Ijităn n-inĕmmušal 10

1Aɣrĕm wa n-Qăyṣăra, izzaɣ-t kăbtăn n-kăl-Roma s-isĕm-net Kărnĕlyus, ănnihăḍ dăɣ-ejhăn n-ĕssărdusa wi hănen taggayt ta s-itawănna: Iṭali. 2Ăhalĕs ăddiinăn a ămoos ĕnta hakd kăl-eɣewĕn-net, itĕkkat, infa tamĕtte s-a ăjjeen, hărkuk daɣ itĕddal Măssinăɣ. 3Ašăl iyyăn, ebre n-tezzar, ɣur ăssaɣăt wa s-kăraḍ, ănfalăl-as-dd ănjălos n-Măssinăɣ dăɣ-ehăn-net s-ălmăɣna ăsisăjrăhăn, inn'-as: "Kărnĕlyus!" 4Issĕjrăh Kărnĕlyus dăɣ-ănjălos dăɣ-a-s irmaɣ, inn'-as: "Emăli, năkk-da, ma tĕnned?" Inn'-as ănjălos: "Tittar-năk, d-tikutawen-năk, ĕwwăḍnăt Măssinăɣ, wăr kăy-in-ittĕwa, 5šĕmmišĕl ămăra meddĕn s-Žafa i-ad-hak-dd aɣrĕn Simyon wa s-itawănna Bĕṭrus, 6ăzzubbăt ɣur-Simyon wa isafalăn ilămawăn s-t-illa ehăn-net dăɣ-asălim n-ejărew wa sĕmmăn." 7Ifăl-t ănjălos wa hasăn-immĕjrădăn ɣas, issăɣră-dd Kărnĕlyus ĕssin dăɣ-inaxdimăn-net, ăsdăw-tăn d-ĕssărdasi ăddinăn dăɣ-wi ăɣlăfnen ehăn-net, ikna taflĕst. 8Ijă dăɣ-săn isălan n-a-wa ijăn iket-net tĕzzar, ăšmašăl-tăn s-Žafa. 9Hărwa han tabarăt ašăl wa iyyăḍăn, ad-iwwăn Bĕṭrus afălla n-ehăn s-tarăhut, ad-itĕddal Măssinăɣ. 10Itĕddal Măssinăɣ dihen-dăɣ a-s ălluẓ, ăsdărhăn a ikša. Samăjnen-as ăddinăt imĕnsiwăn dihen-dăɣ a-s t-irmăs hărăt, 11ojja išĕnnawăn a-s dd-ămerăn, ifăl-tăn-dd ăssărer măqqoorăn ătiwăṭṭăfăn s-ĕkkoẓ išrutăn-net, insă-dd data-s. 12Ăssărer-en, iskar fălla-s a-wa t-illăn dăɣ-irĕzzejăn d-iẓlulam d-igḍaḍ. 13Inn'-as emăsli iyyăn ălwăqq-wen: "Bĕṭrus, ăɣrĕs, ăkš." 14Inn'-as Bĕṭrus: "Făw Emăli! Năkk, wăr kăla ĕkšeɣ a xăramăn wăla a ămmiḍăsăn." 15Inn'-as emăsli daɣ: "Wăr kăy-iwer asăxrĕm n-a-wa issăxlăl Măssinăɣ." 16Itajj ănjălos măjrăd-wĕnnin-dăɣ i-Bĕṭrus har kăraḍ ihăndăggan tĕzzar, immĕḍkăl data-s ăssărer s-išĕnnawăn. 17Iqqăn a-wen-dăɣ eɣăf-net, ad-isimĕktĕw, itassăn ad-ijrăh ălmăɣna n-a-wa has-dd-ănfalălăn. Tamăzăyyat-ten-dăɣ a dăɣ-dd-ĕbdădăn meddĕn dăr-s sastannen dat-emm n-ehăn wa n-Simyon-i ɣur-ăzzubbăt, 18ĕssĕstănăn s-afălla kunta ehăn-wen-dăɣ a dăɣ-izzaɣ Simyon wa s-itawănna Bĕṭrus. 