2 Timoti 1

1A-wa năkk, Bulĕs, wa n-ănămmašul n-Ɣisa Ălmasex dăɣ-erhet n-Măssinăɣ. Ǝnta a hi-ăswărăn iji n-isălan n-tămudre ta s-ijjăš ărkăwăl n-ad-tăt-ăkf i-dăgg-adĕm dăɣ-idĕm n-Ɣisa Ălmasex. 2Ăhuulăɣ-kăy-in Timoti kăyy-i n-rure-ɣ dăɣ-ăddin ĕkneɣ tărha. Ikf'-ik Abba Măssinăɣ d-Emăli-nănăɣ Ɣisa Ălmasex ănnuɣmăt, tăhanint d-ălxer. 3E-d dălăɣ Măssinăɣ-dăɣ jer-ehăḍ wăla ašăl, ad-kăy-dd-ĕktoɣ, umayăɣ-as dăɣ-tĕssĕba-năk, ăɣbĕdăɣ-t s-ulh măllăn šund a-wa jăn imărawăn-in ibda. 4E-d dd-ĕkteɣ imeṭṭawăn-năk-dăɣ, ad-hi-tănɣ tenere-năk, sĕddărhĕnăɣ ahănay-năk i-ad-ăknăɣ tedăwit. 5Kittĕwăɣ daɣ tidĕt n-immun-năk, immun tĕṭṭaf s-tizarăt ma-s n-ma-k Lăwwisa hakd-dăɣ ma-k Anisa, ĕkkasăɣ daɣ ăššăk a-s tĕṭṭafăd-t kăyy dăɣ-ašăl-i-dăɣ. 6A-wen-dăɣ a făl dăɣ-k ărheɣ, ad-dd-sudĕrĕd isuf n-Măssinăɣ wi hak-ija dăɣ-ănnuɣmăt-net, ašăl wa d-kăy-ăswărăɣ ifassăn-in, dălăɣ-ak Măssinăɣ 7făl-a-s, Unfas Šăddijăn wa hanăɣ-ikfă Măssinăɣ, wăr hanăɣ-itĕjj imĕjjejĕḍăn, ănn-ak, ikf'-anăɣ-t i-ad-hanăɣ-ăkf tărna, d-tărha d-tanhaḍt dăɣ-iman-nănăɣ. 8Wăr tăkrakăḍăd tumast n-tajuhe n-Emăli-nănăɣ, wăr tăkrakăḍăd daɣ a-wa s-ămoosăɣ u-takărmut ihan tišĕm dăɣ-tĕssĕba-net, ănn-ak, nahret s-tărna n-Măssinăɣ aɣăna wa hannăyăɣ dăɣ-tĕssĕba n-Ălĕnžil. 9Măssinăɣ a hanăɣ-iɣlăsăn, iɣr'-anăɣ s-tihusay s-iman-net wădden dăɣ-tĕssĕba n-imărkedăn nămešăl, ănn-ak, dăɣ-tĕssĕba n-a-wa issĕbdăd dăɣ-erhet-net d-dăɣ-tĕssĕba n-ănnuɣmăt wa hănăɣ-ikfă dăɣ-idĕm n-Ɣisa Ălmasex hărwa wăr dd-tăxlek ăddunya. 10Ănnuɣmăt-wen-dăɣ, ăsnăfalăl-t-dd ămăra ass n-Ămaɣlas-nănăɣ Ɣisa Ălmasex-i iddăšăn tărna n-tamăttant, ăssăssămăɣmăɣ-dd fălla-năɣ tămudre ta tăɣlălăt šăddijăt s-ităjj Ălĕnžil isălan-net. 11Dăɣ-tĕssĕba n-Ălĕnžil-en-dăɣ a făl hi-dd-iɣră Măssinăɣ s-iman-net, ij'-ahi ămaway n-isălan-net d-ănămmašul d-ălɣalim 12dăɣ-tĕssĕba-net a făl hannăyăɣ tersĕmmawen-ti-dăɣ, măšan, hakd a-wen-dăɣ, wăr hi-ăskărakăḍ a-wen ed ĕssanăɣ ere wa s-omănăɣ, ĕkkasăɣ daɣ ăššăk a-s ila tărna s-ogăẓ a-wa hi-issăɣlăf iket-net hundăɣ har ašăl wa n-tebădde. 13Ǝkĕn uḍĕf n-tifer ti n-tidĕt kăy-ĕssăɣrăɣ, umaset a-s ĕntănăteḍ a ănniihăḍnen dăɣ-tămudre-năk, mašăl-tănăt dăɣ-a-s tănăt-tăsidăwăd d-immun d-tărha-i dd-tirĕw tassaɣt d-Ɣisa Ălmasex s-ăwadĕm. 14Taɣălift-năk a-wa ăhuusken kăy-issăɣlăf Măssinăɣ, agĕẓ-t s-tărna n-Unfas Šăddijăn wa dăɣ-năɣ izzăɣăn. 15Tĕssanăd a-s ăddinăt wi n-teje ta n-Azya, jărăn-ah'-in iket-dăɣ-năsăn hullan Fižilus d-Hirminus. 16Dalăɣ Emăli d-ad-aḍĕn tăhanint i-ehăn wa n-Unizifur, issĕsmăḍ ulh-in dăɣ-ălwăqqăn ăjjootnen, wăr has-ămoos daɣ a-wa s-ĕheɣ tišĕm dăɣ-takărmut tăkrakiḍt. 17A-s dd-oseɣ aɣrĕm wa n-Roma, immăɣ-t iket-net, wăr-ăssunfa har hi-ijrăw. 18Ǝttarăɣ dăɣ-Emăli ad-has-aḍĕn tăhanint ašăl wa n-tebădde, tĕssanăd kăyy iman-năk a-s inf'-ahi s-a ăjjeen dăɣ-aɣrĕm wa n-Ifăsus.

will be added

X\