Ijităn n-inĕmmušal 17

1Ǝjlăyăn Ănfibbolis d-Abulĕbbis, osăn-dd Tăslonika ɣas, ijjăš Bulĕs ehăn n-ăddin wa n-kăl-Ălyăhud 2ed a-wen-dăɣ a-s izzay ad-t-ăj. Ija dihen kăraḍ ĕssĕbĕtăn itidwĕnnit d-kăl-Ălyăhud dăɣ-isălan n-a-wa ĕnnăn ĕlkĕttabăn n-Măssinăɣ. 3Itafăssar-asăn-tăn, isatbat-asăn a-s iktab dăɣ-săn a-s Ălmasex, ilzam-t ad-inhĕy tersĕmmawen, ămmăt tĕzzar, inkăr-dd jer-inĕmmuttan. Ijann'-asăn daɣ a-s Ɣisa-wa hasăn-ixaṭṭăb a-s Ălmasex. 4Ǝkkăsăn iyyăḍ dăɣ-săn ăššăk dăɣ-a-wa hasăn-ijanna, ĕlkămăn-asăn daɣ kăl-Ălyunan ăjjootnen ăddinnen d-tiḍeḍen ăjjootnen lanen isĕm dăɣ-aɣrĕm. 5Măšan, osămăn fălla-săn kăl-Ălyăhud, ĕglăn, ăsdăwăn-dd hărăt dăɣ-erk ăddinăt, ăsmădărwăyăn aɣrĕm tĕzzar, ĕkkăn ehăn wa n-Yazun, ĕmmaɣăn i-Bulĕs d-Sillas i-ad-tăn-sĕbdĕdăn dat-tamĕtte, tĕšrăɣ-tăn. 6Wăr tăn-in-ogeẓăn dihen ɣas, oḍăn făll-Yazun iman-net, ăšrăwrăwăn-t ĕnta d-imumĕnăn iyyăḍ, ĕssĕbdădăn-tăn dat-imănnăhăḍăn n-aɣrĕm, ad-tăn-sawarăn kăl-Ălyăhud uḍlem, jannen: "Ăddinăt-wi-dăɣ, ăkall iket-net a ăsnăxănbălăn siha d-siha tĕzzar, ĕwwăḍăn-anăɣ-dd ămăra, 7ĕntăneḍ-da-dăɣ ăsmăjarăt Yazun, ad-tajjăn hărătăn ĕšlaynen i-a-wa innă ămănokal wa măqqărăn ed, jannen ill'-e ămănokal săl Qăyṣăr s-isĕm-net Ɣisa." 8Wăr-ĕjreẓăn isălan-wi-dăɣ i-tamĕtte wăla i-imănnăhăḍăn n-aɣrĕm, 9ăɣtăsăn i-Yazun d-imumĕnăn wi iyyăḍnen ăddăyyăt s-lan s-ad-t-ĕẓĕlĕn i-ĕlxĕkum tĕzzar, ĕtwĕyyĕn-in. 10Ǝnhăyăn imumĕnăn tukĕse n-talɣa-ta-dăɣ ɣas, ĕssĕjmăḍăn Bulĕs d-Sillas ehăḍ-wen-dăɣ, ăssokăn-tăn aɣrĕm wa n-Biri. Ǝwwăḍăn-in dihen ɣas, ĕkkăn ehăn n-ăddin wa n-kăl-Ălyăhud. 11Ǝssĕknăn-tăn kăl-aɣrĕm wa n-Biri tărha tojărăt ta n-kăl-Tăslonika, ed ĕntăneḍ, ĕslăn i-măjrăd n-Măssinăɣ ɣas, omănăn săr-s šik, ad-ɣarrăn hak ašăl ĕlkĕttabăn, tassănăn a-wa hasăn-itawănnen tidĕt meɣ. 12Omănăn dăɣ-săn ăddinăt ăjjootnen hanăt tiḍeḍen ăjjootnen n-Tălyunaniten lanen isĕm d-meddĕn daɣ ăjjootnen. 13Ǝslăn kăl-Ălyăhud wi n-Tăslonika a-s itajj Bulĕs isălan n-măjrăd n-Măssinăɣ dăɣ-Biri ɣas, ĕlkămăn-as-dd, ad-tattărăn daɣ asĕnkar n-tamĕtte fălla-s ĕnta d-imidiwăn-net; 14ĕssĕglăn imumĕnăn Bulĕs ḍarăt-a-wen dăɣ-armuḍ, ĕssĕjmăḍăn-t aɣrĕm s-ašrut wa n-ejărew măšan, ăqqimă-dd ɣur-săn Sillas d-Timoti. 15Ăddewăn meddĕn wi hin-ăssofăḍnen Bulĕs har hin-ĕwwăḍăn aɣrĕm wa n-Atinya tĕzzar, ĕnnăḍăn-dd, ăssawăy-tăn Bulĕs ămašal i-ad-has-dd-ilkĕm Sillas d-Timoti dăɣ-armuḍ. 16Isimăqqul-asăn Bulĕs dăɣ-Atinya dihen-dăɣ a-s inxăs a-wa ihannăy iman-net făl ĕjut-i-dăɣ jăn ăṣṣănămăn dăɣ-aɣrĕm-en-dăɣ. 17Iglă, ădwănnăt d-kăl-Ălyăhud dăɣ-ehăn n-ăddin-năsăn, ad-itidwĕnnit daɣ hak ašăl d-inaɣbadăn n-Măssinăɣ wi hănen eɣărɣăr wa n-tamɣĕnnant s-itawănna Larofaž. 