Ijităn n-inĕmmušal 16

1Immăr Bulĕs aɣrĕm wa n-Darba d-wa n-Listra, ill'-e dihen-dăɣ a-s ănăṭṭalib iyyăn da-dăɣ s-isĕm-net Timoti, ma-s tamumĕnt lan kăl-Ălyăhud măšan, ti-s, i n-kăl-Ălyunan, 2jannen fălla-s imumĕnăn wi n-Listra hakd-dăɣ wi n-Ikanyun a ăhuusken. 3Iɣr'-e-hi-dd Bulĕs s-iman-net i-ad-dăr-s idaw măšan, ăsmalăy-t tĕzzar i-ad-wăr jărrĕwăn kăl-Ălyăhud wi t-ĕllănen dihen a fălla-s ĕnnăn ed, ĕssanăn iket-năsăn a-s abba-net, i n-kăl-Ălyunan. 4Aɣrĕm ĕmmărăn-dăɣ ḍarăt-a-wen, ad-dăɣ-s sĕmmĕtărăn imumĕnăn dăɣ-alkum d-uḍĕf n-ăddăbaratăn-wi hasăn-ăɣtăsăn inĕmmušal d-inušămăn dăɣ-Yărussălam. 5Samătarăn ălkănisăten i-ad-iṣṣuhĕt immun n-inĕṭṭulab, isajat-dd Măssinăɣ hak ašăl ăddinăt ăynaynen dăɣ-ălkănisăt ĕkfanen iman-năsăn i-Emăli. 6Ijlăy Bulĕs d-imidiwăn-net Frižya d-teje ta n-Gălasya măšan, wăr hasăn-irḍa Unfas Šăddijăn jan isălan dăɣ-ăkall wa n-Azya, 7ĕwwăḍăn-dd Masi, ĕttărăn ad-ĕkkĕn Bĕtni măšan, igdal-asăn daɣ Unfas n-Ɣisa s-a-wen, 8ĕjlăyăn Masi, ăzzubben dăɣ-Tărwas. 9Ǝllan-t dihen-dăɣ a-s ăhhurjăt Bulĕs u-Masidunya iyyăn t-iɣarrăn, ibdad, iddal Măssinăɣ, ijann'-as: "Ya Măssinăɣ! Šĕmmišĕl-dd săr-năɣ ere hanăɣ-ohăɣăn tinahăɣen, năɣlĕs." 10Nĕfhăm s-a-wen-dăɣ dd-ănfalălăn i-Bulĕs, a-s irha fălla-năɣ Măssinăɣ ad-nĕsĕllĕnžĕt teje-ten-dăɣ, ad-nĕtammăɣ ya i-ĕmmĕk s-nĕkka Masidunya. Ɣur-dihen-dăɣ ad-tăn-dd-ĕjjăšăɣ, ohărăɣ d-Bulĕs asikĕl năkk-i iktăbăn isălan-wi-dăɣ. 11Nĕjjăš turăft n-aman dăɣ-Tărwas, nĕja s-iyyăt tamdujt ta n-Somătras, ăffăw nĕkka Năyyabolis; 12nĕfăl dihen, nĕkka aɣrĕm wa n-Fĕlibb-i s-ĕnta a itammăr ere dd-ijjăšăn Masidunya s-tizarăt, ămoos daɣ aɣrĕm făll-ixkam Roma, năssakăy hărăt n-išilan dihen. 13Ašăl wa n-ĕssĕbĕt-i n-tăsonfat, nĕzjăr aɣrĕm, nĕkka asălim n-ejărew ed, norda s-ad-dăɣ-s nĕjrĕw edăgg iṣtarăn dăɣ-nĕdăl Măssinăɣ, nogăẓ-in dihen tiḍeḍen ăžžiimmăɣnen, năqqima ad-hasnăt-nĕtajj isălan. 