2 Kăl-Kurĕnta 13

1Năkk-da-hi ăbokăn ămăra ad-săr-wăn-in-ăjăɣ asikĕl-in wa s-kăraḍ. Ere itĕggar uḍlem-dăɣ, ad-t-iwăr s-a-wa ĕnnănăt sănatăt meɣ kăraḍăt tijuhawen ed a-wen-dăɣ a iɣtăs ĕlkĕttab n-Măssinăɣ. 2A-s săr-wăn-in-jeɣ asikĕl-in wa s-ĕssin, ĕllăɣeɣ-awăn a-s ăddinăt wi ămešălnen abăkkaḍ hakd wi iyyăḍnen, ĕlmĕdnet a-s kud-dăɣ ujĕjăɣ-tăn ămăra-dăɣ, afăl hin-oseɣ, wăr hasăn-e-sĕlmăḍăɣ iman-in 3ed, wădden tĕnnăm tărham ad-sĕbbuyĕnăm kunta Ălmasex a-s ămoosăɣ enĕmmejrĕd-net meɣ. Sollanăt, išwar tĕkkasăm ăššăk dăɣ-a-wen. A-wa ĕkkăsăɣ ăxdamăɣ jere-wăn, ijmaḍ-t ăššăk a-s wădden Ălmasex ibrarăn a tĕnhăyăm, sĕjrăhăt ɣas dăɣ-ăṣṣahăt wa s-ihă ulhawăn-năwăn i-ad-tĕkkĕsăm ăššăk a-s tidĕt-dăɣ a-s ăṣṣohăt. 4Tidĕt a-s ibrar ašăl wa d-ătwăṣlăb făll-tajĕttewt măšan, tĕssĕnkăr-t-dd tărna n-Măssinăɣ jer-inĕmmuttan. Năkkăneḍ-i dăr-s osăɣnen, nĕbrar măšan, nohăr dăr-s tămudre ta tăṣṣohet ija s-tărna n-Măssinăɣ ta dd-e-tĕnfilĕlăt jere-wăn. 5Zĕjjĕzzăt ɣas iman-năwăn: ak ma dăr-ogdăh immun-năwăn? Ăqqĕlăt-in iman-năwăn, zĕjjĕzzĕm-tăn. Ak ajăn wăr hĕnnĕyăm a-s Ɣisa Ălmasex, izzaɣ dăɣ-ulhawăn-năwăn. Wăr-ăɣelăɣ han-kăwăn ăddinăt wăren ăddin, 6ija ɣur-i năkk a-s tĕssanăm a-s inĕmmušal n-tidĕt a nămoos, tĕnhayăm-t a-wen, 7nĕttar dăɣ-Măssinăɣ ad-tĕbḍĕwăm d-e d t-illăm a lăbasăn. Issan Măssinăɣ a-s wăr nărha făw, ad-kăwăn-nĕšĕhhĕššĕl s-tărĕḍḍawt n-a-wa nămoos, wăr nărha ɣas ar ad-kăwăn-išlĕw a-wa olăɣăn, kud-dăɣ wăr hanăɣ-tĕkfem tidĕt. 8A-wa ămoosăn tidĕt, wăr t-dd-nĕkka d-hărăt, wăr năddobăt ɣas ar tĕnna-net. 9Ăsidăwăt-anăɣ abror wa nĕja, igdăh ɣas a-s kăwăneḍ, tăṣṣohem, tittar-nănăɣ dăɣ-Măssinăɣ, ad-tumasăm meddĕn ĕmdanen, šăddijnen. 10Ǝnta-den-dăɣ ăddălil wa făl hawăn-in-ĕssĕktăbăɣ tăkarḍe-ta-dăɣ ašăl-i-dăɣ; derhan-in a-s, afăl kăwăn-in-oseɣ, udaɣ ad-kăwăn-săknăɣ eẓăwe wa ăddobeɣ ed, tădabit ta hi-ikfa Emăli, ti n-ad-kăwăn-sĕbdĕdăɣ, tĕṣṣuhum, wădden ti n-ad-kăwăn-siḍĕwăɣ. 11Ḍarăt-a-wen daɣ, ayĕtma-ɣ, dăwătăt, umasăt meddĕn ĕmdanen, išdajăt, nĕmsĕkkuyĕdăt jer-iman-năwăn, ĕṭṭĕfăt iyyăn n-ĕnniyăt, nĕmhirĕjăt dăɣ-ălxer i-ad-kăwăn-idhĕl Măssinăɣ-i dd-ijăn tărha d-ălxer. 12Nĕmĕjjăt jer-iman-năwăn tărha tĕmdat. Ăhuulăn-kăwăn-in imĕššeddĕjăn wi t-ĕllănen diha-dăɣ. 13Issĕnsă fălla-wăn Emăli Ɣisa Ălmasex ănnuɣmăt, ikf'-iwăn Abba tărha-net, osăɣ-kăwăn Unfas Šăddijăn iket-dăɣ-năwăn. Amin!

will be added

X\