2 Kăl-Kurĕnta 6

1Năkkăneḍ, Măssinăɣ a dăr-nănnixdăm, a-wen-dăɣ a făl kăwăn-năsimătăr d-ad-wăr hin-tăsbăṭṭălăm ănnuɣmăt n-Măssinăɣ-wa kăwăn-ikfa 2ed Măssinăɣ iman-net innă: "Ǝsleɣ i-tittar-năwăn, ašăl wa ĕssĕbdădăɣ i-ad-kăwăn-ăɣlĕsăɣ osă-dd ɣas, ogăẓăɣ-kăwăn." Ămăra, ašăl-en n-ĕlɣĕllas issĕbdăd Măssinăɣ, osă-dd, ĕnta-da-dăɣ nĕha ašăl-i-dăɣ. 3Năkkăneḍ, wăr t-illa a nĕtajj i-ad-nĕkkĕs ăwadĕm dăɣ-tuksĕḍa n-Măssinăɣ, i-ad-wăr-ijărrĕw ăwadĕm a lăbasăn innă dăɣ-ămašal wa nĕha. 4A-wa nĕtăjj iket-net, nĕtajj'-e i-ad-itbĕt dat-ăddinăt, a-s inaxdimăn dd-ăšimašăl Măssinăɣ a nămoos. A ijăn-dăɣ, nĕbdad făll-iman-nănăɣ, wăr t-illa aɣăna s-wădden nĕhannăy-t jer-ălɣizabăt, wăla tissust, wăla tirĕmmaɣ măšan, nĕṣbar dăɣ-a-wen-dăɣ iket-net. 5Ǝjjăšnăt-anăɣ tiwit, nĕjjăš tikărmuten, oẓăyăn-anăɣ ăddinăt, ehăḍ d-ašăl nălluyyăɣ ed nĕšɣal, dehiyyăn făw wăr nĕjărrĕw s-eḍĕs, nĕtajj išilan wăr t-illa a nĕkša. 6Măšan, šăddiij tămudre-nănăɣ, tămudre n-ăddinăt ĕzzaynen Măssinăɣ. Hanăɣ-taẓidert, noolaɣ, idhal-anăɣ Unfas Šăddijăn, nărha ăddinăt s-ulh imdan. 7Nĕxaṭṭăb măjrăd n-Măssinăɣ s-tidĕt-net d-tărna-net, iqqud a-s hărăt dăɣ-imutaj wi s-nĕkannăs d-išĕnja-nănăɣ, ĕnta a nĕja tăkoba hakd aɣărh. 8Dăɣ-a-wa nĕha, ăssiimɣărăn-anăɣ iyyăḍ, ĕlkăhăn-anăɣ iyyăḍ; tĕmmalăn-anăɣ iyyăḍ, gaggărăn-anăɣ iyyăḍ; jan-anăɣ iyyăḍ inĕsbuha, a-s ija a-wen, wăr t-illa a dd-izajjărăn imawăn-nănăɣ săl tidĕt; 9jan-anăɣ iyyăḍ ăddinăt wăren ătwăssăn, a-s ija a-wen, nĕkna atwĕzzi; ija ɣur-iyyăḍ a-s năssijja-hin făw măšan, wăr nămmut hărwa, ăɣtasăn-anăɣ tamăttant măšan, nĕddar hărwa. 10Jan-anăɣ iyyăḍ imĕskay măšan, hărkuk năddiwăt; jan-anăɣ iyyăḍ tilăqqiwen măšan, nĕtirĕw-dd ărrĕzăɣ s-ăddinăt ăjjootnen; jan-anăɣ iyyăḍ ăddinăt s-wăr t-illa a lan uhĕn-dăɣ, wăr t-illa a hin-noḍan. 11Ayĕtma-ɣ wi n-kăl-Kurĕnta, wăr t-ih' ăššăk a-s nor'-awăn imawăn-nănăɣ i-tidĕt, nor'-awăn daɣ ulhawăn-nănăɣ, wăr t-illa făw a hawăn-nĕffar; 12ănn-ak, ulhawăn-wi-di-dăɣ-năwăn a hanăɣ-wăren-olwa, ĕnnăr wădden a-wen, olwan-awăn wi-nănăɣ hullan hullan. 13Šămad ilyaḍăn-in a tămoosăm, ăyyăt-ahi ad-hawăn-ăjăɣ măjrăd wa he-ăj abba i-aratăn-net: ăjăt-anăɣ a-wa hawăn-nĕja, arăt-anăɣ ulhawăn-năwăn s-ĕmmĕk wa s-hawăn-nora wi-nănăɣ. 14Wăr toseɣăm iman-năwăn d-ăddinăt wi wăren oher hărăt d-Emăli. Ma ohar a-wa olăɣăn d-a-wa lăbasăn, meɣ ma ohar ănnur d-tihay? 15Ma tămoos tassaɣt ta t-tĕllăt jer-Ălmasex d-Iblis meɣ jer-amumĕn d-ănăẓẓalim? 16Ma ohar ehăn wa šăddijăn n-Măssinăɣ d-ăṣṣănămăn. Ǝlmĕdăt a-s năkkăneḍ a-s ehăn n-ămudd wa šăddijăn n-Măssinăɣ. Măssinăɣ-i iddărăn innă: "Ad-ĕzzăɣăɣ jere-săn, ĕdhĕlăɣ-tăn e-s ĕkkăn-dăɣ, umasăɣ-asăn Măssinăɣ, umasăn ĕntăneḍ tamĕtte-nin." 17A-wen-dăɣ a făl innă Emăli: "Ǝzjărăt-dd jer-inĕẓẓulam, ĕbḍĕwăt iman-năwăn dăr-săn, wăr ḍesăm a ămmiḍăsăn. Afăl jăm a-wa fălla-wăn ărheɣ, ad-kăwăn-dd-ăjăɣ s-iman-in, sĕbbĕlĕlăɣ-kăwăn, 18umasăɣ-awăn Abba, tumasăm mĕddana-ɣ d-ešše-ɣ. Năkk-i n-Emăli-i ilăn tărna a innăn a-wen."

will be added

X\