Ijităn n-inĕmmušal 26

1Iḍkăl Ăgribba măjrăd, inna i-Bulĕs: "Măjrăd! Ǝkkĕs uḍlem făll-iman-năk." Iḍkăl Bulĕs ăfuss-net i-ad-has-sĕjĕd tamĕtte, innă: 2"Ămănokal Ăgribba, ămoos-ahi a măqqorăn turhajăt n-măjrăd wa hi-tĕkfed ašăl-i-dăɣ i-ad-ĕkkĕsăɣ făll-i uḍlem wa hi-ăswărăn kăl-Ălyăhud wi hi-dd-ĕškănen săr-wăn. 3Ǝssanăɣ a-s wăr t-illa a hak-idrajăn dăɣ-ălɣadatăn-năsăn, wăla dăɣ-tijĕttewen n-ăddin-năsăn, a-wen-dăɣ a făl ĕttarăɣ dăɣ-k taẓidert n-ad-hi-sĕjĕdĕd. 4Năkk, wăr t-illa ăgg-ăkall-i-dăɣ wărăn issen a-s tĕmmăḍrit-in iket-net, jeɣ-tăt jer-kăl-tumast-in dăɣ-Yărussălam-i-dăɣ ĕdwălăɣ. 5Ăru ĕzzayăn-ahi, ĕssanăn daɣ a-wa ămoosăɣ kunta ăbokăn i-a-wen, tămudre-nin iket-net, ĕjeɣ-tăt dăɣ-alkum i-a-wa saɣra taggayt ta n-kăl-faris, wăr t-tĕlla taggayt tăt-tojărăt isĕm, wăla ălɣădalăt dăɣ-ăddin-nănăɣ. 6Ašăl-i, ĕbdadăɣ dat-ăššăreɣa făl tĕssĕba n-ăṭṭăma wa jărăɣ dăɣ-ărkăwăl-wa ijjăš Măssinăɣ i-abbatăn-nănăɣ wi n-ibda, 7ăṭṭăma-en-dăɣ, a-s ăqqalnăt tiwsaten-nănăɣ ti n-mărawăt d-sănatăt n-Iṣrayil ed, a-wen-dăɣ a săr-snăt dd-orăwăn ălɣibadăt n-Măssinăɣ ehăḍ d-ašăl. Ămănokal-in, wăr t-illa uḍlem hi-ăsiwărăn kăl-Ălyăhud wi hi-dd-ĕškănen săl wen-dăɣ. 8Ak ajăn ămoos-awăn tăkunt a-wa s-ilkam ad-dd-isĕnkăr Măssinăɣ inĕmmuttan? 9Dăɣ-a-wa hi-dd-iqqălăn năkk, wăr t-illa a-wa-dăɣ wăr-ĕjeɣ i-ad-hin-alĕmăɣ s-iyyăt isĕm wa n-Ɣisa wa n-Năṣirăt. 10A-wen, jeɣ-t dăɣ-aɣrĕm wa n-Yărussălam-i dăɣ-hi-ĕjrăwăn imănokalăn n-kăl-tikutawen asĕttărmĕs n-e d t-illăm ere ilkamăn i-Ɣisa Ălmasex, ăjăɣ-t dăɣ-takărmut. Afăl ĕnhăyăɣ i dăɣ-săn ăniihăjjăn d-tamăttant, ifassăn-in a-s tajjăɣ iman-net. 11Ǝkkeɣ jer-ihănan n-ăddin wi n-kăl-Ălyăhud i-ad-tăn-săknăɣ dăɣ-săn aɣăna, šahăššalăɣ-tăn s-asĕkkufăr, dăɣ-tĕmɣăre n-aḍkăr-năsăn wa hi-ihăn, ăhoreɣ-tăn har ikallăn wi iyyăḍnen dăɣ-ĕzzaɣăn. 12Dăɣ-isălan n-a-wen-dăɣ a făl ĕkkeɣ Dămašăq, ăwwayăɣ tikarḍiwen hi-ĕkfăn imănokalăn n-kăl-tikutawen, hi-ĕjrawnen tădabit n-a-wa s-ărheɣ iji-net. 13Ămănokal-in, ĕgleɣ dăɣ-a-wen-dăɣ a-s hin-ohăẓăɣ Dămašăq s-ammas n-tarăhut, wăla a hin-ĕjrăhăɣ năkk d-imidiwăn-in a-s ĕnhăyăɣ ănnur dd-ifalăn išĕnnawăn ojărăn tăfukt amlĕwlĕw. 14Nĕhă-dd noḍa iket-dăɣ-nănăɣ, ĕsleɣ dihen i-emăsli hi-innăn dăɣ-Ɣăbranĕyya: 'Sawĕl, Sawĕl! Ma kăy-orămăn săr-i, tiɣĕzzĕbud-ahi? Ad-hak-indăr amẓĕẓẓaj dăr-i hărkuk.' 15Ǝnneɣ-as: 'Emăli, mi tămoosăd?' Inn'-ahi Emăli: 'Năkk a-wa Ɣisa wa tiɣĕzzĕbud. 