Ijităn n-inĕmmušal 2

1A-s dd-iwwăḍ ašăl n-ămudd n-kăl-Ălyăhud wa s-itawănna Fantăkawt, ăžžiimmăɣăn inĕṭṭulab iket-dăɣ-năsăn dăɣ-iyyăn n-edăgg. 2Wăla a hin-ĕjrăhăn a-s dd-ifăl emăsli iyyăn olăhăn d-i n-tamăḍalt tăṣṣoohet išĕnnawăn, ănhăynăhăy edăgg-ĕnnin-dăɣ dăɣ-ăqqiimăn iket-net; 3ibdăd-dd făll-hak iyyăn dăɣ-săn a olăhăn d-ilsawăn n-imămmălăn n-efew ĕbḍanen, 4iḍnăy-tăn Unfas Šăddijăn ălwăqq-wen-dăɣ, ad-tamăjradăn awalăn ăynaynen s-ĕmmĕk wa s-hasăn-issărɣăs Unfas turhajăt n-a-wen. 5A-s ităjj a-wen-dăɣ, ăhhujjăjăn-dd kăl-Ălyăhud ăjjootnen ăddinnen s-Yărussălam, wăr t-illa ăkall s-wădden falăn-t-dd. 6Tĕslă tamĕtte n-aɣrĕm i-emăsli wa ijăn, tošăl-dd iket-net s-edăgg wa dăɣ-ija, tĕjraw-tăt tăkunt n-emăsli-wa-dăɣ d-a-wa s-hak ăwadĕm-dăɣ, isall i-inĕmmušal ămmijrădăn tawalt n-ăkall-wa-dăɣ dd-ifăl. 7Ǝqqălăn-dd ăddinăt ɣas, oran imawăn, tĕjraw-tăn tăkunt, jannen: "Kăhh! Wi ăddinăt hanăɣ-ămmiijrădnen, ajăn wădden teje ta n-Galila a tăn-lăt? 8Ma n-ĕmmĕk n-a-s hasăn-nĕsall ămmiijrădăn tawalen-nănăɣ? 9Han-anăɣ ăddinăt dd-falnen Bartas, Midyas, Ilam, Mizĕbbuṭamya, Ălyăhudĕyăt, Kafadusya, Fon, Azya; 10Frižya, Banfilya, Miṣra, Libya, Qĕrwan, Roma, 11iyyăḍ dăɣ-năɣ kăl-Ălyăhud s-alăṣăl, iyyăḍ inalkimăn n-ăddin wa n-kăl-Ălyăhud, iyyăḍ dăɣ-năɣ kăl-Kritus, iyyăḍ Arabăn; măšan, nĕsall'-asăn iket-dăɣ-nănăɣ tiimĕlĕn tihusay n-ijităn n-Măssinăɣ dăɣ-tawalen-nănăɣ." 12Ǝqqălăn-dd ăddinăt ɣas oran imawăn, iqqan a-wa ijăn iɣăfawăn-năsăn, tinmĕnnin: "Ma ămoos ălmăɣna n-a-wa-dăɣ?" 13Ǝggădăn-dd iyyăḍ, jăn inĕṭṭulab tekăškăšt, ad-jannen: "A-di, asmĕd a dăɣ-ăyyiwănăn." 14Ibdăd-dd Bĕṭrus jer-imidiwăn-net wi n-măraw d-iyyăn, iḍkăl emăsli-net, innă i-tamĕtte: "Meddĕn, kăwăneḍ-i n-imĕhhujjaj, kăwăneḍ-i n-kăl-Ălyăhud ĕzzăɣnen Yărussălam, săjdăt-ahi iket-dăɣ-năwăn, tĕjrăhăm a-wa hawăn-e-ănnăɣ dăɣ-ălmăɣna n-a-wa ijăn jere-wăn ašăl-i-dăɣ. 15Wădden a-wa tordăm a ijan, meddĕn wi hannăyăm, wăr-ĕswen asmĕd dăɣ-săn ikkasăn ĕnniyăt, wăr-ămmukkăn a-wen ed agdĕlset-dăɣ iket ija. 16A-wa ijăn ašăl-i-dăɣ, wăr-ămoos ɣas ar tasĕtbat n-a-wa inn' ănnăbi Yuwil ăzzăman wa d-ălolăy, innă; innă Măssinăɣ: 17'Ǝnta da a-wa ilkămăn dăɣ-išilan wi dd-malĕnen, A dd-zĕzzubbuɣ Unfas-in făll-e d t-illăm ăgg-adĕm, ad-ăkfăɣ măjrăd-in mĕdda-wăn d-ešše-wăn, sĕssiwĕḍăn-t-in dăgg-adĕm, ad-dd-ĕnfilĕlĕn hărătăn ăttunkălnen i-imawaḍăn-năwăn, ĕhhĕrjun imɣarăn-năwăn tikunen; 18išilan-en, a dd-zĕzzubbuɣ Unfas-in făll-eklan-in d-tiklaten-in, ĕlulĕyăn iket-năsăn. 