Ijităn n-inĕmmušal 24

1Sĕmmos išilan ḍarăt-a-wen, osă-dd Ănanyas wa n-ămănokal n-kăl-tikutawen ifal-dd Yărussălam, ăddeew d-hărăt dăɣ-inušămăn d-ănabdid s-isĕm-net Tartăloš. Osăn-dd ɣas, ĕškăn i-Bulĕs s-gĕfăr. 2Ătwăɣră-dd Bulĕs. Diha-dăɣ dd-osa, ad-săr-s ăšonăj Tărtăloš, ad-t-isawar uḍlem, ijanna: 3"Ămănokal-nănăɣ Filiks, nămmoy-ak ălxal wa ăhusken d-ălɣafyăt wa s-tăzozăɣăd ăkall-nănăɣ, a-wen, wăr t-illa ăwadĕm s-wădden issan săr-s. 4Ămăra, wăr nărha asɣĕf-năk s-măjrăd ăjjen, ărheeɣ dăɣ-k dăɣ-milɣaw-năk, ad-hanăɣ-tĕkfĕd ăssaɣăt ĕnḍărrăn n-măjrăd. 5Ăhalĕs-i-dăɣ n-ăgg-ăḍḍărora, edăgg osa-dăɣ, ad-dăɣ-s isĕffĕllĕg kăl-Ălyăhud, ittăr ašĕnnĕmĕšri-năsăn, ămoos iyyăn dăɣ-imizărăn n-taggayt ta tĕglăt făll-tidĕt n-iman-net s-itawănna ta n-kăl-Năṣirăt. 6Dăɣ-tĕmɣăre n-anmĕšri-i-dăɣ ija, ittăr făw ad-isĕmmăḍĕs ehăn n-ămudd wa măqqărăn. Năstărmăs-t s-a-wa innă alămăr-nănăɣ (( 7măšan, ohăɣ-t dăɣ-năɣ Kumănda Lisyas s-ăṣṣahăt. 8Tăddobed kăyy iman-năk ad-t-sĕstĕnnăd d-uḍlem wa t-năswăr ed ĕnta iman-net, ill'-e diha))." 9Ohărăn kăl-Ălyăhud wi iyyăḍnen iket-năsăn iyyăn n-emm, ad-jannen isălan-den-dăɣ. 10Ăstafăy gĕfăr ḍarăt-a-wen i-Bulĕs, inn'-as ad-ămmăjrăd. Iḍkăl Bulĕs măjrăd, innă: "Ǝssanăɣ ămănokal-in a-s kăyy ăru tămoosăd ăgg-ăššăreɣa i-kăl-ăkall-i-dăɣ, a-wen-dăɣ daɣ a făl ĕflasăɣ a-s ad-hi-tĕkkĕsăd tekăriḍt. 11A ilan măraw išilan d-ĕssin dd-ĕjjăšăɣ Yărussălam i-ad-dăɣ-s ăɣbĕdăɣ Măssinăɣ, tăddoobed kăyy iman-năk ad-sĕbbuyĕnăd isălan-win-dăɣ, 12wăr t-illa ere hi-inhayăn ĕntajăɣ tamĕtte, wăla ămiiɣănnanăɣ d-ăwadĕm dăɣ-ehăn n-ămudd wa măqqărăn, wăla dăɣ-ihănan n-ăddin wi n-kăl-Ălyăhud, wăla dăɣ-aɣrĕm, 13wăr t-illa daɣ dăɣ-ăddinăt wi-hi-sawarnen uḍlem data-k-i ăddooben asĕtbat n-a-wen ed, wăr len tijuhawen. 14Hakd a-wen-dăɣ, hărăt iyyăn, ădduuttăt, janneɣ-t daɣ data-k: năkk, Măssinăɣ wa n-abbatăn-nănăɣ a-s ĕlkamăɣ s-ĕmmĕk wa s-tăn-innă alămăr d-ĕlkĕttabăn n-ănnăbităn. A-wen-dăɣ a-s jannen ĕntăneḍ taggayt tĕglat făll-tidĕt n-iman-net. 15Măssinăɣ a dăɣ-jarăɣ ăṭṭăma, jarăn-t dăɣ-s ĕntăneḍ-dăɣ n-a-s tĕlkam tanăkra n-inĕmmuttan, jer-wi olăɣnen, wăla wi lăbasnen. 