2 Kăl-Kurĕnta 4

1Šămad Măssinăɣ, oḍăn-anăɣ tăhanint-ta-dăɣ făl ija ămašal ogdăhăn d-a-wa-dăɣ dăɣ-ifassăn-nănăɣ, adiš, kuyĕdăt-anăɣ, 2nĕbḍĕwet d-a-wa ăsikărakăḍăn tamašalăn ăddinăt dăɣ-ufăr, wăr nĕtĕttăret tikărras n-ăwadĕm, wăr nĕsĕmĕskil măjrăd n-Măssinăɣ, tidĕt ɣas a nĕjanna i-ăddinăt dat-Măssinăɣ i-ad-ĕlmĕdăn a-s a-wa hasăn-nĕjanna iket-net tidĕt. 3Kunta daɣ Ălĕnžil, ĕllan-t ăddinăt s-iffar ălmăɣna-net, a-di wi ĕkfănen iman-năsăn i-ĕlhĕllak a-s ăttunkăl, 4ănimăšrăyăn i-Măssinăɣ, ăsdărɣăl-tăn Iblis-i ăminakălăn făll-ăddunya-ta-dăɣ, igdăl-asăn ahănay n-ănnur wa măqqărăn ăsmăɣmăɣăn ihăn isălan n-Ălĕnžil-i hanăɣ-isalmadăn s-ălxurmăt n-ănnur wa ihăn Ălmasex-i s-ăwadĕm wa t-inhăyăn, inhăy Măssinăɣ. 5Wădden isălan n-iman-nănăɣ a nĕxaṭṭăb i-ad-hanăɣ-in-ĕjrăhăn ăddinăt, isălan n-Ălmasex a nĕxaṭṭăb. Dăɣ-tĕssĕba-net ĕnta-en-dăɣ a făl nĕja iman-nănăɣ eklan-năwăn, 6ed Măssinăɣ-i innăn ašăl ăzzarăn: "Ămĕlet ănnur i-ad-iba tihay", ĕnta-en-dăɣ, a dd-ijăn ănnur wa s-ămăra-dăɣ, ăsimăɣmăɣ dăɣ-ulhawăn-nănăɣ i-ad-nudabăt ahănay n-tihusay n-ănnur wa ăsimăɣmăɣăn făll-idĕm n-Ălmasex. 7Hărăt-wen-dăɣ, ij'-anăɣ-t Măssinăɣ, măšan hakd a-wen-dăɣ ufa ad-nĕssan nĕkittĕw a-s wăr t-illa a nămoos. Wăr nămoos ɣas ar šund hărăt ilan ălqim itwarăn dăɣ-ilĕkkan s-răqqiis terăẓẓe-năsăn i-ad-itbĕt a-s tărna ta n-Măssinăɣ, wădden ta n-iman-nănăɣ a-s năxdam i-Măssinăɣ. 8Ǝẓbăbăn-anăɣ ăddinăt siha d-siha măšan, wăr nălfăẓẓăṭ, nĕššĕwwăš măšan, wăr nĕkkes ăṭṭăma; 9ăstăɣăynăn-anăɣ ăddinăt măšan, wăr ḍara-năɣ iqqel Măssinăɣ, indăr-asăn ad-hanăɣ-ărmĕsăn; tĕggatăn-anăɣ s-ăkall măšan, indăr-asăn ad-hanăɣ-in-sĕmdun, issĕbdăd-anăɣ-dd Măssinăɣ. 10Hak ăssaɣăt-dăɣ, ărhan-anăɣ ăddinăt tĕsĕmme n-tamăttant šund ta ija Ɣisa măšan, intăš-anăɣ-dd Măssinăɣ dăɣ-săn i-ad-ĕlmĕdăn a-s tămudre-ta-dăɣ ija Ɣisa, a nĕja năkkăneḍ-dăɣ, šămad iddar, adiš, nĕddar năkkăneḍ-dăɣ dăɣ-tĕssĕba-net. 11Ăšerăkken ɣas dăɣ-ăddunya-ta-dăɣ tamăttant-nănăɣ dăɣ-tĕssĕba n-alkum-nănăɣ i-Ɣisa. Tidĕt, tĕbrar taɣĕssa-nănăɣ, măšan, nĕddar; ămoos a-wen a ăssiitbătăn i-ăddinăt tămudre ta ija Ɣisa dăɣ-ulhawăn-nănăɣ. 12Ărhan tamăttant-nănăɣ dăɣ-tĕssĕba n-ălxuṭbăt wa nĕtăjj măšan, hakd a-wen-dăɣ, orăw-dd săr-wăn a-wen-dăɣ hanăɣ-tăjjăn, tămudre tăynayăt. 13Nĕṭṭaf ɣas ĕnniyăt wa s-innă ănnăbi iyyăn dăɣ-ĕlkĕttab n-Măssinăɣ: "Omanăɣ s-Măssinăɣ, a-wen-dăɣ a făl ămmijrădăɣ dăɣ-isălan-net." Ămăra, immun šund-wen-dăɣ a nĕṭṭaf năkkăneḍ-dăɣ, nomăn ɣas, ad-nĕxaṭṭăb isălan-net. 14Nĕkkas ăššăk a-s Măssinăɣ-i dd-issĕnkărăn Emăli Ɣisa jer-inĕmmuttan, ilkam ad-hanăɣ-dd-isĕnkăr jere-săn, isĕbdĕd-anăɣ năkkăneḍ hakd kăwăneḍ edes-has dat-Măssinăɣ. 15A-wa hanăɣ-išlăn iket-net, kăwăneḍ a he-infĕw i-ad-imɣar ănnuɣmăt n-Măssinăɣ, iwwaḍăn-dd fălla-wăn ăddinăt ăjjootnen, ijatăn wi tiimĕlnen Măssinăɣ. 16A-wen-dăɣ a făl, kuyĕdăt-anăɣ ed nĕssan a-s kud-dăɣ ašăl-i-dăɣ, tikmĕmmeḍ taɣĕssa-nănăɣ s-a ĕnḍărrăn a ĕnḍărrăn, hak ašăl-dăɣ itiwwaḍ-dd, a ăynayăn făll-tiynĕya n-ulhawăn-nănăɣ. 17Hărăt n-aɣăna wa nĕhannăy ămăra-dăɣ, taẓidert, ilkam ad-t-iba, išrĕy-t-dd ălxurmăt iɣlalăn, ăsinăflăyăn wărăn il' asuɣĕl. 18Wăr-inăbbăjet a-wa inabbăjăn tiṭṭawen n-dăgg-adĕm tiṭṭawen-nănăɣ, ănn-ak, năknet akăyad dăɣ-a-wa wărăn ila mănhoy t-illăn ɣur-Măssinăɣ făl-a-s, a-wa ilăn mănhoy, ad-t-iba, a-s ija a-wen, a-wa t-wărăn ila t-illan ɣur-Măssinăɣ, iɣlal hărkuk.

will be added

X\