2 Kăl-Kurĕnta 12

1Ayĕtma, ĕttĕkĕbru, ma t-ihan? Wăr t-illa! Ăyyăt-ahi ămăra ad-hawăn-ăjăɣ hărăt dăɣ-isălan n-a-wa ĕnhăyăɣ d-a-wa hi-dd-ăsnăfalăl Emăli. 2Ǝzzayăɣ ăhalĕs n-ălmăssexi immĕḍkălăn s-ašĕnna wa s-kăraḍ a ilan măraw iwĕtyan d-ĕkkoẓ. Ăhalĕs-en, wăr-ĕssenăɣ kunta ĕnta iman-net a osăn edăgg-en, meɣ anfilĕl a has-dd-ija a-wa inhăy, a-wen, Măssinăɣ a t-issanăn, 3ĕssanăɣ ɣas a-s ăhalĕs-en-dăɣ, osa ašĕnna wa s-kăraḍ, iqqăl-dd. Kunta ĕnta iman-net a t-osăn, meɣ Măssinăɣ a has-dd-ăsnăfalălăn a-wa inhăy, wăr t-ĕssenăɣ, Măssinăɣ a t-issanăn. 4Ăhalĕs-en-dăɣ, ălwăqq wa d-osa ălžănnăt, ašĕnna wa s-kăraḍ, islă i-isălan-i-dăɣ ăhuuskătnen s-wăr t-illa ăgg-adĕm ijrawăn s-asuɣĕl-năsăn făl tihusay-i-dăɣ jăn. 5Ăhalĕs šund wa-dăɣ, ăddoobeɣ ad-ăbbărăjăɣ dăɣ-isălan-net măšan, a-s tĕkkăsăm a-wen-dăɣ, wăr t-illa a dăɣ-e-ăbbărăjăɣ kunta wădden iba n-ăṣṣahăt-in. 6A-wen-dăɣ a făl kud-ărheɣ ad-ĕḍkĕlăɣ iman-in dăɣ, wăr hi-ija a-wen ere wărăn ijreh hărăt, wăr-ămoosăɣ enĕbbeddĕl ed a-wa he-ănnăɣ iket-net, a-s mad-t-tasĕm, tidĕt. Wăr tĕbĕrijăɣ ed wăr-ărheɣ ad-hi-iḍkĕḍ ăwadĕm ar s-a-wa jănneɣ d-a-wa tăjjăɣ. A-wa săl a-wen, mălayăɣna. 7Tinfilal-ti-dăɣ ăhuuskătnen s-hi-ikfa Emăli turhajăt n-ahănay-năsnăt, ăddoobătnăt ad-hi-sĕssĕffĕnnĕynăt măšan, i-ad-wăr tĕjjăɣ a-wen, ija dăɣ-i Măssinăɣ ălɣib hi-olăhăn d-asĕnnan ihan aḍăr n-ăwadĕm, ălɣib olăhăn d-tewete n-ănjălos n-Iblis i-ad-wăr sĕffĕnnĕyăɣ. 8Har kăraḍ ihăndăggan, tĕddalăɣ Emăli i-ad-hi-ibḍĕw d-ălɣib-wen-dăɣ, 9măšan, inn'-ahi: "Bulĕs, igdăh-ak ănnuɣmăt-in ed ɣur-i, dĕdi-dăɣ d-lămmeḍ ăwadĕm, ad-t-ikann ăṣṣahăt-in uḍĕf." A-wen-dăɣ a făl ăssoofăɣ, ĕbbărăjăɣ dăɣ-iba n-ăṣṣahăt-in i-ad-făll-i ikĕn Ălmasex asĕns n-tărna-net. 10A-wen-dăɣ a făl iba n-ăṣṣahăt hi-irmăsăn-dăɣ, jer-wa n-tirĕbbaḍ, wăla tissusen wăla wa n-ălɣizabăt wăla tirĕmmaɣ, a hi-irmăsăn-dăɣ dăɣ-tĕssĕba n-Ălmasex, ăsidăwăt-ahi ed dihen-dăɣ iman-net d-ĕbrarăɣ, ad-tumasăɣ emăṣṣehi. 11Ǝnhĕywăt! Kăwăneḍ a hi-ăšhăššălnen d-ad-hawăn-in-ăjăɣ măjrăd wa ităjj ere irmas iba n-tayĕtte; kăwăneḍ a-s ăniihăjja a-s timĕlăm-ahi dat-ăddinăt wi s-tordam a-s ojărăn-ahi tumast n-inĕmmušal. Ǝssanăɣ a-s wăr t-illa a ămoosăɣ măšan, wăr t-illa a-s hi-ufăn ăddinăt wi jăm inĕmmušal tăskakăm dăɣ-išĕnnawăn. 