Ijităn n-inĕmmušal 21

1Nĕbḍa dăr-săn ɣas, nĕjjăš turăft n-aman, nărmăs tamdujt n-awtĕl wa n-Kus, ăffăw-anăɣ, nokăy s-Rudus tĕzzar, nĕkkă Batara. 2Nĕjrăw dihen turăft n-aman tiyyăt tĕkkat teje ta n-Finisya, nĕjjăš-tăt, 3nohăẓ-in awtĕl wa n-Qĕbrus, noyy'-e făll-tăšalje-nănăɣ, nokăy s-Surya, năzzubbăt dăɣ-aɣrĕm wa n-Tir-i dăɣ-la turăft s-ad-zĕzzubbĕt ilalăn wi tăt-ĕhănen. 4Nĕjrăw hărăt dăɣ-inĕṭṭulab, năssakăy ɣur-săn ĕssa išilan. Nĕll'-e ɣur-săn dihen-dăɣ a-s tăn-dd-imhăl Unfas Šăddijăn s-Bulĕs, ad-t-salɣadăn d-ad-wăr-ikka Yărussălam. 5Okăyăn-anăɣ išilan-en-dăɣ dihen ɣas, ăssofăḍăn-anăɣ-in imumĕnăn-win-dăɣ, meddĕn, tiḍeḍen d-aratăn har nĕzjăr aɣrĕm, nărkăɣ dăɣ-asălim n-ejărew, ad-nĕtĕddal Măssinăɣ. 6Nĕssĕmdă tittar d-isĕnnăɣlaf dăr-săn ɣas, nĕjjăš turăft n-aman, ĕqqălăn ĕntăneḍ ihănan-năsăn. 7Nĕfăl năkkăneḍ Tir, nĕkkă Bătlomis. Năsjăn dăɣ-s ɣas, nĕkkă ayĕtma-năɣ dăɣ-ăddin wi t-ĕllănen dihen, năssăllăm fălla-săn tĕzzar, năssakăy ašăl ɣur-săn. 8Ăffăw-anăɣ ɣas, nĕkk' ehăn wa n-Filĕbb wa n-amăllănžal, izzaɣ aɣrĕm wa n-Qăyṣăra, ĕnta a-s iyyăn dăɣ-meddĕn wi n-ĕssa ĕnnĕfrănnen dăɣ-Yărussălam, năzzubbăt ɣur-s. 9Ila ĕkkoẓăt tilyaḍen wăren ĕzzey meddĕn, jarrăwnăt măjrăd ɣur-Măssinăɣ i-ad-t-in-sĕssiwĕḍnăt ăddinăt. 10Năssakăy hărăt n-išilan dihen-dăɣ a-s hanăɣ-dd-osa ănnăbi dd-ifalăn Ălyăhudĕyăt s-isĕm-net Ăggăbbas. 11Os'-anăɣ-dd ɣas, iḍkăl tamĕntĕka n-Bulĕs, osăɣ săr-s ifassăn-net d-iḍarăn-net, inna: "Ǝnta da a-wa innă Unfas Šăddijăn: măssi-s n-tamĕntĕka-ta-dăɣ, ilkam ad-t-ĕkrĕdăn kăl-Ălyăhud s-ĕmmĕk-wa-dăɣ dăɣ-Yărussălam, ĕjĕn-t jer-ifassăn n-inĕẓẓulam. " 12Nĕslă i-isălan-win-dăɣ ɣas, ad-nĕlaqqăd năkkăneḍ hakd imumĕnăn wi ĕzzăɣnen Qăyṣăra Bulĕs i-ad-wăr ikkă Yărussălam 13măšan, inn'-anăɣ: "Ma ămoos a-wa kăwăn-išlăn, naxxăsăm ulh-in s-imeṭṭawăn-năwăn? Năkk, diha t-ĕlleɣ, ăsidăwăɣ i-tišĕm hakd-dăɣ i-tamăttant dăɣ-Yărussălam făl tĕssĕba n-isĕm n-Emăli Ɣisa." 14Issĕndăr-anăɣ ɣas, nĕkf'-e ălɣafyăt, nĕnn-as: "Ija Măssinăɣ erhet-net." 15Năssakăy ăzzăman dăɣ-Qăyṣăra tĕzzar, năsdăw, năjoẓăy s-Yărussălam. 