Ijităn n-inĕmmušal 13

1Ălkănisăt ta hăt aɣrĕm wa n-Intyuš, ănnăbităn-net d-imăsăɣran-net da: Bărnăbbas, Simyon wa s-itawănna "Ekăwel", Lisyus wa n-ăkall wa n-Qĕrwan, Mănahin wa s-ĕnta d-Harudĕs Intibbas a ĕdwălnen dăɣ-iyyăn n-ehăn d-Sawĕl. 2Ašăl wa n-ălɣibadăt n-Emăli, ăẓuumăn imumĕnăn, ăžžiimmăɣăn dăɣ-iyyăn n-edăgg, ɣabbădăn Emăli a-s hasăn-innă Unfas Šăddijăn: "Ăjăt-ahi Bărnăbbas d-Sawĕl s-edes i-ămašal wa s-tăn-dd-ăɣreɣ." 3Ăẓumăn, dălăn Măssinăɣ tĕzzar, ăswărăn ifassăn-năsăn Bărnăbbas d-Sawĕl, oyyăn-tăn, ĕglăn. 4Oɣăd-tăn Unfas Šăddijăn, ăzzubben s-aɣrĕm wa n-Slukya tĕzzar ĕjjăšăn turăft n-aman, jăn tamdujt ta n-Qĕbrus; 5ĕwwăḍăn-in taɣrĕmt s-isĕm-net Sălamin ɣas, jăn isălan n-măjrăd n-Măssinăɣ dăɣ-ihănan n-ăddin wi n-kăl-Ălyăhud, ămoos-asăn Exya Marqĕs ămadhal. 6Ǝjlăyăn awtĕl wa n-Qĕrwan iket-net har Bafus, ĕjrăwăn dihen ăgg-Ălyăhud n-emăssăxăr s-isĕm-net Bărɣisa, ijanna s-bahu, ănnăbi a ămoos, 7izzaɣ ɣur-Saržus Bulĕs-i n-ămănokal n-awtĕl, ăhalĕs, a-wen, iknan terše n-tayĕtte. Isla ămănokal Bărnăbbas d-Sawĕl ɣas, issăɣr'-en-dd dăɣ-derhan n-ad-t-sĕslĕn măjrăd n-Măssinăɣ. 8Iggăd-dd Ɣĕlimas wa n-emăssăxăr, a-wen isĕm-net dăɣ-Tălyunanit, ăšmăšăkkăt-asăn măjrăd, ad-itattăr ad-hin-išĕšlĕl ămănokal făll-isălan n-immun. 9Ibdăd-dd săr-s Sawĕl-i s-itawănna daɣ Bulĕs, iḍkar-t Unfas Šăddijăn, ikna asĕns n-akăyad-net făll-Ɣĕlimas, 10inn'-as: "Ǝyya isĕm n-ăgg-Iblis, kăyy wăr tĕḍneyăd a săl amsud d-tĕlmĕnufăɣa, ašănjo n-a-wa oɣădăn a tămoosăd, isĕm n-emĕkkerrĕs, ɣas ăba-hak a kăy-išillĕwăn ar asĕfraɣ n-tabarăt ta toɣădăt n-Emăli. 11Ămăra, sĕjĕd-ahi: ad-fălla-k isăns Emăli ăfuss-net, tăddărɣălăd, tăhajĕd wăr tĕnheyăd tăfukt s-tiṭṭawen-năk." Wărnăt tihay d-tăhoẓt tiṭṭawen-net ăssaɣăt-wen-dăɣ, ad-isikluluf siha d-siha, itammăɣ i-ere t-ilwăyăn. 12Inhăy ămănokal n-ăkall a-wa ijăn ɣas, omăn, tĕḍăs teɣăre ta s-islă făll-Emăli ulh-net. 13Ijjăš Bulĕs d-imidiwăn-net turăft n-aman dăɣ-Bafus, ĕkkăn aɣrĕm wa n-Birga dăɣ-ăkall wa n-Bănfĕli, dihen-dăɣ a dăr-săn ibḍa Marqĕs, ăssof ad-iqqĕl Yărussălam. 