2 Kăl-Kurĕnta 3

1Edăwănne-wa s-iket hawăn-t-jeɣ, ajăn idĕm ăynayăn a nĕtattăr ɣur-wăn? Ăbo! Meɣ ajăn năkkăneḍ, nămiiɣatăr s-tăkarḍe ĕktabăn dăgg-adĕm tăssiilmădăt a-s inĕmmušal s-tidĕt a nămoos? Ǝllan-t ăddinăt ămiɣatărnen s-a-wen i-ad-sĕlmĕdăn a-wa ămoosăn măšan, năkkăneḍ, wăr dăɣ-wăn nărha a-wen. 2Tăkarḍe-nănăɣ, kăwăneḍ-di-dăɣ. Tăkarḍe a-wa, tĕktabăt dăɣ-ulhawăn-nănăɣ, ĕssanăn săr-s dăgg-adĕm, ɣarrăn-tăt daɣ iket-dăɣ-năsăn. 3Ălmasex a iktăbăn tăkarḍe-ten-dăɣ dăɣ-ulhawăn-nănăɣ, ij'-anăɣ năkkăneḍ imawayăn-net i-ad-tăt-năj dăɣ-ifassăn-năwăn măšan, tăkarḍe-en, wădden adăloš a-s tĕktab, ănn-ak, Unfas n-Măssinăɣ-i n-Amăɣlol a tăt-iktăbăn, wădden isĕllam n-tihun a făll-tăt-iktăb, ulhawăn n-dăgg-adĕm a dăɣ-tăt-iktăb. 4Nĕkkas ăššăk dăɣ-tărna n-Măssinăɣ ta hanăɣ-ikfa dăɣ-ăddimmăt n-Ălmasex. 5Wăr nĕhel wăla-dăɣ ad-nănn a-s, a-wa-dăɣ hanăɣ-išlăn, išl'-anăɣ s-tărna dd-nĕkkas dăɣ-iman-nănăɣ, ănn-ak, Măssinăɣ a hanăɣ-ikfăn turhajăt n-tădabit n-iji-net, 6ĕnta a hanăɣ-ikfăn turhajăt n-ad-numas inaxdimăn n-ărkăwăl n-tassaɣt ăynayăn wărăn ăshătăl făll-alămăr wa n-Mosa ănn-ak făll-tărna n-Unfas Šăddijăn: Alămăr, tamăttant Unfas, tămudre. 7Alămăr wa s-janneɣ dd-itiirĕwăn tamăttant s-ăgg-adĕm, ăzzăbbăt-t-dd Măssinăɣ făll-ănnăbi Mosa, iktab făll-isĕllam n-tihun. Ija dăɣ-s Măssinăɣ ălxurmăt ijan tihusay s-indăr wăla-dăɣ i-kăl-Iṣrayil ad-dăɣ-s ĕjĕn wăla-dăɣ hărăt n-ăssaɣăt ĕnḍărrăn n-akăyad făl tĕssĕba n-ănnur-i ăsmăɣmăɣăn făll-idĕm n-ănnăbi Mosa, uhĕn-dăɣ ănnur-en, wăr-ăhoja ăsimăɣmăɣ fălla-s. 8Kunta ălxurmăt n-ăssaɣăt-wen-dăɣ ĕnḍărrăn, ija tihusay ogdăhnen d-a-wen-dăɣ, ăb' ăṭṭăma n-tĕmɣăre n-tihusay ti ija ămašal wa dd-ăssawăḍ Unfas n-Măssinăɣ-i s-ĕnta ad-ăhaj. 9Ɣas, kunta, alămăr-wen-dăɣ, wărăn săr-năɣ dd-itiirĕw ar tamăttant, ila ălxurmăt ogdăhăn d-a-wen-dăɣ, ăb' ăṭṭăma n-tĕmɣăre n-ălxurmăt wa mad-ăj alămăr-i hanăɣ-itajjăn ăddinăt lanen idĕm dat-Măssinăɣ. 10A-wen-dăɣ făw a făl ălxurmăt-wen-dăɣ dd-ăzzarăn, ăba-hin ălxurmăt-net ed osă-dd-i t-iknan mijraw, 11făl-a-s, kunta a-wa t-illăn s-ilkam ad-t-iba, ila ălxurmăt ogdăhăn d-a-wen-dăɣ, ăb' ăṭṭăma n-ălxurmăt wa mad-ikrĕš a-wa s-ĕnta a iɣlalăn. 12Ăṭṭăma ogdăhăn d-wen-dăɣ a făll-năsifălla, a-wen-dăɣ a făl ozja ĕnniyăt-nănăɣ, 13wăr noleh d-ănnăbi Mosa-i s-ălwăqq wa d-fălla-s dd-ăsmăɣmăɣ ănnur n-Măssinăɣ, ăškănbăš-as i-ad-wăr hĕnnĕyăn kăl-Iṣrayil a-s asmăɣmăɣ wa ija idĕm-net, ifannăẓ-in s-a ĕnḍărrăn a ĕnḍărrăn. 14Ăsɣărăn kăl-Iṣrayil ulhawăn-năsăn, a-wen-dăɣ a făl har ašăl-i-dăɣ, ed ɣarrăn ĕlkĕttab wa n-ărkăwăl n-tassaɣt wa ărĕwăn, indar-asăn afăham-net ed olăh-asăn ĕlkĕttab-en d-a hasăn-ilsa hărăt, s-ĕmmĕk-wa-dăɣ s-ăškănbăš ănnăbi Mosa idĕm-net i-ad-wăr t-hĕnnĕyăn ăddinăt. Ămăra, a-wa ilsăn tiṭṭawen n-ăddinăt hasăn-igdălăn ujreh, wăr t-illa ujreh-net ar s-tartit d-Ălmasex. 15Ijmaḍ-t ăššăk a-s har ašăl-i-dăɣ, kud-ăɣrăn ĕlkĕttabăn wi iktăb ănnăbi Mosa-dăɣ, ad-tăn-asĕn, wăr hasăn-len ujreh ed, ilsa hărăt tiṭṭawen n-ulhawăn-năsăn, 16măšan ăddinăt wi ĕkfănen iman-năsăn i-Emăli, ăbas ăšikănbăš hărăt i-idmawăn-năsăn. 17Emăli, Unfas a ămoos, ere s-iha Unfas n-Emăli ulh-net, a-di, ijraw iman-net. 18Năkkăneḍ daɣ-i s-ămăra-dăɣ, ăbas ăšikănbăš hărăt i-idmawăn-nănăɣ, ere dăɣ-năɣ ikyădăn dăɣ, ad-inhĕy šund dăɣ-tiset ălxurmăt n-Emăli măšan, ilkam ad-tĕmmuttĕy talɣa-nănăɣ, ăkf'-anăɣ Unfas n-Emăli ălxurmăt ojărăn wa-dăɣ nĕjrăw ămăra-dăɣ.

will be added

X\