Ijităn n-inĕmmušal 11

1Ǝslăn inĕmmušal d-ayĕtma wi iyyăḍnen hănen teje ta n-Ălyăhudĕyăt a-s iyyăḍ dăɣ-inĕẓẓulam omănăn s-măjrăd n-Măssinăɣ. 2Ălwăqq wa dd-iqqăl Bĕṭrus Yărussălam, ămẓăyẓăyăn-t imumĕnăn wi n-dăgg-Ălyăhud jănen amili hărăt, ĕnnăn-as: 3"Kăyy, ma kăy-ăsihălăn ujĕš n-ehăn n-ăddinăt wăren ămelăy tihĕrĕd dăr-săn imĕnsiwăn?" 4Issĕnt'-asăn Bĕṭrus afĕssăr n-isălan s-iyyăn-iyyăn ɣur-alăṣăl-năsăn har ašăl-i-dăɣ, inn'-asăn: 5"Heɣ aɣrĕm wa n-Žafa, tĕddalăɣ Măssinăɣ a-s dd-heɣ oḍeɣ, irmăs-ahi hărăt, ănfalăl-ahi-dd ăssărer dd-ifalăn išĕnnawăn 6făll-ĕnsanăt taɣsiwen d-tawăqqast d-iẓlulam d-igḍaḍ. Zajăzzeɣ a-wa insăn făll-ăssărer-en-dăɣ 7a-s ĕsleɣ i-emăsli hi-innăn: 'Bĕṭrus, ăɣrĕs, ăkš' 8măšan, ĕnneɣ-as: 'Făw Emăli! Năkk, wăr kăla ĕkšeɣ a xăramăn wăla a ămmiḍăsăn.' 9Inn'-ahi emăsli-ĕnnin daɣ: 'Wăr kăy-iwer asăxrĕm n-a-wa issăxlăl Măssinăɣ.' 10Itajj a-wen har kăraḍ ihăndăggan tĕzzar, immĕḍkăl dat-i ăssărer s-išĕnnawăn. 11Iqqan a-wa ijăn eɣăf-in dihen-dăɣ a-s dd-ĕbdădăn kăraḍ meddĕn dd-falnen Qăyṣăra dat-emm n-ehăn wa ɣur-ăzzubbeɣ, 12inn'-ahi Unfas Šăddijăn ad-dăr-săn idawăɣ šik. Ăddewăɣ dăr-săn, ăddeewăɣ daɣ d-săḍis ayĕtma wi t-ĕllănen data-wăn ămăra-dăɣ s-ehăn n-Kărnĕlyus-i hi-dd-issăɣrăn. 13Năwwăḍ-in ɣas, ija dăɣ-năɣ Kărnĕlyus isălan n-ĕmmĕk wa s-has-dd-ănfalăl ănjălos wa has-innăn: 'Šĕmmišĕl ămăra ăwadĕm s-aɣrĕm wa n-Žafa i-ad-dd-idaw d-ăhalĕs s-isĕm-net Simyon wa s-itawănna Bĕṭrus. 14Afăl dd-osa, ad-hak-ăllăɣăt ĕmmĕk wa s-mad-tăɣlĕsăd kăyy d-eɣewĕn-năk.' 15Ămmiijrădăɣ-asăn dihen-dăɣ, a-s fălla-săn dd-ăzzubbăt Unfas Šăddijăn iket-năsăn s-ĕmmĕk wa s-fălla-năɣ dd-ăzzubbăt năkkăneḍ ašăl ăzzarăn. 16Ǝkteɣ-dd ălwăqq-wen măjrăd n-Emăli Ɣisa a-s inna: 'Exya, issĕlmăɣ dăɣ-aman măšan, kăwăneḍ, ad-tĕtwĕsĕlmăɣăm dăɣ-Unfas Šăddijăn.' 17Ɣas šămad ij'-asăn Măssinăɣ ihuk šund wi hanăɣ-ija a-s nomăn s-Emăli Ɣisa Ălmasex, mi ămoosăɣ timsĕgĕggiyăɣ d-Măssinăɣ?" 