14Fălăn Birga, ĕkkăn Intyuš ta n-teje ta n-Bĕssidi. Ij'-en ašăl wa n-ĕssĕbĕt dihen ɣas, ĕkkăn ehăn n-ăddin wa n-kăl-Ălyăhud. 15Ăqqimăn dihen-dăɣ, itawăɣra alămăr n-Măssinăɣ d-a-wa ĕnnăn ănnăbităn dăɣ-ĕlkĕttabăn ɣas, ĕnnăn-asăn imizărăn n-ehăn wa n-ăddin: "Meddĕn, ayĕtma-năɣ, kunta lam isĕmmĕterăn s-tărham ad-tăn-tĕjĕm i-ăddinăt, ăxṭĕbăt-asăn." 16Ăstafăy Bulĕs i-ălžămaɣăt, ibdăd, inn'-asăn: "Kăl-Iṣrayil d-imaksaḍăn n-Măssinăɣ, săjdăt-ahi. 17Măssinăɣ n-tamĕtte-ta-dăɣ n-Iṣrayil, ĕnta a ăsnăfrănăn abbatăn-nănăɣ, ăsset'-en hărwa han ăkall wa n-Miṣra tĕzzar, izzĕzjăr-asăn-t-dd s-tărna n-ăfuss-net, 18wăr t-illa erk ălxal wăr has-ĕjješăn măšan, ăẓẓăydăr fălla-săn har jăn ĕkkoẓăt timĕrwen n-awătay dăɣ-tenere. 19Ḍarăt a-s tăn-ikfa tărna făll-ĕssa ĕddĕwĕlăn dăɣ-Xăna a tăn-ikfa tăkasit ta hasăn-ămoos ăkall-wen-dăɣ. 20Okăy ḍarăt-a-wen a ojărăn ĕkkoẓăt timaḍ n-awătay d-sĕmmosăt timĕrwen tĕzzar, ikf'-en ălqa/l/lităn-i fălla-săn ămnakălnen hundăɣ har ăzzăman wa n-ănnăbi Sumăyla. 21Ǝnta-en-dăɣ a dăɣ-ĕttărăn kăl-Iṣrayil ere fălla-săn ămnakălăn, ij'-asăn a-wa dăɣ-s ĕttărăn, ikf'-en Măssinăɣ Sayĕl ăgg Kis wa n-tawset ta n-Bănyamin. Ămnakăl fălla-săn ĕkkoẓăt timĕrwen n-awătay 22măšan, innăḍ fălla-s Măssinăɣ, ijă-dd Dawĕd ăgg Yasa-i s-ĕnta a făll inna Măssinăɣ: 'Ǝjrăwăɣ Dawĕd ăgg Yasa, ĕnta a-s ăhalĕs-wa s-ulh-net ilkam i-wa-nin, ad-ămašăl erhet-in iket-net.' 23Ijĕllan n-Dawĕd-en-dăɣ a dăɣ-dd-ikkăs Măssinăɣ Ɣisa-i s-ĕnta a-s Ămaɣlas wa s-ijjăš ărkăwăl-net i-kăl-Iṣrayil. 24Ɣisa, a-s ija Exya isălan-net hărwa wăr-issĕnta ămašal-net ălwăqq wa d-ixaṭṭăb asĕlmaɣ dăɣ-aman i-ad-umas a-wen ašămol n-tătubt i-tamĕtte n-Iṣrayil iket-net. 25Ălwăqq wa dd-tohăẓ tamăttant n-Exya, innă i-tamĕtte: 'Mi s-tordam ămoosăɣ-t? Wăr teɣalăt năkk a-s ătwănna ilkam a dd-asăɣ; wa s-ătwănna ilkam a dd-ass, imal-dd, ĕnta-en, wăr-ănhăjjăɣ wăla-dăɣ d-ad-ĕkkĕsăɣ tifădelen dăɣ-iḍarăn-net.' 26Ayĕtma-ɣ wi n-ihăyawăn n-Ibrahim, kăwăneḍ-i ăksuḍnen Măssinăɣ, năkkăneḍ a-s dd-ăssawăy Emăli măjrăd wa n-ĕlɣĕllas. 