Ijităn n-inĕmmušal 25

1Kăraḍ išilan ḍarăt a-s iḍkal Fistus tanăya, ifăl-dd Qăyṣăra, teje ta făll-ixkăm, ikkă Yărussălam. 2Ǝškăn-dd săr-s imănokalăn n-kăl-tikutawen d-imizărăn n-Ălyăhud dăɣ-isălan n-Bulĕs, 3laqqădăn-t d-ad-hasăn-dd-isĕwwĕyy Bulĕs i-ad-t-ĕšrăɣăn dăɣ-Yărussălam, jannen a-wen, a-s ija a-wen, ăru d-ĕjăn ăddăbara n-ad-t-săɣdărăn dăɣ-tabarăt, ănɣĕn-t kĕrĕf. 4Inn'-asăn Fistus: "Bulĕs iha takărmut dăɣ-Qăyṣăra, ḍarăt-a-wen daɣ, năkk iman-in, ĕkkeɣ Yărussălam dăɣ-išilan-i-dăɣ, 5idawnet dăr-i iyyăḍ dăɣ-wăn tĕflasăm i-ad-ĕbdĕdăn fălla-wăn, umasăn tijuhawen-năwăn dăɣ-isălan n-ăhalĕs-wa-dăɣ sawarăn uḍlem." 6Ikkă Fistus Yărussălam, ija dăɣ-s a t-illan jer-ĕttam tĕkkĕd măraw išilan tĕzzar, iqqăl-dd Qăyṣăra. Ašăl wa ilkămăn i-wa n-uɣĕl-net, issăɣră-dd Bulĕs s-edăgg wa dăɣ-iɣattăs ăššăreɣa. 7Ijjăš-dd Bulĕs ehăn-en ɣas, ăɣlăyɣălăyăn-t-dd kăl-Ălyăhud wi-dd fălnen Yărussălam, ad-t-sawarăn bahutăn d-uḍlemăn s-wăr t-illa ere ăddoben asĕddĕttu-năsăn. 8Iḍkăl Bulĕs măjrăd i-ad-ihĕl iman-net, isĕbbuggĕt a-wa fălla-s itawănnen, inna: "Wăr t-illa uḍlem hi-iwarăn, wăr t-illa a lăbasăn ăɣšadăɣ wăla ĕnneɣ făll-alămăr n-kăl-Ălyăhud, wăla făll-ehăn n-ămudd wa măqqărăn, wăla făll-Qăyṣăr-i n-ămănokal wa măqqărăn." 9Innă Fistus ălwăqq-wen i-Bulĕs i-ad-ijrăẓ i-kăl-Ălyăhud: "Ak tărḍed s-ad-tĕkkĕd Yărussălam i-ad-kăy dăɣ-s ĕšrăɣăɣ meɣ?" 10Inn'-as Bulĕs: "Năkk, ămăra, Qăyṣăr-i n-ămănokal wa măqqărăn ihăn Roma, ĕnta a-s ărheɣ tebădde data-s i-ad-hi-išrăɣ. Kăl-Ălyăhud-i săr-k dd-ĕškănen, wăr t-illa a hasăn-ăɣšadăɣ, a-wen, kăyy iman-năk, hannăyăd-t. 11Kunta ill'-e a ăɣšadăɣ wăla a jeɣ lăbasăn, ărḍeeɣ s-tamăttant măšan, kunta a wa făll-i itawănnen bahu, adiš, wăr-ĕleɣ s-ad-ĕtwĕjjăɣ jer-ifassăn-năsăn. Ămăra, šămad tanfust-da-dăɣ, ăɣreɣ Qăyṣăr wa n-ămănokal măqqărăn." 12Ănmănhăy Fistus d-inušămăn wi ɣattăsnen ăššăreɣa tĕzzar, innă i-Bulĕs: "Šămad kăyy iman-năk a iɣrăn ămănokal wa măqqărăn, adiš, ad-hak-sukăɣ." 13Hărăt n-išilan ḍarăt-a-wen-dăɣ, osă-dd ămănokal iyyăn s-isĕm-net Ăgribba ăddeew d-wălătma-s s-isĕm-net Berenis, jan-dd tăbošăjt s-Fistus dăɣ-Qăyṣăra. 