2 Kăl-Kurĕnta 5

1Ămăra, nĕssan a-s taɣĕssa-ta-dăɣ nĕha tolăhăt ɣas d-ehăket, ilkam ad-tumas šund ebăršăj măšan, nĕssan a-s ašăl wa n-sămdo n-hărăt iket-net, a-s e-ăj, ăsimăjnăt-anăɣ-dd Măssinăɣ ehăket ăynayăn dăɣ-išĕnnawăn. Wen ĕnta, wădden a ĕknan ifassăn n-ăgg-adĕm, Măssinăɣ iman-net a t-dd-iknăn, iɣlal daɣ. 2Ămăra, noẓar dăɣ-ehăket-wa-dăɣ, năsidărhăn ad-nĕddĕk ɣur-Măssinăɣ i-ad-nĕjjĕš ehăket wa n-tiɣĕswen ti ăynaynen, 3s-afăl ašăl wa tănăt-nĕjjăš, ad-ăbas nĕzzaf. 4A nĕkka nĕzzaɣ dăɣ-taɣĕssa-ta-dăɣ, ad-noẓar, năsnin hak ašăl măšan, wădden arurĕd a nĕja ad-hanăɣ-ikkĕs Măssinăɣ dăɣ-ăddunya-ta-dăɣ, ănn-ak a nărha, ad-fălla-năɣ-in-ikkĕs taɣĕssa ta tărĕwăt s-hak ašăl tamăttat, ăj ta tăɣlălăt dăɣ-edăgg-net. 5Măssinăɣ iman-net a hanăɣ-dd-ixlăkăn i-a-wen, ĕnta-i hanăɣ-ikfăn Unfas-net i-ad-umas tasĕtbat d-ăḍḍimmana n-ărkăwăl wa hanăɣ-ijjăš. 6Ăsikayăd-anăɣ a-wen-dăɣ hak ašăl ed, nĕssan a-s a nĕkka nĕha taɣĕssa-ta-dăɣ, ad-nujĕj Emăli. 7Tidĕt, wăr t-nĕhĕnnĕy s-tiṭṭawen-nănăɣ ămăra-dăɣ măšan, năkkăneḍ immun wădden a-wa hannăynăt tiṭṭawen-nănăɣ a făl năsifălla. 8Nĕflas hullan a-wa s-nomăn măšan, năssoof ad-năhan, nĕzjăr taɣĕssa-ta-dăɣ, nĕddĕk edes i-Emăli. 9A-wen-dăɣ a făl jer-năqqima dăɣ-taɣĕssa-ta-dăɣ wăla nĕzjar-tăt, nĕjrĕẓet i-Emăli dăɣ-hărăt iket-net, 10făl-a-s ăhhuuššăl, ad-dd-nĕbdĕd iket dăɣ-nănăɣ dăɣ-edăgg n-ăššăreɣa wa n-Ălmasex i-ad-hanăɣ-išrăɣ. Dihen, hak ăwadĕm d-a-wa has-jăn imojjan-net. Wa ămešălăn a-wa olăɣăn, ad-ijrĕw marušăt-net, wa s-a-wa lăbasăn daɣ ɣas a ămešăl, ad-ijrĕw ălhăk-net. 11Šămad nĕssan a-wa s-itawănna tuksĕḍa n-Emăli, nĕtattăr daɣ ad-tĕjjĕš tuksĕḍa-ten-dăɣ ulhawăn n-dăgg-adĕm, Măssinăɣ, wăr has-tĕdrej talɣa-nănăɣ, norda daɣ a-s kăwăneḍ, dăɣ-ulhawăn-năwăn, tĕssanăm fălla-năɣ. 12A-wa hawăn-nĕjanna, wăr hawăn-t-nĕjĕnn făl-a-s innin nărha ad-hanăɣ-in-tĕjrăhăm, ănn-ak, nĕjann'-awăn-t i-ad-tudabem abăraj dăɣ-tĕssĕba n-a-wa năxdăm jere-wăn, dihen, ad-tĕlmĕdăm a-wa mad-tĕnnĕm i-wi tabărajnen dat-ăddinăt, a-s ija a-wen, wăr šăddijăn ulhawăn-năsăn. 