Ijităn n-inĕmmušal 20

1Tokăy tamdĕrwayt, sămmiḍ tanfust ɣas, issăɣră-dd Bulĕs inĕṭṭulab, ad-tăn-isamătar, isasmaḍ ulhawăn-năsăn, issĕllăm fălla-săn ḍarăt-a-wen, ikkă teje ta n-Masidunya. 2Issăɣlăy-dd dăɣ-s iket-net, isamătar imumĕnăn. Ifăl dihen, ikk' ăkall wa n-Ălyuna, 3ăssakăy dihen, kăraḍ orăn; ălwăqq wa d-itĕffal ăkall-en, ăkk wa n-Surya, ĕjjăšăn-t isălan n-taɣdărt ta s-ărhăn kăl-Ălyăhud ad-has-tăt-ĕjĕn ɣas, olăs uɣĕl n-teje ta n-Masidunya, 4ăddeew d-Subatir ăgg Birus wa n-aɣrĕm wa n-Biri, d-Aristarăq d-Skăndus wa n-Tăslonika d-Gayĕs wa n-Darba d-Timoti, d-Tušik d-Tirfim wa n-teje ta n-Azya. 5Ăzzarăn-as meddĕn-win-dăɣ, ĕqqălăn-asăn dăɣ-aɣrĕm wa n-Tărwas, 6okăy-anăɣ ămudd wa dăɣ-tattăn ăddinăt tijĕlwen ti wăr ha tăẓẓa ɣas, nĕjjăš turăft n-aman dăɣ-aɣrĕm wa n-Fĕlibb, năssakăy sĕmmos išilan făll-ejărew tĕzzar, năwwăḍ-tăn-in dăɣ-Tărwas-i-dăɣ năssakăy ĕssĕboɣ imdan. 7Ij'-anăɣ ašăl wa n-ălxad-i n-ašăl wa ăzzarăn dăɣ-ĕssĕboɣ dihen ɣas, năžžiimăɣ iket-nănăɣ, nĕtatt amĕnsi wa n-tasăktot šăddijăn. Issan Bulĕs, a-s ašăl wa ilkămăn i-wen, iglă. Dăɣ-tĕssĕba n-a-wen-dăɣ a făl ăssakăy ehăḍ-wen-dăɣ, ădiwănnăt d-imadhalăn-net d-ăddinăt. 8Năžžiimmăɣ iket-nănăɣ făll-afălla n-ehăn n-soro ăsimălăwlăwnăt tiftĕl ăjjootnen, 9ădiwănnăt Bulĕs i-ălžămaɣăt dihen-dăɣ, a-s ija a-wen-dăɣ, ăsihătăl ămawaḍ s-isĕm-net Itikus făll-fĕnetăr ămerăn. Ămmiijrăd Bulĕs ehăḍ-en-dăɣ a-s hin-ilɣăd eḍĕs Itikus, ătrăkkăt-dd făll-afălla n-soro wa s-kăraḍ. A-s săr-s dd-ăzzubben imumĕnăn, ĕjmaḍăn-t iman. 10Ăzzubbăt-dd săr-s Bulĕs ĕnta-dăɣ, ibdăd jĕnnĕj-s, irmăs-t-dd s-ăfuss tĕzzar, innă i-ăddinăt: "Ănset ĕnniyăt-năwăn, iddar." 11Iqqăl ḍarăt-a-wen afălla n-ehăn, ăẓun amĕnsi wa n-tasăktot šăddijăn, olăs-asăn edăwănne har tănfărarăw tifawt. 12Iqqăl ămawaḍ ĕnta ehăn-net, iddar-iɣlas. Ămoos a-wen ĕssĕbab n-tedăwit ăssismăḍăn ulhawăn n-tamĕtte iket-net. 13Năzzar năkkăneḍ i-Bulĕs, nĕjjăš turăft n-aman, nĕkka Asus-i dăr-s nohăr ed, ăssof ĕnta ad-ăj asikĕl-en făll-iḍarăn-net. 14Iwwăḍ-anăɣ-dd dăɣ-Asus ɣas, nămohăr dăr-s asikĕl har năsjăn dăɣ-Mittilăn, 15nokăy ašăl wa iyyăḍăn s-Šayo, tĕzzar, nokăy s-Samos d-Milati. 16Ăssof Bulĕs ad-wăr-immer aɣrĕm wa n-Ifăsus i-ad-wăr t-ăwweɣăn dăɣ-s ăddinăt wi n-teje ta n-Azya ed, ărorăd Yărussălam i-ad-dăɣ-s isĕssikĕy ămudd wa n-Fantăkawt. 17Ălwăqq wa d-năsjăn dăɣ-Milati, ăssoka Bulĕs inušămăn n-ălkănisăt ta n-Ifăsus. 18Osăn-t-dd ɣas, inn'-asăn: "Tĕssanăm kăwăneḍ iman-năwăn tămudre ta ĕṭṭăfăɣ ɣur-wăn dăɣ-a-wa ĕkkăsăɣ ĕlleɣ jere-wăn ašăl wa d-kăwăn-dd-oseɣ dăɣ-teje ta n-Azya, 19tĕssanăm ĕmmĕk wa s-ăsrăsăɣ iman-in data-wăn dăɣ-ălxidmăt wa heɣ i-Emăli. A-wen, jeɣ-t s-imeṭṭawăn d-ahănay n-talɣiwen sămumnen săr-i dd-orawăn kăl-Ălyăhud. 