27Ădduuttăt a-s Yărussălam d-imizărăn-net, ĕžžĕžhălăn iman-năsăn i-Ɣisa, wăr t-illa a ĕfhamăn dăɣ-a-wa ĕnnăn ănnăbităn dăɣ-ĕlkĕttabăn wi titwăɣrinen hak ĕssĕbĕt n-ălɣibadăt dăɣ-ihănan n-ăddin, ăswărăn Ɣisa uḍlem, ittărmăs, 28a-s ija a-wen, wăr t-illa uḍlem fălla-s ăttijrăwăn, hakd a-wen-dăɣ, ĕttărăn dăɣ-Bilatĕs ad-ĕtwĕjjĕn iman-net. 29Ǝssĕtbătăn a-wa fălla-s ĕnnăn ĕlkĕttabăn ɣas, ĕkkăsăn-t-dd făll-tajĕttewt, jăn-t dăɣ-aẓĕkka 30măšan, issĕnkăr-t-dd Măssinăɣ jer-inĕmmuttan. 31Ănfalăl-dd i-ăddinăt ăjjootnen dăɣ-wi dăr-s ăddewnen wa-dăɣ n-Galila har Yărussălam, ija išilan ăjjootnen ill'-e jere-săn. Ămăra, ăddinăt-win-dăɣ s-dd-ănfalăl a tajăyhanen i-isălan-win-dăɣ data-wăn. 32Năkkăneḍ ămăra, nĕtajj'-awăn isălan-win-dăɣ n-ălxer s-ătwăjja ărkăwăl-năsăn i-abbatăn-nănăɣ. 33Ărkăwăl-en, năkkăneḍ-i ămoosnen ihăyawăn-năsăn a-s t-ijjăš Măssinăɣ ĕnta-i dd-issĕnkărăn Ɣisa jer-inĕmmuttan s-ĕmmĕk wa s-iktăb dăɣ-ĕlxĕsĕb-wa s-ĕssin n-ĕlkĕttab wa n-Ăẓẓăbur, innă Măssinăɣ dăɣ-isălan n-Ɣisa: 'Kăyy a-s Rure-ɣ, orăwăɣ-kăy ašăl-i-dăɣ.' 34Ăywa, Ɣisa ya, Măssinăɣ iman-net a innăn, a t-dd-issĕnkărăn jer-inĕmmuttan hărwa wăr-inhey mărkăhaw wa n-aẓĕkka. A-wen-dăɣ daɣ a făl innă dăɣ-isălan-net: 'Ad-kăwăn-ăkfăɣ ălbăraka wa šăddijăn itbătăn s-jeɣ ărkăwăl n-ad-t-ăkfăɣ i-ănnăbi Dawĕd.' 35Iktab daɣ a-s: 'Wăr-e tĕyyĕd Emĕššeddĕj-năk irakkăh dăɣ-aẓĕkka.' 36Tĕssanăm a-s Dawĕd ĕnta iman-net ămešăl a-wa fălla-s irha Măssinăɣ dăɣ-ăzzăman-net tĕzzar, ămmut, inhăy mărkăhaw wa n-aẓĕkka šund a-wa jăn abbatăn-net wi has-dd ăzzarnen 37măšan Ɣisa ĕnta, wăr-inhey mărkăhaw-wen-dăɣ ed, issĕnkăr-t-dd Măssinăɣ jer-inĕmmuttan. 