13Kunta iyyăḍ ija ɣur-săn a-s iba n-tayĕtte a hanăɣ-irmasăn, wăr-iɣšed hărăt a-wen ed ălxidmăt n-Măssinăɣ wa nĕha, a hasăn-ijrăwăn tĕnna n-a-wen; kunta daɣ, jăn-anăɣ ăddinăt ĕssannen a-wa hăn, a-wen, tănfo-năwăn. 14Ălxidmăt wa nĕha, tĕntaj-anăɣ săr-s tărha ta măqqărăt hanăɣ-ija Ălmasex, a-wen-dăɣ a făl nĕdgaẓ. Nĕkkas ăššăk a-s ĕnta-i n-iyyăn, ămmut dăɣ-tĕssĕba-năwăn, ămoos a-wen-dăɣ a-s šund iket-dăɣ-nănăɣ a ămmutnen dăɣ-a-wa ămoosăn amišĕl n-erk hărătăn wi nĕtamašal ibda. 15Dăɣ-tĕssĕba-nănăɣ iket-nănăɣ a făl ămmut i-ad-umas a-s ăddinăt wi ikfa tămudre ta tăynayăt, ad-ăbas ărjašăn dăɣ-derhan n-iman-năsăn, ănn-ak, ărjašăn s-a-wa fălla-săn irha Ălmasex-i ămmun, inkăr-dd jer-inĕmmuttan. 16Ašăl-i, ăbas nĕḍkaḍ ăwadĕm wăl' iyyăn s-a-wa s-t-ĕḍkăḍăn dăgg-adĕm. Ibda a-wen-dăɣ a-s nĕḍkaḍ Ălmasex iman-net măšan ămăra, wădden tayĕtte-ten-dăɣ a-s nĕgla. 17E-d osăɣ ăwadĕm d-Ălmasex-dăɣ, ămoos ăwadĕm ăynayăn, a-wa n-ibda ibbĕdăy; ĕnhĕywăt-t, hărăt iket-net, ăynay-dd săr-s. 18A-wen, Măssinăɣ-i hanăɣ-ăẓmăẓălăn d-iman-net s-Ălmasex a t-ijăn, ijă daɣ ašăl-i-dăɣ ămašal-wen-dăɣ n-aẓĕmmăẓĕl n-dăgg-adĕm d-Măssinăɣ dăɣ-ifassăn-nănăɣ. 19Dăɣ-tĕssĕba n-tărna n-Ălmasex-en-dăɣ, ad-ija Măssinăɣ tanmĕẓalt dăr-s d-ăddinăt iket-dăɣ-năsăn, ĕnta a ijjăšăn ărkăwăl wa n-ad-ăbas hasăn-e-iṭṭaf uḍlem-năsăn, ij'-anăɣ năkkăneḍ-dăɣ inĕmmejrĕdăn ăwwikkălnen tanmĕẓalt-net. 20Ămăra, năkkăneḍ a-s ălžămaɣăt n-imawayăn n-isălan n-ălxer n-Ălmasex šund ɣas a-s Măssinăɣ iman-net a itamăjradăn i-dăgg-adĕm dăɣ-tĕssĕba-nănăɣ; a-wen-dăɣ a făl dăɣ-wăn nĕtattăr, nĕj'-awăn isĕm wa n-Ălmasex, ehăff, măẓălăt d-Măssinăɣ iket-di. 21Ɣisa-i s-wăr kăla ofa abăkkaḍ, ij'-e Măssinăɣ dăɣ-edăgg n-inăsbăkkaḍăn i-ad-nasăɣ dăr-s, nĕkrĕš idĕm dat-Măssinăɣ.

will be added

X\