Ijităn n-inĕmmušal 12

1Ăzzăman-wen-dăɣ, ad-izzăn ămănokal Harudĕs Ăgribba s-iyyăḍ dăɣ-ăddinăt n-ălkănisăt ta hăt Yărussălam, ad-tăn-itiɣĕzzĕbut. 2Dăɣ-a-wen-dăɣ, ad-inɣa s-tăkoba Yaqub wa n-ă/n/na-s n-Exya. 3Inhăy a-s a-wa ija, ijraẓ i-kăl-Ălyăhud ɣas, ăstărmăs Bĕṭrus ašăl n-ămudd wa n-Faṣka-i-dăɣ tattăn ăddinăt tijĕlwen ti wăr ha tăẓẓa, 4ij'-e dăɣ-takărmut tĕzzar, issĕbdăd ĕkkoẓăt taggayen n-ĕkkoẓ-ĕkkoẓ ĕssărdusa i-ad-t-ăɣlĕfăn ed irha ad-t-dd-isĕbdĕd dat-kăl-ăššăreɣa afăl okăy ašăl wa n-Faṣka. 5Iha Bĕṭrus takărmut-en-dăɣ măšan, a-s ija a-wen-dăɣ, ălkănisăt ĕnta, tăžžiimăɣ, tajăynan dat-Măssinăɣ, tattăr dăɣ-s ad-t-dd-ăswăyyăn. 6Dăɣ-ehăḍ wa n-dat-wa d-ila Harudĕs ad-t-išrăɣ, insa Bĕṭrus dăɣ-takărmut jer-ĕssin ĕssărdusa dăɣ-s janen sănatăt tišĕm, ĕbdadăn daɣ ĕssărdusa iyyăḍ dat-emm n-takărmut. 7Har šik-dăɣ, osă-dd ănjălos n-Emăli edăgg-en, ămlăwlăw sĕllul wa iha, ăkrăttăt ănjălos tasăja n-Bĕṭrus, issĕnkăr-t, inn'-as: "Tărmaḍ, ĕbdĕd šik!" Sărnăt fălla-s tišĕm ăssaɣăt-wen-dăɣ, oḍănăt. 8Inn'-as ănjălos daɣ: "Tărmaḍ, ĕjbĕs tamĕntĕka-năk, ĕsĕl tifădelen-năk, uhĕn, ăj anăkăbba-năk, ĕlkĕm-ahi." Ija Bĕṭrus a-wa has-innă ănjălos iket-net. 9Izjăr-dd Bĕṭrus takărmut, ilkăm i-ănjălos măšan har ămăra-dăɣ, ija ɣur-s a-s tăharjit ɣas a-wa-dăɣ iket-net. 10Ǝkkăn-dd edes i-ĕssărdusa wi ăzzarnen, ĕkkăn-dd daɣ edes i-taggayt ta s-sănatăt har dd-ohăẓăn tashărt ta n-tăẓoli tĕkfăt emm-net aɣrĕm, tămera d-iman-net data-săn, ĕzjărăn, ĕjjăšăn ammas n-tăšarrit ɣas, ifăl ănjălos Bĕṭrus. 11Ălwăqq-wen-dăɣ, ad-t-dd-iqqăl ĕnniyăt-net, ikkăs ăššăk a-s Măssinăɣ a săr-s dd-ăšmašălăn ănjălos-net i-ad-t-dd-ikkĕs jer-ifassăn n-Harudĕs, d-a-wa lăbasăn s-ărhăn kăl-Ălyăhud ad-has-t-ĕjĕn. 12Ijrăh taɣărha-net ămăra ɣas, ikkă ehăn n-Măryăma ta n-ma-s n-Exya wa s-itawănna Marqĕs, ăžžiimmăɣăn ɣur-s imumĕnăn ăjjootnen tĕddalnen Măssinăɣ. 