2 Timoti 3

1Timoti, ĕlmĕd a-s dăɣ-išilan-wi-dăɣ n-ajilal n-ăddunya, ĕlkamăn ăzzămanăn sămumnen, 2ad-ănnăhăḍ munkăẓi dăɣ-ăddinăt, ĕjĕn aẓrĕf amidi, sĕffĕnnĕyăn, ijjĕš-tăn ĕttĕkĕbru, sĕkkufărăn, umasăn inĕbbudar; ad-ăbas tăn-ha tămayit, ad-ăbas ăssimɣărăn a-wa ila Măssinăɣ, 3ad-ăbas tăn-ha tărha wăla tăhanint, ad-ijatnăt tiẓmiten dăɣ-săn, ad-ĕmšăršărăn, ikwalăn ulhawăn-năsăn, ĕksĕnăn a-wa olăɣăn, 4ad-umasăn imaɣdarăn d-imĕnhaj ăzziwăt ĕttĕkĕbru wa tăn-ăsidărɣălăn, sĕmmidĕwăn iẓĕjraẓ n-iman-năsăn uhĕn Măssinăɣ, 5ad-saknen ăddinăt ălmăt a-s ĕṭṭafăn ăddin măšan, hakd a-wen-dăɣ, unjayăn s-a-wa ihakkăn ăddin ăṣṣahăt-net. Sallăd-ahi, ăddinăt-win-dăɣ, ajĕj-tăn. 6Iyyăḍ dăɣ-săn, wăr tăn-išla ar tikawt jer-ihănan i-ad-sĕswĕdĕn s-tăẓude n-ilĕs tiḍeḍen wăren ĕla tayĕtte s-wăr-intem immun-năsnăt, tĕnẓay daɣ tămudre-năsnăt, wăr t-illa erk derhan ḍarăt wăr-ošelnăt, 7ărhanăt hărkuk almud măšan, indar-asnăt făw, ad-ĕlmĕdnăt wăla ad-ĕnnuflĕynăt dăɣ-musnăt n-tidĕt. 8Ǝmmĕk-wa-dăɣ s-ămɣănnan Yanis d-Yinbris tidĕt i-ănnăbi Mosa, ĕmmĕk-wen-dăɣ daɣ a-s tattărăn meddĕn-en-dăɣ asĕbbĕggu n-tidĕt. Meddĕn-en, tayĕtte-năsăn, tĕfraɣ, wăr-ibded immun-năsăn făll-hărăt 9măšan, wăr mad-ĕkkĕn ijĕj ed ad-ĕnhĕyăn ăddinăt iket-năsăn ĕbbuddĕl wa dăɣ-oḍăn, oškăn s-ĕmmĕk wa s-ĕnhăyăn ăddinăt iket-năsăn ibda išk wa ijă Yanis d-Yinbris. 10Kăyy, tărḍalăd a-wa kăy-ĕssăɣrăɣ, wăr has-tĕšleyăd siha wăla siha, tĕttĕlălăd tămudre-nin, tĕssanăd hărătăn wi s-ănnuyăɣ iji-năsăn d-immun-in d-taẓidert-in d-tărha-nin d-akuyĕd dăɣ-taẓidert, 11tăjjĕyhăd i-ălɣizabăt d-tersĕmmawen ti hi-ărmăsnen dăɣ-aɣrĕm wa n-Intyuš, d-wa n-Ikanyun, d-wa n-Listra. Tĕssanăd a-s hak iyyăn dăɣ-idăggan-win-dăɣ, ĕnhăyăɣ dăɣ-s ălɣizabăt măšan, ikkăs-ahi-dd dăɣ-săn Emăli iket-dăɣ-năsăn. 12Ǝlmĕdnet ăddinăt wi ărhănen uḍĕf n-ăddin i-ad-sĕtbĕtăn tassaɣt-năsăn d-Ɣisa Ălmasex a-s ad-ĕnhĕyăn ălɣizabăt 13măšan, ăddinăt wi n-inăllăbăsăn n-inĕsbuha, ad-ăssetăn hărkuk dăɣ-tăllăbăst d-ahălak, saswadăn, tinmĕsĕswidăn daɣ ĕntăneḍ jer-iman-năsăn. 14Kăyy, agĕẓ iman-năk, ĕkĕn uḍĕf n-a-wa tăɣred, tĕflĕsăd a-s ădduuttăt ed tĕssanăd ere wa hak-t-issăɣrăn. 15Ǝlkĕttabăn wi šăddijnen tăɣred hărwa măḍriyăd, ĕntăneḍ a ăddobătnen ad-kăy-sĕwrĕn sărho wa ihakkăn ĕlɣĕllas s-immun s-Ɣisa Ălmasex. 16Ǝlkĕttabăn, iket-dăɣ-năsăn, Măssinăɣ a tăn-dd-ăzzăbben s-tărna n-Unfas-net i-ad-tăn-ha tĕnfa, tolăs, dăɣ-isălan n-teɣăre d-asĕbbĕggu d-asĕmmăqq d-asĕssiɣĕd i-ad-ĕlmĕdăn ăddinăt iqqud dat-Măssinăɣ, 17udabăt u-Măssinăɣ amišĕl n-e d t-illăm emărked ijraẓăn i-Măssinăɣ.

will be added

X\