14Tăsjăd-anăɣ tiyyăt dăɣ-snăt n-tămaksaḍt n-Măssinăɣ s-isĕm-net Lidya, tu-mamălat n-aɣrĕm wa n-Tĕyatir hin-žănšet măṣăr wa n-nefran n-ini šăggăɣăn. Oră Emăli ulh-net, tomăn s-a-wa has-ijănna Bulĕs, 15tătwăsălmăɣ dăɣ-aman ĕnta d-kăl-ehăn-net. Tĕnnă i-Bulĕs d-imidiwăn-net ḍarăt-a-wen: "Kunta tĕflasăm a-s tamumĕnt n-Emăli a ămoosăɣ, mĕjurĕtăt-ahi". Laqqăd-anăɣ har hanăɣ-tăšhăššăl s-a-wen. 16Nolăs daɣ nĕkka edăgg n-tittar a-s hanăɣ-dd-tĕlkăḍ tănaxdimt tiyyăt ih' alšin iknan tăllăbăst, tămoos i-mĕssaw-s ĕssĕbab n-ărrĕzăɣ ed, itilĕɣut alšin wa tăt-ihăn a-wa ilkămăn, tĕẓẓalăn-as ăddinăt. 17Tĕnhăy-anăɣ ɣas, tĕltăɣ-anăɣ, e-s nĕkka-dăɣ tăseɣărăt ḍara-năɣ, janna: "Ya ăddinăt, ĕlmĕdăt a-s meddĕn-wi-dăɣ hannăyăm, eklan n-Măssinăɣ wa iknăn aḍkul, isălan n-tabarăt ta n-ĕlɣĕllas a-s dd-osăn i-ad-tăn-ĕjĕn." 18Tĕj'-anăɣ alkum-wen-dăɣ har ja išilan, tĕglă făw har tăsɣăf Bulĕs; ămlăllăy-dd săr-s, ăsmăhăḍ făll-alšin wa tăt-ihăn, inn'-as: "Omarăɣ-kăy s-isĕm n-Ɣisa Ălmasex, ĕsjăr-tăt!" Izjăr-tăt alšin ăssaɣăt-wen-dăɣ. 19Ǝnhăyăn mĕssaw-s a-s taklit-năsăn ăbas-hasăn-dd-saɣsal ehăre ɣas, ărmăsăn Bulĕs d-Sillas, ĕlwăyăn-tăn s-eɣărɣăr wa n-tamɣĕnnant s-itawănna Larofaž dăɣ-itamăr ăššăreɣa, ĕssĕbdădăn-tăn dat-ălqa/l/lităn, 20ĕssĕknăn-tăn ḍarăt-a-wen daɣ i-kăl-ăššăreɣa wi n-Roma, ĕnnăn-asăn: "Meddĕn-i n-kăl-Ălyăhud hannăyăm, wăr dd-ăwweyăn a săl ăḍḍărora s-aɣrĕm-nănăɣ, 21sasăɣren ăddinăt ălɣadatăn s-năkkăneḍ-i n-kăl-Roma wăr hanăɣ-t-illa uḍĕf-năsăn wăla alkum-hasăn." 22Tĕsla tamĕtte i-a-wen ɣas, tĕzzăn săr-săn. Ǝnnăn kăl-ăššăreɣa, ĕtwĕkkĕsnet isĕlsa dăɣ-Bulĕs d-Sillas, ăttăwătnet. 23Ǝknăn-tăn asĕsnan tĕzzar, jărăn-tăn-in dăɣ-takărmut dăɣ-a-s ĕnnan i-ĕssărdusa ad-hasăn-ĕknĕn iji n-ĕnniyăt. 24Ătwănnă a-wen i-emănnăhăḍ n-takărmut ɣas, ija dăɣ-săn tišĕm, ij'-en dăɣ-sĕllul. 25Ebre n-ammas n-ehăḍ, irmăs Bulĕs d-Sillas ăsahăɣ n-tĕmmal i-Măssinăɣ, ăsijădăn-asăn kăl-takărmut wi iyyăḍnen. 