Ijităn n-inĕmmušal 15

1Ăzzăman-en-dăɣ a dd-fălăn meddĕn iyyăḍ teje ta n-Ălyăhudĕyăt, ad-saɣren imumĕnăn n-a-s ere wărăn ămelăy s-ălɣadăt wa dd-oyya ănnăbi Mosa, wăr-e iɣlĕs. 2Ija dăr-săn Bulĕs d-Bărnăbbas tamɣĕnnant tăṣṣoohet tĕzzar, ănmărḍăn imumĕnăn făl ad-sukĕn Bulĕs d-Bărnăbbas d-hărăt dăɣ-meddĕn n-ălkănisăt-năsăn Yărussălam i-ad-ĕjĕn isălan n-tamɣĕnnant-ta-dăɣ i-inĕmmušal d-inušămăn wi t-ĕllănen dihen i-ad-hasăn-tăt-arĕn. 3Ăssofăḍăn-tăn-in imumĕnăn n-ălkănisăt ta n-Intyuš-i tăn-tăšmašălăt s-tizarăt, răsăn teje ta n-Finisya d-ta n-Sămari, siɣulăn isălan n-ĕmmĕk wa s-ătubăn inĕẓẓulam i-Măssinăɣ. Ămoos umăr wa tăn-dd-jăn a iknan asĕddĕwi n-ayĕtma-săn dăɣ-ăddin dăɣ-idăggan-win-dăɣ. 4Ǝwwăḍăn-in Yărussălam, tăsbărrăk-tăn ălkănisăt d-inĕmmušal d-inušămăn, jăn dăɣ-săn isălan n-a-wa s-tăn-ikfa Măssinăɣ turhajăt n-iji-net s-ifassăn-năsăn. 5Ǝggădăn-dd meddĕn iyyăḍ hanen taggayt ta n-kăl-faris tĕglăt făll-tidĕt n-iman-net, ĕnnăn ĕflasăn a-s ămoos amili d-alkum i-alămăr wa n-ănnăbi Mosa a ifraḍăn făll-inĕẓẓulam i-ad-ĕjjĕšăn Tĕmmĕnĕya n-Măssinăɣ. 6Ǝžžĕmmăɣăn inĕmmušal d-inušămăn i-ad-ĕjrĕwăn ăddăbara dăɣ-isălan-wi-dăɣ. 7Tĕja dăɣ-săn tamăzaɣt tăṣṣoohet. Dăɣ-a-wen-dăɣ, ad-dd-ibdăd Bĕṭrus jere-săn, inna: "Ayĕtma-ɣ, tĕssanăm a-s ăru d-hi-ăsnăfranăn Măssinăɣ jere-wăn i-ad-săslăɣ inĕẓẓulam isălan n-Ălĕnžil i-ad-amĕnăn s-Măssinăɣ. 8Măssinăɣ i issănăn a-wa ihăn ulh n-ăgg-adĕm a hasăn-immĕjrădăn, ikf'-en Unfas Šăddijăn s-ĕmmĕk wa s-hanăɣ-t-ikfa năkkăneḍ-i n-kăl-Ălyăhud, 9wăr t-illa a-s hanăɣ-aẓimăẓlăy dăr-săn ed, immun s-Măssinăɣ a iššĕšdăjăn ulhawăn-năsăn. 10Šămad tidĕt a-wen, adiš mafăl tirĕmĕm Măssinăɣ, tajjăm făll-errawăn n-inĕṭṭulab ăẓuk s-năkkăneḍ wăla abbatăn-nănăɣ, indăr-anăɣ ălănji-net? 11Wădden ănnuɣmăt n-Emăli Ɣisa-i s-nomăn, iɣlăs-anăɣ, ĕnta daɣ a-s omănăn ĕntăneḍ-dăɣ." 12Tăssosăm tamĕtte iket-net, ăsjădăn ăddinăt ḍarăt-a-wen i-Bărnăbbas d-Bulĕs siɣulăn isălan n-ijităn n-Măssinăɣ wi jăn d-hărătăn wi ăssuksăḍnen jăn jer-inĕẓẓulam. 