2 Kăl-Kurĕnta 11

1Ayĕtma, ĕṣbărăt ămăra hărăt n-iba n-tayĕtte hi-dd-ifalăn, ĕyya, ĕṣbărăt făll-i a ĕnḍărrăn 2făl-a-s, jeɣ-awăn tărha ta n-tismiten, tismiten daɣ s-Măssinăɣ a dd-falnăt. Ija ɣur-i a-s Ălmasex a dăr-kăwăn-ăsdobănăɣ i-ad-tumasăm šund tămutărt šăddijăt wărăt tĕzzey meddĕn s-wăr t-illa făw ălɣib tăt-iwarăn, ărheeɣ daɣ ad-tăqqaymĕm dăɣ-tĕšĕdje-ten-dăɣ. 3Măšan, ăssirmăɣ-ahi a-s, tassaɣt ta n-tidĕt jăm d-Ălmasex, ăbas dăɣ-s tĕjlayăm. Hannăyăɣ a-s tărham, ad-tĕšlĕyăm i-tabarăt s-ĕmmĕk wa s-has-tĕšlăy Xĕwwa-i tĕkkărrăs taššălt, tăšnămăšrăy-tăt. 4Ǝjrăhăɣ-in a-s afăl kăwăn-in-osa ere hawăn-ixaṭṭăbăn isălan n-Ɣisa wărăn oher hărăt d-a-wa hawăn-năxṭăb, meɣ ere hawăn-ijăn isălan n-unfas wărăn oher hărăt d-Unfas wa ihăn ulhawăn-năwăn, meɣ ere hawăn-ijăn isălan n-Ălĕnžil săl wi hawăn-nĕja, šik-dăɣ a-s hasăn-tirĕm timĕẓẓujen-năwăn, tĕyyĕm-t s-măjrăd. 5Ǝyya, ija ɣur-wăn a-s ăddinăt wi jăm inĕmmušal măqqornen, ojărăn-ahi tumast n-ănămmašul. Taẓidert! Wăr t-illa a-s hi-ojărăn. 6Tidĕt, ămmukkăn a-s ojărăn-ahi ăllifaẓ n-măjrăd măšan, dăɣ-isălan wi n-musnăt, ĕssanăɣ a-wa heɣ, nĕssĕkn'-awăn-t s-ălxalăn ăjjootnen, năsdăttăt-t data-wăn s-a-wa nĕnnă d-a-wa nĕjă. 7Tĕssanăm a-s ašăl wa ăzzarăn d-hawăn-năxṭăb isălan n-Ălĕnžil n-Măssinăɣ, bănnan a-s hawăn-t-năxṭăb meɣ ămmukkăn a-s a-wa jeɣ a-s hawăn-ăsrăsăɣ iman-in i-ad-timɣarăm kăwăneḍ, i lăbasăn; ak ajăn ălxer wa hawăn-jeɣ, iqqăl emănkăs? 8Ǝgleɣ făw har ălkănisăten tiyyăḍ a hi-ĕdhălnen dăɣ-ălxidmăt wa jeɣ jere-wăn, ĕfnăẓăɣ-tănăt i-ad-kăwăn-siwĕḍăɣ kăwăneḍ. 9A-wa ĕkkăsăɣ ĕlleɣ jere-wăn, tidĕt-dăɣ a-s ămɣatărăɣ măšan, wăr t-illa ere s-kăla has-ămoosăɣ ăẓuk, wăr-ărheɣ daɣ ad-t-umasăɣ i-ăwadĕm wăl' iyyăn ašăl-i-dăɣ wăla ašĕkka. Tĕssanăm a-s ayĕtma dăɣ-ăddin dd-falnen Masidunya a hi-ĕdhălnen ăzzăman-wen-dăɣ. 10Ašăl-i, ĕnta-den-dăɣ abăraj-in, wăr t-illa ere s-ĕkšeɣ ehăre-net. A-wen ăddoobeɣ ad-dăɣ-s ăbbărăjăɣ dăɣ-ăkall wa n-Akaya iket-dăɣ-net. A-wen, tăsiidăttăt-t tidĕt ta n-Ălmasex hi-hăt. 11Ma hi-ăswănnăn a-wen-dăɣ? Ak iba n-tărha-năwăn? Ăbo, Măssinăɣ a issanăn a-s ărheeɣ-kăwăn. 