2 Kăl-Kurĕnta 8

1Ayĕtma-ɣ, nărha ad-hawăn-năj isălan n-ănnuɣmăt wa ikfa Măssinăɣ ălkănisăten ti hănen teje ta n-Masidunya. 2Wăr t-illa ălɣizabăt s-wădden ĕnhăyăn-t măšan, wăr-ifneẓ a-wen tĕmɣăre n-tedăwit-năsăn, lăqqĕwăn măšan wăr-ăsɣărăn ifassăn-năsăn i-imumĕnăn wi wăren ĕṭṭef hărăt. 3Ăjjĕyhăɣ a-s jăn a-wa ăddooben, ănn-ak, jăn făw a okăyăn a-wa ăddooben, ămoos a-wen a tăn-dd-ifalăn, wădden a-s tăn-ăšihăššăl ăwadĕm. 4Ǝntăneḍ iman-năsăn a dd-ifăl ĕnniyăt-wen-dăɣ, tilăqqad făw a hanăɣ-jăn făll-tărha-i-dăɣ jăn n-ad-ĕdhĕlăn imĕššeddĕjăn-wi hănen Yărussălam. 5Tanĕmmirt-năsăn, jăn a okăyăn a-wa tăn-norda. Emăli a ĕkfăn iman-năsăn, ĕkfăn-anăɣ daɣ iman-năsăn dăɣ-erhet n-Măssinăɣ. 6Isălan n-a-wen-dăɣ jăm a făl năsmătăr Titus i-ad-kăwăn-in-iqqĕl, isĕmdĕw a-wa issĕnta jere-wăn, awĕy-dd tirjit ta s-tăbokăm i-imumĕnăn. 7Tidĕt-dăɣ a-s wăr t-illa a-s wădden ăsnăflăy-kăwăn Măssinăɣ dăɣ-s, jer-immun wăla musnăt wa n-tayĕtte wăla musnăt n-măjrăd, wăla ăddăgaẓăt dăɣ-iji n-isălan-net wăla tărha tĕmdat. A-wen-dăɣ a făl isălan-wi-dăɣ n-tirjit i-imumĕnăn, ĕjlĕyăt dăɣ-săn hullan. 8A-wa dăr-kăwăn-ăsimătărăɣ, wăr-ărheɣ ad-hawăn-umas tăhaššilt. Isălan ɣas n-armuḍ wa s-ĕkfănăt ălkănisăten ti iyyăḍnen a dăɣ-wăn tajjăɣ i-ad-tĕjlĕyăm kăwăneḍ-dăɣ, sĕtbĕtăm tărha ta jăm i-ayĕtma-wăn wi iyyăḍnen. 9Tĕssanăm iman-năwăn tĕmɣăre n-ănnuɣmăt wa kăwăn-ikfă Emăli-nănăɣ Ɣisa Ălmasex dăɣ-tĕssĕba-năwăn, ĕnta-i n-amărrĕzăɣ, ăslăqqăw iman-net i-ad-tărzăɣăm kăwăneḍ, dăɣ-ĕllăqqu-net. 10Ăddăbara-nin hawăn da: sĕmdĕwăt-in a-wa ăhusken tĕssĕntăm; ĕnhaḍ, kăwăneḍ a ăzzarnen s-ajăraw n-ĕnniyăt-wa-dăɣ, kăwăneḍ daɣ a ăzzarnen s-iji-net. 11A-wen-dăɣ a făl ărheɣ a-s a-wa dăɣ-tĕssĕntăm ăddăgaẓăt, sămdăt-t-in s-tădabit-năwăn. 12Ere ikfăn hărăt i-Măssinăɣ s-ulh imdan, ikf'-e s-ĕnniyăt n-a-wa ila wădden a wăr-ila, ad-ijrăẓ ălxal-net i-Măssinăɣ, Măssinăɣ daɣ, wăr dăɣ-năɣ-e ittăr a wăr nĕla, wăla a wăr năddobăt. 