13Ǝssĕmdăn măjrăd ɣas, iḍkăl-t Yaqub, inna: "Ayĕtma-ɣ, săjdăt-ahi. 14Ija dăɣ-năɣ Simyon Bĕṭrus isălan n-ĕmmĕk wa s-dd-ăšbašăj Măssinăɣ s-inĕẓẓulam i-ad-dăɣ-săn isĕnnĕfrĕn tamĕtte tĕlkamăt i-isĕm-net ed, 15ămoos a-wen a ănimănnakăn d-a-wa ĕnnăn ănnăbităn ed, iktab a-s, innă Măssinăɣ: 16'Ḍarăt-a-wen, ilkam a dd-ăqqĕlăɣ i-ad-alĕsăɣ edey n-ehăn n-Dawĕd-wa oḍăn, sĕbdĕdăɣ-t-dd dăɣ-timšar-net, ădyăɣ-t.' 17A-wen, dăɣ-tĕssĕba n-ad-immăɣ a-wa t-illăn dăɣ-ăddinăt i-Emăli, ĕmmăɣnăt-as daɣ tiwsaten-ti făll-itawăɣra isĕm-in. A-wen, Emăli a tăn-innăn, erhet-net daɣ den-dăɣ ĕnta-i ilăn tărna n-iji n-hărătăn-win-dăɣ daɣ den-dăɣ, 18wăr t-illa daɣ a has-idrajăn dăɣ-a-wen-dăɣ, ed issăn-t ɣur-alăṣăl-net. 19Tĕssĕba n-a-wen-dăɣ a făl hawăn-janneɣ a-s, wăr tăsmăɣatărăm inĕẓẓulam-wi maden-utab s-Măssinăɣ 20măšan, nĕktĕbet-asăn tăkarḍe n-tamătert i-ad-ĕbḍĕwăn d-hărăt iket-net ăddooben asĕmmăḍĕs-năsăn, ĕbḍĕwnet d-ălɣibadăt n-ăṣṣănămăn d-ĕzzĕna d-tetăte n-măɣsoy d-tesăse n-ašni. 21Ădduuttăt a-s ila ănnăbi Mosa dăɣ-ĕzzurĕyatăn-ti-dăɣ hakd-dăɣ ti-okăynen ăddinăt dăɣ-iɣărman iket-năsăn ɣarrănen ĕlkĕttabăn-net hak ĕssĕbĕt-i n-tăsonfat dăɣ-ihănan n-ăddin." 22Ănmănnakăn inĕmmušal d-inušămăn d-ălkănisăt ḍarăt-a-wen făll-ad-sĕnnĕfrĕnăn hărăt dăɣ-meddĕn-năsăn maden-idaw d-Bulĕs d-Bărnăbbas s-Intyuš, ăsdăwăn dăr-săn daɣ Yahudĕs wa itawăɣren s-isĕm Bărsabas d-Sillas, ĕssin meddĕn a-wen ătiwăsămɣărnen jer-ayĕtma-săn dăɣ-ăddin. 23Ǝkfăn-tăn tăkarḍe ĕktabăn s-ifassăn-năsăn. Ǝnnăn dăɣ-s: A-wa năkkăneḍ inĕmmušal d-inušămăn wi n-ayĕtma-wăn dăɣ-ăddin. Năhuul-in ayĕtma-năɣ wi s-kăla ămoosăn inĕẓẓulam hănen Intyuš d-Surya d-Silisi. 24Ijmaḍ-t ăššăk a-s nĕššĕwwăš a-s nĕslă ass wa kăwăn-in-jăn meddĕn hanăɣ-in-falnen wăr hin-năšmašăl, nĕssan a-s, ĕnxăsăn iman-năwăn. 25A-wen-dăɣ a făl nohăr iyyăn n-ăddăbara iket dăɣ-nănăɣ i-ad-kăwăn-in-nĕsuk meddĕn năsidaw d-Bărnăbbas d-Bulĕs-i nĕkna tărha ed, 26ămoosăn meddĕn jănen iman-năsăn dăɣ-miši făl tĕssĕba n-isĕm n-Emăli-nănăɣ Ɣisa Ălmasex. 