Ijităn n-inĕmmušal 18

1Ifăl Bulĕs Atinya ḍarăt-a-wen, ikkă aɣrĕm wa n-Kurĕnta. 2Ămmoqqăs dihen d-ăgg-Ălyăhud n-ăkall wa n-Fon s-isĕm-net Akilas. Iket-dd ifăl Iṭali ĕnta d-hănne-s s-isĕm-net Briska făl-a-s ăzziizjăr-dd ămănokal n-ăkall Kĕlod alămăr dăɣ-iktab a-s, ĕzjărnet kăl-Ălyăhud iket-năsăn Roma. 3Ămedăw Bulĕs d-Akilas ed oharăn ălxidmăt wa n-iji n-ihĕktan. 4Hak ĕssĕbĕt-i n-tăsonfat, isatbat Bulĕs isălan i-ăddinăt dăɣ-ehăn n-ăddin i-kăl-Ălyăhud hakd-dăɣ kăl-Ălyunan. 5Iwwăḍ-dd Sillas d-Timoti Bulĕs, falăn-dd Masidunya ɣas, oyyă iji n-ihĕktan, ikfă iman-net axăṭab n-măjrăd n-Măssinăɣ, itajăyha i-kăl-Ălyăhud a-s Ɣisa a-s Ălmasex. 6Ăšmăšăkken a-wa hasăn-ijanna, ad-sikuforăn. Ibbĕkbăk Bulĕs isĕlsa-net, inn'-asăn: "Ǝḍmanăn dăɣ-wăn iman-năwăn, ăbas dăɣ-i ĕḍmanăn, ămăra, inĕẓẓulam a-s e-ĕnnăḍăɣ, ăjăɣ-asăn isălan." 7Ifăl Bulĕs dihen, ikk' ehăn n-ăhalĕs s-isĕm-net Titus Istus, ănaɣbad n-Măssinăɣ s-ănimăltaɣ ehăn-net d-wa n-ăddin. 8Dăɣ-a-wen-dăɣ, ad-omăn Krisbus wa n-ălfăqqi n-ehăn n-ăddin s-Emăli ĕnta hakd d-ejădăš-net d-kăl-Kurĕnta ăjjootnen ăsijădnen i-Bulĕs; omănăn, ad-titwĕsĕlmiɣăn dăɣ-aman. 9Ehăḍ iyyăn, ănfalăl-dd Emăli i-Bulĕs, inn'-as: "Bulĕs, wăr kăy-isărmaɣet hărăt, măjrăd, wăr tăssosămăd, 10ĕlleɣ-t edes-hak, ĕdhalăɣ-kăy, wăr t-illa ere hak madăn-iɣšĕd hărăt făl-a-s leɣ tamĕtte tăjjeet s-ărheeɣ ad-tăt-ăɣlĕsăɣ dăɣ-aɣrĕm-wa-dăɣ." 11Izzăɣ Bulĕs dihen har ija awătay d-săḍis orăn, isaɣra ăddinăt măjrăd n-Măssinăɣ. 12Ăzzăman wa d-ămoos Galyon gĕfar n-Akaya, ănmănnakăn kăl-Ălyăhud făll-Bulĕs, ăɣrăn-t s-ălqa/l/lităn i-ad-t-ĕšrăɣăn. 13Ăswărăn-t uḍlem dat-gĕfăr, ĕnnăn-as: "Ăhalĕs-i, isaɣra ăddinăt ălɣibadăt n-Măssinăɣ s-ălɣadăt ănimăšrayăn i-a-wa innă alămăr." 14Ittăr Bulĕs ad-arr emm-net i-ad-ămmăjrăd ɣas, innă Galyon i-kăl-Ălyăhud: "Ǝnnăr anmĕšri i-ăššăreɣa meɣ erk ămašal a făl hi-dd-tĕkkăm i-ad-hawăn-arăɣ ăššăreɣa-net, ăjăɣ-awăn-t 15măšan, šămad a-wa tamădašt jat fall-tijĕttewen n-teɣăre-năwăn d-ismawăn wi ĕktăbnen dăɣ-alămăr-năwăn, wăr-ărheɣ ad-umasăɣ ălqa/l/li-năwăn dăɣ-isălan-win-dăɣ, ĕšrăɣăt-tăn kăwăneḍ iman-năwăn." 