšăn, sans'-en-t dat-inĕmmušal i-ad-t-uẓanăn jer-imumĕnăn. Hak ăwadĕm, ijraw s-a-wa dăr-ogdăhnăt timɣutar-net. 36Osă-dd Yusĕf wa n-ahăya n-Lewi, il' ăkall wa n-Qĕbrus, ɣarrăn-t inĕmmušal s-isĕm Bărnăbbas, a-wen ălmăɣna-net: enĕssesmăḍ n-talɣiwen. Ižžĕnša-hin ašĕkrĕš-net, 37iwwăy-dd a-wa t-in-ižžĕnša, ikf'-e inĕmmušal.

will be added

X\