13Wăr hawăn-jĕnneɣ, kăykăyăt-dd a-wa tĕṭṭăfăm i-ad-sĕyyĕwĕnăm ăddinăt iyyăḍ, făw, ănn-ak, a tattărăɣ ad-tagdăhăm iket-dăɣ-năwăn dăɣ-a-wa lăm. 14Tidĕt, ašăl-i, kăwăneḍ, ăsnăflăy-kăwăn Măssinăɣ, a-wen-dăɣ a făl dăɣ-wăn tattărăɣ ad-tĕdhĕlăm ayĕtma-wăn wi tărmăs tămăɣatert ed ăddobăt a-s ašĕkka, ad-tĕbrĕjwĕl talɣa, umas a-s win-dăɣ tĕdhălăm ašăl-i-dăɣ, a he-isĕnnĕflĕy Măssinăɣ, a-s ija a-wen, kăwăneḍ, tărmas-kăwăn tămăɣatert. Dihen, ĕntăneḍ a iwar ad-kăwăn-ĕdhĕlăn. 15Ǝnta-den-dăɣ migdăhaw wa s-hawăn-jănneɣ dăɣ-hanăɣ-ăssewăl ĕlkĕttab n-Măssinăɣ a-s innă: "Wa dd-ăjlaben a ăjjen, wăr-ăssakăy, wa s-a-ĕnḍărrăn daɣ a dd-ăjlabăt, wăr fălla-s in-ăba hărăt." 16Nămmoy i-Măssinăɣ ed issĕjlăy Titus dăɣ-isălan-năwăn s-ĕmmĕk wa s-dăɣ-săn-ĕjlayăɣ năkk iman-in. 17Titus iman-net a irḍăn s-ad-kăwăn-in-ăkk, nĕttăr dăɣ-s daɣ ad-kăwăn-in-ăkk šik, ija daɣ făll-a-wen. 18Dăɣ-isălan n-asikĕl wa săr-wăn-in-ija, năsidăw-t-in d-ă/n/na-năɣ iyyăn dăɣ-ăddin s-wăr t-illa ălkănisăt s-wădden tajăyha făll-tihusay n-ălxidmăt-wa t-išlăn dăɣ-efes n-Ălĕnžil. 19Wădden dăɣ-tĕssĕba n-a-wen-dăɣ ɣas a făl săr-wăn-t-in-năsidăw d-Titus, ĕnta-en-dăɣ daɣ a ăsnăfrănnăt ălkănisăten i-ad-isărtĕy tirjiten iket-di d-tuẓannăt. Ălxidmăt-wen-dăɣ, nĕh'-e i-ad-itwĕsĕmɣăr isĕm n-Emăli, nĕsĕtbĕt tărha n-tadhĕlt ta s-nărha ad-tăt-năj i-ayĕtma-năɣ. 20Dăɣ-isălan n-tasĕssiwit-ta-dăɣ, aẓrĕf ăjjeen a-wa, a-wen-dăɣ a făl wăr nărha ad-hanăɣ-iššĕk ăwadĕm dăɣ-isălan n-ĕmmĕk wa s-t-nĕṭṭăf hundăɣ har ašăl wa d-e-ijjĕš ifassăn n-mĕssaw-s 21ed, nărha amišĕl n-a-wa olăɣăn dat-Emăli hakd-dăɣ dăgg-adĕm. 22Meddĕn-wi hin-năšmašăl săr-wăn, năsidăw-tăn-in daɣ d-ă/n/na-năɣ iyyăn nĕkna azĕjjĕzz, nĕnhăy a-s ăwadĕm irhan tadhĕlt n-ăddinăt wi iyyăḍnen, a-wen-dăɣ a făl t-noyya, ikk'-iwăn-in. Ijlăy hullan dăɣ-derhan n-ad-kăwăn-in-ăkk, ikn'-iwăn daɣ taflĕst, ijlay hullan dăɣ-derhan n-amišĕl n-erhet n-Măssinăɣ. 23Ămăra, taɣălift-năwăn Titus wa n-amidi-nin dăr-oharăɣ ălxidmăt, taɣălift-năwăn meddĕn wi iyyăḍnen dăr-nănniixdăm dăr-s ăddewnen. Iket-nănăɣ kăwăneḍ-di-dăɣ a-s năxdam. Meddĕn wi n-ĕssin dăr-ăddew Titus, ălkănisăt a tăn-in-tăšimašălăt i-ad-ăxdĕmăn jere-wăn, sĕmɣărăn isĕm n-Ălmasex. 24Săknăt-tăn tărha tĕmdat i-ad-umas a-wen tajuhe i-ălkănisăten-ti tăn-dd-ăšmašălnen, ĕlmĕdnăt a-s wăr-ăbbuggăt abăraj wa fălla-wăn nĕtajj.

will be added

X\