2 Bĕṭrus 2

1Dăɣ-ăzzăman hin-okayăn, kăla hăn ănnăbităn n-bahu iyyăḍ tamĕtte ta n-kăl-Iṣrayil s-ĕmmĕk wa s-ašăl-i-dăɣ, han-kăwăn imăsăɣran n-bahu iyyăḍ tikĕddulnen Măssinăɣ-i n-ămănokal wa măqqărăn tăn-iɣlăsăn. Ǝkkăẓẓu a-s dd-silmumusăn iman-năsăn jere-wăn, tilăqqad a-s saswadăn ăddinăt i-ad-tăn-šĕnnĕmĕšrĕyăn. Imojjan-năsăn a tăn-e-awĕynen šik s-ĕlhĕllak. 2Ad-hasăn-ĕlkĕmăn ăddinăt ăjjootnen dăɣ-asĕmmăḍĕs wa tăjjăn i-iman-năsăn, sĕssĕkkufărăn-tăn i-ad-ĕšlĕyăn i-tabarăt n-Măssinăɣ ta n-tidĕt. 3Imĕkkorras-win-dăɣ, ad-ĕttărăn asĕswad-năwăn s-tinfusen ĕglanen s-aẓrĕf, dd-ĕkkasăn dăɣ-iɣăfawăn-năsăn i-ad-sumĕmăn a-wa lăm. Ăru d-issĕbdăd Măssinăɣ ĕlhĕllak-năsăn, wăr-e ăhaj daɣ wăr-ija a-wen. 4Ǝkkasăɣ-kăwăn dăɣ-taɣdărt: Măssinăɣ, wăr-inɣa tiṭṭawen-net făll-ănjălosăn wi ănmăšrăynen, ănn-ak, ija dăɣ-săn tišĕm tĕzzar ijăr-tăn-in s-iyyăt dăɣ-tihay ti n-žohănnăma i-ad-ĕqqĕlăn dihen i-ăššăreɣa wa ilkămăn. 5Ăddinăt daɣ wi n-ibda ănmăšrăynen i-Măssinăɣ dăɣ-ăzzăman wa n-Nox, wăr tăn-oyya Măssinăɣ s-ĕmmĕk-wen-dăɣ. Ăsmăqqăs-dd fălla-săn aman wi n-ḍuf dd-fălnen išĕnnawăn d-ăkall, ĕkšăn-tăn. Wăr dăɣ-săn dd-iɣles ar Nox d-ăddinăt n-kăl-ehăn ĕssa. Inhăy Măssinăɣ a-s ăzzăman-wen-dăɣ, Nox-en-dăɣ ɣas a oɣadăn data-s, ixaṭṭăb iqqud s-Măssinăɣ. 6Olăs daɣ Măssinăɣ, alăhas n-iɣărman wi n-Sodoma d-Gomora, issĕntăs-tăn, ij'-en eẓĕd făl tĕmɣăre n-anmĕšri-i-dăɣ jăn i-ad-umas a-wen ălmital i-inămăšrayăn iket-dăɣ-năsăn. 7Ilhăs-tăn Măssinăɣ iket-dăɣ-năsăn, wăr dd-oyya ar Lut-i n-ămaɣdal. Jăn kăl-iɣărman-en-dăɣ asĕssiki okăyăn ămaku. Ihannăy Lut, isall hak ašăl i-xorĕzzĕma wa tăn-išlăn, ăsniinăn iman-net făl tĕmɣăre n-tăllăbăst-i-dăɣ jăn kăl-iɣărman-en-dăɣ. 9Isălan-win-dăɣ, salmadăn-anăɣ a-s ăddinăt wi ăddiinnen, a jăn dăɣ-ălɣizabăt-dăɣ, ad-tăn-dd-iɣlĕs Emăli dăɣ-s, măšan, inămăšrayăn ĕntăneḍ, ašăl wa ilkămăn, itwar-asăn ăššăreɣa ăssuuksăḍăn. 10Tĕlkam tisnant n-ăššăreɣa n-Măssinăɣ hullan dăɣ-ăddinăt wi wăren ĕlkem ar i-derhan n-iman-năsăn wa tăn-isamăḍasăn. Imăsăɣran n-bahu-win-dăɣ, wăr-ĕrhen ad-fălla-săn ixkĕm Emăli, ĕflasăn iman-năsăn, hălăn, wăr tăn-issărmăɣ asĕkkufăr n-a-wa ăssimɣăr Măssinăɣ dăɣ-išĕnnawăn 11s-wăla ănjălosăn iman-năsăn-i ojărnen imăsăɣran n-bahu-win-dăɣ tărna hakd-dăɣ ăṣṣahăt, wăr helăn ad-ĕnnĕn a lăbasăn wărăn il' ĕmmĕk dat-Emăli. 