Ijităn n-inĕmmušal 27

1Tăwwăḍ-dd tăqqăn ta n-tikawt n-ăkall wa n-Iṭali ɣas, jăn kăl-ĕlxĕkum Bulĕs d-kăl-takărmut wi iyyăḍnen dăɣ-ifassăn n-kăbtăn s-isĕm-net Yulyus, ĕnta a ănnihăḍăn făll-ejhăn n-ĕlɣĕskăr wa s-isĕm-net: "Wa tăn-ojărăn". 2Nĕjjăš turăft n-aman jat isĕm Adăramit, nĕkkă ăkall wa n-Azya, năddeew dăɣ-asikĕl-nănăɣ d-Aristarăq wa n-Tăslonika. 3Ašăl wa ilkămăn i-wen, năsjăn dăɣ-teje ta n-Sidon. Ămoos kăbtăn Yulyus ăwadĕm s-ikna Bulĕs ĕjjăruẓăt, iglă făw har t-ikfă turhajăt n-ad-ăkk imuzăyăn-net wi hănen aɣrĕm-en i-ad-has-arĕjăn dăɣ-asikĕl. 4Nĕfăl dihen, năllil asălim n-aman, nămsadăɣ i-awtĕl wa n-Qĕbrus i-ad-nĕmjušĕt d-aḍu d-tinăzzămăren-ti dd-bahhălnen i-turăft. 5Nĕjlăy ḍarăt-a-wen ejărew wa sĕmmăn ošălăn dăɣ-ăkall wa n-Silisi d-Banfĕli, năsjăn dăɣ-taɣrĕmt ta n-Mira tĕhăt ăkall wa n-Lisya. 6Ijrăw kăbtăn-nănăɣ dihen turăft n-aman tĕkkat Iṭali, ij'-anăɣ dăɣ-s. 7Nĕjă išilan năsilalăm sollan făll-aman har šărnaš d-nănmawăḍ d-aɣrĕm wa n-Kănida, igdăl-anăɣ ĕṣṣuhu n-aḍu ad-nakĕy ɣas, nărmăs tamdujt ta n-ajus n-ăkall wa n-Kritus, nĕkka dawa-s har nămsadăɣ d-Sălmuni. 8Šărnaš d-năllil asălim n-ejărew har dd-năwwăḍ edăgg ijan isĕm: tasjĕnt ta n-tihusay, a-wen edăgg, ănimahăẓăn d-taɣrĕmt ta n-Lazaya. 9Nĕja išilan s-ĕmmĕk-en-dăɣ a-s fălla-năɣ ănmăntaš ejărew, nĕjjăš miši, okăy fălla-năɣ daɣ ăẓum wa n-tajrĕst. 10Dihen-dăɣ, ad-ăsmătăr Bulĕs imĕssukal wi iyyăḍnen hănen turăft n-aman, inn'-asăn: "Meddĕn, hannăyaɣ a-s asikĕl-nănăɣ wăr-mad-ăj wăla šăɣšad d-miši; năkkăneḍ hakd a-wa ihăn turăft, nĕha miši d-šăɣšad-wen-dăɣ." 11Măšan ojăr taflĕst ija kăbtăn a-wa has-innă u-taɣăya-net a-wa innă Bulĕs. 12Ǝnhăyăn a-s edăgg-wa-dăɣ ăsjănăn wădden edăgg dăɣ-isasakay ăwadĕm tajrĕst ɣas, ăssoɣălăn tisdas n-turăft, ărmăsăn tamdujt n-aɣrĕm wa n-Fĕnikus daw-awtĕl wa n-Kritus i-ad-dăɣ-s sĕssikĕyăn tajrĕst. 13Ǝllan-t dihen-dăɣ a-s dd-isrăj aḍu dd-ifalăn ajus, orăn-dd turăft, ărkăbăn dăɣ-a-s ăllilăn tasăja n-ejărew ed, ăɣelăn ăɣlăsăn dăɣ-ăššar-net. 14A ĕnḍărrăn ḍarăt-a-wen-dăɣ, toḍă-dd fălla-săn tăšikwalt tăṣṣoohet s-itawănna dăɣ-Tălyunanit: Erakilun. 15Izzĕwăt ăṣṣahăt-net turăft, iglă dăr-s emănăn, ăbas t-illa ere dăɣ-s ănnihăḍăn. 