2 Kăl-Tăslonika 1

1A-wa năkk, Bulĕs, hin-iktabăn năkk d-Silwan d-Timoti i-ălkănisăt n-Măssinăɣ-i n-Abba-nănăɣ d-Emăli Ɣisa Ălmasex ta hăt aɣrĕm wa n-Tăslonika. 2Năhuul-kăwăn-in, nĕttar dăɣ-Măssinăɣ-i n-Abba-nănăɣ d-Emăli Ɣisa Ălmasex ad-kăwăn-ăkf ănnuɣmăt d-ălxer. 3Ayĕtma, hak ašăl nămmoy i-Măssinăɣ dăɣ-tĕssĕba-năwăn, ăniihăjja a-wen ed itĕhhal immun-năwăn s-data, tiwwaḍ daɣ tărha ta tănimăjjăm jer-iman-năwăn. 4A-wen-dăɣ a dd-orăwăn a-s wăr t-tĕlla ălkănisăt n-Măssinăɣ s-wădden nĕtabăraj-as dăɣ-isălan-năwăn, ed kud-dăɣ, wăr t-illa ălɣizabăt wăla talɣa wăr tĕnheyăm, tĕṣbărăm, wăr-ifneẓ a-wen wăla a ĕnḍărrăn dăɣ-akuyĕd-năwăn wăla immun-năwăn. 5Hakd a-wen-dăɣ, ayĕtma-ɣ, a-wa kăwăn-irmăsăn a ămoos-dăɣ, asĕddĕttu ɣas a ămoos n-a-s ilkam ašăl dăɣ-mad-išrăɣ Măssinăɣ s-iqqud. Ălɣizabăt kăwăn-irmăsăn-dăɣ, wăr-ămoos ɣas, ar a kăwăn-isinhĕjjin d-ujĕš n-Tĕmmĕnĕya n-Măssinăɣ ed Tĕmmĕnĕya-net a făl hannăyăm a-wa hannăyăm. 6Itbat a-s Măssinăɣ-i oɣadăn, wăr-e ăyy ere kăwăn-itaɣăzzăben ăssunfa, ăssilkăm dăɣ-s. 7Ilkam ad-kăwăn-ăkf tăsonfat, kăwăneḍ-i hannăynen ălɣizabăt ašăl-i-dăɣ, ăkf'-anăɣ-tăt năkkăneḍ-dăɣ ašăl wa dd-e-infilĕl Emăli Ɣisa ifal-dd išĕnnawăn, ăddeew d-ănjălosăn wi n-imĕṣṣuha. 8Ad-dd-iqqĕl dăɣ-ammas n-efew ăhijăljălăn, išĕj eɣa dăɣ-ăddinăt wi has-ăsɣărnen ulhawăn-năsăn, unjăynen ămišĕl n-a-wa innă Ălĕnžil n-Emăli-nănăɣ Ɣisa. 9Ăddinăt-en, tĕlkam dăɣ-săn tisnant sĕmmăt d-terăẓẓe tăɣlalăt jat dăɣ-anmĕjjaj d-Emăli d-tărna n-ălxurmăt-net. Wăr dăɣ-săn ilkem ad-t-ĕnhayăn. 10Ašăl-en dd-mad-ass Emăli, ad-sĕmɣărăn imĕššeddĕjăn wi săr-s omănnen ălxurmăt-net ed ăsidăwăt-tăn ass-net. Kăwăneḍ, ăddinăt-en, ham-tăn ed tomănăm s-isălan wi hawăn-năxṭăb. 11Ayĕtma, a-wen-dăɣ daɣ a făl hawăn-nĕtattăr s-Măssinăɣ hak ašăl, nĕtattăr dăɣ-s ad-tăqqaymĕm tĕṭṭafăm tabarăt ta dăɣ-kăwăn-ija, tĕnhĕjj tămudre-năwăn d-teɣăre ta kăwăn-dd-ija Măssinăɣ s-iman-net, idhĕl-kăwăn s-tărna-net i-ad-tamašalăm a-wa olăɣăn iket-dăɣ-net, umas immun-năwăn, immun ih' ălfăyda. 12Ǝmmĕk-wen-dăɣ a dăɣ-mad-itwĕsĕmɣăr Emăli-nănăɣ Ɣisa dăɣ-tămudre-năwăn, tĕkrĕšăm idĕm data-s dăɣ-ănnuɣmăt n-Măssinăɣ d-Emăli-nănăɣ Ɣisa Ălmasex.

will be added

X\