16Ămăra, ĕbdĕd făll-iman-năk, ănfalălăɣ-ak-dd i-ad-tumasăd ănămmašul-in, tumasăd daɣ tajuhe-nin dăɣ-a-wa tĕnhăyăd ašăl-i-dăɣ d-a-wa hak dd-madăn-infilĕl ḍarăt a-wa, 17ad-kăy-dd-ăɣlĕsăɣ dăɣ-kăl-Ălyăhud d-inĕẓẓulam šĕmmišĕlăɣ-kăy săr-săn, 18i-ad-tarĕd tiṭṭawen-năsăn, ĕzjărăn-dd tihay s-ănnur, ĕzjărăn-dd tărna n-Iblis s-Măssinăɣ, amĕnăn săr-i i-ad-tăn-ăkfăɣ tenăšše n-ibăkkaḍăn i-ad-ahĕrĕn tăkasit d-imĕššeddĕjăn wi iyyăḍnen.' 19Ămănokal-in Ăgribba, wăr-ĕtterăɣ anmĕšri i-a-wa hi-dd-ănfalălăn dd-ifălăn išĕnnawăn ed, Măssinăɣ ad-dd-ifal. 20Ǝmmĕjrădăɣ s-tizarăt i-kăl-Dămašăq d-kăl-Yărussălam tĕzzar, okăyăɣ s-Ălyăhudĕyăt d-iɣărman wi iyyăḍnen hăn inĕẓẓulam, xaṭṭăbăɣ-asăn iket-dăɣ-năsăn isălan n-a-s lan s-ad-utabăn, ĕjĕn tămudre tăddewăt d-imărkedăn olaɣnen ăssiitbătnen tiynĕya ta dd-tĕšrăyăt fălla-săn. 21Tĕssĕba n-a-wen dăɣ, a făl făll-i oḍăn kăl-Ălyăhud dăɣ-ammas n-ehăn n-ămudd wa măqqărăn, ĕttărăn tenăɣe-nin 22măšan, idhăl-ahi Măssinăɣ, ikkăs-ahi-dd dăɣ-ifassăn-năsăn i-ad-udabeɣ tebădde, ăjjayhăɣ făll-isălan-net har ašăl-i-dăɣ i-wi lănen isĕm hakd wi t-wăren ĕla. A-wa jănneɣ daɣ ašăl-i-dăɣ, wăr-ămoos a ăynayăn, ăru dăɣ-s ăssewălăn ănnăbităn d-Mosa-i ĕssĕtbătnen a-s ĕlkamăn isălan-wi-dăɣ hawăn-tajjăɣ. 23A-wen a t-ămoosăn, a-s ilkam ad-inhĕy Ɣisa Ălmasex tersĕmmawen tĕzzar, umas teɣăfădde n-ăddinăt wi dd-maden-ĕnkăr jer-inĕmmuttan i-ad-ĕtwĕjjĕn isălan n-ănnur n-ĕlɣĕllas i-kăl-Ălyăhud hakd inĕẓẓulam." 24Ămmiijrăd Bulĕs itakkăs uḍlem făll-iman-net dihen-dăɣ a-s iḍkăl Fistus emăsli-net, innă: "Kăyy Bulĕs, ăbas tĕssanăd a jănned, tĕkkas dăɣ-k tĕmɣăre n-tĕlɣulĕma tayĕtte." 25Inn'-as Bulĕs: "Ămănokal-in Fistus, năkk ɣas ozja ĕnniyăt-in, ĕjrahăɣ a-wa heɣ; a-wa jănneɣ iket-net, wăr-ămoos ɣas ar tidĕt lat ujreh. 26Kăyy daɣ ămănokal-in Ăgribba, wăr hak-ĕdrejăn isălan-win-dăɣ, a-wen-dăɣ daɣ a făl wăr-ăksuḍăɣ măjrăd data-k, ed wăr t-illa dăɣ-isălan-wi-dăɣ a-s wădden tĕssanăd săr-s e-d, ĕkkasăɣ ăššăk a-s isălan-wi-dăɣ, wăr jen dăɣ-ufăr. 27Ămănokal-in Ăgribba, tomanăd s-a-wa ĕnnăn ănnăbităn, wădden?" 28Iggăd-dd Ăgribba ălwăqq-wen s-Bulĕs, inn'-as: "Kăyy, hannăyăɣ-kăy, a ĕnḍărrăn ɣas teɣalăd ămoosăɣ ălmăssexi." 29Inn'-as Bulĕs: "Jer-a ĕnḍărrăn wăla a hin-illan i-ad-tumasăd a-wen, dalăɣ-ak Măssinăɣ kăyy hakd ălžămaɣăt wa hi-ăsijădăn, ad-dăr-i talĕhĕm hărăt iket-net, a săl tišĕm-ti-dăɣ hi-hănen." 30Issĕmdă Bulĕs măjrăd-wen-dăɣ ɣas, ibdăd ămănokal Fistus hakd Ăgribba d-Berenis, tĕlkăm-asăn daɣ tamĕtte, 31zajjărăn ăddinăt, tinmĕnnin: "Ăhalĕs-i-dăɣ, wăr t-illa a iɣšad t-ăsinăhăjjăn d-tamăttant wăla tišĕm." 32Inna Ăgribba i-Fistus ălwăqq-wen: "Ǝnnăr wădden teɣăre-i ija ăhalĕs-i-dăɣ i-Qăyṣăr wa n-ămănokal măqqărăn, itwĕyy'-in."

will be added

X\