Ijităn n-inĕmmušal 28

1Năɣlăs-dd dăɣ-a-wen-dăɣ iket-dăɣ-nănăɣ, nĕzjăr-dd aman ɣas, nĕslă a-s awtĕl wa dăɣ-năsjăn, isĕm-net Malta. 2Ăsmăjaren-anăɣ kăl-awtĕl-en, ĕssărɣăn-anăɣ efew, nĕzzăh săr-s iket-nănăɣ ed, iwat ajĕnna, ija esămeḍ. 3Ikkĕmăt-dd Bulĕs isuksukăn s-ăshăjăljăl efew măšan, tăkwăttăt-t taššălt dd-tĕstaɣ tukĕse n-efew, tărmăm dăɣ-ăfuss-net. 4Ǝnhăyăn kăl-awtĕl a-wen ɣas, ad-tinmĕnnin: "Ăhalĕs-i-dăɣ, wăr t-ih' ăššăk a-s emăjj n-iman, ĕnta da-dăɣ s-iket dd-iɣlăs dăɣ-aman măšan, ilkăm-as-dd ĕlɣĕdăr n-a-wa iɣšăd i-Măssinăɣ." 5Irsăy-in Bulĕs taššălt ḍarăt-a-wen făll-iman-net, ănnunnăẓăt-tăt dăɣ-efew, wăr t-illa a has-tăɣšad. 6Ija a-wen ɣas, ăsbălalăɣăn kăl-awtĕl dăɣ-Bulĕs, ija ɣur-săn a-s a ĕnḍărrăn ɣas a has-in-ăqqimăn ihḍĕḍi, meɣ ămmut ălwăqq-wen-dăɣ. Ăhojăn wăr t-illa a ijan dăɣ torda-năsăn ɣas, ĕqqălăn s-a-wa ĕnnăn, ad-jannen ămăra: "A-wa, hărăt dăɣ-imălan wi n-išĕnnawăn." 7Edăgg-en, ohaẓăn-t išĕkraš n-ămănokal n-awtĕl s-isĕm-net Bublĕs. Isl'-anăɣ ɣas, ăsmăjarăt-anăɣ s-ehăn-net, năssakăy ɣur-s kăraḍ išilan. 8Nĕll'-e dihen-dăɣ a-s tărmăs tenăde tăddewăt d-tanănăɣat abba n-ămănokal. Os'-e Bulĕs, ăswăr-t ifassăn-net, ittăr-as dăɣ-Măssinăɣ, izzăy. 9Ăwwăyăn-dd kăl-ăkall ḍarăt-a-wen imarhinăn-năsăn, ăzozăy-tăn Bulĕs ĕntăneḍ-dăɣ. 10Ǝssĕmɣărăn-anăɣ kăl-awtĕl en-dăɣ făl tĕssĕba n-a-wen-dăɣ. Năssawăḍ tekle ɣas, jăn-anăɣ ăzzad igdăhăn i-a-wa hanăɣ-in-ăqqimăn dăɣ-asikĕl. 11Šămad fălla-năɣ okayăn kăraḍ orăn n-asikĕl, ad-nĕjrăw turăft n-aman tăṣṣiwwărăt idmawăn d-ismawăn n-imălan n-eknewăn wi s-itawănna: Kăstur d-Bolăkĕs dd-falăt Iskăndĕrya, nĕjjăš-tăt, tăssakăy dăr-năɣ tajrĕst dăɣ-awtĕl-wen-dăɣ. 12Nĕfăl dihen, năsjăn kăraḍ išilan dăɣ-Sirakuz, 13tĕzzar năllil asălim n-aman har Rajyo. Ašăl wa ilkămăn i-wen, inkăr-dd fălla-năɣ aḍu dd-ifalăn ajus, izzĕwăt-anăɣ emănăn har năsjăn dăɣ-Băzula. 14Nĕjrăw dihen hărăt dăɣ-ayĕtma-năɣ dăɣ-ăddin, ăsmăjaren-anăɣ; năssakăy ɣur-săn ĕssĕboɣ imdan. Ɣur-săn en-dăɣ, ad-nărmăs tamdujt ta n-Roma. 15Ǝslăn-anăɣ hărăt dăɣ-ălmăssexităn n-Roma ɣas, ĕlkăḍăn-anăɣ-dd s-ăssuk n-aɣrĕm wa n-Abyud, ĕssĕlkăḍăn-anăɣ-dd daɣ iyyăḍ s-ăssuk wa n-aɣrĕm wa n-kăraḍăt tihĕnzubba. Inhăy-tăn Bulĕs ɣas, irăš i-Măssinăɣ, ikf'-e a-wen-dăɣ ăṭṭăma d-ăṣṣahăt ăynayăn. 16Năwwăḍ-in Roma ɣas, irḍa ĕlxĕkum i-Bulĕs s-ad-ifăr ehăn n-iman-net, izzăɣ dăɣ-s ĕnta d-ĕssărdasi wa has-ijăn ĕnniyăt. 