19Ad-dd-ĕjmăḍăn hărătăn ăssuksăḍnen išĕnnawăn, ăjăɣ ijităn n-Măssinăɣ făll-ărori n-ăkall, inɣĕl ašni, ărɣ efew, inkăr ăho s-išĕnnawăn. 20Ad-tămaɣăy tăfukt, ĕjĕnăt tihay, išwaɣ ewăr šund ašni tĕzzar, ass-dd ašăl wa măqqărăn n-ălxurmăt iɣtăs Emăli. 21Ašăl-en, ere iɣrăn isĕm n-Emăli i-tinahăɣen, ad-iɣlĕs.' 22Ya kăl-Iṣrayil, săjdăt i-isălan-wi-dăɣ: Ɣisa wa n-Năṣirăt, tĕssanăm kăwăneḍ iman-năwăn a-s ăhalĕs ăsinăfrăn Măssinăɣ a ămoos, issĕtbăt a-wen dat-tiṭṭawen-năwăn s-tikunen d-tišušab d-ijităn n-Măssinăɣ wi ija jere-wăn, 23dăɣ-a-wa ităjj Măssinăɣ d-tĕllulĕya-net, oyy'-iwăn tărmăsăm-t, jăm iman-net s-ifassăn n-inĕẓẓulam wi t-ĕṣlăbnen făll-tajĕttewt; 24tidĕt, ămmut măšan, ikkăs-t-dd Măssinăɣ dăɣ-tamăttant ta t-tĕẓbăbăt, ed wăr t-illa ĕmmĕk s-t-tĕṭṭăf dăɣ-tišĕm-net. 25Isălan n-a-wen-dăɣ a dăɣ-ălolăy ănnăbi Dawĕd a-s innă: 'Hannăyăɣ hak ăssaɣăt Emăli dat-i; iwar aɣil-in i-ad-ozja ĕnniyăt-in. 26Ăsidăwăt a-wen ulh-in, olwa ilĕs-in ed jarăɣ ăṭṭăma n-ad-tăns tafĕkka-nin dăɣ-ălxer, 27wăr-e tĕyyĕd iman-in ĕnsan dăɣ-ider n-ăkall, wăr-e tĕyyĕd Emĕššeddĕj-năk rakkăh tafĕkka-net dăɣ-aẓĕkka. 28Kăyy a hi-issĕknăn tabarăt ta ha tămudre, sămmeḍ ulh-in, ăddiwăt ed tĕlled-t edes-in.' 29Meddĕn, kăwăneḍ-i n-ayĕtma-ɣ, ĕkkasăɣ ăššăk dăɣ-a-wa hawăn-janneɣ: Amɣar n-amăzzaɣ Dawĕd, ăba-t, iẓka; aẓĕkka-net daɣ har ašăl-i-dăɣ, ill'-e diha-dăɣ jere-năɣ. 30Ǝnta-i n-ănnăbi, issan făll-ărkăwăl wa has-ihăḍ Măssinăɣ a-s has-innă: 'Ilkam ad-isĕbdĕd dăɣ-edăgg-net iyyăn dăɣ-ihăyawăn-net dăɣ-tĕmmĕnukĕla.' 31A-s ijănna Dawĕd a-wen, ihannăy dăɣ-ijĕj tanăkra n-Ălmasex jer-inĕmmuttan ed ăru d-ălolăy Dawĕd dăɣ-isălan n-a wa s-ilkam ad-ăj. Ǝnta-en-dăɣ a dăɣ-ăssewăl Dawĕd a-s innă: 'Wăr-e tĕyyĕd tafĕkka-nin tĕjar-in dăɣ-aẓĕkka, wăr-e tĕyyĕd tafĕkka-nin rakkăh dăɣ-aẓĕkka.' 