2 Kăl-Kurĕnta 2

1Ărheɣ dăɣ-iman-in, ad-wăr kăwăn-in-tilĕsăɣ uɣĕl i-ad-ăɣšĕdăɣ iman-năwăn 2ed kunta năkk-i-dăɣ a dd-iqqălăn ɣaššădăɣ-awăn iman, mi hi-e-isĕddĕwen? Kunta kăwăneḍ-i n-ĕssĕbab n-tedăwit-in, ăɣšădăɣ iman-năwăn, ĕndek ĕmmĕk wa s-hi-e-sĕddĕwem? 3A-wen-dăɣ făw a dd-orăwăn a-s ăssofăɣ ad-hawăn-in-ĕktĕbăɣ, uhĕn ad-kăwăn-in-ăkkăɣ năkk iman-in, ed ĕssanăɣ a-s afăl kăwăn-in-ĕkkeɣ s-ĕmmĕk-wa-dăɣ, ad-ăɣšĕdăn iman-in fălla-wăn ed ĕkkasăɣ ăššăk a-s tedăwit-in, a-s tedăwit-năwăn. 4Tăkarḍe-ta-dăɣ, kattăbăɣ-awăn-tăt-in măšan, ărmăsnăt-ahi tirĕmmaɣ, osas ulh-in, jeɣ tisnant ta n-imeṭṭawăn dăɣ-tĕssĕba-năwăn măšan hakd a-wen-dăɣ, akătab wa hawăn-jeɣ, wădden i n-ad-ăɣšĕdăɣ iman-năwăn, ănn-ak, i-ad-tĕlmĕdăm făll-tărha-i-dăɣ măqqărăt hawăn-jeɣ. 5Ămăra, ăwadĕm wa săr-wăn dd-ăwwăyăn uɣšad n-iman-wen-dăɣ, wădden năkk ɣas a-s iɣšăd hărăt, iɣšăd-awăn-t daɣ kăwăneḍ, ănn-ak, ănnăɣet: iɣšăd iman n-tĕššĕm-năwăn, măšan, wăr-ărheɣ ad-šĕššĕjreɣ măjrăd dăɣ-isălan n-a-wa iɣšăd. 6Ăwadĕm-en-hi, igdăh-as ămăra uḍlem-wen-dăɣ t-tăswăr tĕššĕm-năwăn, ed tăsmăqqăm fălla-s. 7Ămăra d-ămmujrăẓ a-wa ija, ătub, adiš, ăjăt-t-dd s-iman-năwăn, tĕnšĕm-as, sĕsmĕḍăm ulh-net i-ad-wăr t-năqq tămujriẓt tojărăt ta t-tărmăsăt s-tizarăt. 8Ǝttarăɣ dăɣ-wăn, ad-t-sĕknĕm tărha t-tăssiilmădăt a-s tăkkulăm dăɣ-s. 9Tăkarḍe ta hawăn-in-ĕktăbăɣ, ti s-kăwăn-tirĕmăɣ i-ad-ĕlmĕdăɣ ak făw tamašalăm a-wa hawăn-janneɣ meɣ. 10Ǝlmĕdăt a-s ere s-tĕnšăm-dăɣ, ĕnšeɣ-as. Ere daɣ wa s-ĕnšeeɣ, kunta ill'-e ere hi-iɣšadăn hărăt, ămiiɣatărăn s-ad-has-ănšăɣ, ilmĕdet a-s ĕnšeɣ-as-in dăɣ-tĕssĕba-năwăn, ĕnšeɣ-as daɣ dăɣ-tĕssĕba n-Ălmasex. 11Afăl nĕtajj a-wen, wăr săr-năɣ dd-mad-ijrĕw Iblis tašlĕlt s-hanăɣ-ikkărrăs ed tiddas-net, wăr hanăɣ-ĕdrejnăt. 12Ăzzăman wa d-ĕjjăšăɣ aɣrĕm wa n-Tărwas i-ad-dăɣ-s ăxṭĕbăɣ Ălĕnžil n-Ălmasex, oră-hi dăɣ-s Emăli emm hĕrĕwăn, issărɣăs-ahi iji n-isălan dăɣ-idăggan ăjjootnen 13măšan, hakd a-wen-dăɣ, wăr-insa ĕnniyăt-in, făl-a-s wăr dăɣ-s in-ogeẓăɣ Titus-i n-ă/n/na-năɣ dăɣ-ăddin, a-wen-dăɣ a făl fălăɣ ayĕtma dăɣ-ăddin wi t-ĕllănen dihen, okăyăɣ s-teje ta n-Masidunya. 14Tĕmmal i-Măssinăɣ-i ihakkăn ašăl făll-Iblis, dăɣ-ăddimmăt n-Ălmasex-i dăr-nosaɣ, ĕnta daɣ a hanăɣ-ikfăn turhajăt n-ad-nĕtajj isălan n-Ălĕnžil i-ăddinăt dăɣ-edăgg iket-net, isălan a-wen s-ašăl-i-dăɣ, jăn abɣănɣĕl wa tăjjăn aḍutăn ăẓednen. 15A-wen-dăɣ a făl năkkăneḍ-i ila Ălmasex, nămoos i-Măssinăɣ šund aḍutăn-win-dăɣ ăẓednen ikna tărha, a-wen-dăɣ daɣ a nămoos i-ăddinăt wi hănen tabarăt ta n-ĕlɣĕllas hakd wi hănen tabarăt ta n-ĕlhĕllak 16măšan ăddinăt wi hănen tabarăt ta n-ĕlhĕllak, aḍu wa hasăn-nămoos, erk aḍu dd-itiirĕwăn săr-săn tamăttant, a-s ija a-wen, ăddinăt wi iyyăḍnen, nămoos-asăn, aḍu ăẓedăn dd-itiirĕwăn săr-săn tămudre tăɣlalăt. Ăssiistănăɣ-kăwăn: mi s-ĕgdăhăn iman-net dăɣ-ălxidmăt ogdăhăn d-a-wen-dăɣ? 17Năkkăneḍ, wăr noleh d-ăddinăt wi iyyăḍnen jănen măjrăd n-Măssinăɣ mamăla s-ĕbbăɣărăn; Măssinăɣ a hanăɣ-ijăn dăɣ-a-wa hanăɣ-išlăn iket-net, a-wa hanăɣ-issăɣlăf daɣ, nĕtajj'-e s-ĕnniyăt šăddiijăn dat-Măssinăɣ dăɣ-tĕssĕba n-tassaɣt ta nĕja d-Ălmasex.

will be added

X\