2 Bĕṭrus 3

1Ayĕtma-ɣ-i ĕkneɣ tărha, tăkarḍe-nin ta s-sănatăt hawăn-in-ĕktăbăɣ a-wa. A-wa hawăn-in-ĕktăbăɣ dăɣ-snăt iket-net, i n-ad-kăwăn-săɣrăɣ, sĕmmĕtărăɣ-kăwăn i-ad-tĕkrĕšĕm tayĕtte ta ihăkk Măssinăɣ. 2Wăr hin-tĕttĕwăm a-wa hawăn-ĕnnăn ănnăbităn wi n-imĕššeddĕjăn d-fărĕḍăn wi kăwăn-ikfa Emăli d-Ămaɣlas s-hawăn-jăn inĕmmušal-năwăn isălan-năsăn. 3Hărăt wa ăzzarăn s-ărheɣ ad-săr-s tĕssanăm, ĕnta da: dăɣ-ajilal n-ăddunya-ta-dăɣ, ad-tăt-dd-ĕjjĕšăn ăddinăt kăwăn-janen isĕḍsa, wăr tăn-išla ar alkum i-tărha n-iman-năsăn. 4Ad kăwăn-dd-asĕn, ĕnnĕn-awăn: "Ǝyyaa, wădden a ija a-wa-dăɣ, jannem-anăɣ a-s ikf'-iwăn Ɣisa ărkăwăl n-a-s imal-dd. Ǝndek-t ya ămăra!" Jannen-awăn: "Ɣur-imărawăn-nănăɣ wi n-ibda, har ašăl-i-dăɣ, ălxal wa s-dd-tăxlăk ăddunya, ĕnta a ha har ămăra-dăɣ, wăr t-illa a dăɣ-s ifalăn edăgg-net." 5Jannen a-wen-dăɣ măšan, otasăn tetăwit n-a-s tărna n-măjrăd n-Măssinăɣ a-s dd-ixlăk išĕnnawăn d-ăkall, ibḍa ăkall d-aman, ibnă-dd ăkall s-aman-en-dăɣ, 6ĕmmĕk-wen-dăɣ a-s hin-omăs Măssinăɣ a-wa iwărăn ărori n-ăkall iket-net dăɣ-ăzzăman wa n-anji wa n-ḍuf. 7Ašăl-i daɣ, s-tărna n-măjrăd-net en-dăɣ a-s iṭṭaf išĕnnawăn d-ăkall i-efew wa hasăn-iqqalăn ašăl wa ilkămăn. Ašăl-en-hi, a-s ašăl wa n-ăššăreɣa wa n-tidĕt d-tinmĕnhiyăn inămăšrayăn d-iman-năsăn. 8Ayĕtma-ɣ-i ĕkneɣ tărha, wăr-ărheɣ ad-tĕžhalăm făll-hărăt iyyăn: dat-Emăli, ašăl iyyăn, wăr-iẓley d-efăḍ n-awătay, efăḍ n-awătay daɣ data-s, wăr-iẓley d-iyyăn n-ašăl. 9Ma ăsihălăn wi dăɣ-wăn jănnanen a-s Emăli, irẓa dăɣ-tĕnna-net, ăhoj'-in fălla-năɣ? A-wen wădden a ijan. Emăli, aẓĕẓẓidăr fălla-năɣ ɣas a ija, wăr-irha ad-ihlĕk wăl' iyyăn dăɣ-năɣ, ănn-ak a irha, ad-utabăn ăddinăt iket-dăɣ-năsăn. 10Ašăl wa n-Emăli, ad-dd-ăj ejăḍăl wa ităjj emăkrăḍ făll-ăwadĕm. Ašăl-en, išĕnnawăn d-a-wa tăn-ihăn, ad-ĕjĕn anbărăqqĕs ăssuuksăḍăn, ihjĕljĕl efew făll-ărori n-ăkall iket-net, ilyĕm-in s-iyyăt, ad-ăbas t-illa a t-illan. 11Šămad hărătăn-win-dăɣ, ilkam ad-tăn-in-iba s-ĕmmĕk-wen-dăɣ, adiš, ĕṭṭĕfăt tămudre šăddiijăt tăddiinăt, 12tăqqĕlăm i-ašăl wa n-Măssinăɣ, sărmĕḍăm-t făw ed išwar-dd-osa. Ašăl-en, a-wa ihăn išĕnnawăn, ad-intĕs iket-net, ilyĕm-in a-wa iwărăn ărori n-ăkall. 13Măssinăɣ, ijjăš-anăɣ ărkăwăl n-ad-dd-izĕzzubbĕt išĕnnawăn ăynaynen d-ăkall ăynayăn-hanăɣ, ĕnta-den-dăɣ a-wa iha ăṭṭăma-nănăɣ, năqqal-as ed dihen, wăr t-illa a săl iqqud. 14Ayĕtma-ɣ-i ĕkneɣ tărha, iket-di d-tajjăn hărătăn-win-dăɣ, ăjăt a-wa tăddobem iket-net i-ad-kăwăn-dd-agĕẓ Ɣisa, šăddiijăm, wăr t-illa ălɣib kăwăn-iwarăn, imal-t daɣ ălxer jere-wăn d-Măssinăɣ. 15Ǝlmĕdăt a-s ăṣṣăbarăt wa kăwăn-ija Emăli, i n-ad-tăɣlĕsăm. A-wen, ăru d-hawăn-t-in-iktăb Bulĕs-i n-ă/n/na-năɣ nĕkna tărha, s-sărho wa t-ikfa Măssinăɣ. 16A-wen-dăɣ daɣ a itajj dăɣ-tikarḍiwen-net iket-năsnăt ti-dăɣ ăssewăl dăɣ-isălan-win-dăɣ. Tidĕt daɣ a-s, a-wa ikattăb, han-t idăggan s-wăr răqqis ujreh-năsăn. A-wen-dăɣ a făl măjrăd-en ităjj, e-d t-ărmăsăn erk ăddinăt ĕžhalnen wăren ĕssen a hăn, ad-safraɣăn ălmăɣna-net ed a-wen-dăɣ a tajjăn i-a-wa ătwănnăn dăɣ-ĕlkĕttabăn wi iyyăḍnen. Ǝnta-den-dăɣ ĕmmĕk wa s-dd-tirĕwăn ĕlhĕllak făll-iman-năsăn. 17Ayĕtma-ɣ-i ĕkneɣ tărha, năkk ya ɣas, ĕkkăsăɣ-kăwăn dăɣ-taɣdărt: agĕẓăt iman-năwăn, wăr toyyem erk ăddinăt-win-dăɣ, ăšinămăšrăyăn-kăwăn dăɣ-erk ălxal wa hăn, takkăsăn-kăwăn dăɣ-edăgg-wa dăɣ-kăwăn-issĕntăm Măssinăɣ. 18Ǝdwĕlăt, tĕhĕlĕm s-data dăɣ-ănnuɣmăt d-muzĕyăt n-Ămaɣlas-nănăɣ Ɣisa Ălmasex. Ǝnta a ăniihăjjăn d-ălxurmăt ašăl-i-dăɣ har amăɣlol! Amin!

will be added

X\