19Isimĕktĕw Bĕṭrus dăɣ-isălan n-tănăfalilt-ta-dăɣ a-s has-innă Unfas Šăddijăn: "Sastanăn dăr-k kăraḍ meddĕn, 20wăr tăsmăsăndădăd tidawt dăr-săn ed năkk a tăn-dd-ăšmašălăn săr-k." 21Ăzzubbăt-dd săr-săn Bĕṭrus, ăzozăy-tăn iman-net, issĕstăn-tăn d-ăddălil wa făl dăr-s sastanăn. 22Ǝnnăn-as: "Kărnĕlyus wa n-kăbtăn n-Roma a hanăɣ-dd-ăšmašălăn săr-k, ăhalĕs n-ămaɣdal n-ămaksaḍ n-Măssinăɣ, ăssiimɣărăn kăl-Ălyăhud iket-năsăn a ămoos. A ilan išilan d-has-dd-ănfalăl ănjălos n-emĕššeddĕj n-Măssinăɣ t-ăsmătărăn d-ad-kăy-dd-isĕssăɣăr, isĕjĕd i-a-wa has-mad-tĕnnĕd afăl t-dd-tosed." 23Ăsbărrăkăt Bĕṭrus meddĕn wi dd-ăšmašăl Kărnĕlyus, ăsmăjarăt-tăn. Ăffăw ɣas, ărkăbăn, ăddewăn dăr-săn hărăt dăɣ-ayĕtma-săn dăɣ-ăddin ĕzzaɣnen Žafa. 24Ǝwwăḍăn-in ašăl wa iyyăḍăn Qăyṣăra. A-s hin-osăn, iqqal-asăn Kărnĕlyus ĕnta d-kăl-eɣewĕn-net d-inaflisăn-net. 25Irăs-dd Bĕṭrus ehăn ɣas, ilkăḍ-as-dd Kărnĕlyus, oḍa daw-iḍarăn-net, irkăɣ data-s 26măšan, issĕbdăd-t-dd Bĕṭrus, inn'-as: "Ahaa, wăr jed a-di, năkk-dăɣ ăgg-adĕm ɣas a ămoosăɣ." 27Ădiiwănnen har-ĕjjăšăn făll-ălžămaɣăt wa ăqqiimăn dăɣ-ammas n-ehăn. 28Iḍkăl Bĕṭrus măjrăd, inn'-asăn: "Tĕssanăm kăwăneḍ iman-năwăn a-s ăssixrăm alămăr wa n-kăl-Ălyăhud i-iyyăn dăɣ-săn ujĕš n-ehăn, wăla tĕmmidĕwa d-ere d-wăr-oher ăddin măšan, năkk-i-hi, inn'-ahi Măssinăɣ a-s wăr leɣ s-ad-sĕjrăhăɣ ăwadĕm wăl' iyyăn i-ad-t-ăjăɣ a xăramăn wăla a ămmiḍăsăn. 29Tĕssĕba n-a-wen-dăɣ afăl wăr jeɣ ăsaru wăl' iyyăn i-ad-wăr kăwăn-dd-ĕkkeɣ, lăɣătăt-ahi ămăra, ăddălil wa făl hi-dd-tĕssăɣrăm." 30Inn'-as Kărnĕlyus: "A ilan kăraḍ išilan, s-ăssaɣăt šund-wa-dăɣ, tĕddalăɣ Măssinăɣ s-tezzar dăɣ-ehăn-in, har šik-dăɣ, ibdăd-dd ăhalĕs ilsan imălsan ăsimăɣmăɣnen dat-i, 31inn'-ahi: 'Kărnĕlyus, tittar-năk d-tikutawen-năk, ĕwwăḍnăt Măssinăɣ, wăr kăy-in-ittĕwa, 32šĕmmišĕl ămăra meddĕn s-aɣrĕm wa n-Žafa i-ad-dd-idawăn d-ăhalĕs s-isĕm-net Simyon wa s-itawănna Bĕṭrus, ăzzubbăt dăɣ-ehăn n-Simyon wa isafalăn ilămawăn, ehăn-net, ih' asălim n-ejărew wa sĕmmăn.' 33Ăšmašălăɣ-in săr-k ălwăqq-wen-dăɣ meddĕn-in, irăš-ak Măssinăɣ ass wa hi-dd-jed. Ămăra, iket-dăɣ-nănăɣ da-dăɣ, Măssinăɣ a dăɣ-nĕjar ăṭṭăma, năsijăd daɣ iket-nănăɣ i-a-wa s-hak-inna Emăli ad-hanăɣ-t-sĕlmĕdăd." 