2 Kăl-Tăslonika 3

1Ayĕtma, tasămdot n-măjrăd-nănăɣ da: tĕddalăt-anăɣ-in Măssinăɣ i-ad-ihĕl măjrăd n-Emăli s-data šik dăɣ-idăggan iket-năsăn, sĕmɣărăn ăddinăt măjrăd-en s-ĕmmĕk wa s-t-tăssimɣărăm kăwăneḍ. 2Ădĕlăt-anăɣ-in Măssinăɣ i-ad-hanăɣ-iɣlĕs dăɣ-erk imojjan n-erk ăddinăt d-inăllăbăsăn ed wădden ăddinăt iket-năsăn a ĕṭṭafnen immun. 3Emăli, oɣad, ĕnta-en-dăɣ a kăwăn-e-isĕṣṣuhun dăɣ-immun-năwăn, agĕẓ-kăwăn dăɣ-Iblis-i n-Anămsod. 4Emăli a ih' ăṭṭăma-nănăɣ dăɣ-isălan-năwăn, nĕkkas ăššăk a-s a-wa dăr-kăwăn-năsmătăr, tĕṭṭafăm-t, ad-t-tĕknĕm daɣ uḍĕf. 5Ij'-iwăn Emăli dăɣ-tabarăt, ăssewăḍ Măssinăɣ tărha-net dăɣ-ulhawăn-năwăn, ija dăɣ-wăn akuyĕd dăɣ-taẓidert šund ta hăt Ălmasex. 6Ayĕtma, năsimătăr-kăwăn hullan dăɣ-isĕm n-Emăli-nănăɣ Ɣisa Ălmasex i-ad-sĕnnĕmĕjjĕjăm iman-năwăn d-ere ijannen ĕnta ă/n/na-wăn dăɣ-ăddin, a-s ija a-wen, unjay s-ad-iṭṭĕf ălɣadatăn wi kăwăn-nĕssăɣra, unjay s-ălxidmăt s-ifassăn-net, tămišăršăr tămudre-net. 7Tămudre ta tăttilălăt a-wa kăwăn-nĕssăɣra, tĕssanăm-tăt; tĕssanăm a-s, a-s t-nĕlla jere-wăn, wăr hanăɣ-tĕzzeyăm d-a-wărăn oɣed. 8Wăr t-illa ere s-nĕkša ăsink-net bănnan, ehăḍ d-ašăl năxdam s-ăṣṣahăt-nănăɣ, tidĕt, nălluyyăɣ măšan, wăr t-illa făw ere s-nămoos ăẓuk. 9A-wen, nĕj'-e, wădden i n-a-s innin wăr-ănhăjja d-ad-năkš isinkawăn-năwăn măšan, năssof ad-wăr nĕja a-wen, i-ad-hanăɣ-tăttălălăm kăwăneḍ-dăɣ, tĕlmĕdăm a-s ălxidmăt, a iwarăn hak ăgg-adĕm. 10Ăzzăman wa nĕkkăs jere-wăn, nĕkna aẓĕẓẓĕwi fălla-wăn tĕnna n-a-s: "Ăwadĕm wa wărăn irha ad-ixdĕm, adiš, wăr-ităttet." 11Kăwăneḍ, nĕsla a-s han-kăwăn ăddinăt ămišăršărnen wăren ĕrha ad-ăxdĕmăn, tajjăšăn isălan wăren tăn-dd-ăqqel. 12Ăddinăt-en, nărha ad-nĕsĕmmăqq fălla-săn, nĕsĕmmĕtăr-tăn: nĕj'-asăn isĕm n-Emăli Ɣisa Ălmasex idĕm n-ad-ăxdĕmăn s-ăṣṣahăt-năsăn, ĕyyĕnet sendad i-ad-udaben uḍĕf n-tămudre n-iman-năsăn. 13Kăwăneḍ-i n-ayĕtma-ɣ, wăr kăwăn-išălḍašet amišĕl n-a-wa olăɣăn. 14Isĕmmĕterăn wi hawăn-nĕtăjj dăɣ-tăkarḍe-ta-dăɣ, ere săr-săn unjayăn, ĕzzĕyăt-t, širĕšăm fălla-s i-ad-ikrukăḍ, 15wăr t-jem ašănjo-năwăn, sĕmmăqqăt fălla-s šund ă/n/na-wăn. 16Ikf'-iwăn Emăli-i n-Măssi-s n-ălxer, ălxer s-ĕjut hak ăssaɣăt, idhăl-kăwăn Emăli iket-dăɣ-năwăn. 17Tihulawen-ti-dăɣ, năkk iman-in, Bulĕs a hawăn-tănăt-in-iktăbăn s-ăfuss-in; ešwăl-in daɣ, dăɣ-tikarḍiwen-in iket-dăɣ-năsnăt da-dăɣ. 18Ăhuulăɣ-kăwăn-in, ĕttarăɣ dăɣ-Emăli-nănăɣ Ɣisa Ălmasex ad-kăwăn-ăkf ănnuɣmăt iket-dăɣ-năwăn. Amin!

will be added

X\