2 Kăl-Tăslonika 2

1Ayĕtma, hakd a-wen-dăɣ ămăra, dăɣ-isălan n-uɣĕl n-Emăli-nănăɣ Ɣisa Ălmasex d-ažĕmmăɣ wa s-ilkam ad-t-nĕnmĕjj dăr-s, nĕnn'-awăn: 2taẓidert, wăr-ităggădet ăwadĕm wăl' iyyăn d-ĕnniyăt-năwăn, wăr sărɣasăt i-ăwadĕm wăl' iyyăn aɣăšad n-iman-năwăn s-a has-dd-ănifalălăn wăla s-a nĕnna wăla s-tăkarḍe hawăn-in-nĕktab dăɣ-nĕnna a-s ašăl n-uɣĕl n-Emăli ăru dd-osa. 3Wăr kăwăn-isăswadet ăwadĕm s-wăla a ĕnḍărrăn făl-a-s ašăl wa n-uɣĕl n-Emăli, iket-di d-ităjj, ad-irmĕs iba n-ăddin ăssuksăḍăn ăddinăt ăjjootnen tĕzzar ass-dd u-tanmĕšrayt wa s-itawănna Ăddăžžal he-ihlĕk Măssinăɣ. 4Ǝnta-en-dăɣ a-s ămakšar n-e d t-illăm a ititwăɣbidăn. Dăɣ-tanmĕšrayt-net, ad-iglĕw har ăqqayĕm dăɣ-ehăn n-ămudd wa măqqărăn, isigdăh iman-net d-Măssinăɣ. 5Ajăn tĕttĕwăm-in a-wa hawăn-ĕnneɣ a-s t-ĕlleɣ ɣur-wăn. 6Tĕssanăm a-wa t-in-iṭṭafăn, a ikkăs daɣ wăr dd-ăwweḍ ašăl-net, wăr dd-e-ass. 7Tĕmɣăre n-ĕddăraj n-iba n-ăddin-net ixdam dăɣ-ăddunya-ta-dăɣ, afăl has-dd-tĕssĕlwăs tărna ta t-in-tĕṭṭafăt fălla-năɣ, ad-dd-infilĕl a-wa t-išlăn, os'-iwăn făw. 8Afăl dd-osa anămăšray-wen-dăɣ, ad-has-dd-ilkĕm Emăli Ɣisa-i t-in-e-isăhĕḍăn s-tărna-net, ikkĕs dăɣ-s ălfăyda iket-net s-tiyyăt tashăḍt n-emm-net. 9Ăhalĕs wa t-illăn ḍarăt-a-wen-dăɣ, ad-t-ăkf Iblis tărna s-mad-itajj ijităn ăssuksăḍnen, tikunen d-tišušab s-issĕswăd tamĕtte, 10wăr t-tĕlla tăllăbăst d-iba n-iqqud s-wădden ad-t-ăj i-ad-isĕswĕd ăddinăt wi hănen tabarăt n-tanmĕšrayt s-ĕlhĕllak ɣas a hasăn-iqqalăn, ăsɣărăn ulhawăn-năsăn i-tidĕt ta lăt s-ad-tăn-tăɣlĕs. 11Dăɣ-tĕssĕba n-a-wen-dăɣ, a făl hasăn-išlăy Măssinăɣ, oyy'-en oḍăn dăɣ-a-wa tăn-itakărrasăn, išinmĕšrĕy-tăn. 12Ilkam ad-ĕnmĕnhĕyăn d-ăššăreɣa ed ăssofăn bahu tidĕt, ăssofăn fărrăɣ, iqqud. 13Ayĕtma-ɣ, iwar-anăɣ hak ašăl ad-numay i-Măssinăɣ dăɣ-tĕssĕba-năwăn. Emăli iman-net a kăwăn-issĕlmădăn s-tărha-net, ăsnăfrăn-kăwăn Măssinăɣ, iɣlăs-kăwăn s-tărna n-Unfas Šăddijăn, iššĕšdăj-kăwăn i-ad-tumasăm tamĕtte-net ed tomănăm s-tidĕt. 14Iɣr'-iwăn-dd s-iman-net i-ad-tĕslĕm i-Ălĕnžil wa hawăn-năxṭăb, tĕjrĕwăm ejădăr-năwăn dăɣ-ălxurmăt n-Emăli-nănăɣ Ɣisa Ălmasex. 15Ayĕtma! A-wen-dăɣ a făl ĕkfărăt i-Iblis, ăknăt uḍĕf n-ălɣadatăn wi kăwăn-nĕssăɣra s-imawăn-nănăɣ hakd-dăɣ s-tikarḍiwen ti hawăn-in-nĕktăb. 16Emăli-nănăɣ Ɣisa Ălmasex hakd-dăɣ Măssinăɣ-i n-Abba-nănăɣ, tĕtbat tărha-năsăn hanăɣ, ĕntăneḍ a hanăɣ-ĕkfănen dăɣ-ănnuɣmăt-năsăn turhajăt n-ad-năkk s-data, nĕhlĕylĕy hărkuk dăɣ-ăṭṭăma ădduutten. 17Nĕttar dăɣ-Măssinăɣ ad-iḍnĕy ulhawăn-năwăn tărha n-tikawt n-s-data, ija dăɣ-wăn ălbăraka n-ad-tamašalăm a-wa olăɣăn dăɣ-ijităn-năwăn hakd-dăɣ dăɣ-măjrăd-năwăn.

will be added

X\