16Ăssofăḍăn-anăɣ-in hărăt dăɣ-inĕṭṭulab n-aɣrĕm-en, ăwwăyăn-anăɣ s-ehăn n-amumĕn s-isĕm-net Mănasun ila awtĕl wa n-Qĕbrus, năzzubbăt ɣur-s. 17Năwwăḍ-in Yărussălam ɣas, ăsbărrăkăn-anăɣ dăɣ-s ayĕtma-năɣ dăɣ-ăddin s-tedăwit. 18Ăffăw, năddew d-Bulĕs s-ehăn wa n-Yaqub-i ɣur-ăžžimmăɣăn inušămăn n-ălkănisăt iket-năsăn. 19Nănmăjja dăr-săn isofan tĕzzar, illăɣăt-asăn Bulĕs isălan s-iyyăn-iyyăn n-a-wa ija Măssinăɣ iket-net jer-inĕẓẓulam s-ălxidmăt wa ija jere-săn. 20Ǝslăn i-isălan-en-dăɣ ɣas, ad-tiimĕlĕn Măssinăɣ. Ǝnnăn-as ḍarăt-a-wen: "Ă/n/na-năɣ Bulĕs, ĕnhĕy ɣas afḍăn făll-afḍăn n-kăl-Ălyăhud wi omănnen s-Măssinăɣ, ĕṭṭafăn iket-dăɣ-năsăn alkum i-alămăr wa n-Mosa dăɣ-isălan n-asĕmmili n-aratăn d-ălɣadatăn wi-iyyăḍnen; 21nĕssan a-s ămăra d-ĕslăn a-s dd-tosed, ilkam dăɣ-săn tĕnna n-hărăt ed ĕslăn a-s kăyy, tănimăšrayăd i-alămăr wa n-Mosa. 22Nărha fălla-k ămăra ad-tăn-tĕkkĕsăd dăɣ-tăqqăn n-eɣăf-ten-dăɣ. 23Ămăra, ăddăbara-nănăɣ hak da: hann-anăɣ ĕkkoẓ meddĕn ĕjjašnen ărkăwăl, 24idawnet dăr-k s-edăgg wa dăɣ-šašdajăn ăddinăt iman-năsăn, šĕšdĕjăd iman-năk dăr-săn, tĕkkĕsăd-asăn ehăre wa n-asĕttĕbĕlbĕl-năsăn, dihen, ad-ĕlmĕdăn ăddinăt a-s a-wa fălla-k itawănnen, wădden a ijan ed, a-wa mad-tĕjĕd, ăsijăyha a-s wăr tănmăšrăyăd i-alămăr wa n-Mosa. 25Dăɣ-isălan n-inĕẓẓulam wi s-ămăra, omanăn s-Ălmasex, nĕktab-asăn tăkarḍe n-tamătert dăɣ-hasăn-nĕnnă, wăr tăttănet isan ămoosnen takute i-ăṣṣănăm, wăr săssănet ašni, wăr tăttănet măɣsoy, ĕbḍĕwnet d-e d t-illăm a isamăḍasăn taɣĕssa." 26Ăffăw, ăddew Bulĕs d-meddĕn wi n-ĕkkoẓ, ijjăš dăr-săn edăgg wa n-tĕšĕdje, illăɣăt i-ăddinăt tăqqăn ta mad-sĕssikĕyĕn tĕzzar išdajăn, tĕzzar ăkt hak iyyăn dăɣ-săn făll-iman-net. 27Išwar imda ĕssĕboɣ wa n-tĕšĕdje-năsăn, ĕnhăyăn hărăt dăɣ-kăl-Ălyăhud n-ăkall wa n-Azya Bulĕs dăɣ-ehăn n-ămudd wa măqqărăn ɣas jăn-dd erk iman dăɣ-tamĕtte, toḍa fălla-s, 28saɣăren ăddinăt, jannen: "Ya kăl-Iṣrayil, ĕyyăwăt! Ǝnhĕywăt ăwadĕm-wa s-edăgg osa-dăɣ, išinmĕšrĕy tamĕtte-nănăɣ s-a-wa ixaṭṭăb făll-alămăr wa n-Mosa d-a-wa ijăn făll-ehăn n-ămudd wa măqqărăn, ĕnhĕywăt-ak, igla făw har dd-ăššojăš dăgg-Ălyunan iyyăḍ ehăn n-ămudd wa măqqărăn, ăsmăḍăs-t." 29Ǝnnăn a-wen făl-a-s innin, ĕnhayăn Tirfim wa n-Ifăsus ăddeew d-Bulĕs dăɣ-ammas n-aɣrĕm, ăɣelăn, ăššojăs-t-dd ehăn n-ămudd wa măqqărăn. 