12Ămăra, ijităn wi satbatnen tumast n-ănămmašul, jăn jere-wăn: ĕššumorăt, ijităn n-Măssinăɣ, hărătăn ăssuksăḍnen, tikunen, ămešălăɣ a-wen-dăɣ iket-net jere-wăn. 13Lăɣătăt-ahi ɣas a jeɣ dăɣ-ălkănisăten ti iyyăḍnen wăr jeɣ ɣur-wăn săl wa n-a-s unjăyăɣ ad-hawăn-umasăɣ ăẓuk; kunta a-wen, ikm'-iwăn, adiš, ănšăt-ahi-dd. 14Ămăra, năkk da ăbokăn ad-săr-wăn-in-ăjăɣ asikĕl-in wa s-kăraḍ, măšan ĕlmĕdăt a-s wăr kăwăn-in-ĕkkeɣ i-ad-hi-tĕkfĕm hărăt ănn-ak, ĕkkeɣ-kăwăn-in ed tojărăm săr-i ehăre, a ămoos-dăɣ. Ajăn wădden abbatăn a-s ăniihăjja ad-ĕṭṭĕfăn tămudre i-aratăn-năsăn a ĕkkăn măḍrĕyăn wădden aratăn a iwar a-wen. 15S-iman wi-nin năkk, wăr t-illa a leɣ hawăn-ĕnkaẓăɣ ed diha t-ĕlleɣ, ăsidăwăɣ i-ad-kăwăn-ăkfăɣ wăla-dăɣ tămudre-nin. Ak, ajăn kăwăneḍ tărha ta măqqărăt hawăn-jeɣ, wăr săr-wăn dd-torew ar iba n-tărha-nin? 16Tĕssanăm a-s wăr kăwăn-iha făw ere ăddoben ad-ăjjăyh a-s kăla has-ămoosăɣ ăẓuk. Adiš, ma ăsihălăn iyyăḍ jannen: wa Bulĕs, imsăd, amsud daɣ ɣas a-s ikša ehăre-nănăɣ. 17Lăɣătăt-ahi ɣas dăɣ-meddĕn wi săr-wăn-in-ăšmašălăɣ i kăwăn-ikkan s-tăkkărzăzzăl i-ad-ăkš ehăre-năwăn? 18Năkk a ăsmătărăn Titus d-ad-kăwăn-in-akk ĕnta d-ă/n/na-ɣ dăɣ-ăddin wa s-hawăn-jeɣ isălan-net. Ak, ajăn a-s kăwăn-in-osăn, ĕkšăn ehăre-năwăn? Năkk hakd Titus, iyyăn n-ĕnniyăt a nĕṭṭăf jere-wăn, iyyăn n-emm a nohăr dăɣ-a-wa nămešăl iket-net. 19Tăkarḍe-ta-dăɣ, wăr hawăn-tăt-in-nĕkteb făl-a-s innin nărha ad-năkf iman-nănăɣ tidĕt. A-wa nĕnnă iket-net, Măssinăɣ a dat-tăn-nĕnnă dăɣ-tĕssĕba n-tassaɣt ta nĕja d-Ălmasex. Ayĕtma-ɣ, ittus n-măjrăd wa hawăn-in-jeɣ, i n-ad-tĕṣṣuhum dăɣ-immun-năwăn. 20Ăssiirmăɣ-ahi a-s afăl kăwăn-in-oseɣ, ad-kăwăn-in-asăɣ wăr hem ălxal wa dăr-kăwăn-ĕzzăyăɣ, ĕkrukĕḍăɣ; a-wen, ălmăɣna-net a-s ăssirmăɣ-ahi ad-kăwăn-in-asăɣ, ĕllan-t ikĕnnasăn d-tismiten d-akfor d-tărha n-anmijar d-mawmaw d-ĕhhulĕs d-asĕnnăxĕmbĕl n-ăddinăt jere-wăn. 21Ăssiirmăɣ-ahi a-s afăl kăwăn-in-oseɣ, ad-hi-isărĕs Măssinăɣ, isăkn'-ahi a-s han-kăwăn ăddinăt ăjjootnen s-har ămăra-dăɣ, wăr-ămmujrăẓăn a-wa jăn, utabăn; ad-hi-umas a-s šund iba a ĕṭṭafăɣ dăɣ-tĕssĕba n-iyyăḍ dăɣ-wăn s-har ămăra-dăɣ, ĕkfan iman-năsăn iba n-tĕšĕdje d-erk ălxal, d-asĕmmăḍĕs n-iman-năsăn.

will be added

X\