12Ăddinăt-wi-dăɣ, wăr-ĕẓleyăn d-taɣsiwen wăren la tayĕtte, wăren ĕgla ar făll a-wa hannăynăt, irmĕs-tănăt-dd ăwadĕm, iɣrĕs-asnăt. Sikuforăn i-a-wa s-wăr-ĕssenăn hărăt, erk imojjan-năsăn a-s ilkam ad-tăn-ĕjĕn dăɣ-hărăt. 13Ǝlkamnăt timẓal n-iba n-iqqud-năsăn. A-wa ăskărakăḍăn tamašalăn, tarăhut a-s t-tajjăn, samăḍasăn, samăḍrayăn iman-năsăn. Išl'-en a-wen-dăɣ, uhĕn-dăɣ, tažămmaɣăn dăɣ-imjora-năwăn, dăɣ-utăr n-ad-kăwăn-sĕkkĕrukĕḍăn. 14Wăr t-tĕlla tamăḍt s-wădden lan-as ĕnniyăt, ĕnsayăn amišĕl n-abăkkaḍ, taqqănăn tănḍărbaten i-ăddinăt wi wăren ĕssen a han, šinmĕšriyăn-tăn; ošalăn hărkuk dăɣ-umăɣ i-aẓrĕf s-tăkkărzăzzăl, a-di, imĕlɣan dat-Măssinăɣ. 15Ǝzjărăn tabarăt ta toɣădăt, ĕššĕškăn iman-năsăn. Ăssofăn alkum i-adăriš n-Balam ăgg Baɣor-i ijăn a wărăn itĕtwĕjj a-wa-dăɣ has-ija utăr n-aẓrĕf wărăn xălal. 16Iɣtăl-t Măssinăɣ dăɣ-anmĕšri wa ija. Igla făw har has-immĕjrăd s-tešeḍt. Tešeḍt ya, wăr tĕmĕjrid măšan ašăl-en, s-tărna n-Măssinăɣ, tăssewăl-as šund ăgg-adĕm i-ad-wăr-itĕjj ănnăbi Balam ĕbbuddĕl wa s-ikittĕw iji-net. 17Imăsăɣran n-bahu-win-dăɣ dăɣ-hawăn-ăssewălăɣ, wăr t-illa a ĕnfan. Olăhăn ɣas d-terĕst s-ăqqurăn aman-net, olăhăn d-tijărăken ăzziwăt aḍu, šik-dăɣ a-s jammăḍnăt mănhoy. Tĕlkam dăɣ-săn tisnant sĕmmăt dăɣ-tihay ti n-ălaxărăt. 18Ăẓiẓădăn ilsawăn-năsăn kud-dăɣ taxxalen ɣas a jannen, šinmĕšriyăn ăddinăt wi s-iket dd-ĕzjărăn ifassăn n-ăddinăt s-ihĕnnin-dăɣ bahu a-s ĕlkamăn, tattărăn ad-tăn-sĕswĕdăn. 19Tajjăn-asăn ărkăwăl n-ad-tăn-sĕddărfen s-bahu, a-s ija a-wen, ĕntăneḍ iman-năsăn ăkkilen i-derhanăn-năsăn wi tăn-ăzziwătnen s-ĕlhĕllak. Ăywa, hak ăgg-adĕm, ăkkilăt i-a-wa fălla-s ilăn tărna. 20Ăddinăt wi omănnen s-Emăli-nănăɣ d-Ămaɣlas-nănăɣ Ɣisa Ălmasex, ăɣlăsăn, a-wen, wăr t-ih' ăššăk. Tĕssĕba n-a-wen-dăɣ ămăra, a făl ăbas samăḍasăn iman-năsăn s-a-wa făll-tĕgla ăddunya. Măšan ere wa oyyăn iman-net ḍarăt-a-wen tĕkraš fălla-s ăddunya ašăl, ad-umas a-s talɣa-net ta tĕšrăyăt, tĕššăm-as ta tăzzarăt. 21Ere wa ilmădăn a-wa ămoosăn tabarăt ta n-iqqud tĕzzar oyy'-et i-ad-inmĕšrĕy i-alămăr wa šăddijăn issĕbdăd Măssinăɣ, ăwadĕm-en, iššăm-as-in ad-wăr-issen făll-tabarăt-ten-dăɣ hărwa dăɣ-tizarăten 22ed ija ɣas a-wa innă oẓẓ, wa innăn: "Iqqăl edi ebsan-net", meɣ wa innăn: "Ărrid-dd ĕlxĕnžăr, iqqăl tărbăbbăẓ-net."

will be added

X\