Ijităn n-inĕmmušal 23

1Ikna Bulĕs akăyad n-inušămăn wi n-Sinhidrin ɣattăsnen ăššăreɣa tĕzzar, inn'-asăn: "Ayĕtma-ɣ, wăr t-illa a dăɣ-ĕššakăɣ iman-in, a-wa s-ila ăgg-adĕm s-iji-net dăɣ-isălan n-ta n-jere-s d-Măssinăɣ, wăr kăla has-ănmăšrăyăɣ har năkk-da-dăɣ." 2Iggăd-dd săr-s Ănanyas wa n-ămănokal n-kăl-tikutawen, omăr i-ĕssărdusa wi t-ĕllanen edes i-Bulĕs s-ad-has-ĕnfăẓăn, isusĕm s-iyyăt. 3Ǝnfăẓăn ĕssărdusa i-Bulĕs ɣas, innă i-ămănokal n-kăl-tikutawen: "Infăẓ-ak Măssinăɣ isĕm n-erk ăwadĕm; ĕnde d-ămmukkăn a-s kăyy-i s-ăniihăjja d-ad-hi-tĕšrăɣăd s-iqqud s-a-wa innă alămăr, kăyy-da-dăɣ ămăra has-itinmĕšriyăn, sasănɣed-ahi." 4Ǝnnăn-as ăddinăt: "Kăyy, ma kăy-ăsihălăn tigĕggar n-ămănokal n-kăl-tikutawen n-Măssinăɣ?" 5Inn'-asăn Bulĕs: "Ayĕtma, ănšăt-ahi-dd, wăr-ĕssenăɣ a-s ĕnta-i-dăɣ a-s ămănokal n-kăl-tikutawen ed ĕssanăɣ a-s iktab a-s: 'Wăr tĕnned a lăbasăn făll-ămănokal-năk.' " 6Dăɣ-a-wen-dăɣ, ad-ilmăd Bulĕs a-s ašrut n-tamĕtte iyyăn, i n-taggayt ta n-kăl-sadus, wa iyyăḍăn, i n-ta n-kăl-faris. Iḍkăl emăsli-net dat-kăl-Sinhidrin, innă: "Ayĕtma-ɣ, năkk u-faris n-ăgg-u-faris a ămoosăɣ, kunta ill'-e uḍlem hi-iwarăn ašăl-i-dăɣ, wăr t-illa a ămoos kunta wădden wa n-ăṭṭăma-i jărăɣ n-a-s tĕlkam tanăkra jer-inĕmmuttan." 7Innă a-wen ɣas, tĕnkăr tamɣĕnnant jer-kăl-faris d-kăl-sadus, tăẓun tamĕtte. 8Ămoos ašrut iyyăn wa n-kăl-sadus-i jannănen wăr tĕlkem tanăkra n-inĕmmuttan, wăr t-ĕllen ănjălosăn wăla alšinăn; ămoos ašrut wa iyyăḍăn wa n-kăl-faris-i ăssiitbătăn emel n-hărătăn-win-dăɣ iket-năsăn. 9Tĕwăs tamĕtte iket-net, ja tăkat. Ǝggădăn ălɣulam wi n-taggayt ta n-kăl-faris, ĕwărăn s-ăṣṣahăt s-ašrut wa n-Bulĕs, ad-jannen: "Ăhalĕs-i-dăɣ, wăr t-illa uḍlem fălla-s nĕhannăy, ak mi issanăn făw kunta wădden a dd-ifalăn išĕnnawăn meɣ ănjălos iyyăn a has-immĕjrădăn?" 10Inhăy kumănda tukĕse n-talɣa ta dd-tĕšrăyăt ɣas, irmăɣ făll-ad-t-tĕmẓĕyẓĕy tamĕtte, tĕnkăḍnĕkăḍ-t. Omăr i-ĕssărdusa s-ad-t-ĕlwĕyăn s-ehăn wa n-ĕlɣĕskăr i-ad-t-sĕssijĕjăn tamĕtte. 11Ehăḍ wa ilkămăn i-wen, ănfalăl-dd Emăli i-Bulĕs, inn'-as: "Bulĕs, kuyĕd, wăr kăy-išăšlalet hărăt făll-ămašăl wa kăy-ĕssăɣlăfăɣ, ĕmmĕk wa s-hi-tămoosăd tajuhe dăɣ-Yărussălam, ĕmmĕk-wen-dăɣ daɣ a-s mad-hi-tumasăd tajuhe dăɣ-Roma." 12Ăffăw ɣas, hăḍăn kăl-Ălyăhud n-a-s wăr t-illa a mad-ĕkšĕn wăla a mad-ĕswĕn a ĕkkăn wăr-ĕssăɣdărăn Bulĕs, ĕjĕn iman-net. 13Ǝkkoẓăt timĕrwen n-ăhalĕs a jănen tahuḍe-ten-dăɣ. 14Dăɣ-a-wen-dăɣ, ad-ĕkkăn ămănokal n-kăl-tikutawen d-imănnăhăḍăn n-tamĕtte, ĕnnăn-asăn: "Nĕj'-awăn tahuḍe, ilɣăn-anăɣ daɣ Măssinăɣ kunta ill'-e a he-năkš wăla a he-nĕsĕw a nĕkkăs wăr nĕja iman n-Bulĕs. 15Nărha dăɣ-wăn ămăra, ad-tĕttărăm dăɣ-kumănda d-kăl-Sinhidrin, ad-dd-sĕbdĕdăn Bulĕs data-wăn dăɣ-ăsaru n-a-s tărham asĕstan-net, afăl tĕjăm a-wen, ad-năj năkkăneḍ ĕmmĕk făll-has-in-nĕssĕmdă." 