14Jăn išilan dihen ɣas, iḍkăl-asăn-dd Fistus isălan n-Bulĕs, inn'-asăn: "Ill'-e diha ăhalĕs dd-oyya Filiks dăɣ-takărmut, 15ĕškăn-dd săr-i fălla-s imănokalăn n-kăl-tikutawen d-inušămăn n-kăl-Ălyăhud, ĕttărăn dăɣ-i ad-t-siḍĕwăɣ dăɣ-ăššăreɣa 16măšan, ĕllăɣeɣ-asăn a-s ălqanun-nănăɣ năkkăneḍ-i n-kăl-Roma, wăr hanăɣ-ijrew ad-nĕsiḍĕw ăwadĕm dăɣ-ăššăreɣa ar s-ad-t-dd-năssibdăd dat-ăššăreɣa tĕzzar, nĕlmĕd kunta a-wa fălla-s itawănnen tidĕt meɣ. 17Osăn-ahi-dd dăɣ-Qăyṣăra ɣas, ĕssăɣrăɣ-asăn-dd năkk iman-in ăhalĕs wa s-săr-i dd-ĕškăn. 18Ăɣelăɣ dăɣ-a-wa fălla-s jannen, iɣšad a măqqoorăn măšan, oseɣ-t wăr-ija a-wen 19ed, isălan n-ăddin-năsăn d-isălan ĕkkanen ăhalĕs iyyăn ămmun s-isĕm-net Ɣisa, s-orda ĕnta a-s inkăr-dd jer-inĕmmuttan, ĕnta-den-dăɣ a-wa ikkăn jere-săn, 20wăr-ĕssenăɣ a has-e-ăjăɣ, ĕttărăɣ dăɣ-s ad-ăkk Yărussălam i-ad-dăɣ-s itwĕšrăɣ ed, năkk iman-in, wăr hĕnnĕyăɣ uḍlem t-ăswărăɣ 21măšan, ăssof teɣăre n-Qăyṣăr wa n-ămănokal măqqărăn ed, ijraw-as ălqanun-nănăɣ a-wen." 22Iggăd-dd Ăgribba ălwăqq-wen, inna i-Fistus: "Ăhalĕs-wa-dăɣ, săsl'-ahi-has năkk-dăɣ." Inn'-as Fistus: "Ašĕkka, ad-t-dd-sĕbdĕdăɣ data-k, tĕslĕd-as." 23Ăffăw ɣas, ăssahăɣ-dd Ăgribba ašăl s-ălxal wa n-imănokalăn ĕnta d-Berenis ta n-wălătma-s, ĕjjăšăn ehăn wa n-ăššăreɣa ăddewăn d-kumănda d-inušămăn n-aɣrĕm. Issăɣră-dd Fistus Bulĕs, ittĕlwăy-dd. 24Immĕjrăd Fistus, innă: "Ămănokal Ăgribba, kăwăneḍ-i dd-ĕžžĕmmăɣnen diha-dăɣ ašăl-i, ăhalĕs-i-dăɣ hannăyăm, wăr t-illa dăɣ-Yărussălam hakd diha-dăɣ, ere s-wădden innă, ăbas ănihăjja d-tămudre. 25Dăɣ-a-wa hi-dd-iqqălăn năkk, wăr t-illa uḍlem fălla-s ĕjrawăɣ t-ăsinăhăjjăn d-tamăttant măšan, šămad ĕnta iman-net a ăsnăfrănăn ad-t-išrăɣ ămănokal wa măqqărăn, adiš ad-has-t-sukaɣ i-ad-t-išrăɣ. 26Hakd a-wen-dăɣ, wăr-ărheɣ, ad-has-t-sukaɣ ar s-ad-t-ăsidăwăɣ d-tăkarḍe dăɣ-iktab uḍlem wa t-iwarăn. Tĕssĕba n-a-wen-dăɣ a făl ăssofăɣ ad-t-dd-sĕbdĕdăɣ data-k i-ad-hi-tĕkfĕd tayĕtte n-a-wa mad-ĕktĕbăɣ dăɣ-tăkarḍe i-ămănokal wa măqqărăn ḍarăt isĕstanăn wi t-mad-ăjăɣ 27ed, wăr-il' ĕmmĕk n-ad-sukaɣ ămănokal u-takărmut s-wăr-ătwăssăn a-wa iɣšăd."

will be added

X\