1 Ašăl iyyăn, ikka Bĕṭrus ehăn n-ămudd wa măqqărăn, ăddeew d-Exya i-ămudd wa n-tezzar. 2 Ălwăqq-wen-dăɣ daɣ, ad-dd-ămewăy s-emm n-ehăn n-ămudd wa s-itawănna: "Tihusay", ăhalĕs s-a-s dd-iwa-dăɣ ibdan. Hak ašăl dihen-dăɣ a t-sănsen ăddinăt-net i-ad-itattăr takute dăɣ-ăddinăt wi dd-tajjăšnen ehăn n-ămudd. 3 Inhăy Bĕṭrus d-Exya ăbokăn ujĕš n-ehăn n-ămudd ɣas, iẓẓăl-asăn ăfuss. 4 Ikn'-e Bĕṭrus d-Exya azĕjjĕzz tĕzzar, inn'-as Bĕṭrus: "Ǝkĕn dăɣ-năɣ akăyad." 5 Iknă dăɣ-săn ăhalĕs akăyad, ijar ăṭṭăma n-ad-t-ĕkfĕn hărăt 6 măšan, inn'-as Bĕṭrus: "Wăr leɣ orăɣ wăl' aẓrĕf măšan, a-wa leɣ, hakkăɣ-ak-t s-isĕm n-Ɣisa Ălmasex wa n-Năṣirăt: ĕbdĕd, ărjĕš." 7 Ăshătăl-as-dd Bĕṭrus s-ăfuss-net wa n-aɣil, issĕbdăd-t. Iqqăl-dd ăṣṣahăt iḍarăn-net d-timẓĕẓẓĕden-net ăssaɣăt-wen-dăɣ; 8 ijă-dd tiyyăt teggedt, irjăš, ănmăjjaš dăr-săn ehăn n-ămudd, itaggăd a-wa-dăɣ has-tĕja tedăwit, itiimĕl Măssinăɣ. 9 Ǝnhăyăn-t ăddinăt iket-năsăn irjaš, itiimĕl Măssinăɣ, 10 ĕzzăyăn-t ɣas, ad-jannen: "Ak, wa wădden emădăl wa s-hărkuk ăqqiima dat-emm wa ăhusken n-ehăn n-ămudd wa măqqărăn." Ǝnhăyăn a-wa dăɣ-s ijăn ɣas, ăqqănăn iɣăfawăn-năsăn, tof'-en tăkunt n-a-wa ijăn. 11 Iltăɣ ăhalĕs-ĕnnin Bĕṭrus d-Exya, unjăy făw dăr-săn ibḍa. Tošăl-dd tamĕtte iket-net s-edăgg wa dăɣ-ĕbdădăn s-itawănna tisuḍaf n-ehăn wa n-Sulăyman, ăɣlăyɣălăyăn-tăn-dd ăddinăt tufa tăkunt n-a-wa ijăn. 12 Inhăy Bĕṭrus awnaf wa hasăn-ămoosăn ɣas, inn'-asăn: "Kăl-Iṣrayil, ma s-dăɣ-năɣ tĕkyadăm s-ĕmmĕk-wa-dăɣ šund a-s năkkăneḍ d-iman-nănăɣ, meɣ s-iqqud-nănăɣ dat-Măssinăɣ a-s năzozăy ăhalĕs-i-dăɣ? 13 Măssinăɣ wa n-Ibrahim d-Isxaqq d-Yaqub, ĕnta-i n-Măssi-s n-abbatăn-nănăɣ, ĕnta a iḍkălăn s-ălxurmăt-net, akli-net Ɣisa-wa tăstărmăsăm tĕzzar, tăkkuddălăm-t dat-Bilatĕs-i a-s ităjj a-wen-dăɣ, ăbook ad-t-in-isĕwwĕyy măšan, 14 kăwăneḍ tăkkuddălăm Emĕššeddĕj d-Ămaɣdal, tĕttărăm dăɣ-ămănokal ad-hawăn-dd-isĕwwĕyy emăjj n-iman, 15 jăm iman n-ămănokal wa ihakkăn tămudre măšan, issĕnkăr-t-dd Măssinăɣ jer-inĕmmuttan, năkkăneḍ a-s tijuhawen-net. 16 Ǝlmĕdăt a-s s-tărna n-isĕm n-Ɣisa d-tĕssĕba n-immun wa săr-s nĕja, a făl hannăyăm ăhalĕs-wa-dăɣ tĕzzayăm, har t-dd-iqqăl ăṣṣahăt-net data-wăn; immun s-isĕm n-Ɣisa a ăzozăyăn ăhalĕs-i-dăɣ hannăyăm ibdăd data-wăn. 17 Ămăra ayĕtma-ɣ, ĕssanăɣ a-s a-wa tĕjăm kăwăneḍ d-imizărăn-năwăn, ălžăhalăt a dăɣ-t tĕjăm, 18 a-wa ijăn, a otas Măssinăɣ i-ad-isĕtbĕt a-wa s-ăru d-ălolăyăn ănnăbităn dăɣ-isălan-net, a-s ĕnnăn a-s Ălmasex, ad-inhĕy aɣăna tĕzzar imnukĕl. 19 A-wa ĕnnăn, ijă, a-wen-dăɣ a făl ămăra, mujrĕẓăt ibăkkaḍăn-năwăn, tutabăm i-ad-hin-amĕs Măssinăɣ ibăkkaḍăn-năwăn, 20 izĕzzubbĕt-dd fălla-wăn išilan n-ălxer, i-ad-hawăn-dd isuɣĕl Ɣisa-i n-Ălmasex ăsnăfrăn-i s-ămăra-dăɣ, 21 ih' išĕnnawăn har ašăl wa d-mad-isĕynĕy Măssinăɣ hărăt iket-net, s-ĕmmĕk wa s-ăru tăn-innă s-imawăn n-ănnăbităn-net wi n-imĕššeddĕjăn. 22 Dăɣ-isălan n-a-wen-dăɣ, ad-inn' ănnăbi Mosa: 'Ad-hawăn-dd-isĕssiwĕy Emăli Măssinăɣ ănnăbi dăr-toharăm temiḍt, dăr-i olăhăn, săjdăt i-a-wa hawăn-e-ănn iket-net. 23 Ere unjăyăn s-asjĕd-has, ad-ăbas ăḍḍiin dăɣ-tamĕtte n-Măssinăɣ, ămmătet.' 24 Ămăra, ănnăbităn iket-năsăn, ɣur-Sumăyla har wi t-dd-ĕšrăynen, ălolăyăn iket-dăɣ-năsăn dăɣ-isălan wi s-hanăɣ-sallăm nĕttajj'-awăn-tăn ašăl-i-dăɣ. 25 Kăwăneḍ a-s imĕkkusa n-ănnăbităn-win-dăɣ ed tăkosăm ărkăwăl wa ohăr Măssinăɣ d-abbatăn-nănăɣ ašăl wa d-innă i-Ibrahim: 'S-isĕm n-ĕzzurĕyăt-năk a-s mad-ijjĕš ălbăraka tiwsaten n-ăkall iket-năsnăt.' 26 Tĕssĕba-năwăn kăwăneḍ, s-tizarăt, a făl dd-issĕnkăr Măssinăɣ akli-net, Ɣisa Ălmasex, ăšmašăl-t-dd săr-wăn i-ad-dăɣ-wăn ăj ălbăraka, tĕbḍĕwăm d-erk imojjan-năwăn."
