Ijităn n-inĕmmušal 1

1A-wa năkk hin-iktabăn i-enĕssemɣăr-in Tăyofil: Dăɣ-ĕlkĕttab-in wa ăzzarăn, ăssoɣălăɣ-ak isălan n-a-wa s-issĕntă Ɣisa iji-net d-a-wa issăɣra iket-net 2hundăɣ har ašăl wa d-immĕḍkăl s-išĕnnawăn, ḍarăt a-s ăsimătăr inĕmmušal wi ăsnăfrăn s-tărna n-Unfas Šăddijăn. 3Ǝntăneḍ-en-dăɣ a-s dd-ăsnăfalăl iman-net s-tizarăt ḍarăt tamăttant-net i-ad-tăn-isĕlmĕd s-timtăr ăjjootnen a-s iddar. Ija ḍarăt tanăkra-net jer-inĕmmuttan ĕkkoẓăt timĕrwen n-ašăl izzaɣ jer-inĕṭṭulab-net, itajj'-asăn isălan n-Tĕmmĕnĕya n-Măssinăɣ. 4Ašăl iyyăn, ohar dăr-săn amĕnsi har šik-dăɣ, inn'-asăn: "Wăr felăm aɣrĕm wa n-Yărussălam, ĕqqĕlăt i-a wa s-hi-tĕslăm saɣreɣ-t s-hawăn-ijjăš Abba ărkăwăl-net; 5tidĕt, Exya, aman a dăɣ-issĕlmăɣ ăddinăt măšan kăwăneḍ, dăɣ-hărăt n-išilan, ad-tĕtwĕsĕlmăɣăm dăɣ-Unfas Šăddijăn-i dd-e-izzubben fălla-wăn." 6Ăžžiimmăɣăn dihen-dăɣ a-s t-ĕssĕstănăn, ĕnnăn-as: "Emăli, ajăn ăzzăman wa dăɣ-dd-taqqăl tĕmmĕnukĕla Iṣrayil, osă-dd?" 7Inn'-asăn: "Wădden kăwăneḍ a iwar almud n-tăqqăn wăla ăssaɣăt wa iɣtăs Abba dăɣ-ălxikmăt-net; 8kăwăneḍ, ad-tĕjrĕwăm tărna, ad-fălla-wăn dd-izzubbĕt Unfas Šăddijăn, tumasăm tijuhawen-in dăɣ-aɣrĕm wa n-Yărussălam, dăɣ-teje ta n-Ălyăhudĕyăt iket-net d-ta n-Sămari tĕkkĕm har diha dd-tĕmda ăddunya." 9Inn'-asăn a-wen ɣas, immĕḍkăl data-săn s-išĕnnawăn; ĕbdadăn, ĕswaḍăn dăɣ-s har hasăn-t tĕnjăr tejărăkt. 10Ăjoẓăyăn išĕnnawăn-i s-immĕḍkăl a-s hasăn-dd-ănfalălăn ĕssin meddĕn ăssiimlălnen, ĕnnăn-asăn: 11"Ya kăl-Galila, ma s-tĕbdadăm tăjoẓăyăm išĕnnawăn? Ɣisa wa immĕḍkălăn jere-wăn s-išĕnnawăn, ilkam a dd-iqqĕl s-ĕmmĕk-wa-dăɣ s-t-tĕnhăyăm ikk'-en." 12Fălăn inĕmmušal ḍarăt-a-wen taḍaɣt ta n-ĕzzăytunităn, ĕqqălăn aɣrĕm wa n-Yărussălam-i hasăn-t-illăn ĕḍḍĕkuḍ n-tăẓune n-ăssaɣăt n-răjjoš. 13Ǝwwăḍăn-in aɣrĕm, ĕkkăn soro n-ehăn-wa s-ĕzzăyăn ažĕmmăɣ dăɣ-s. A-wen: Bĕṭrus, Exya, Yaqub, Idris, Fĕlibb, Tomi, Bartălămma, Mătti, Yaqub ăgg Ălfa, Simyon wa s-itawănna Ăššažeɣ, Hudd wa n-ăgg Yaqub. 