16Tĕssĕba n-a-wen-dăɣ a făl tattărăɣ, ad-wăr-itĕmmil a dăɣ-ĕššakăɣ iman-in, dat-Măssinăɣ wăla dat-dăgg-adĕm. 17A ilan iwĕtyan d-ĕzjărăɣ ăkall-i-dăɣ, a-s t-dd-ăqqălăɣ, ăwwayăɣ takute n-aẓrĕf tămoosăt tadhĕlt i-imumĕnăn n-ăkall-in, ăwwayăɣ daɣ năkk a-wa s-ărheɣ ad t-ĕkĕtăɣ i-Măssinăɣ. 18Ašăl wa d-ĕssĕmdăɣ a-wa iktăbăn dăɣ-alămăr dăɣ-isălan n-tĕšĕdje-nin, ĕbdadăɣ dăɣ-ammas n-ehăn n-ămudd wa măqqărăn, wăr ɣur-i t-tĕlla tamĕtte wăla tamdĕrwayt wăl'-iyyăt. Ǝbdadăɣ dihen-dăɣ a-s făll-i toḍa tamĕtte. 19A-wa wăr-ih' ăššăk ĕnta da: kăl-Ălyăhud wi dd-fălnen Azya a făll-i oḍănen, a-wen-dăɣ a făl ăniihăjja daɣ a-s kunta ill'-e uḍlem hi-iwarăn, ĕntăneḍ-en-dăɣ a lanen s-ad-hi-sĕwrĕn uḍlem data-k i-ad-sĕddĕttun a-wa făll-i itawănnen. 20Kunta a-wen, wăr-ija, adiš, lăɣătnet meddĕn-wi ĕbdădnen diha uḍlem wa hi-iwarăn a-s dd-ĕbdădăɣ dat-kăl-Sinhidrin-wi ɣattăsnen ăššăreɣa. 21Wăr t-illa uḍlem hi-iwarăn săl wa n-a-s ĕnneɣ: tĕlkam tanăkra jer-inĕmmuttan, tĕnna daɣ n-a-wen-dăɣ a făl ĕbdadăɣ data-k ašăl-i-dăɣ." 22Ăsfăl Filiks ăddinăt iman-net ḍarăt-a-wen ed issan a ăjjeen făll-taggayt-ta-dăɣ tĕglăt făll-tidĕt n-iman-net, inn'-asăn: "Afăl dd-osa Lisyas wa n-ămănokal n-ĕssărdusa, ad-kăwăn-dd-săɣrăɣ." 23Omăr ḍarăt-a-wen i-kăbtăn iyyăn i-ad-ăj ĕnniyăt i-Bulĕs măšan, ăkfet-t turhajăt n-ad-t-dd-tisĕn ăddinăt-net, tassănăn dăɣ-s. 24Hărăt n-išilan ḍarăt-a-wen, iqqăl-dd Filiks ăddeew d-Dĕrusil ta n-hănne-s lăn kăl-Ălyăhud. Issăɣră-dd Bulĕs, ăsjăd i-isălan-wi ităjj făll-immun s-Ɣisa Ălmasex. 25Itajj'-as Bulĕs isălan har dd-iwwăḍ edăgg-wa dăɣ-has-ijanna ĕmmĕk wa s-ila ăgg-adĕm ad-săr-s iddăr dat-Măssinăɣ, ijrĕw ălɣafyăt, isĕdĕw i-ăššăreɣa wa dd-imalăn, ănnăhăḍ dăɣ-iman-net ɣas, irmăɣ Filiks, innă i-Bulĕs: "Ǝglĕw ămăra, afăl săr-k ĕjrăwăɣ, ad-kăy-dd-alĕsăɣ asăɣăr." 26E-d ăhoj a dd-isăɣăr Bulĕs, isĕddĕwĕnnĕt-t, dăɣ-a-s, ijar ăṭṭăma n-ad-t-ăkf Bulĕs a ila aẓrĕf. 27Ija a-wen-dăɣ har okăyăn ĕssin iwĕtyan, izjăr Filiks Tĕmmĕnĕya, ijjăš Bursĕs Fistus edăgg-net. Ăssof ĕnta, ad-iṭṭĕf Bulĕs dăɣ-takărmut i-ad-iẓĕjrĕẓ iman-net i-kăl-Ălyăhud.

will be added

X\