27Năšimašăl-in daɣ săr-wăn Yăhudĕs d-Sillas i-ad-hawăn-alĕsăn asuɣĕl n-isălan-wi-dăɣ. 28Issĕlmăd-anăɣ Unfas Šăddijăn, nărḍa daɣ s-ad-wăr nĕtĕjj fălla-wăn ăẓuk wăl' iyyăn săl wa ămoosăn fărĕḍ, 29a-wen a t-ămoosăn, asăxrĕm n-tetăte n-takute jat i-ăṣṣănămăn, asăxrĕm n-tesăse n-ašni d-tetăte n-măɣsoy d-tăbĕḍḍawt d-iji n-ĕzzĕna. Afăl tĕṭṭăfăm iman-năwăn făll-hărătăn-win-dăɣ, ad-tĕjĕm a ăhuusken ed, wăr mad-iɣšĕd isĕm-năwăn dat-ăddinăt. Năhuul-kăwăn-in, wăssălam! 30Ărkăbăn ḍarăt-a-wen, ĕqqălăn Intyuš, ăwwayăn tăkarḍe-tĕnnin-dăɣ. Ǝwwăḍăn-in ɣas, ăsdăwăn-dd ălkănisăt, ĕkfăn ălžămaɣăt tăkarḍe, 31tătwăɣra, ămoosăn isălan-wi tăt-hănen ĕssĕbab n-tedăwit măqqoorăt. 32Ăsmătăr-tăn daɣ Yăhudĕs d-Sillas ed ănnăbităn a ămoosăn s-imĕjridăn ăjjootnen, sasmaḍăn ulhawăn n-imumĕnăn, siṣuhun-tăn dăɣ-immun-năsăn. 33Ăssakăyăn hărăt n-išilan dihen ɣas, fălăn-tăn imumĕnăn-wi dd-fălnen Yărussălam dăɣ-ălxer, ĕqqălăn ălkănisăt ta tăn-dd-tăšmašălăt (( 34măšan, ăqqima Sillas ḍara-săn)). 35Izzăɣ Bulĕs d-Bărnăbbas dăɣ-Intyuš-en-dăɣ, saɣr'-en ĕntăneḍ d-iyyăḍ, xaṭṭăbăn s-ălxalăn ăjjootnen isălan n-Emăli. 36Hărăt n-išilan ḍarăt-a-wen, innă Bulĕs i-Bărnăbbas: "Năqqĕlet ayĕtma-năɣ dăɣ-ăddin wi hănen iɣărman wi dăɣ-nĕja isălan n-măjrăd n-Emăli, nĕssĕn ĕndek ĕmmĕk-năsăn." 37Ittăr Bărnăbbas a-dăr-săn alĕs Exya Marqĕs tădiwt 38măšan, wăr has-irḍa Bulĕs s-a-wen. Inn'-as, wăr-ănhăjja a-dăr-săn idaw ed, ĕnta iman-net a hin-iɣtăsăn iman-net dăr-săn a-s ḍara-săn ibḍa dăɣ-Bănfĕli. 39Tăkkus talɣa jere-săn har dd-orăw a-wen-dăɣ tăbĕḍḍawt-năsăn s-iyyăt. Ăddew Bărnăbbas d-Marqĕs ḍarăt-a-wen, ĕjjăšăn turăft n-aman, ĕkkăn Qĕbrus. 40Iɣră-dd Bulĕs Sillas s-iman-net, iglă ḍarăt a-s t-ăsseɣlăfăn ayĕtma-s dăɣ-ăddin ănnuɣmăt n-Emăli. 41Immăr Bulĕs ăkall wa n-Surya d-Silisi, isiṣuhut immun n-ălkănisăten dăɣ-idăggan-win-dăɣ iket-năsăn.

will be added

X\