2 Kăl-Kurĕnta 7

1Ǝnhĕywăt ɣas ayĕtma-ɣ wi ĕkneɣ tărha, šămad năkkăneḍ a-s ija Măssinăɣ ărkăwălăn-win-dăɣ, adiš, nĕbḍĕwet d-asĕmmăḍĕs n-tiɣĕswen-nănăɣ d-ĕnniyătăn-nănăɣ, nišdajet, tănnăhăḍet dăɣ-năɣ tuksĕḍa n-Măssinăɣ. 2Ayĕtma, arăt-anăɣ ulhawăn-năwăn, ăjăt-anăɣ edăgg. Wăr t-illa ere năddiɣwăt, wăl' ere năssok' ăkall, wăl' ere năkkirrăs i-ad-năkš ehăre-net. 3A-wa hawăn-janneɣ, wăr teɣalăt janneɣ-awăn-t i-ad-kăwăn-sĕḍlĕmăɣ, ham ulhawăn-nănăɣ, nĕj'-awăn tărha-ta-dăɣ s-wăr hanăɣ-e-ibḍĕw a săl tamăttant. 4Ǝjrawăɣ s-măjrăd dăɣ-isălan-năwăn, ămoos-ahi daɣ abăraj ad-fălla-wăn ăbbărăjăɣ, ĕssĕnsăn isălan wi fălla-wăn ĕsleɣ ĕnniyăt-in har jeɣ tedăwit-ta-dăɣ hin-tăstăwăt wăla dăɣ-tersĕmmawen ti nĕnhăy. 5A hin-năwwăḍ teje ta n-Masidunya-dăɣ har ašăl-i-dăɣ, wăr kăla nĕja hărăt n-ăssaɣăt n-tăsonfat. Iwwăɣwăɣ-anăɣ ălɣizabăt siha d-siha, ĕknăsăn-anăɣ ăddinăt, nărmăɣ făll-iman-nănăɣ hakd-dăɣ făll-tiɣĕswen-nănăɣ, 6măšan issĕsmăḍ Măssinăɣ-i n-enĕssesmăḍ n-talɣiwen ulhawăn-nănăɣ, ed nĕha a-wen-dăɣ, a-s hanăɣ-dd-osa Titus. 7Ăsdăwăt-anăɣ ass-net, ăsdăwen-anăɣ daɣ isălan-năwăn wi dăɣ-năɣ ija. Illăɣăt ĕmmĕk wa s-t-tăsbălălăm, ija dăɣ-năɣ isălan n-awnaf wa hanăɣ-jăm, illăɣăt-anăɣ daɣ tisnant ta jăm dăɣ isălan n-a-wa ijăn; iglă har hanăɣ-innă a-s ašrut wa-nin a tărmăsăm dăɣ-isălan-win-dăɣ har ămăra, năkk a făll-tĕknasăm d-išĕnja-nin. Ǝsleɣ i-isălan-en-dăɣ ɣas, ăssakăyăɣ dăɣ-tedăwit. 8Ǝssanăɣ a-s ikm'-iwăn a-wa s-kăla hawăn-t-in-ĕktăbăɣ măšan, wăr t-ămmujrăẓăɣ, kud-dăɣ ămmujrăẓăɣ-t, hannăyăɣ a-s wăr tăhoja tisnant-năwăn. 9Ămăra, ăddiweɣ dăɣ-isălan-năwăn măšan, wădden tisnant ta kăwăn-tărmasăt a hi-tăsidăwet, ănn-ak, tătubt ta jăm s-Măssinăɣ săr-wăn-dd-orăw măjrăd wa hawăn-in-jeɣ a hi-ăsidăwen. 10Tisnant ta s-Măssinăɣ a tăt-dd-orăwăn săr-năɣ, wăr la imujraẓ ed tiirĕw-dd săr-năɣ tăbĕḍḍawt d-a-wa lăbasăn nĕtamašal, năɣlĕs, a-s ija a-wen, tisnant ta s-ăddunya a săr-năɣ-tăt-dd-orăwăn, ten, ušreyăn-net, ĕlhĕllak ɣas. 11Tidĕt, ikm'-iwăn a-wa hawăn-ĕnneɣ măšan, ămoos a-wa săr-wăn dd-orăw a ihan erhet n-Măssinăɣ. Ǝnhĕywăt kăwăneḍ iman-năwăn ălxal wa ăhusken tărmăsăm ămăra, tĕššăkăm iman-năwăn, tăkrakăḍăm, tărmăɣăm, tăsdărhănăm ad-hi-talĕsăm ahănay, tărḍăm iket-năwăn dăɣ-armuḍ a-s ăwadĕm wa ămešălăn tĕluše-ten-dăɣ jere-wăn, inmĕnhĕyet d-imojjan-net; ĕnta-den-dăɣ a-wa issĕtbătăn a-s ĕnta a iwar uḍlem, wădden kăwăneḍ. 12Ărheeɣ ad-tĕssanăm a-s tăkarḍe ta iyyăḍăt hawăn-in-ĕktăbăɣ, wăr tăt-in-ĕktebăɣ dăɣ-tĕssĕba n-ăwadĕm wa ănmăšrăyăn wăla wa ittĕḍlămăn, ănn-ak, ĕktăbăɣ-awăn-tăt-in dăɣ-tĕssĕba n-ĕddĕguẓăt wa jăm fălla-năɣ s-Măssinăɣ a-s ĕssĕbab-net. 13Ămăra-dăɣ, issĕsmăḍ a-wa jăm ulhawăn-nănăɣ, tăssewăḍ daɣ tedăwit ta ija Titus făll-ta-nănăɣ, ikkăs-anăɣ dăɣ-tăqqăn n-eɣăf dăɣ-isălan-năwăn, 14ĕbbărăjăɣ data-s dăɣ-isălan-năwăn, ĕnhăyăɣ a-s a-wa ăhusken has-ĕnneɣ fălla-wăn, wăr t-ămmujrăẓăɣ ed wăr-ăbbuggăt. Tidĕt d-tărha ɣas a kăwăn-nĕssĕkna, nosa daɣ a-s a-wa nĕnna i-Titus dăɣ-isălan-năwăn, tidĕt. 15Ašăl-i, e-d dd-iktă asĕbbĕlĕl wa t-jăm a-s kăwăn-in-osa d-ĕjjĕluyăt d-semɣar wa jăm dăɣ-amišĕl n-a-wa hawăn-nĕjanna, ad-kăwăn-itimĕl s-tărha. 16Tedăwit-ten-dăɣ ija, a jeɣ năkk-dăɣ, ed ĕssanăɣ a-s ăddoobeɣ ad-fălla-wăn sĕffĕllăɣ, ĕflĕsăɣ-kăwăn dăɣ-hărăt iket-net.

will be added

X\