30Iwăs aɣrĕm-ĕnnin-dăɣ iket-net, tošăl-dd tamĕtte, ărmăsăn ăddinăt Bulĕs, ăšrăwrăwăn-t har t-ĕzzĕzjărăn ehăn n-ămudd tĕzzar, ăɣfălăn tishar-net ḍara-săn. 31Tattărăn iji n-iman-net dihen-dăɣ a-s osăn isălan n-tamdĕrwayt ta jat dăɣ-aɣrĕm kumănda wa ănnihăḍăn dăɣ-ĕssărdusa wi n-kăl-Roma hănen Yărussălam. 32Issăɣră-dd ălwăqq-wen-dăɣ kăbtănăn d-ĕssărdusa, ăddew dăr-săn šik s-tamĕtte. Tĕnhăy-t tamĕtte imal-dd ĕnta d-ĕssărdusa-net ɣas, ĕbḍăn d-Bulĕs. 33Ikkă-dd kumănda Bulĕs, omăr s-ad-dăɣ-s ĕtwĕjjĕnăt sănatăt tišĕm tĕzzar, issĕstăn-t d-ere wa ămoos d-a-wa iɣšăd. 34Tăsiɣărăt tamĕtte iket-net, hak ašrut-dăɣ wăr-oher d-amidi-net iɣăran, indăr i-kumănda ad-isĕl i-a-wa has-ijanna Bulĕs. Omăr ḍarăt-a-wen s-ad-ăttălwăy Bulĕs s-ehăn wa n-ĕlɣĕskăr. 35Ălwăqq wa d-itiwĕn Bulĕs asĕggaggĕn wa išijušăn ăwadĕm ehăn wa n-ĕlɣĕskăr, amsiwi a t-ĕjăn ĕssărdusa făl tĕssĕba n-ašunĕj-i-dăɣ săr-s tĕja tamĕtte i-ad-t-tănɣ. Issĕntă Bulĕs ujĕš n-ehăn, tĕzzăn săr-s tamĕtte har dd-ĕqqălăn ĕssărdusa jan-as afăraj. 36Tăsiɣărăt tamĕtte iket-dăɣ-net, janna: "Ămmătet, ămmătet." 37Ălwăqq wa d-ăbok Bulĕs ujĕš n-ammas n-ehăn wa n-ĕlɣĕskăr, innă i-kumănda: "Ak ăddobeɣ ad-hak-ănnăɣ hărăt meɣ?" Inn'-as kumănda: "Kăhh! Ɣas kăyy tĕssanăd Tălyunanit? 38Adiš kăyy, wădden u-Miṣra-wa s-a ăynayăn d-ăsfăllăg ĕkkoẓ afḍăn n-ăwadĕm wi has-ĕlkămnen s-tenere?" 39Inn'-as Bulĕs: "Năkk, ăgg-Ălyăhud, ĕweɣ dăɣ-taɣrĕmt ta n-Tarša dăɣ-teje ta n-Silisi, a-wen taɣrĕmt tĕlat isĕm. Ămăra, ărheeɣ dăɣ-k, ad-hi-tĕkfĕd turhajăt n-ad-ăjăɣ hărăt n-măjrăd i-tamĕtte-ta-dăɣ." 40Ikf'-e kumănda măjrăd ɣas, ibdăd Bulĕs, ikkă-dd tamĕtte, ibdăd făll-isĕgguggan n-ehăn, illăf i-tamĕtte i-ad-susĕm, tăssosăm. Immĕjrăd-asăn ălwăqq-wen dăɣ-Ɣăbranĕyya, tawalt ta-dăɣ ĕnkăsăn. Inn'-asăn:

will be added

X\