34Iḍkăl Bĕṭrus măjrăd, innă: "Tidĕt-dăɣ a-s, iket ĕjrăhăɣ a-s, Măssinăɣ, wăr-iẓley ăddinăt, 35ănn-ak, e d t-illăm ere t-ăksuḍăn, itamašal erhet-net s-iqqud, tawset t-tĕlăt-dăɣ, ijraẓ-as. 36Măssinăɣ, ăssawăy-dd s-tizarăt măjrăd-net i-kăl-Iṣrayil i-ad-tăn-isĕlmĕd s-ălxer wa tăn-mad-ăkf Ɣisa Ălmasex-i n-Emăli n-e d t-illăm ăgg-adĕm. 37Tĕssanăm a-wa ijăn dăɣ-Galila d-Ălyăhudĕyăt ḍarăt asĕlmaɣ wa ij' Exya i-ăddinăt dăɣ-aman. 38Ɣisa wa n-Năṣirăt, ăsnăfrăn-t Măssinăɣ, ikf'-e Unfas, issăɣlăy-dd ăkall iket-net, itajj ălxer, izizuy ăddinăt iket-năsăn wi ăssirmăɣ Iblis. 39Năjjĕyh i-a-wa ija iket-net dăɣ-teje ta n-Ălyăhudĕyăt d-aɣrĕm wa n-Yărussălam hundăɣ har ašăl wa d-t-ărmăsăn kăl-Ălyăhud, ĕṣlăbăn-t făll-tajĕttewt 40măšan, issĕnkăr-t-dd Măssinăɣ s-tărna-net jer-inĕmmuttan ašăl wa s kăraḍ i-ad-t-ĕnhĕyăn ăddinăt, iddar, 41wădden ăddinăt iket-năsăn a t-ĕnhăynen, wăr t-inhey ar wi ăsnăfrăn ĕnta iman-net i-a-wen. Ăddinăt-en, nĕh'-en năkkăneḍ-i ohărnen išĕkša d-isĕswa d-Ɣisa ḍarăt a-s t-dd-ăssinkăr Măssinăɣ jer-inĕmmuttan. 42Ǝnta-en-dăɣ a hanăɣ-ăsnăfrănăn, omăr-anăɣ s-axăṭṭab n-isălan-net i-ăddinăt, nĕsĕlmĕd-tăn a-s Ɣisa a ăsnăfrăn Măssinăɣ i-ad-išrăɣ e d t-illăm ăgg-adĕm, wi ăba hakd wi ĕddărnen. 43Dăɣ-isălan-net ĕnta-en-dăɣ a dăɣ-ăjjĕyhăn, ĕnnăn ănnăbităn iket-dăɣ-năsăn a-s, ere săr-s omănăn-dăɣ, ad-ijrĕw tenăšše n-ibăkkaḍăn-net s-tărna n-isĕm-net." 44Ijanna Bĕṭrus a-wen-dăɣ a-s dd-ăzzubbăt Unfas Šăddijăn făll-ălžămaɣăt-en iket-net. 45Iqqăn a-wen eɣăf n-imumĕnăn wi n-kăl-Ălyăhud ămelăynen ăddewnen d-Bĕṭrus ed ĕnhăyăn Unfas Šăddijăn har dd-ăzzubbăt făll-ăddinăt s-alăṣăl-năsăn, inĕẓẓulam a ămoosăn. 46Sallăn-asăn daɣ ămmiijrădăn awalăn ăynaynen, samɣarăn Măssinăɣ. 47Inn'-asăn Bĕṭrus ḍarăt-a-wen: "Ak, ma igdalăn i-ăddinăt făll-dd-ăzzubbăt Unfas Šăddijăn s-ĕmmĕk wa s-fălla-năɣ dd-ăzzubbăt ad-ĕtwĕsĕlmăɣăn dăɣ-aman?" 48Omăr ălwăqq-wen-dăɣ s-ad-ĕtwĕsĕmăɣăn dăɣ-aman s-isĕm n-Ɣisa Ălmasex. Ittăr Kărnĕlyus d-ălžălmaɣăt-net dăɣ-Bĕṭrus ad-ɣur-săn isĕssikĕy a lăn išilan.

will be added

X\