20Tĕssanăm daɣ a-s wăr t-illa a hawăn-ĕffarăɣ, ăxṭăbăɣ-awăn, ĕssăɣrăɣ-kăwăn dăɣ-ihănan-năwăn hakd tifărrawen a-wa hawăn-iha ălfăyda iket-net, 21wăr kăla hi-okăy ašăl d-wăr-ăsmătărăɣ kăl-Ălyăhud hakd inĕẓẓulam d-ad-utabăn i-Măssinăɣ, ĕjĕn immun-năsăn dăɣ-Emăli Ɣisa. 22Ămăra năkk da-hi, izzĕlzăm Unfas Šăddijăn tikawt n-Yărussălam, wăr-ĕssenăɣ a hi-iqqălăn dăɣ-s 23măšan, ikkas-ahi Unfas Šăddijăn dăɣ-taɣdărt n-a-s taɣrĕmt oseɣ-dăɣ, ăjăɣet făll-ujĕš n-tišĕm d-ahănay n-aɣăna. 24Diha t-ĕlleɣ, wăr-ĕjeɣ tămudre-nin hărăt, wăr fălla-s ărmeɣăɣ ed, wăr hĕnnĕyăɣ a săl ittus wa s-ošalăɣ i-ad-hin-sĕssiwĕḍăɣ amăšal wa hi-issăɣlăf Emăli Ɣisa, ăxṭĕbăɣ isălan n-Ălĕnžil-i hăn isălan n-ănnuɣmăt n-Măssinăɣ. 25Ămăra, kăwăneḍ-i jer-ăxṭăbăɣ isălan n-Tĕmmĕnĕya n-Măssinăɣ, ĕssanăɣ a-s ăbas ilkam ad-tĕnhayăm idĕm-in, 26ĕkkasăɣ-kăwăn dăɣ-taɣdărt iket-dăɣ-năwăn, ăbas dăɣ-i ĕḍmanăn iman-năwăn ed, a-wa ămoosăn ălmăɣna n-ĕlɣĕllas n-Măssinăɣ wa hawăn-irha, 27ĕssăɣrăɣ-kăwăn tayĕtte-net iket-net, wăr dăɣ-s-in-oyyeɣ hărăt. 28Ămăra, ăjăt ĕnniyăt i-iman-năwăn, tagĕẓăm daɣ ălžămaɣăt n-imumĕnăn wa kăwăn-issăɣlăf Unfas Šăddijăn, umasăt šund imăḍanăn ăɣdalnen, agĕẓăt ălkănisăt n-Măssinăɣ ta ikfă iman-net s-ašni-net wa inɣălăn. 29Ǝssanăɣ a-s afăl kăwăn-ĕfălăɣ, ad-jere-wăn dd-ĕlmumĕsnăt tiɣĕs wăren-e-aḍĕn tăhanint i-tahrut ta n-imumĕnăn. 30Ad-kăwăn-dd-ĕzjărăn meddĕn n-inĕsbuha maden-ĕttăr ere ăslălăn ḍara-săn, 31a-wen-dăɣ a făl, ăjăt ĕnniyăt, ĕktĕwăt-dd a-s kăraḍ iwĕtyan-wi ĕkkăsăɣ jere-wăn, ehăḍ d-ašăl, samătarăɣ-kăwăn s-iyyăn-iyyăn, dehiyyăn făw, imeṭṭawăn a-s jeɣ a-wen. 32Ămăra, ayĕtma, ăssiiɣlăfăɣ-kăwăn i-Măssinăɣ d-ănnuɣmăt n-măjrăd-net, Măssinăɣ a ilan tărna n-ad-kăwăn-isĕdwĕl dăɣ-immun-năwăn, isĕtbĕt tăkasit ta itwăr i-imĕššeddĕjăn iket-dăɣ-năsăn. 33A-s t-ĕlleɣ jere-wăn, wăr-ăsdărhănăɣ aẓrĕf wăla orăɣ wăla isĕlsa n-wăl' iyyăn dăɣ-wăn, 34sĕjrăhăt ifassăn-in, tĕssanăm kăwăneḍ iman-năwăn a-s ifassăn-in a-s ăxdămăɣ i-a-wa s-ămiɣatărăɣ, năkk d-meddĕn-wi dăr-i ăddewnen, 35ĕssĕknăɣ-kăwăn hak ašăl a-s a-wen-dăɣ a-s tĕlam s-ad-t-tĕjĕm i-ad-tĕdhĕlăm tilăqqiwen. Ǝktĕwăt-dd a-wa innă Emăli Ɣisa a-s innă: 'Ojăr ălxer ihăn isuf uhĕn ajăraw.' " 36Issĕmdă Bulĕs d-timtăr-tin-dăɣ ɣas, ărkăɣăn iket-dăɣ-năsăn, ad-hasăn-itĕddal Măssinăɣ. 37Hallăn iket-dăɣ-năsăn, tikrirĕyăn dăɣ-s, tisĕsăn-t dăɣ-idmarăn-năsăn, 38ăsniinăn iman-năsăn făll-a-wa s-hasăn-innă, ăbas ilkam ad-t-ĕnhayăn. Ăssofăḍăn-t-in ḍarăt-a-wen hundăɣ har ijjăš turăft n-aman tĕzzar, ĕqqălăn.

will be added

X\