2 Timoti 2

1Ɣas, kăyy-i n-rure-ɣ dăɣ-ăddin, sĕṣṣuhĕt iman-năk hărkuk dăɣ-ănnuɣmăt wa ihăn Ɣisa Ălmasex. 2A-wa kăy-ĕssăɣrăɣ dat-tijuhawen ăjjootnen, săɣr'-e kăyy-dăɣ i-imumĕnăn n-imaɣdalăn ăddoobătnen ĕntăneḍ-dăɣ, ad-t-săɣrĕn i-iyyăḍ. 3Alăh d-ĕssărdasi ifranăn n-Ɣisa Ălmasex, ĕḍkĕl kăyy-dăɣ šund a-wa jeɣ folăt-năk dăɣ-tersĕmmawen ti inhăy. 4Ǝssărdasi ya, e-d irha ad-ijrĕẓ i-ĕlxĕkum wa t-ijăn dăɣ-ĕlɣĕskăr, ad-ăbas izinĕzjumĕt dăɣ-tămudre ta wărăt tămoos ta n-ĕlɣĕskăr afăl išwăr ijjăš ejhăn ikkan edăgg n-akĕnnas. 5U-ašĕšrah, wăr mad-inžăx ar s-ad-ilkam i-fărĕḍăn wi făll-igla ašĕšrah iket-dăɣ-năsăn. 6Ănăsdamu wa osăsăn dăɣ-ălxidmăt ɣas a madăn-alĕy ašĕkrĕš-net s-tizarăt. 7Zĕnnĕzjumĕt hullan hullan dăɣ-hărătăn-win-dăɣ hak-ĕnneɣ ed, ad-kăy-ăkf Emăli turhajăt n-afăham-năsăn iket-dăɣ-năsăn. 8Ɣayĕm kittĕwăd Ɣisa Ălmasex wa n-ahăya n-ănnăbi Dawĕd dd-issĕnkăr Măssinăɣ jer-inĕmmuttan s-ĕmmĕk wa s-tăn-innă Ălĕnžil-i xaṭṭăbăɣ. 9Dăɣ-tĕssĕba n-Ălĕnžil-en-dăɣ a făl hannăyăɣ ălɣizabăt har dd-ăqqălăɣ heɣ ămăra-dăɣ tišĕm šund ănăsjafa măšan, hakd a-wen-dăɣ-dăɣ, măjrăd n-Măssinăɣ ĕnta, wăr-iha tišĕm. 10A-wen-dăɣ a făl ĕṣbarăɣ hărăt iket-net dăɣ-tĕssĕba n-ăddinăt wi ăsnăfrăn Măssinăɣ dăɣ-ittus n-ad-ĕnmiwăḍăn ĕntăneḍ-dăɣ d-ĕlɣĕllas wa ihăkk Ɣisa Ălmasex d-ălxurmăt wa iɣlălăn dăr-ăddew. 11A-wa măjrăd ănihăjjăn: "Ɣisa Ălmasex, afăl tamăttant ta ija, nohăr-tăt dăr-s, adiš, ad-dăr-s nahăr daɣ tanăkra ta dd-ija jer-inĕmmuttan. 12Afăl nĕṣbăr dăɣ-a-wa hanăɣ-irammăsăn, ad-dăr-s nahăr tĕmmĕnukĕla măšan, afăl t-năkkuddăl, ad-hanăɣ-ikkuddĕl ĕnta-dăɣ. 13Afăl wăr năɣdel năkkăneḍ, ĕnta iɣdal hărkuk ed wăr-ăddobăt ad-iqqĕl ḍarăt tĕnna-net." 14Hărătăn-wi-dăɣ a-s led s-ad tăn-dd-siktĕwăd i-ăddinăt hărkuk, ĕttăr dăɣ-săn dăɣ-idĕm n-Măssinăɣ ad-ĕbḍĕwăn d-anmĕntaš n-tifer ed wăr t-illa ad-dd-išašray a-wen kunta wădden ĕlhĕllak n-ăddinăt wi has-sajadnen. 