32Ɣisa-i s-hawăn-heɣ isălan-net, năjjĕyha i-asĕnkar wa t-dd-ija Măssinăɣ jer-inĕmmuttan tĕzzar 33iḍkăl-t s-išĕnnawăn, ăsɣăym'-e daw-aɣil-net i-ad-imnukĕl, ikf'-e Abba Unfas Šăddijăn wa s-ijjăš ărkăwăl-net, ăzzăbbăt-t-dd daɣ fălla-năɣ, ăsnăflăy-anăɣ dăɣ-s, ĕnta-den-dăɣ a-wa dd-orăwăn a-wa s-săllăm d-a-wa hannăyăm ašăl-i-dăɣ. 34Ănnăbi Dawĕd ya, tĕssanăm a-s wăr-immĕḍkăl s-išĕnnawăn ed ĕnta iman-net a innăn: 'Innă Emăli Măssinăɣ i-Emăli-nin: Ǝyyăw, ɣayĕm, tăxkĕmăd daw-aɣil-in 35hundăɣ har ăjăɣ išĕnja-năk isĕkkukal daw-iḍarăn-năk.' 36Ašăl-i, ĕlmĕdnet kăl-Iṣrayil iket-dăɣ-năsăn a-s Ɣisa wa tĕṣlăbăm făll-tajĕttewt, ĕnta a ija Măssinăɣ Emăli d-Ălmasex!" 37Iḍăs măjrăd wa ija Bĕṭrus ulhawăn n-ăddinăt wi has-ăsijădnen, ĕnnăn-as ĕnta d-inĕmmušal wi iyyăḍnen: "Ayĕtma-năɣ, ma hanăɣ-iwarăn?" 38Inn'-asăn Bĕṭrus: "Utabăt, tĕtwĕsĕlmăɣăm iket-năwăn dăɣ-aman s-isĕm n-Ɣisa Ălmasex, i-ad-tĕjrĕwăn tenăšše n-ibăkkaḍăn-năwăn, ăkf'-iwăn Măssinăɣ Unfas Šăddijăn, 39ed ărkăwăl wa ijjăš Măssinăɣ, kăwăneḍ d-ihăyawăn-năwăn d-ăddinăt wi ĕzzăɣnen dăɣ-ijĕj, d-e d t-illăm ere dd-iɣra Emăli-nănăɣ Măssinăɣ s-iman-net a-s t-ija." 40Ij'-asăn Bĕṭrus isălan ăjjootnen, isatbat hărătăn data-săn, isamătar-tăn, ijann'-asăn: "Agĕẓăt iman-năwăn dăɣ-ĕzzurĕyăt-ta-dăɣ tĕfrăɣăt." 41Ăddinăt wi omănnen s-a-wa ătwănnăn, ătwăsălmăɣăn dăɣ-aman; ămoos a-s, kăraḍ afḍăn n-ăwadĕm ašăl-wen-dăɣ a dd-ĕwwăḍnen făll-imumĕnăn. 42Ǝkfăn imumĕnăn iket-dăɣ-năsăn iman-năsăn i-a-wa tăn-săɣren inĕmmušal, oharăn ittus, tuẓanăn amĕnsi wa šăddijăn n-tasăktot, tĕddalăn Măssinăɣ. 43Tĕjjăš tuksĕḍa n-Măssinăɣ tamĕtte iket-net, făl-a-s tamašalăn inĕmmušal tišušab d-ijităn n-Măssinăɣ ăqqannen eɣăf. 44Ănimăṭṭafăn imumĕnăn iket-dăɣ-năsăn jer-iman-năsăn, ĕzzaɣăn iyyăn n-edăgg, tihĕrĕn a-wa ĕṭṭăfăn, 45žănš'-en-in a-wa lăn dăɣ-ehăre, ad-tuẓanăn ălqim-net s-a-wa dăr-ogdăhnăt timɣutar n-hak iyyăn dăɣ-săn. 46Ăkoyădăn hak ašăl s-iyyăn n-ĕnniyăt dăɣ-ažĕmmăɣ dăɣ-tĕfărre n-ehăn n-ămudd wa măqqărăn, tihĕrĕn imĕnsiwăn dăɣ-ihănan-năsăn s-iman ăddiwătnen; a-wa tăjjăn iket-net, il' ĕmmĕk, 47tiimĕlĕn Măssinăɣ, ăssiimɣărăn-tăn ăddinăt iket-năsăn. Isawaḍ-dd Emăli hak ašăl făll-ălžămaɣăt-năsăn ăddinăt wi iɣallăs.

will be added

X\