2 Bĕṭrus 1

1A-wa năkk Simyon Bĕṭrus wa n-akli d-ănămmašul n-Ɣisa Ălmasex hin-iktabăn i-imumĕnăn wi ikfa Ɣisa Ălmasex-i n-Măssinăɣ d-Ămaɣlas-nănăɣ immun ilan ălqim, omănăn săr-s, noman săr-s năkkăneḍ-dăɣ. 2Ăhuulăɣ-kăwăn-in, ăsnăḍfăs fălla-wăn Măssinăɣ d-Emăli-nănăɣ Ɣisa Ălmasex ănnuɣmăt d-ălxer dăɣ-tĕssĕba n-muzĕyăt wa n-tidĕt t-jăm. 3Măssinăɣ, dăɣ-tărna-net, wăr t-illa a-wa-dăɣ hanăɣ-ihakkăn tămudre ta n-tidĕt tăddiinăt dăɣ-tuksĕḍa-net s-wădden, ikf'-anăɣ-t. Issĕlmăd-anăɣ s-Emăli-i hanăɣ-dd-iɣrăn s-iman-net i-ad-hanăɣ-ăkf dăɣ-ănnur-net d-ălxal-net. 4Tĕssĕba n-ănnur d-ălxal-wen-dăɣ a făl hanăɣ-ăssahăr d-iman-net, ijjăš-anăɣ ărkăwălăn n-nefran ăjjootnen lanen ălqim i-ad-nĕbḍĕw d-erk derhanăn wi făll-tĕgl' ăddunya săr-s dd-tirĕwnen ĕlhĕllak, nĕṭṭĕf ălxal wa-net. 5A-wen-dăɣ a făl kăwăn-ăsimătărăɣ d-ad-tĕjĕm tădabit-năwăn iket-net i-ad-siwĕḍăm făll-immun-năwăn amišĕl n-a-wa olăɣăn, siwĕḍăm făll-amišĕl n-a-wa olăɣăn muzĕyăt n-Măssinăɣ; siwĕḍăm făll-muzĕyăt n-Măssinăɣ, tanhaḍt dăɣ-iman-năwăn, 6siwĕḍăm făll-tanhaḍt dăɣ-iman-năwăn, ehel n-iman-năwăn dăɣ-ălɣizabăt; siwĕḍăm făll-ehel n-iman-năwăn dăɣ-ălɣizabăt tămudre tăddiinăt, 7siwĕḍăm făll-tămudre tăddiinăt, anmărh jer-iman-năwăn šund ă/n/natăn, siwĕḍăm făll-anmărh jer-iman-năwăn šund ă/n/natăn, tărha tĕmdat. 8Afăl tamašalăm tihusay-tin-dăɣ s-ĕjut, wăr-e tumasăm ăddinăt wăren dd-săɣsĕl hărăt, ănn-ak, ad-ijjĕš ălbăraka tassaɣt-năwăn d-Emăli-nănăɣ Ɣisa Ălmasex, tĕknĕm-t muzĕyăt. 9Wa wărăn itĕmmišil tihusay-tin-dăɣ, ilmĕdet a-s wăr-iẓley d-adărɣal d-asăffănăwnaw, ittĕw'-in ašĕšdaj wa t-ija Măssinăɣ dăɣ-ibăkkaḍăn-net wi n-ibda. 10Ayĕtma-ɣ, šămad Măssinăɣ iman-net a kăwăn-ăsnăfrănăn, ĕjlĕyăt hullan dăɣ-alkum-has i-ad-itbat nĕfran d-teɣăre ta kăwăn-dd-ija s-iman-net. Afăl tămudre-ten-dăɣ a tĕṭṭafăm, wăr-e tăjjărtăqqălăm. 11Ǝmmĕk-wen-dăɣ daɣ a dăɣ-hawăn-e-ikĕn Măssinăɣ arr n-imawăn n-Tĕmmĕnĕya ta tăɣlălăt dăɣ-ixkăm Emăli-nănăɣ d-Ămaɣlas-nănăɣ Ɣisa Ălmasex. 12Hărătăn-wi-dăɣ, siktoɣ-awăn-tăn-dd dăɣ-a-s, ĕssanăɣ a-s tăn-tĕssanăm, tĕṭṭafăm daɣ tidĕt măšan hakd a-wen-dăɣ, indăr-ahi făw ad-wăr hawăn-tăn-dd-ĕssĕktăɣ. 13Ija ɣur-i a-s a ĕkkăsăɣ ĕddarăɣ, iwar-ahi, ad-hawăn-tăn-dd siktoɣ i-ad-jam ĕnniyăt 14ed ĕssanăɣ a-s ašăl-in, ohăẓ-dd. Išwar ĕzjarăɣ ăddunya-ta-dăɣ, ăj a-wen s-ĕmmĕk wa s-ăru hi-t-dd-ăsnăfalăl Emăli-nănăɣ Ɣisa Ălmasex. 15A-wen-dăɣ a făl ărheɣ iket-di d-ităjj a-wen, ad-kăwăn-dd-siktoɣ hărătăn-win-dăɣ i-ad-fălla-săn jam wăla ḍarăt tamăttant-in. 16Isălan wi hawăn-in-nĕja făll-ass n-Emăli-nănăɣ Ɣisa Ălmasex, wădden a insan făll-tinfusen dd-năsinăxănbăl wăla dd-năsihăskăt dăɣ-iɣăfawăn-nănăɣ. Aa făw! Tihusay n-a-wa hawăn-nĕjanna, a nĕnhay s-tiṭṭawen-nănăɣ, 17năjjĕyh i-semɣar d-ălxurmăt wa t-ikfa Abba Măssinăɣ-i n-Măssi-s n-tihusay d-ălxurmăt, nĕbdad a-s dd-ijmăḍ emăsli n-Măssinăɣ išĕnnawăn innă: "A-wa Rure-ɣ wa n-iyyăn ĕkneɣ tărha, ĕnta ɣas a dăɣ-ăsriwăn iman-in." 18Emăsli-en s-nĕsla dd-ifălăn išĕnnawăn, nĕsl'-as ašăl d-năddew d-Ɣisa făll-taḍaɣt ta šăddijăt. 19A-wen-dăɣ a făl, a-wa ĕnnăn ănnăbităn, nĕflas-t, ĕflĕsăt-t kăwăneḍ-dăɣ i-ad-kăwăn-infĕw s-a ăjjeen ed ad-hin-ikkĕs tihay făll-ulhawăn-năwăn s-ĕmmĕk wa s-hin-takkăs tefătelt tărmasăt tihay, imlĕwlĕw edăgg, išĕšdĕj ănnur wa n-Ălmasex ulhawăn-năwăn šund tatrit ta n-tifawt dd-tăsimăqqet. 20Ǝlmĕdăt dat-hărăt iket-net a-s măjrăd wa jăn ănnăbităn, wăr t-illa dăɣ-ĕlkĕttab n-Măssinăɣ ere ăddooben ad-t-ăffăssăr s-a-wa dd-ikkăs dăɣ-eɣăf-net ɣas 21făl-a-s, wăr t-illa ănnăbi n-Măssinăɣ dd-iggadăn ɣas ittăr tĕnna n-a-wăr-innă Măssinăɣ, ed măjrăd wa jăn ănnăbităn dăɣ-isălan n-Măssinăɣ, tărna n-Unfas Šăddijăn a tăn-dd-intăjăn s-tĕnna-net iket-net.

will be added

X\