15Kăyy, ăj a-wa tăddobed iket-net i-ad-dd-tĕbdĕdăd dat-Măssinăɣ tămoosăd ăhalĕs has-ijraẓăn dd-ăssimdăn ămašal-wa dăɣ-t-ija, umas ănaxdim wăr-ăskărakăḍ ălxidmăt wa iha, ănaxdim hin-isasawăḍăn s-iqqud, măjrăd wa ămoosăn tidĕt. 16Jiwĕḍ i-idăwănnităn wi ĕšlăynen i-ăddin dd-wăren šĕšrĕy hărăt, wi wăr-ĕšlenăt ar taxxalen-tin-dăɣ, iba n-ăddin ɣas a dd-e-itiḍĕwăn fălla-săn. 17Imĕjridăn-năsăn olăhăn ɣas d-abuyĕs ijjašăn, itihraw. Ălžămaɣăt n-ăddinăt-win-dăɣ, ih'-e, Himnayus d-Filitus, 18jăn anmĕjjaj d-tidĕt wa-dăɣ făl, jannen tanăkra jer-inĕmmuttan, ăru d-tĕja; ĕmmĕk-wen-dăɣ a-s takkăsăn ăddinăt iyyăḍ dăɣ-immun 19măšan, ăssas wa s-išwăr issĕns'-e Măssinăɣ, intam dăɣ-edăgg-net. Ǝntăneḍ da išĕkkelăn n-akătab wi t-wărnen: "Emăli, izzay ăddinăt-net", iktab fălla-s daɣ a-s: "Ere innăn a-s il'-e Emăli, adiš, isĕnnĕmĕjjajet iman-net d-iba n-iqqud." 20Ehăn ăhuusken măqqorăn, wădden han-t ikassăn n-orăɣ d-i n-aẓrĕf, han-t daɣ iyyăḍ ĕknanen s-ahĕšk d-i ĕknanen dăɣ-tălaɣt. Ikassăn wi n-orăɣ d-wi n-aẓrĕf, i n-išilan wi n-imjora, wi n-ahĕšk d-tălaɣt, i n-imĕnsiwăn wi n-hak ašăl. 21Afăl iṭṭăf ăwadĕm isălan-wi-dăɣ s-iket tăn-jeɣ, iššĕšdăj iman-net, ad-umas šund ăkoss ilan ălqim, ăkoss šăddijăn, itwar măssi-s i-ašăl wa n-imjora. Ăkoss-en, infa măssi-s ed ăddoobăt ad-săr-s ixdĕm a-wa olăɣăn iket-net. 22Jiwĕḍ i-derhanăn wi tisĕsnen ere ĕnḍărrăn, ĕmmăɣ i-iqqud d-immun d-tărha d-ălɣafyăt d-ăddinăt iket-năsăn wi ɣabbădnen Emăli s-ulh šăddijăn, 23sĕnnĕmĕjjĕj iman-năk d-mătlofăt d-taxxalen wăren dd-itirĕw a săl ikĕnnasăn jer-ăddinăt. 24Akli n-Emăli, umaset emărh, wădden emĕkkennĕs, umaset ere ăddooben ăsĕɣĕr n-ăddinăt, ere išmărăn inăllăbăsăn; 25iwar-t s-ad-itajj i-ăddinăt wi t-ăḍḍukrătnen ălwižabăn ăhuuskătnen ed iha miši s-ad-tăn-ăkf Măssinăɣ turhajăt n-ad-sĕmmĕskĕlăn erk ĕẓẓĕnĕf wa hăn, utabăn, ĕzzĕyăn tidĕt, 26dihen, ad-tăn-dd-ĕqqĕlăn iman-năsăn, ad-ăbas ăllilăn erhet n-Iblis, isiḍĕw-tăn dăɣ-tănḍărbaten-net.

will be added

X\