Ijităn n-inĕmmušal 14

1Olăs Bulĕs d-Bărnăbbas dăɣ-Ikanyun iji n-a-wa s-ĕzzăyăn iji-net dăɣ-ăzzăman-en-dăɣ, ĕjjăšăn ehăn n-ăddin wa n-kăl-Ălyăhud, jăn dăɣ-s măjrăd-wa-dăɣ făl omănăn kăl-Ălyăhud ăjjootnen d-tamĕtte tăjjeet dăɣ-ta n-kăl-Ălyunan, 2măšan, ĕssĕnkărăn-dd kăl-Ălyăhud wi s-ăqqurăn ulhawăn-năsăn inĕẓẓulam, jăn dăɣ-săn erk iman i-ad-ĕššunjen ăddinăt-wi omănnen s-Ɣisa. 3Ădwănnăt Bulĕs d-Bărnăbbas dăr-săn har jăn ăzzăman, tajjăn-asăn măjrăd ădduutten, tajăyhen-asăn făll-Emăli. Ikf'-en daɣ Măssinăɣ ănnuɣmăt s-tajjăn ijităn n-Măssinăɣ d-hărătăn ăssuksăḍnen, wăr t-illa a tăn-ăssirmăɣăn, ed ăsiwăr-tăn Emăli tărna-net. 4Tĕbḍa tamĕtte n-aɣrĕm iket-net, ĕlkămăn iyyăḍ i-kăl-Ălyăhud, ĕlkămăn wi iyyăḍnen i-inĕmmušal. 5Ǝjjăšăn-dd erk iman inĕẓẓulam d-kăl-Ălyăhud iyyăḍ d-imizărăn-năsăn, ad-tattărăn ĕmmĕk s-ăsmăḍrăyăn Bulĕs d-Bărnăbbas, ĕkfĕn-tăn sămmăjori n-tihun, 6ĕlmădăn inĕṭṭulab s-a-wen ɣas, ăjewăḍăn s-Likawni d-Listra d-Darba d-attayăn n-tidbi-tin-dăɣ. 7Jăn isălan n-Ălĕnžil dăɣ-iɣărman-win-dăɣ iket-năsăn. 8Aɣrĕm wa n-Listra, ih'-e ăhalĕs n-anăbdon s-a dd-iwa-dăɣ, ibdan. 9Islă i-Bulĕs ămmijrăd ɣas, ăsjăd-as. Inhăy Bulĕs dăɣ-tiṭṭawen-net a-s ila immun t-ăzozăyăn, iɣlĕs ɣas, 10inn'-as s-afălla: "Ǝbdĕd făll-iman-năk." Iggăd ăhalĕs, irjăš. 11Ǝnhăyăn ăddinăt a-wa ija Bulĕs ɣas, ăsɣăren, ĕnnăn dăɣ-tawalt ta n-Likawni: "Ašăl-i, mĕssaw-năɣ dd-falnen išĕnnawăn dăɣ-taɣĕssa n-dăgg-adĕm a dd-ăzzubbătnen fălla-năɣ." 12Jăn i-Bărnăbbas isĕm Zuss, jăn i-Bulĕs isĕm Armas ed, ĕnta a ămmijrădăn ăssaɣăt-wen-dăɣ. 13Ošăl-dd u-tikutawen wa n-Zuss ila ehăn-n-ămudd wa ihăn emm n-aɣrĕm, ilwăy-dd iwdesăn d-tăboyt n-isĕhhĕska, ad-itattăr ĕnta d-tamĕtte ĕmmĕk s-jăn hărătăn-win-dăɣ takute i-Bulĕs d-Bărnăbbas. 14Ǝlmădăn inĕmmušal s-a-wen ɣas, ăsɣărrawen inkubba-năsăn făll-iman-năsăn, ošălăn s-tamĕtte ăseɣăren, 15jannen: "Ya meddĕn! Wăr jem a-di, ma ămoos a-wa s-tăbokăm iji-net? Năkkăneḍ dăgg-adĕm ɣas a nămoos, wăr t-illa a dăr-wăn nĕẓlay. Isălan n-ălxer a hăwăn-năwway i-ad-tĕbḍĕwăm d-mălayăɣna, tutabăm s-Măssinăɣ-i n-Ămaɣlal dd-ixlăkăn išĕnnawăn d-ăkall d-ijĕrwan d-a-wa tăn-ihăn iket-net. 16Ibda, oyya ĕzzurĕyyatăn-ti okăynen ĕlkamnăt i-erhet n-iman-năsnăt 17măšan hakd a-wen-dăɣ, wăr hin-issĕbdăd fălla-snăt ălxer-net. Ǝnta a fălla-wăn dd-ăzzăbben ijĕnnawăn, iɣmăr-kăwăn s-ăzzămanăn olaɣnen, ikf'-iwăn isudar, ij' ălxer dăɣ-ulhawăn-năwăn." 18Jannen-asăn a-wen-dăɣ măšan, šărnaš d-ĕgdălăn tikutawen-ti s-ărhan ăddinăt a tănăt-ĕjĕn dăɣ-tĕssĕba-năsăn. 19Osăn-dd hărăt dăɣ-kăl-Ălyăhud dd-falnen Intyuš d-Ikanyun, ĕzzănăn s-Bulĕs. Ǝkfăn-t sămmăjori n-tihun tĕzzar, ăšrăwrăwăn-t har t-ĕzzĕzjărăn aɣrĕm ed, ăɣelăn ăba-t. 20Ǝlkămăn-as-dd inĕṭṭulab-net, ăɣlăyɣălăyăn-t ɣas, inkăr-dd, olăs ujĕš n-aɣrĕm. Ăffăw ɣas, ăddew d-Bărnăbbas s-Darba. 21Ăslănžen aɣrĕm-wen-dăɣ, jăn dăɣ-s inĕṭṭulab ăwwăḍnen hărăt tĕzzar, ĕqqălăn Listra d-Ikanyun d-Intyuš. 22Samătarăn inĕṭṭulab dăɣ-idăggan-win-dăɣ d-ad-ĕṭṭĕfăn immun s-Măssinăɣ ed, itbat a-s ujĕš n-Tĕmmĕnĕya n-Măssinăɣ, ăddeew daɣ d-ălɣizabăt ăjjeen. 23Ălkănisăt ĕmmărăn-dăɣ, a dăɣ-s sĕbdĕdăn inušămăn, ĕdĕlĕn-asăn Măssinăɣ, uẓamăn tĕzzar, săɣlĕfăn-tăn i-tărna n-Emăli-i s-omănăn i-ad-dăɣ-săn ăj ălbăraka. 24Ǝjlăyăn ḍarăt-a-wen teje ta n-Bĕssidi, okăyăn s-ta n-Bănfĕli, 25ăxṭăbăn dăɣ-aɣrĕm wa n-Birga tĕzzar ătrarăn s-Antalya. 26Ǝjjăšăn turăft n-aman dihen, jăn tamdujt ta n-Intyuš-i-dăɣ dd-ămešălăn ḍarăt a-s ăssiiɣlăfăn imumĕnăn i-ănnuɣmăt n-Măssinăɣ. 27Osăn-in ɣas, ăsdăwăn-dd ălkănisăt, ad-siɣulăn i-imumĕnăn isălan n-a-wa s-tăn-ikfa Măssinăɣ turhajăt n-iji-net, d-ĕmmĕk wa s-ora Măssinăɣ emm n-ehăn n-immun i-inĕẓẓulam. 28Ăhojăn ḍarăt-a-wen ĕzzaɣăn ɣur-inĕṭṭulab wi n-dihen.

will be added

X\