38Ayĕtma, ĕlmĕdăt a-s Ɣisa-i, ĕnta a ɣur-hawăn-t-tĕlla tenăšše n-ibăkkaḍăn, ĕnta a-s sămdo n-a-wa hawăn-ihăn alămăr wa dd-ăzzăbbăt Măssinăɣ făll-ănnăbi Mosa iket-net, 39ĕnta a ɣur-ijarrăw e d t-illăm amumĕn idĕm dat-Măssinăɣ, 40a-wen-dăɣ a făl, agĕẓăt iman-năwăn iket-di d-wăr fălla-wăn oḍa ăššar-wa s-ĕnnăn ănnăbităn. Innă Măssinăɣ: 41'Ǝnhĕywăt, kăwăneḍ-i ĕḍnăynen kĕssĕn, tărmĕset-kăwăn tăqqăn n-eɣăf, ibăhet-kăwăn făl-a-s ad-ĕjĕn ijităn dăɣ-ăzzăman-năwăn s-kud-dăɣ ij'-awăn ăwadĕm isălan-năsăn, wăr mad-t-tĕflĕsăm.' " 42Izjăr-dd Bulĕs d-Bărnăbbas ehăn n-ăddin ɣas, ĕttărăn dăɣ-săn ăddinăt a dd-alĕsăn uɣĕl ĕssĕbĕt-wa ilkămăn i-ad-hasăn-alĕsĕn iji n-isălan-wi-dăɣ. 43Immăhăš ălžămaɣăt ɣas, ĕlkămăn-asăn kăl-Ălyăhud ăjjootnen d-iyyăḍ ĕlkamnen i-ăddin wa n-kăl-Ălyăhud, ădwănnen dăr-săn, sisibuyunăn-tăn, sikusăn-tăn ăššăk n-ad-ăqqăymĕn ĕṭṭafăn ănnuɣmăt n-Măssinăɣ. 44Ijă ašăl wa n-ĕssĕbĕt-i n-tăsonfat ɣas, ăddew-dd aɣrĕm iket-dăɣ-net i-ad-isĕjĕd i-măjrăd n-Emăli. 45Ǝnhăyăn kăl-Ălyăhud ĕjut n-tamĕtte ɣas, osămăn, ad-šimšĕkken măjrăd i-Bulĕs, jannen isikufor. 46Bulĕs d-Bărnăbbas ămoosăn meddĕn ozjanen s-itbat immun-năsăn, ĕnnăn-asăn: "Kăwăneḍ a-s ăniihăjja ad-hawăn-itwăxṭĕb măjrăd n-Măssinăɣ s-tizarăt măšan, tunjăyăm săr-s ed, wăr tăsnăhăjjăm iman-năwăn d-tămudre ta tăɣlălăt, a-wen-dăɣ a făl ămăra, ĕlmĕdăt a-s ad-nĕnnăḍ s-inĕẓẓulam. 47Ǝnta-den-dăɣ a-wa s-hanăɣ-omăr Emăli dăɣ-ĕlkĕttab-net a-s innă: 'Jeɣ kăy-ănnur i-tiwsaten i-ad-hin-sĕssiwăḍĕd ĕlɣĕllas ifăyyăn n-ăkall iket-net.' " 48Ǝslăn inĕẓẓulam i-a-wen ɣas, ĕddĕwen, ad-timĕlĕn măjrăd n-Emăli, omănăn wi s-ătiwatăs ad-ĕjrĕwăn tămudre ta tăɣlălăt iket-năsăn. 49Intăj măjrăd n-Emăli dăɣ-ăkall iket-net. 50Jăn kăl-Ălyăhud erk iman dăɣ-tiḍeḍen ătiwăsămɣărnen d-imuzărăn n-aɣrĕm, oḍă-dd ălɣizabăt sĕmmăn făll-Bulĕs d-Bărnăbbas, ăsmăhăḍăn dăɣ-săn ăddinăt i-ad-ĕzjărăn isăɣlay n-ăkall-năsăn. 51Ǝbbĕkbăkăn ăboqqal n-iḍarăn-năsăn făll-aɣrĕm-en tĕzzar, ĕkkăn aɣrĕm wa n-Ikanyun. 52Ăqqimăn-dd inĕṭṭulab wi n-Intyuš ḍarăt tekle-năsăn, ĕknan dăɣ-tedăwit, iḍnay-tăn daɣ Unfas Šăddijăn.

will be added

X\