18Ădwănnen dăr-s dihen kăl-fălṣăfa wi s-itawănna kăl-Ibbikur d-iyyăḍ s-itawănna kăl-Stoyis. Jannen dăɣ-săn iyyăḍ: "Ak i n-ilĕs šĕjren-wa, ma ijanna?" Jannen wi iyyăḍnen: "A-wa mĕssaw-năɣ iyyăḍ făll-wăr nĕssen ĕzzaɣnen išĕnnawăn a-s hanăɣ-ixaṭṭăb isălan-năsăn." Jannen a-wen făl-a-s ij'-asăn Bulĕs isălan n-ălxer n-Ɣisa d-isălan n-tanăkra jer-inĕmmuttan. 19Ărmăsăn Bulĕs ḍarăt-a-wen, ĕlwăyăn-t s-Larofaž, ĕnnăn-as. "Săsĕl-anăɣ ya ămăra isălan n-teɣăre ta tăynayăt dăr-hanăɣ-dd-tosed 20făl-a-s kăyy, tikunen ti s-hanăɣ-săsled, wăr kăla hasnăt-nĕsla dăɣ-ăddunya, făssăr-anăɣ ălmăɣna-năsnăt." 21Ăzzăman-en, kăl-Atinya hakd-dăɣ imăjarăn-năsăn, wăr t-illa ere s-wădden issan a-s wăr-oren timĕẓẓujen ar dăɣ-umaɣ n-isălan d-iji-năsăn. 22Ibdăd-dd Bulĕs dăɣ-ămmas n-Larofaž, eɣărɣăr wa n-tamɣĕnnant, innă: "Ya kăl-Atinya, dăɣ-a-wa hannăyăɣ, ijmaḍ-t ăššăk a-s tĕjlayăm hullan dăɣ-ăddin wa hăm, 23ĕssăɣlăyăɣ-dd dăɣ-aɣrĕm-năwăn, ĕkneɣ azĕjjĕzz n-idăggan n-ălɣibadăt-năwăn, ĕgleɣ făw har oḍeɣ făll-edăgg n-tikutawen-năwăn făll-iktăb: 'I-Ămakraš wa wăr nĕzzey'. Ǝlmĕdăt ašăl-i, a-s Wa ɣabbădăm wăr t-tĕzzeyăm a-wa hawăn-ija ălžăhalăt, ĕnta a-s hawăn-tajjăɣ isălan-net. 24Măssinăɣ-i dd-ixlăkăn ăddunya d-a-wa tăt-ihăn iket-net, ĕnta-i n-Emăli n-išĕnnawăn d-ăkall, wăr-itĕzzăɣ ehăn dayăn ifassăn-n-ăgg-adĕm, 25wăr-ămɣatăr s-tadhĕlt n-ifassăn n-ăgg-adĕm wăla s-hărăt wăl' iyyăn ed, ĕnta a ihakkăn e d t-illăm ăgg-adĕm tămudre, ĕnta daɣ a ihakkăn unfas d-tămudre i-hărăt iket-net. 26Ǝnta a dd-ixlăkăn ăhalĕs-wa dd-ăshăyăwăn e d t-illăm ăgg-adĕm iwarăn ărori n-ăkall, ĕnta a iɣtăsăn tăkost n-ikallăn wi tazzăɣăn, ĕnta daɣ a hanăɣ-dd ijăn ăzzămanăn. 27A-wen, ij'-e Măssinăɣ i-ad-has-ĕmmăɣăn ăddinăt kud-dăɣ s-ekălelaf i-ad-t-ĕjrĕwăn ed, ijmaḍ-t ăššăk a-s Măssinăɣ, wăr hanăɣ-iha i ujĕj. 28Ǝnta a hanăɣ-ikfăn tămudre d-emăremar d-tumast. Măjrăd-wen-dăɣ, tăsdăttăt tăsawit-năwăn ta tĕnnăt: 'Nolăh dăr-s ed nămoos aratăn-net.' 29Ɣas, šămad nămoos aratăn-net, adiš tĕlăš fălla-năɣ torda n-a-s Măssinăɣ ănifăqqa d-a ămoosăn orăɣ meɣ aẓrĕf meɣ tăhunt meɣ ăṭṭăṣwer dd-izjarăn tăhore wăla tayĕtte n-ăgg-adĕm. 30Ǝlmĕdăt a-s Măssinăɣ, iwĕtyan-wi ăssakăyăn ăddinăt dăɣ-ălžăhalăt, wăr tăn-ixseb făll-errawăn-năsăn, a-wen-dăɣ a făl ămăra, omar i-e d t-illăm ăgg-adĕm dăɣ-e d-t-illăm edăgg s-ad-utab 31făl-a-s ăssiibdăd ašăl dăɣ-mad-išrăɣ ăddunya-ta-dăɣ s-ăhalĕs-wa ăsnăfrăn tat-madăn-išrăɣ s-iqqud. A-wen, issĕtbăt-t Măssinăɣ i-tamĕtte iket-net s-ĕmmĕk wa s-dd-issĕnkăr Ɣisa jer-inĕmmuttan." 32Tĕslă tamĕtte i-isălan n-tanăkra jer-inĕmmuttan ɣas, jăn-t iyyăḍ tekăškăšt, ĕnnăn-as iyyăḍ: "Ǝglĕw, tăqqĕlăd-anăɣ-dd ašăl iyyăn săl wa i-ad-nalĕs asjĕd i-isălan-wi-dăɣ." 33Ifăl Bulĕs jere-săn ălwăqq-wen-dăɣ măšan, ĕlkămăn-as iyyăḍ omănnen s-a-wa innă. 34Ăddinăt-en, ih'-en Denis wa ijăn ĕnniyăt i-Larofaž d-tamăḍt tiyyăt s-isĕm-net Dămaris d-iyyăḍ daɣ săl-win-dăɣ.

will be added

X\