16Ija a-wen-dăɣ har nokăy afălla n-awtĕl wa n-Kluda, ij'-anăɣ aɣrĕm-en eff ɣas, nĕttăr ăddăbara s-nănmawăḍ d-isăɣlas wi hănen turăft. 17Ǝjrăwăn meddĕn aḍkul n-asăɣlĕs wa n-ĕnḍărrăn ihăn turăft, ăstărăkken-t dăɣ-aman, ĕkrăsăn-t dăɣ-turăft s-iɣunan, nĕḍkăl tisdas i-ad-tănăt-isĕkĕf aḍu i-ad-ăbas hanăɣ-ăzziwăt aḍu. Năšinanăj s-ĕmmĕk-wen-dăɣ har nănmawăḍ d-Libya, noyya iman-nănăɣ s-ašrut wa dăɣ-wăr šĕjrĕtăn aman. 18Okăy fălla-năɣ ašăl imdan năbbillăn d-aḍu s-ĕmmĕk-wen-dăɣ, har hanăɣ-ilzăm ašăl wa iyyăḍăn, ad-hin-nĕjăr ilalăn wi hănen turăft i-ad-tifsas. 19Ašăl wa s-kăraḍ, jărăn-in inaxdimăn a-wa ăẓẓayăn ihăn turăft iket-net. 20Nĕjă ăzzăman wăr nĕnhey tăfukt wăla etran, a ija a-wen-dăɣ, itiwwaḍ-dd fălla-năɣ ăṣṣahăt n-aḍu har ăbas hanăɣ-iha ere ijarăn ăṭṭăma n-tămudre. 21Išilan-win-dăɣ, năssakăy-tăn wăr t-illa a nĕkša, dăɣ-a-wen-dăɣ ad-dd-ibdăd Bulĕs, innă i-ăddinăt: "Imidiwăn-in, ĕnnăr hi-tăsijădăm ihĕnnin a-s hawăn-ĕmmĕjrădăɣ dăɣ-awtĕl wa n-Kritus, wăr nĕtĕjjĕš miši d-šăɣšad ogdăhăn d-a-wa-dăɣ. 22Ărheeɣ fălla-wăn ămăra, ad-hi-sĕjdĕm: sănsăt ĕnniyăt-năwăn, ĕḍmanăɣ-awăn a-s wăr t-illa i dăɣ-năɣ mad-iba măšan, turăft ĕnta, ĕkkĕsăt ăṭṭăma-net. 23Ănfalăl-ahi-dd ănjălos n-Măssinăɣ ĕnḍăhaḍ, 24inn'-ahi: Bulĕs, wăr tărmeɣăd ed, wăr t-illa ad-wăr tĕbdedăd dat-Qăyṣăr wa n-ămănokal măqqărăn. Ad kăy-iɣlĕs Măssinăɣ kăyy d-imĕssukal wi dăr-tăddewăd. 25Ɣas, imidiwăn-in, kuyĕdăt, wăr tĕkkesăm ăṭṭăma, ĕflasăɣ a-s Măssinăɣ a-wa hi-innă, ad-ăj, 26ilkam dăɣ-năɣ ad-nĕsĕjĕn făll-awtĕl iyyăn." 27Nĕja ehăḍ-nănăɣ wa s-măraw d-ĕkkoẓ măšan, ăzziwăt-anăɣ aḍu hărwa făll-ejărew wa sĕmmăn s-itawănna Adĕrya, a-wen, dăɣ-ejărew wa sĕmmăn măqqărăn n-Miditerani. Ebre n-ammas n-ehăḍ, ofrăyăn kăl-taɣăya n-turăft a-s ohaẓăn edăgg dăɣ-wăr ĕknen aman ĕjut. 28Jărăn aɣan dăɣ-aman i-ad-săr-s ĕkĕtĕn tĕššĕjrĕt n-aman, osăn aman jan tĕššĕjrĕt n-kăraḍăt timĕrwen n-metăr d-ĕssa. Ǝglăn har dihen, olăsăn daɣ ejer n-aɣan-ĕnnin dăɣ-aman, imăl-asăn ider n-aman ămăra, dăɣ-sănatăt timĕrwen n-metăr d-ĕttam. 