Ijităn n-inĕmmušal 22

1"Ayĕtma-ɣ, abba-tăn-in, săjdăt ămăra i-măjrăd wa s-ărheɣ ad-hawăn-t-ăjăɣ i-ad-săr-s ĕkkĕsăɣ uḍlem făll-iman-in." 2Ǝslăn a-s Ɣăbranĕyya-ta-dăɣ ĕttăḍăn a dăɣ-hasăn-ăssewăl, ĕṭṭăfăn ṭăbb, ăsjădăn-as. Inn'-asăn: 3"Năkk, ăgg-Ălyăhud, ĕweɣ dăɣ-taɣrĕmt ta n-Tarša tĕhăt Silisi măšan, aɣrĕm wa n-Yărussălam a dăɣ-ĕdwălăɣ. A-wa ĕlmădăɣ iket-net, ĕlmădăɣ-t daw-tĕlɣulĕma n-Gamălyăl. Ǝnta a hi-issăɣrăn alkum i-a-wa innă alămăr n-abbatăn-nănăɣ iket-net. Ǝjjĕluyăt-in dăɣ-tuksĕḍa n-Măssinăɣ a hi-iwwăyăn s-ĕššĕnju n-tabarăt ta-dăɣ n-Ɣisa s-ĕmmĕk wa s-tăt-tăššunjem ašăl-i-dăɣ. 4Ǝgleɣ dăɣ-ĕššĕnju wa has-jeɣ har tajjăɣ iman n-ăddinăt wi ĕlkămnen i-zăbo-wen-dăɣ, tajjăɣ tišĕm dăɣ-iyyăḍ, tĕjjarăɣ-tăn dăɣ-takărmut, wăr-ĕẓleyăɣ meddĕn d-tiḍeḍen. 5A-wen, ăjjĕyh'-as ămănokal n-kăl-tikutawen, ăjjĕyhăn-as daɣ inušămăn wi ɣattăsnen ăššăreɣa ed ĕntăneḍ iman-năsăn a hi-ĕkfănen tikarḍiwen ĕkkanen kăl-Ălyăhud wi n-aɣrĕm wa n-Dămašăq i-ad-ĕjrĕwăɣ tabarăt n-asĕttărmĕs n-ăddinăt-wi ĕlkămnen i-tabarăt-ta-dăɣ, ăjăɣ dăɣ-săn tišĕm tĕzzar, ĕlwĕyăɣ-tăn-dd s-Yărussălam. 6Ăssokalăɣ dăɣ-isălan n-a-wen-dăɣ har hin-ohăẓăɣ Dămašăq. Diha-dăɣ tăt-in-ohăẓăɣ s-tarăhut, wăla a hin-ĕjrăhăɣ, a-s făll-i dd-ăzzubbăt ănnur, dd-ifalăn išĕnnawăn, ijan amlĕwlĕw n-tikunen, 7ĕheɣ-dd oḍeɣ, ĕsleɣ i-emăsli hi-innăn: 'Sawĕl, Sawĕl! Ma kăy-orămăn săr-i, tiɣĕzzubud-ahi?' 8Ǝnneɣ: 'Emăli, mi tămoosăd?' Inn'-ahi: 'Năkk a-wa Ɣisa wa n-Năṣirăt tiɣĕzzĕbud.' 9Ǝnhăyăn meddĕn wi dăr-ăddewăy ănnur wa dd-ămlăwlăwăn măšan, wăr-ĕslen i-emăsli wa hi-ămmijrădăn. 10Ǝnneɣ-as: 'Emăli! Ma s-leɣ s-ad-t-ăjăɣ?' Inn'-ahi Emăli: 'Ǝbdĕd, ăkk aɣrĕm wa n-Dămašăq, ad-hak-itwĕnn dihen a-wa s-led s-ad-t-tĕjĕd.' 11A-s ităjj a-wen-dăɣ, wăr t-illa a hannăyăɣ ed, ăsdărɣăl-ahi ănnur wa făll-i dd-ăzzubben. Ǝlwăyăn-ahi imidiwăn-in s-ăfuss har nĕjjăš Dămašăq. 12Ill'-e dihen ăhalĕs ăddiinăn dăɣ-a-wa innă alămăr wa n-Mosa, ăssiimɣărăn kăl-Ălyăhud s-isĕm-net Ănanyas, 13ĕnta-en-dăɣ a hi-dd-osăn, ăzozăy-ahi iman-net, inn'-ahi: 'Ă/n/na-ɣ Sawĕl, arr tiṭṭawen-năk'. Ămerănăt-dd tiṭṭawen-in, ĕnhăyăɣ-t. 14Inn'-ahi daɣ: 'Măssinăɣ-i s-ĕlkămăn abbatăn-nănăɣ a-s ăru d-kăy-ăsnăfrăn i-ad-kăy-isĕlmĕd erhet-net, tĕnhĕyăd wa s-itawănna Ămaɣdal, tĕslĕd i-a-wa