Ijităn n-inĕmmušal 19

1Ăzzăman-wen-dăɣ d-iha Ăbbăloš Kurĕnta, ad-ijlăy Bulĕs ejărew s-afălla n-ăkall, ikka Ifăsus. Ijrăw dihen hărăt dăɣ-inĕṭṭulab, 2inn'-asăn: "Ak kăwăneḍ, a-s tomănăm, tĕjrăwăm Unfas Šăddijăn?" Ǝnnăn-as: "Wăr kăla nĕslă făw a-s t-illa a-s itawănna Unfas Šăddijăn." 3Inn'-asăn: "Adiš ma ămoos asĕlmaɣ wa hawăn-ătwăjjăn?" Ǝnnan-as: "Asĕlmaɣ wa n-Exya." 4Inn'-asăn Bulĕs: "Exya, issĕlmăɣ tamĕtte dăɣ-aman i-ad-umas a-wen ašămol n-tătubt-năsăn măšan, illăɣăt i-ăddinăt a-s ilkam iyyăn wăr-ămoos, a-wen a t-ămoosăn Ɣisa, ĕnta-en-dăɣ a-s lan ăddinăt ad-săr-s amĕnăn." 5Ǝslăn meddĕn-en i-măjrăd-wen-dăɣ ɣas, ĕttărăn ad-ĕtwĕsĕlmăɣăn dăɣ-aman s-isĕm n-Emăli Ɣisa. 6Ăswăr-tăn Bulĕs ḍarăt-a-wen ifassăn-net, ăzzubbăt-dd Unfas Šăddijăn fălla-săn, ad-tamăjradăn tawalen ăynaynen, tamajradăn dăɣ-isălan n-Măssinăɣ. 7Meddĕn-en, măraw-essăn d-ĕssin. 8Itakk Bulĕs ehăn n-ăddin wa n-kăl-Ălyăhud, ixaṭṭăb dăɣ-s tidĕt s-ăṣṣahăt har ăssakăy dihen kăraḍ orăn, itidwĕnnit d-ăddinăt, isatbat-asăn isălan wi n-Tĕmmĕnĕya n-Măssinăɣ. 9Măšan, ăsɣărăn iyyăḍ dăɣ-săn ulhawăn-năsăn, unjăyăn omănăn s-a-wa ijanna, ĕglăn făw har jannen a lăbasăn făll-tabarăt-ta-dăɣ s-ităjj Bulĕs isălan-net dat-tamĕtte. Ikkăs-dd Bulĕs iman-net dăɣ-săn, ad-isaɣra hak ašăl inĕṭṭulab dăɣ-lăkkol n-ăddin ora ăhalĕs s-isĕm-net Tiranus. 10Išl'-e a-wen-dăɣ dihen har ĕssin iwĕtyan, ĕmmĕk-wen-dăɣ a-s ĕslăn kăl-Azya iket-năsăn i-măjrăd n-Emăli jer-wi n-kăl-Ălyăhud-năsăn hakd-dăɣ wi n-kăl-Ălyunan. 11Itajj Măssinăɣ s-ifassăn n-Bulĕs tikunen ăjjootnen, ăqqannen eɣăf, 12tišĕlĕn-dd ăddinăt săr-s, tazăwen imălsan d-ikăršăyăn t-ḍasnen, sănsen-tăn făll-imarhinăn, tazzăyăn, zajjărăn daɣ alšinăn imĕlšan. 13Ǝggădăn-dd imăssăxărăn n-kăl-Ălyăhud takkănen jer-ikallăn, ad-ɣarrăn ĕntăneḍ-dăɣ făll-imĕlšan isĕm n-Emăli Ɣisa-wa ixaṭṭăb Bulĕs. 14Meddĕn-wi išla a-wen-dăɣ, ĕssa-essăn, abba-năsăn u-tikutawen s-isĕm-net Žibba. 