2 Kăl-Kurĕnta 9

1Dăɣ-isălan n-tadhĕlt ta tĕkkăt imĕššeddĕjăn wi hănen teje ta n-Ălyăhudĕyăt, ĕjrăhăɣ-in a-s wăr-ămɣatărăɣ ad-hawăn-siwĕlăɣ dăɣ-isălan-net, 2ed diha t-tĕllăm, tĕjlayăm hullan dăɣ-a-wen. Iwwăy-dd săr-i făw a-wen ad-kăwăn-amĕlăɣ dat-imumĕnăn wi ĕzzăɣnen teje ta n-Masidunya; ĕnneɣ-asăn a-s: imumĕnăn-wi hănen teje ta n-Akaya, wa-dăɣ n-ĕnhaḍ jan ĕmmĕk i-ad-ĕdhĕlăn imumĕnăn wi ĕzzăɣnen Ălyăhudĕyăt. Hannăyăm ămăra a-s ĕjjĕluyăt-năwăn, orăw-dd derhan s-ăddinăt ăjjootnen n-ad-arĕjăn ĕntăneḍ-dăɣ. 3A-wen, wăr hin-ikkes a-s ămăra, ăšimašălăɣ-in săr-wăn hărăt dăɣ-ayĕtma-năɣ iyyăḍ dăɣ-ăddin i-ad-wăr-itĕbĕggut a-wa fălla-wăn ĕnneɣ. A-s kăwăn-in-tisĕn, ĕjrĕwnet-kăwăn tĕknam dăɣ-asdu i-ad-titbat tĕmmal ta kăwăn-jeɣ dăɣ-isălan n-aẓrĕf-wa-dăɣ. 4Ăksuuḍăɣ a-s afăl kăwăn-in-ĕkkeɣ, năkk d-hărăt dăɣ-imumĕnăn wi n-Masidunya, har kăwăn-in-nosa wăr tăsdăwăm, ad-hi-umas a-wen tăkrakiḍt, umas-awăn-tăt kăwăneḍ-dăɣ ḍarăt tĕmmal ta kăwăn-jeɣ hasăn. 5Tĕssĕba n-ad-wăr ija a-wen-dăɣ a făl hi-dd-ijjăš ĕnniyăt n-ad-ĕttărăɣ dăɣ-ayĕtma-win-dăɣ n-kăraḍ, ad-hi săr-wăn-in-izarăn, sĕdĕwĕn tirjit ta s-jăm ărkăwăl-net i-ad-tĕmdĕw talɣa-ten-dăɣ iket-di d-kăwăn-in-tisăɣ. A-wen a madăn-isĕtbĕt a-s a-wa jăm, wădden ăwadĕm a kăwăn-ăšhăššălăn săr-s, ănn-ak, ămoos a jam d-iman-năwăn dăɣ-tedăwit. 6Ǝlmĕdăt a-s ăwadĕm wa ăddomen a ĕnḍărrăn, wăr-e alĕy a ăjjeen, măšan, wa ăddomen a ăjjen, ad-alĕy a ăjjeen. 7Hak ăwadĕm, ăkfet a-wa issĕbdăd dăɣ-ulh-net, wăr-itumaset a-wa ihăkk a dăɣ-ăẓikănẓăr, wăla a t-ăhhuuššălăn ed Măssinăɣ, ăwadĕm ɣas wa ihakkăn s-ulh ăsriiwăn a has-ijraẓăn. 8Măssinăɣ a ăddoben ad-kăwăn-ăkf a ojărăn a-wa s-tămiɣatărăm, isĕnnĕflĕy-kăwăn i-ad-tudabem kăwăneḍ-dăɣ ad-tĕdhĕlăm ăddinăt wi iyyăḍnen, tĕjrĕwăm imărkedăn, 9s-ĕmmĕk wa s-tăn-innă ĕlkĕttab n-Măssinăɣ a-s innă: "Ăfuss n-emăssărho wa izzăyăn ihuk, wăr kăla has-ăba a ikfa, imărkedăn-net ăɣlalăn." 10Măssinăɣ a ihakkăn idommăn i-anăsdamu, isajat fălla-s isudar, ĕnta daɣ a he-isĕnnăḍfĕsăn ajăraw-năwăn i-ad-tudabem amišĕl n-imărkedăn. 11Măssinăɣ a ăddoben asĕbbĕlĕl-năwăn dăɣ-a-wa iṭṭăf ăhusken i-ad-ămerăn ifassăn-năwăn i-ăddinăt. Dăɣ-a-wen-dăɣ a-s afăl hin-năssawăḍ aẓrĕf-wa-dăɣ n-tadhĕlt mĕssaw-s, ad-amĕlăn ăddinăt ăjjootnen Măssinăɣ dăɣ-tĕssĕba n-tadhĕlt ta kăwăn-dd-fălăt. 12Ijmaḍ-t ăššăk a-s aẓrĕf n-tadhĕlt wa mad-tĕkfĕm, ad-ikkĕs imĕššeddĕjăn ăjjootnen dăɣ-timɣutar-năsăn, arĕw-dd a-wen-dăɣ daɣ s-ad-amĕlăn ăddinăt ăjjootnen Măssinăɣ. 13Tihusay n-a-wen-dăɣ jăm a he-isĕtbĕtăn tărĕḍḍawt ta jăm s-Ălĕnžil n-Ălmasex d-amišĕl wa tăjjăm i-erhet n-Măssinăɣ. Afăl jăm a-wen har t-ĕnhăyăn ăddinăt, ad-amĕlăn Măssinăɣ, umayăn-as dăɣ-tĕssĕba n-tadhĕlt ta jăm i-imumĕnăn d-ăddinăt wi iyyăḍnen ed wăr hasăn-tăsɣărăm ifassăn-năwăn. 14Ǝntăneḍ daɣ ămăra, dăɣ-tĕssĕba n-tĕmɣăre n-ănnuɣmăt wa kăwăn-issĕknă Măssinăɣ, tĕddalăn-awăn Măssinăɣ i-ad-kăwăn-sĕlmĕdăn s-tărha ta kăwăn-jăn. 15Ămăra ayĕtma, namĕlet Măssinăɣ făl tihusay n-isuf wi hanăɣ-ija wăren la milhaw.

will be added

X\