fălla-k irha s-emm-net, 15tumasăd tajuhe-net dat-dăgg-adĕm, tăllăɣed-asăn a-wa tĕnhăyăd d-a-wa s-tĕsled iket-net. 16Ămăra, ma kăy-iwwaɣăn? Ǝbdĕd, tĕtwĕsĕlmăɣăd dăɣ-aman, săɣlĕfăd iman-năk Măssinăɣ i-ad-kăy-išĕšdĕj dăɣ-ibăkkaḍăn-năk.' 17Ălwăqq wa d-ăqqălăɣ Yărussălam ḍarăt-a-wen, tĕddalăɣ Măssinăɣ dăɣ-ehăn n-ămudd wa măqqărăn ašăl iyyăn a-s hi-tăssoḍa tănăfalilt dd-falăt Măssinăɣ. 18Ǝnhăyăɣ Emăli, inn'-ahi: 'Tărmaḍ, ĕzjăr Yărussălam šik făl-a-s wăr mad-ărḍĕn imuzăɣăn-net s-tajuhe ta făll-i mad-tĕjĕd.' 19Ǝnneɣ-as: 'Emăli, wădden, ĕssanăn imumĕnăn ĕmmĕk wa s-ĕkkeɣ jer-ihănan n-ăddin wi n-kăl-Ălyăhud, naqqăɣ iyyăḍ dăɣ-săn, tajjăɣ tiwit s-ebărtăk dăɣ-iyyăḍ, tĕjjarăɣ-in wi iyyăḍnen dăɣ-takărmut. 20Ašăl wa d-inɣăl ašni n-Stifan -i n-tajuhe-năk, ĕbdadăɣ, taqqăsăɣ i-wi t-naqqănen, năkk făw a ĕssăɣlăfăn isĕlsa-năsăn.' 21Inn'-ahi Emăli ălwăqq-wen: 'Ǝglĕw, ad-kăy-sukăɣ tiwsaten n-inĕẓẓulam ti hănen ikallăn wi ujĕjnen.' " 22Ăsijădăn-as ăddinăt hundăɣ har ten-dăɣ ɣas, ăsɣăren dăɣ-išĕnnawăn, ad-jannen: "Ǝlhĕsăt fălla-năɣ ăwadĕm-wa-dăɣ, wăr-ilă s-ad-ăqqayĕm iddar." 23Naḍḍăwăn iɣăran, tăkkăsăn isĕlsa-năsăn făll-iman-năsăn, nabbăsăn-as ăkall. 24Omăr kumănda ălwăqq-wen i-ad-t-šujĕšăn ĕssărdusa ammas n-ehăn wa n-ĕlɣĕskăr, ĕjĕn dăɣ-s tiwit i-ad-t-šĕhhĕššĕlăn tĕnna n-ăddălil-wa făl fălla-s saɣărat tamĕtte. 25Karrădăn-t ĕssărdusa dihen-dăɣ i-ad-dăɣ-s ĕjĕn tiwit a-s innă Bulĕs i-kăbtăn wa t-illăn dihen: "Ajăn, ijraw-awăn ălqanun ad-tĕjĕm tiwit dăɣ-u-Roma wăr-ăswăr ăššăreɣa uḍlem." 26Isla kăbtăn-en i-a-wen ɣas, ošăl s-kumănda, inn'-as: "Hekăyy! Ăj ĕnniyăt i-a-wa s-tărhed iji-net, ăhalĕs-i, i n-Roma." 27Ikkă-dd kumănda Bulĕs, inn'-as: "Ɣas, tidĕt kăyy u-Roma?" Inn'-as Bulĕs: "Ǝyya." 28Inn'-as kumănda: "Năkk, aẓrĕf ăjjeen a ẓălăɣ i-ad-ĕjrĕwăɣ tumast-ten-dăɣ." Inn'-as Bulĕs: "Năkk, a ĕweɣ-dăɣ, ămoosăɣ-t." 29Ǝššĕnkăšăn fălla-s ĕssărdusa wi s-ihĕnnin ărhan ad-t-ĕkrĕdăn, ĕjĕn dăɣ-s tiwit. Irmăɣ kumănda ed, ija tišĕm dăɣ-ere la Roma iket-di d-ititwĕšreɣ. 30Ăffăw ɣas, ad-itammăɣ kumănda i-ăddălil n-ăḍḍărora wa t-ăswărăn kăl-Ălyăhud, ikkăs Bulĕs dăɣ-tišĕm, issăɣră-dd ḍarăt-a-wen imănokalăn n-kăl-tikutawen d-inušămăn-wi ɣattăsnen ăššăreɣa tĕzzar, issăɣră-dd Bulĕs, ij'-e jere-săn.

will be added

X\