16Tĕsla tejăše n-Bulĕs i-taɣdărt-năsăn ɣas, ikka ehăn n-ĕssărdusa wa iha Bulĕs, ija dăɣ-s isălan. 17Iɣră-dd Bulĕs iyyăn dăɣ-kăbtănăn, inn'-as: "Ǝlwĕy alyaḍ-i-dăɣ s-kumănda făl-a-s ila a-s irha ad-has-tăn-ănn." 18Ăddew dăr-s kăbtăn-en s-kumănda, innă i-kumănda: "Bulĕs wa n-u-takărmut a hi-innăn ad-săr-k dd-ĕlwĕyăɣ ămawaḍ-i-dăɣ făl-a-s ăwway isălan s-irha ad-dăɣ-k tăn-ăj." 19Ikkăs-dd kumănda alyaḍ s-takše tĕzzar, issĕstăn-t d-isălan wi ăwwăy. 20Inn'-as alyaḍ: "Ănmănnakăn kăl-Ălyăhud făll-ad-dăɣ-k ĕttărăn ašĕkka ad-dd-tĕyyĕd Bulĕs săr-săn i-ad-t-sĕbdĕdăn dat-kăl-Sinhidrin ălmăt ărhan ad-t-ĕknĕn asĕstan d-a-wa iɣšăd, 21wăr kăy-săswadnet făl-a-s, a iwwăḍăn ĕkkoẓăt timĕrwen n-ăhalĕs a ihăḍăn n-a-s wăr mad-ĕkšĕn, wăr mad-ĕswĕn a ĕkkăn wăr jen iman-net, wăr-ăqqelăn ămăra ɣas ar i-ad-săr-săn t-dd-tĕyyĕd." 22Ălwăqq wa d-isiglĕw kumănda ămawaḍ-ĕnnin-dăɣ, ăsmătăr-t d-ad-wăr ija isălan-wi-dăɣ i-ăwadĕm wăl' iyyăn. 23Issăɣră-dd ḍarăt-a-wen ĕssin kăbtănăn, inn'-asăn: "Sădwăt-dd sănatăt-timaḍ n-ĕssărdusa, ĕssayăt timĕrwen n-ĕssărdasi dăɣ-wi năynen ibĕjwan d-sănatăt timaḍ dăɣ-wi ărjašnen, ăwwayăn allaɣăn, sĕdĕwĕm afăl okăynăt tisuḍĕsen i-tikawt n-Qăyṣăra, 24ĕstĕjăt i-tisnay, sĕssiwĕḍăm-in Bulĕs iddar-iɣlas Filiks wa n-gĕfăr." 25Iktăb kumănda tăkarḍe ḍarăt-a-wen-dăɣ innă: 26A-wa năkk Kĕlod Lisyas hin-ăhuulăn gĕfăr Filiks-i ĕkneɣ semɣar. 27Ăhalĕs-i-dăɣ săr-k-in-ăssiiglăɣ, ărmăsăn-t kăl-Ălyăhud, ĕttărăn ad-ĕjĕn iman-net. Ǝlmădăɣ a-s ăḍḍiin făll-Roma ɣas, ăssokăsăɣ-t-dd jer-ifassăn-năsăn s-ejhăn n-ĕssărdusa. 28Dăɣ-derhan-in n-almud n-a-wa făl ărhăn tenăɣe-net, ĕssĕbdădăɣ-t-dd dat-inušămăn-wi ɣattăsnen ăššăreɣa i-ad-ĕlmĕdăɣ ăddălil n-uḍlem wa t-ăsiwărăn, 29ĕlmădăɣ a-s a ihalăn ebre n-tijĕttewen n-alămăr-năsăn ɣas, wădden a ănihăjjăn d-tamăttant wăla takărmut. 30Iket hi-ĕjjăšăn isălan n-a-s ărhan kăl-Ălyăhud asăɣdăr-net i-ad-ĕjĕn iman-net. Dăɣ-tĕssĕba n-a-wen-dăɣ a făl t-in-ĕssărmăḍăɣ săr-k, sĕlmĕdăɣ daɣ wi has-dd-ĕškănen a-s kăyy a ănnihăḍăn dăɣ-isălan-net. Wăssălam! 31Ǝjăn ĕssărdusa ălwăqq-wen-dăɣ a-wa hasăn-innă kumănda, ĕglăn d-Bulĕs ehăḍ-en-dăɣ har t-in-ăssawăḍăn taɣrĕmt ta n-Antibatris. 32Ăffăw ɣas, ĕqqălăn ĕssărdusa wi ărjăšnen Yărussălam, ăssofăḍăn-in wi năynen ibĕjwan Bulĕs s-Qăyṣăra. 33Ǝwwăḍăn-in ɣas, jăn tăkarḍe-tĕnnin-dăɣ ifassăn n-gĕfăr, ĕssĕbdădăn-dd daɣ Bulĕs data-s. 34Iɣra gĕfăr tăkarḍe tĕzzar, issĕstăn d-teje ta lăt Bulĕs. Ilmăd a-s Silisi a t-lăt ɣas, inn'-as: 35"Ad-kăy-dd-săɣrăɣ afăl dd-ĕwwăḍăn ăddinăt wi hak-dd-ĕškănen." Omăr ḍarăt-a-wen i-ĕssărdusa i-ad-t-ĕjĕn dăɣ-ehăn s-ătiwăjja ĕnniyăt, dăɣ-ehăn n-tĕmmĕnukĕla wa ăsdăy ămănokal Harudĕs.

will be added

X\