15E-d ĕttărăn teɣăre n-isĕm n-Ɣisa făll-imĕlšan, ad-hasăn-ănn alšin: "Năkk ya ĕzzaɣăɣ Ɣisa, ĕssanăɣ daɣ a-wa ămoos Bulĕs-i t-ixaṭṭăbăn măšan kăwăneḍ, mi tămoosăm?" 16Oḍa fălla-săn amălšon iyyăn, iknăs-tăn ed irn'-en ăṣṣahăt, ikn'-en asĕlmaḍ hundăɣ har a-s ĕzjărăn ehăn-en-dăɣ, ĕzzafăn, šarăn. 17Ǝslăn kăl-Ălyăhud hakd kăl-Ălyunan-wi hănen Ifăsus i-isălan-en-dăɣ ɣas, ărmăɣăn ad-samɣarăn isĕm n-Emăli Ɣisa. 18A dd-tisĕn ăddinăt ăjjootnen omannen s-Măssinăɣ, safăkkarăn-dd terk timašalen-năsăn. 19Ăwwăyăn-dd imăssăxărăn ăjjootnen ĕlkĕttabăn-năsăn, ad-tăn-sarɣen dat-tamĕtte iket-net, ăḍkăḍăn ălqim n-a-wen-dăɣ irɣăn, osăn-t, iwwăḍ sĕmmosăt timĕrwen n-efăḍ n-ărriyal n-aẓrĕf. 20Ǝmmĕk-wen-dăɣ a-s tĕntăm tărna n-Măssinăɣ d-ăṣṣahăt n-măjrăd n-Emăli dăɣ-ulhawăn n-ăddinăt, ad-nattăjăn daɣ isălan-net. 21Ijjăš-dd ḍarăt-a-wen ĕnniyăt n-Bulĕs tărha n-ad-ijlĕy Masidunya d-Akaya, ăkk Yărussălam, ijanna dăɣ-iman-net a-s afăl-hin-iwwăḍ dihen, ad-ittăr ĕmmĕk s-ikka Roma. 22Ăšmašăl Timoti d-Errast wi n-imadhalăn-net s-Masidunya, ija ĕnta ăzzăman dăɣ-Azya. 23Ăzzăman-en-dăɣ ad-tĕja tamdĕrwayt măqqoorăt făl tĕssĕba n-tabarăt n-Emăli-ta isaɣra Bulĕs. 24Iggăd-dd enhăḍ iyyăn s-isĕm-net Dimitrus, ikanna ăṭṭăṣwerăn n-aẓrĕf făll-ăṣṣiwwwăr idĕm n-temălit tiyyăt s-isĕm-net Artamis, ămoos a-wen a ih' ălfăyda măqqoorăn i-inhăḍăn ed, itiirĕw-dd săr-săn ehăre n-tikunen. 25Ăsdăw-dd inhăḍăn-wi dăr-ohăr ălxidmăt, inn'-asăn: "Meddĕn, nĕhlăk, tĕssanăm a-s ălxidmăt-nănăɣ, a-s terše-nănăɣ, wădden hannăyăm, sallăm daɣ dăɣ-Ifăsus hakd-dăɣ dăɣ-Azya iket-net a-s Bulĕs-wa-hi, 26ăsmăttăy tamĕtte tăjjeet ed edăgg osa-dăɣ, ad-dăɣ-s ănn a-s: 'Imakrašăn wi nĕkann s-ifassăn-nănăɣ, mălayăɣna ɣas.' 27Ămoos-anăɣ a-wa t-išlăn săbxas, ămoos-t daɣ i-ehăn n-ămudd wa n-Artamis făl-a-s išwar ăba s-tăt-ăssimɣărăn ăddinăt wi tăt-ɣabbădnen dăɣ-Ifăsus d-ikallăn n-ăddunya wi iyyăḍnen." 