29Ăksuḍăn kăl-taɣăya ad-tiḍĕw turăft-năsăn, tĕnkĕf i-tihun, ɣas, jărăn ĕkkoẓăt tiẓolyawen dăɣ-aman i-ad-ĕhĕlnăt turăft, ĕqqălăn ḍarăt-a-wen i-tebădde n-ašăl. 30Dăɣ-a-wen-dăɣ, ad-tattărăn kăl-taɣăya ĕmmĕk s-ĕjmăḍăn, ăsrăsăn dăɣ-aman asăɣlĕs ĕnḍărrăn, jăn ăsaru n-a-s ărhan ad-hin-šĕššĕnkĕšăn tiẓolyawen ti jăn dăɣ-aman i-ad-ĕknĕnăt antum, ĕṭṭĕfnăt turăft. 31Ilmăd Bulĕs făll-amsud-năsăn ɣas, innă i-kăbtăn d-ĕssărdusa: "Ănn i-meddĕn-năk, afăl wăr-ăqqimăn meddĕn-wi-dăɣ dăɣ-turăft, adiš, ĕkkĕsnet ăṭṭăma n-tămudre." 32Ăɣtăsăn ĕssărdusa ḍarăt-a-wen iɣunan n-asăɣlĕs wa ĕnḍărrăn, oyyăn-t iglă, ăwwăyăn-t aman. 33A ĕnḍărrăn dat-ăbaqqu n-tifawt, ăsmătăr Bulĕs imidiwăn-net i-ad-ĕkšĕn hărăt făl-a-s lan a iwwăḍăn măraw išilan d-ĕkkoẓ wăr t-illa a ikkan imawăn-năsăn. 34Inn'-asăn Bulĕs: "Ǝnfĕwăt iman-năwăn s-hărăt iyyăn, ĕflĕsăt a-s wăr t-illa dăɣ-wăn-i s-mad-hin-iba wăla-dăɣ emẓăd iyyăn ɣas dăɣ-eɣăf-net." 35Inn'-asăn Bulĕs a-wen-dăɣ ɣas, iḍkăl-dd tijĕlwen, ămmoy i-Măssinăɣ dat-ăddinăt wi hanen turăft, ăẓun-tănăt ḍarăt-a-wen, ad-itatt. 36Tokăy-tăn tarĕmmeɣt, ad-tattăn ĕntăneḍ-dăɣ. 37Dăɣ-turăft-en-dăɣ, năwwăḍ sănatăt timaḍ n-ăhalĕs d-ĕssayăt timĕrwen d-săḍis. 38Ălwăqq wa d-ĕyyĕwănăn ăddinăt, ĕssănɣălăn-in ălkăma dăɣ-ejărew i-ad-sĕfsĕsăn turăft. 39Ja tifawt, ĕšlămăn dăɣ-ijĕj taɣmărt dăɣ-ijjĕt ăkall măšan wăr-ĕssenăn ma ămoos ăkall-wen-dăɣ. Ǝnnăn ad-săr-s ĕnnăḍăn turăft, sĕjnĕn-tăt dihen-dăɣ kunta ămmukkăn a-wen. 40Ǝkkăsăn isăssărăn wi iṭṭăfnen turăft, oyyăn-tăn-in s-aman, orăn iɣunan wi n-taɣăya sasaɣadnen turăft, jăn tisdas i-aḍu s-data n-turăft i-ad-tăn-in-imhĕl aḍu s-edăgg wa ăqqurăn ĕšlămăn. 41Diha-dăɣ d-ĕkkăn s-data a ĕnḍărrăn ad-oḍăn făll-hărăt n-tejeft, tĕntăm-asăn turăft dăɣ-ăkall. Ittĕytăy ăkumkum-net dăɣ-ăkall hundăɣ har ăbas timtĕkwĕy, irẓă-dd daɣ ajilal-net făll-ăṣṣahăt wa ija anmĕntaš n-ejărew wa sĕmmăn. 42Ǝnhăyăn ĕssărdusa a-wen ɣas, ănmănnakăn i-ad-ĕjĕn iman n-kăl-takărmut i-udaɣ ad-ijmăḍ wăl' iyyăn dăɣ-eššaf, 43măšan unjăy-asăn kăbtăn s-a-wen făl tărha-i ija i-Bulĕs. Dihen-dăɣ ad-innă kăbtăn i-ăddinăt wi ĕssănnen eššaf, ad-ĕyyĕn iman-năsăn s-tizarăt s-aman, ĕšyĕfăn s-asălim. 44Innă i-wi iyyăḍnen, ad-ĕjĕn ăddăbara făl năyăn iferĕsăn n-tisĕjwen n-turăft wi dd-irẓa aḍu. Ǝmmĕk-wen-dăɣ a-s hin-ĕwwăḍăn iket-dăɣ-năsăn asălim n-aman, ĕddarăn-ăɣlasăn.

will be added

X\