14Ǝjlayăn iket-dăɣ-năsăn dăɣ-a-wa hăn, oharăn iyyăn n-ulh dăɣ-temădilt n-Măssinăɣ ĕntăneḍ d-tiḍeḍen tĕha Măryăma ta n-ma-s n-Ɣisa d-ayĕtma-s n-Ɣisa. 15Ăžžiimmăɣăn dihen-dăɣ, ămoosăn temeḍe n-ăwadĕm d-sănatăt timĕrwen a-s dd-ibdăd Bĕṭrus jere-săn, inn'-asăn: 16"Ayĕtma-ɣ, a-wa innă Unfas Šăddijăn s-emm n-ănnăbi Dawĕd, dăɣ-isălan n-Yăhudĕs-i dd-ăslălăn ăddinăt wi ărmăsnen Ɣisa, ijă; 17kăla dăɣ-năɣ ăḍḍiin, kăla t-illa ijraw folăt-net dăɣ-ămašal wa hanăɣ-issăɣlăf Măssinăɣ. 18Aẓrĕf-wa xăramăn irmăs i-ad-ămašăl abăkkaḍ wa ofa, ižžĕnšă săr-s ašĕkrĕš wa dăɣ-dd-iha ăsikăṭṭăy făll-eɣăf-net, ăsfătăqqăt iman-net, ăẓun dăɣ-ammas, ăbrăẓẓăt-dd a-wa ihăn tăsa-net iket-net făll-ăkall; 19wăr t-illa ere izzaɣăn Yărussălam s-wădden han-t isălan n-a-wen-dăɣ, ĕglăn ăddinăt făw har ašĕkrĕš-wen-dăɣ dăɣ-t-ăba, ĕjăn-as isĕm dăɣ-tawalt-năsăn: 'Hăqqăldăma', a-wen ălmăɣna-net: 'Ašĕkrĕš wa n-ašni'. 20Ămăra, iktab dăɣ-ĕlkĕttab wa n-Ăẓẓăbur a-s: 'Iqqĕlet ehăn-net timšar, wăr t-itilĕset ăwadĕm uzăɣ.' Iktab daɣ a-s: 'Ijjĕšet iyyăn edăgg-net.' 21Ilzam ămăra ad-nĕsĕnnĕfrĕn iyyăn dăɣ-meddĕn wi hanăɣ-hănen s-alkum i-Ɣisa dăɣ-takliwen-net d-uɣlawăn-net dăɣ-a-wa ikkăs Emăli Ɣisa ill'-e jere-năɣ, 22a-wen, ɣur-ašăl wa t-issĕlmăɣ Exya dăɣ-aman har ašăl wa dd-inkăr jer-inĕmmuttan tĕkkĕd ašăl wa d-immĕḍkăl jere-năɣ s-išĕnnawăn." 23Ăsnăfrănăn-dd ĕssin meddĕn, iyyăn Yusĕf wa s-itawănna Bărsabas, jannen-as iyyăḍ Istus, wa iyyăḍăn Matiyas. 24Dălăn Măssinăɣ ḍarăt-a-wen, ĕnnăn: "Emăli, kăyy a issanăn a-wa ihăn ulh n-e d t-illăm ăgg-adĕm, sĕlmĕd-anăɣ wa tăsnăfrănăd jer-meddĕn-wi-dăɣ n-ĕssin 25i-ad-ijjĕš edăgg wa n-tĕnnĕmušĕla irfăḍ Yăhudĕs, ikk' edăgg wa ija i-iman-net." 26Jăn tisăɣeren ḍarăt-a-wen, oḍănăt făll-Matiyas, ăḍḍin ya făll-inĕmmušal wi n-măraw d-iyyăn.

will be added

X\