16Ăsfăl-tăn Galyon ehăn wa n-ăššăreɣa ḍarăt-a-wen. 17Tĕzzăn tamĕtte iket-net s-Sustin wa n-ălfăqqi n-ehăn n-ăddin, ad-t-tĕggatăn dat-ălqa/l/lităn măšan, wăr t-illa a hasăn-inna Galyon wa n-gĕfăr. 18Ăhoja Bulĕs dăɣ-Kurĕnta tĕzzar, ăssăllăm făll-imumĕnăn, ĕkfăn-t turăft n-aman ijjăš s-ăkall wa n-Surya, igla, ăddew d-Briska d-Akilas. Ǝwwăḍăn-in aɣrĕm wa n-Sănkĕrya ɣas, ăstăbălbăl Bulĕs i-ad-umas a-wen a ăssitbătăn ărkăwăl wa ijjăš. 19Osăn-dd aɣrĕm wa n-Ifăsus ɣas, ibḍa dăr-săn Bulĕs, ijjăš ehăn n-ăddin, ad-itidwĕnnit d-kăl-Ălyăhud. 20Ǝttărăn dăɣ-s ad-ɣur-săn ăhaj 21măšan, wăr hasăn-irḍa s-a-wen ed, inn'-asăn: "Kunta otăs Măssinăɣ a-wen, ilkam ad-kăwăn-dd-ăqqĕlăɣ." Ifăl-tăn, ijjăš turăft n-aman, 22ăzzubbăt dăɣ-Qăyṣăra ḍarăt-a-wen. Ijjăš aɣrĕm, ăssăllăm făll-ălkănisăt tĕzzar, okăy s-Intyuš. 23Ija hărăt n-išilan dihen ɣas, ijlăy s-teje ta n-Gălasya d-ta n-Frižya. Edăgg immăr-dăɣ, ad-dăɣ-s isĕmmĕtăr inĕṭṭulab i-ad-isĕṣṣuhĕt immun-năsăn. 24A-s ităjj a-wen-dăɣ, aɣrĕm wa n-Ifăsus, ih'-e ăhalĕs n-ăgg-Ălyăhud il' aɣrĕm wa n-Iskăndĕrya s-isĕm-net Ăbbăloš. Ălɣalim iknan musnăt n-măjrăd a ămoos, ikna daɣ teɣăre n-a-wa ĕnnăn ĕlkĕttabăn. 25Han-t isălan n-tabarăt n-Emăli, ijlay hullan dăɣ-a-wa iha, itamăjrad, isaɣra s-ălmăɣna oɣadăn isălan n-Ɣisa dăɣ-a-s wăr t-tĕha tijya ar ta n-asĕlmaɣ dăɣ-aman wa n-Exya. 26Tĕsl'-as Briska d-Akilas a-s ixṭăb s-tihusay dăɣ-ehăn n-ăddin wa n-Ifăsus ɣas, ăɣrăn-t-dd s-iman-năsăn, ad-t-sasaɣadăn, tafăssarăn-as tabarăt n-Măssinăɣ. 27Ăsdărhăn Ăbbăloš ḍarăt-a-wen tikawt n-ăkall wa n-Akaya, ĕdhălăn-t imumĕnăn dăɣ-derhan-net wen-dăɣ, ĕkfăn-t tăkarḍe i-inĕṭṭulab wi n-ăkall-en i-ad-t-sĕbbărrĕkăn afăl tăn-in-iwwăḍ. Iwwăḍ-in ɣas, ămoos tadhĕlt măqqoorăt i-ăddinăt-wi omănnen s-ănnuɣmăt n-Măssinăɣ. 28Isibĕggut s-tayĕtte kăl-Ălyăhud dat-tamĕtte, isasăjrăh-tăn a-s Ɣisa a-s Ălmasex.

will be added

X\