18Isl' ălžămaɣăt i-isălan-win-dăɣ ɣas, sămmeḍ ĕnniyăt-net ad-tiimĕlĕn Măssinăɣ, jannen: "Itbat a-s inĕẓẓulam-dăɣ, ikf'-en Măssinăɣ turhajăt n-ad-utabăn, amĕnăn săr-s, ĕjrĕwăn ĕntăneḍ-dăɣ tămudre ta n-tidĕt." 19Imumĕnăn wi ĕmmăhăšnen ḍarăt tissust ta tĕlkămăt i-tamăttant n-Stifan, ĕkkăn dăɣ-săn iyyăḍ ăkall wa n-Finisya, ĕkkăn iyyăḍ awtĕl wa n-Qĕbrus, ĕkkăn iyyăḍ aɣrĕm wa n-Intyuš, măšan wăr xĕṭṭĕb tĕššĕm-năsăn ar i-kăl-Ălyăhud. 20Dăɣ-a-wen-dăɣ a dăɣ-săn ĕkkăn iyyăḍ ĕwanen dăɣ-ăkall wa n-Qĕbrus d-wa n-Libya aɣrĕm wa n-Intyuš, ad-xaṭṭăbăn dihen isălan n-ălxer n-Emăli Ɣisa i-kăl-Ălyunan. 21Idhal-tăn Emăli dăɣ-a-wa tăjjăn. Omănăn ăddinăt ăjjootnen dăɣ-a-wen-dăɣ, ĕkfăn iman-năsăn i-Emăli. 22Tĕsl' ălkănisăt ta hăt Yărussălam i-a-wen ɣas, tăšmašăl-dd Bărnăbbas s-aɣrĕm wa n-Intyuš. 23Osa-hin, inhăy tihusay n-ănnuɣmăt n-Măssinăɣ ɣas, ăsdăwăt-t a-wen, ad-isamătar imumĕnăn d-ad-ĕknĕn uḍĕf n-Emăli s-ulhawăn ĕjlaynen. 24Ămoos ĕnta iman-net ăhalĕs n-emăssărho, iḍnay Unfas Šăddijăn, ăṣṣoohăt daɣ dăɣ-immun-net. Išilan-en-dăɣ, omănăn ăddinăt ăjjootnen s-Emăli. 25Dăɣ-a-wen-dăɣ ad-ikka Bărnăbbas taɣrĕmt ta n-Tarša itammăɣ i-Sawĕl, ijrăw-t ɣas, ilwăy-t-dd s-Intyuš. 26Jăn dihen awătay imdan ănniixdămăn d-ălkănisăt n-aɣrĕm-en, saɣr'-en tamĕtte tăjjet. Aɣrĕm-wen-dăɣ n-Intyuš a dăɣ-ătwăɣrăn inĕṭṭulab n-Ɣisa s-isĕm wa n-ălmăssexităn s-tizarăt. 27Ăzzăman-en-dăɣ ad-dd-fălăn ănnăbităn iha Ăggăbbas aɣrĕm wa n-Yărussălam, ĕkkăn-dd Intyuš. 28Ǝnta-en-dăɣ a ibdădăn, ălolăy s-tărna n-Unfas Šăddijăn n-a-s ilkam ad-ăj laẓ lăbasăn făll-ărori n-ăkall iket-net. Ija daɣ a-wen s-ĕmmĕk-wen-dăɣ s-tăn-innă dăɣ-ăzzăman wa d-ămoos Kĕlod ămănokal n-ăkall. 29Tĕssĕba n-a-wen-dăɣ a făl, ănmănnakăn imumĕnăn wi hănen Intyuš i-ad-arĕj hak iyyăn dăɣ-săn s-a-wa iṭṭăf d-a-wa s-ăddoobăt i-ayĕtma-săn dăɣ-ăddin wi hănen Ălyăhudĕyăt. 30Ǝjăn a-wen s-ĕmmĕk-en-dăɣ tĕzzar, jăn tasĕssiwit-ten-dăɣ jer-ifassăn n-Bărnăbbas d-Sawĕl i-ad-tăt-in-sĕssiwĕḍăn inušămăn n-ălkănisăt ta hăt Ălyăhudĕyăt.

will be added

X\