28Ǝslăn i-a-wen ɣas, ijjăš-tăn aḍkăr, ad-saɣăren dăɣ-išĕnnawăn, jannen: "Artamis ta n kăl-Ifăsus, ĕnta a-s măssa-năɣ ta tojărăt dăɣ-išĕnnawăn d-ăkall." 29Ămdărwăy aɣrĕm iket-net, ad-dd-tidaw tamĕtte s-ehăn wa n-ăddăl d-iẓĕjraẓ. Tĕzzăn tamĕtte s-Gayĕs d-Aristarăq wi n-Masidunya n-imidiwăn n-Bulĕs dăr-ohăr asikĕl, ĕlwăyăn-tăn. 30Ittăr Bulĕs ĕnta-dăɣ ad-ăkk ehăn wa n-ăddăl d-iẓĕjraẓ măšan, ĕgdalăn-as inĕṭṭulab s-a-wen, 31ăsmătărăn-t daɣ imizărăn n-Azya n-imidiwăn-net t-ĕllanen dihen-dăɣ d-ad-wăr-ikka ehăn-en. 32A-s ităjj a-wen-dăɣ, tăseɣărăt tamĕtte dăɣ-išĕnnawăn, ămidărwăy a-wen-dăɣ iket-net s-iɣăran, wăr t-illa-i s-olăhăn iɣăran-net d-wi n-amidi-net, făl-a-s tĕššĕm n-tamĕtte-ten-dăɣ, wăr tĕssen wăla-dăɣ ăddălil n-tamdĕrwayt-ta-dăɣ tĕjăt. 33Ǝmhălăn-dd kăl-Ălyăhud ăhalĕs s-isĕm-net Ălxaḍer i-ad-imĕl dat-tamĕtte, jăn-as isălan n-a-wa ijăn, ăstafăy-asăn i-ad-hasăn-ămmăjrăd 34măšan, tĕlmăd tamĕtte a-s i n-kăl-Ălyăhud ɣas, ad-saɣăren, jannen: "Artamis ta n-kăl-Ifăsus, ĕnta a-s măssa-năɣ ta tojărăt dăɣ-išĕnnawăn d-ăkall." Tăseɣăyya tamĕtte s-ĕmmĕk-wen-dăɣ hundăɣ har okăyăn ĕssin ăssaɣătăn. 35Iggăd-dd ălmer n-aɣrĕm wa n-Ifăsus, ad-isasmaḍ tamĕtte, ijann'-as: "Ya kăl-Ifăsus, mi wărăn issen dăɣ-ăddunya a-s năkkăneḍ-i-dăɣ n-Ifăsus a iɣlafăn ehăn wa-dăɣ titwăɣbid Artamis ta tojărăt, ĕnta d-tele-net ta tăṣṣiwwărăt dăɣ-tăhunt ta dd-tătrăkket dăɣ-išĕnnawăn? 36Ɣas, šămad a-wen, wăr t-ih' ăššăk, adiš, sănsăt ĕnniyăt-năwăn, wăr tăjjăt a išlayăn, 37meddĕn-wi dd-tăwwăyăm, wăr-ăskafărăn, wăr-ĕnnen daɣ a lăbasăn făll-măssa-năɣ, 38kunta ăɣšadăn a lăbasăn i-Dimitrus d-imidiwăn-net, adiš, ĕqqĕlnet i-išilan wi dăɣ-itaɣătăs ăššăreɣa ed, ĕllan-t ălqa/l/lităn i-a-wen, ĕškĕwnet săr-săn; 39kunta daɣ tăsiwărăm-tăn uḍlem săl wen-dăɣ, ad-itwăɣtĕs ăššăreɣa-net dăɣ-ălžămaɣăt wa ilăn s-a-wen. 40Afăl wăr nĕlkem i-ăddăbara-wen-dăɣ, ad-hanăɣ-isĕwăr ĕlxĕkum uḍlem ed ažĕmmăɣ-nănăɣ ămăra-dăɣ, wăr-ila ăddălil." 41Innă ălmer a-wen ɣas, innă i-tamĕtte, ad-tămmăhăš.

will be added

X\