26A ĕnḍărrăn-dăɣ ăškăḍkăḍ-dd ăkall daw-săn s-ăṣṣahăt hăr ăsnăhăynăhăy issas n-takărmut, ămerăn isăɣfal n-takărmut iket-dăɣ-năsăn ăssaɣăt-wen-dăɣ, ămerănăt daɣ tišĕm-năsăn. 27Inkăr-dd emănnăhăḍ n-takărmut dăɣ-eḍĕs, inhăy tishar n-takărmut ămerănăt ɣas, ilbăy-dd takoba-net i-ad-săr-s idĕj iman-net ed, ăɣel kăl-takărmut wi iɣlăf, ĕjmăḍăn. 28Măšan, ăsɣărăt-as Bulĕs s-afălla, inn'-as: "Ahaa! Wăr jed a-di, nĕll'-e diha iket-nănăɣ." 29Irmăs-dd emănnăhăḍ n-takărmut emămmăl n-efew s-inhăy data-s, ošăl-dd, irkăɣ dat-Bulĕs d-Sillas ăšikăḍkăḍ, 30ikkăs-tăn-dd dăɣ-ammas n-takărmut tĕzzar, inn'-asăn: "Meddĕn, ma s-leɣ s-ad-t-ăjjăɣ i-ad-ăɣlĕsăɣ?" 31Ǝnnăn-as: "Amĕn kăyy d-ejădăš-năk s-Emăli Ɣisa, ad-tăɣlĕsăm." 32Ăxṭăbăn-as măjrăd n-Emăli ĕnta d-kăl-ehăn-net ălwăqq-wen-dăɣ. 33Ilwăy-tăn dăɣ-tăkkăwălt n-ehăḍ-en-dăɣ s-ehăn-net, issĕfăr ibuyĕsăn-năsăn, ătwăsălmaɣ dăɣ-aman ḍarăt-a-wen ĕnta hakd kăl-ehăn-net iket-năsăn. 34Ăsmăjarăt-tăn dăɣ-a-s ikna tedăwit ĕnta d-kăl-ehăn-net n-a-wa s-omănăn iket-năsăn s-Măssinăɣ. 35Ăffăw ɣas, ăšmašălăn-dd kăl-ăššăreɣa meddĕn s-emănnăhăḍ n-takărmut i-ad-hin-isĕwwĕy Bulĕs d-Sillas. 36Ija dăɣ-săn emănnăhăḍ isălan n-a-wa ĕnnăn kăl-ăššăreɣa măšan, 37inn'-as Bulĕs: "Făw, šămad jăn dăɣ-năɣ tiwit dat-tamĕtte, a-s ija a-wen, wăr nătwăšrăɣ, năkkăneḍ-i ăḍḍinnen făll-Roma, jărăn-anăɣ-in dăɣ-takărmut s-ĕmmĕk-wa-dăɣ, ămăra ărhan ad-hin-nĕtwĕyy dăɣ-ufăr, wăr nărḍa s-a-wen, asĕnet-dd ĕntăneḍ iman-năsăn, sĕwwĕyyĕn-anăɣ-in." 38Ǝqqălăn meddĕn-wi dd-ămešălnen, ăssoɣălăn isălan n-a-wa inna Bulĕs i-imănnăhăḍăn. Ǝslăn i-isălan n-a-s Bulĕs d-Sillas ăḍḍinăn făll-Roma ɣas, ărmăɣăn. 39Osăn-tăn-dd ḍarăt-a-wen ĕntăneḍ iman-năsăn, ĕttărăn tenăšše dăɣ-Bulĕs d-Sillas, ĕkkĕsăn-tăn-dd dăɣ-takărmut dăɣ-a-s dăɣ-săn ĕttarăn ad-ĕfĕlĕn aɣrĕm-năsăn. 40Ǝzjărăn-dd takărmut ɣas, ĕkkăn ehăn wa n-Lidya, ad-samătarăn dihen ayĕtma-săn dăɣ-ăddin d-alkum i-Măssinăɣ tĕzzar, ĕglăn.

will be added

X\