13Ikkĕwkăw emm n-ehăn, tošăl-dd săr-s tămawaḍt n-tănaxdimt s-isĕm-net Roda, tĕssĕstăn-t d-ere wa ămoos, 14tĕzzăy temăslăɣt-net măšan, tĕja tedăwit-ta-dăɣ făl hin-tĕttĕwa wăla-dăɣ ad-has-tarr emm n-ehăn, tošăl, tăqqăl ammas n-ehăn, tĕja isălan dăɣ-ălžămaɣăt n-a-s Bĕṭrus a itakăwkawăn emm n-ehăn. 15Ǝslăn i-a-wa jănna ɣas, ĕjăn-tăt tenĕbbeddĕlt, ĕnnăn-as: "A-di ănjălos-net ɣas a-s tĕsled." Măšan, tĕnn'-asăn: "Tidĕt-in, ĕjlayăɣ a-s ĕnta." 16Jannen a-wen-dăɣ, itakăwkaw-asăn Bĕṭrus emm n-ehăn. Ǝglăn, orăn-as-t, ĕqqălăn-dd ɣas, tof'-en tăkunt n-a-s tidĕt-dăɣ a-s ĕnta a-wa. 17Ăswăr-asăn assĕkăḍ emm-net, ăstafăy-asăn d-ad-susĕmăn, ad-hasăn-itajj ḍarăt-a-wen isălan n-ĕmmĕk wa s-t-dd-ikkăs Emăli dăɣ-takărmut. Inn'-asăn daɣ: "Ăglăt, ăjăt ămăra isălan dăɣ-Yaqub d-ayĕtma-năɣ dăɣ-ăddin wi iyyăḍnen." Ifăl-tăn ḍarăt-a-wen, ikk' edăgg iyyăn. 18Ăffăw ɣas tĕjă tămdărwăy măqqoorăt dăɣ-ĕssărdusa, hak iyyăn isastan amidi-net d-a-wa ija Bĕṭrus. 19Ăssomăɣ-asăn-t Harudĕs măšan, ăba-hasăn-t-dd. Issăɣră-dd ĕssărdusa wi s-kăla t-ăɣlăfăn, omăr s-ad-ĕtwĕsĕstĕnăn tĕzzar, ămmătăn. Ifăl Harudĕs ḍarăt-a-wen teje ta n-Ălyăhudĕyăt, ikk' aɣrĕm wa n-Qăyṣăra i-ad-dăɣ-s isĕssikĕy a lăn išilan. 20A-s ităjj a-wen-dăɣ, ih' aḍkăr n-iɣărman wi n-Tir d-Săyda ămănokal Harudĕs. Tĕssĕba n-ad-ăj ălxer dăr-săn a făl dd-ăšmašălăn iɣărman-en ălžămaɣăt n-ălɣafyăt. Ănmănnakăn d-Blastas-i ănnihăḍăn dăɣ-ehăn n-ămănokal Harudĕs d-a-wa t-dd-iqqălăn iket-net. Ǝnta-en-dăɣ a dăɣ-ĕttărăn ad-ilɣĕd ămănokal i-ad-ăj ălxer ed isudar-năsăn teje-ten-dăɣ făll-ixkăm Harudĕs a dd-tĕffalăn. 21Ašăl wa d-ĕlăn s-ad-sĕtbĕtĕn ălxer jere-săn, ăssahăɣ-dd Harudĕs ašăl dăɣ-isĕlsa-net wi n-tĕmmĕnukĕla, ăqqima făll-tasăqqaymut-net ta n-tĕmmĕnukĕla, immĕjrăd i-tamĕtte. 22Tĕsla tamĕtte i-măjrăd-net ɣas, tăsɣăyya dăɣ-išĕnnawăn, ad-janna: "Ašăl-i, Măssinăɣ iman-net a hanăɣ-ămmijrădăn, wădden ăgg-adĕm." 23Diha-dăɣ d-tĕnna tamĕtte a-wen-dăɣ, ad-has-ăẓẓuggăt ănjălos n-Măssinăɣ ed unjăy ikfa Măssinăɣ semɣar wa dăr-ănihăjja. A-s t-in-ĕjrăhăn ăddinăt, ĕfradnăt dăɣ-s tiwĕkkawen har ămmut. 24Intăj măjrăd n-Măssinăɣ dăɣ-idăggan ăjjootnen, omănăn ăddinăt dăɣ-išilan-win-dăɣ. 25Ăssawăḍ-in Bărnăbbas d-Sawĕl ămašal-năsăn i-kăl-Yărussălam ɣas, ĕqqălăn siha s-dd-hăn, ăddeewăn ămăra d-Exya wa s-itawănna Marqĕs.

will be added

X\