17Kăraḍ išilan ḍarăt-a-wen, issăɣră-dd Bulĕs inušămăn n-kăl-Ălyăhud wi ĕzzăɣnen Roma. Ǝžžĕmmăɣăn-dd săr-s ɣas, inn'-asăn: "Ayĕtma-ɣ, wăr t-illa a ăɣšadăɣ s-ănimăšrăyăɣ i-tumast-nănăɣ, wăla i-ălɣadatăn-nănăɣ. Aɣrĕm wa n-Yărussălam a dăɣ-dd-ĕttărmăsăɣ, ĕjjăšăɣ dăɣ-s takărmut, ătwăjjăɣ jer-ifassăn n-kăl-Roma, 18ĕttărăn ĕntăneḍ almud n-a-wa ăɣšădăɣ ḍarăt a-s hi-ăsimăjrădăn măšan, wăr t-illa ăḍḍărora făll-i ĕjrawăn hi-ăsinăhăjjăn d-tamăttant, ĕttărăn făw ad-hin-sĕwwĕyyĕn măšan, 19ĕnkărăn-dd kăl-Ălyăhud dihen făll-i, unjăyăn ărḍăn a-wa hi-ăɣtăsăn kăl-Roma. Ǝnhăyăɣ a-s wăr t-illa a ărhan săl tamăttant-in ɣas, tămoos-ahi teɣăre n-Qăyṣăr wa n-ămănokal măqqărăn ihăn Roma tăhaššilt. Măšan, hakd a-wen-dăɣ, wăr-iha ĕnniyăt-in n-ad-săwrăɣ tumast-in uḍlem wăl' iyyăn. 20A-wa-dăɣ a făl ăsdărhănăɣ ahănay-năwăn, sĕfhĕmăɣ-kăwăn a-s tišĕm-ti-heɣ, wăr tănăt-dd-orew săr-i a săl ăṭṭăma wa ohărăɣ d-kăl-Iṣrayil iket-năsăn." 21Inn'-as ălžămaɣăt wa săr-s dd-ăddewăn: "Dăɣ-a-wa hanăɣ-dd-iqqălăn năkkăneḍ, wăr t-tĕlla tăkarḍe hanăɣ-dd-tosat dd-falăt Ălyăhudĕyăt hanăɣ-tĕjat isălan-năk, wăr t-illa daɣ ere nĕnhay dăɣ-ayĕtma-năɣ dd-ifalăn dihen hanăɣ-kăy-omalăn wăla i hanăɣ-kăy-oẓamăn. 22Ămăra, năssof, ad-hak-nĕsĕll năkkăneḍ iman-nănăɣ ed taggayt ta hed tĕglăt făll-tidĕt n-iman-net, nĕssan a-s wăr t-illa edăgg s-wădden ăššunjen-tăt dăɣ-s ăddinăt." 23Ohărăn dăr-s ḍarăt-a-wen ašăl dăɣ-t-dd-mad-ăqqĕlăn ăddewăn d-ăddinăt ojărnen wi dd-osănen ăsihe-wa. Osăn-dd ašăl-en, immĕjrăd-asăn wa-dăɣ n-tifawt har toḍa tăfukt, itafăssar-asăn tijĕttewen n-a-wa isaɣra, ixaṭṭăb-asăn isălan n-Tĕmmĕnĕya n-Măssinăɣ d-a-wa innă alămăr wa n-Mosa d-ănnăbităn wi iyyăḍnen, isafham-tăn daɣ a-wa ĕnnăn făll-Ɣisa Ălmasex. 24Issĕtbăt ašrut iyyăn dăɣ-săn tĕnna-net, ăsɣăr-as ašrut wa iyyăḍăn ulh-net, unjăyăn omănăn s-măjrăd n-Măssinăɣ. 25A-s t-fălăn ăddinăt, ăẓunăn dăɣ-a-wa ordăn făll-Ɣisa Ălmasex. Inhăy Bulĕs tăẓune ta jăn ɣas, inn'-asăn: "Ijmaḍ-t ăššăk a-s tidĕt a-wa innă Unfas Šăddijăn i-imărawăn-nănăɣ s-emm n-ănnăbi Saya a-s t-ăšmašăl Măssinăɣ. Ăzzăman-en, inn'-as: 26'Ǝglĕw, ăkk ăddinăt-i-dăɣ, tĕnnĕd-asăn: ad-sallăm s-timĕẓẓujen-năwăn măšan, wăr t-illa a mad-tĕfhĕmăm, ad-tĕswaḍăm s-tiṭṭawen-năwăn măšan, wăr t-illa a mad-tĕnhĕyăm 27făl-a-s tamĕtte-i, tăsɣăr-ahi ulh-net, tăɣfăl-ahi timĕẓẓujen-net, tăhăr-ahi tiṭṭawen-net i-ad-wăr hĕnnĕy, wăr sĕll, i-ad-wăr t-illa a isalmaḍăn ulh-net, i-ad-săr-i dd-tĕnnăḍ, zuzĕɣăɣ-tăt.' " 28Inn'-asăn Bulĕs ḍarăt-a-wen: "Ǝlmĕdăt, ɣur-ašăl-i-dăɣ a-s, ĕlɣĕllas wa kăwăn-ikfa Măssinăɣ, ikf'-e daɣ i-inĕẓẓulam -i has-e-sĕjĕdnen." (( 29Issĕmda Bulĕs tĕnna n-a-wen ɣas, fălăn-t kăl-Ălyăhud ămiiɣănnăn jer-iman-năsăn.)) 30Izzăɣ Bulĕs dăɣ-ehăn-wen-dăɣ ifăr har dăɣ-s ăssakăy ĕssin iwĕtyan ĕmdanen. Ijraw iman-net, ehăn-en-dăɣ, a dăɣ-t-dd-tisĕn ăddinăt iket-năsăn wi ărhănen ahănay-net, 31ixaṭṭăb-asăn isălan n-Tĕmmĕnĕya n-Măssinăɣ, isaɣr'-en, wăr t-illa daɣ ere has-igdalăn tĕnna n-a-wa s-irha, ad-tăn-ănn făll-Emăli Ɣisa Ălmasex.

will be added

X\