12A-wa jeɣ jere-wăn, ad-t-alĕsăɣ iji. Dihen, ăddinăt wi tabărajnen a-s wăr dăr-săn nĕẓley, ad-ĕnmĕnhĕyăn d-iman-năsăn ed, wăr mad-ĕjrĕwăn fălla-năɣ ălɣib s-hanăɣ-ăkkulmen. 13Ăddinăt-win-dăɣ, inĕmmušal n-bahu a ămoosăn, erk inaxdimăn ăssiijbărnen tumast n-inĕmmušal n-Ălmasex s-bahu ɣas. 14A-wen, wăr-iqqen eɣăf ed Iblis iman-net dehiyyăn itajj-dd iman-net dat-ăddinăt ălmăt ănjălos n-ănnur ăwwayăn tidĕt, 15wăr-iqqen adiš eɣăf kunta inaxdimăn-net, sajbarăn tumast n-inaxdimăn oɣadnen dat-Măssinăɣ; ajilal-năsăn, imojjan-năsăn. 16Ǝnneɣ-awăn hărwa a-s wăr-iteɣalet ăwadĕm, irmas-ahi iba n-tayĕtte măšan, kud-dăɣ ija ɣur-wăn a-s a-wen-dăɣ a ijan, săjdăt-ahi, tĕyyĕm-ahi ad-ăbbărăjăɣ a n-bănnan. 17Măjrăd wa hawăn-in-tajjăɣ ămăra-dăɣ, wădden măjrăd ija Emăli dăɣ-emm-in, ănn-ak, măjrăd šund wa he-ăj ere irmas iba n-tayĕtte a hawăn-in-tajjăɣ. 18Ǝllan-t ăddinăt ăjjootnen tabărajnen s-a-wăr ih' ălfăyda, ăyyăt-ahi năkk-dăɣ, ad-ăbbărăjăɣ a n-bănnan. 19Tĕjraw-ahi tăkunt-năwăn! Kăwăneḍ-i ĕnnănen lam tayĕtte, šik-dăɣ a-s riḍḍum s-a-wa hawăn-jannen ăddinăt wi irmăs iba n-tayĕtte kăwăn-in-tisĕnen. 20Tănnuflăyăm dăɣ-ĕkkĕlu-hasăn, ĕntăneḍ-i kăwăn-tihăɣnen, samăḍrayăn-kăwăn, ĕlkăhăn-kăwăn, sattăɣăn-awăn dat-ăddinăt. 21Jan-awăn tanhaḍt, ed năkkăneḍ, nĕkkas-awăn ăṣṣahăt dăɣ-iman-nănăɣ, wăr nĕhel ad-hawăn-năj šund a-wen. Măjrăd n-ere irmas iba n-tayĕtte a hawăn-tajjăɣ i-ad-kăwăn-sĕlmĕdăɣ a-s ăddoobeɣ năkk-dăɣ ĕhhulĕs-wen-dăɣ. 22Kunta ăddinăt wi kăwăn-takărrasnen ĕnnăn ĕntăneḍ Ɣăbranităn a ămoosăn, ămoosăɣ-t năkk-dăɣ, kunta dăgg-Iṣrayil a ămoosăn, ămoosăɣ-t năkk-dăɣ, kunta ihăyawăn n-Ibrahim a ămoosăn, ămoosăɣ-t năkk-dăɣ. 23Kunta inĕmmušal n-Ălmasex a ămoosăn, ămoosăɣ-t, ojărăɣ-tăn daɣ tumast-net. Ăyyăt-ahi ămăra ed edăwănne n-ere s-ăba eɣăf-net a hawăn-tajjăɣ. Ăddinăt wi tordăm hărăt, kunta tiluyyaɣ, ojărăɣ-asăn-tănăt; kunta tikărmuten, ojărăɣ-tăn ahănay-năsnăt; wăr tăn-iha-i inhayăn tiwit ti ĕnhăyăɣ, wăr tăn-iha-i ijjašăn miši wa ĕjjăšăɣ. Dăɣ-idăggan ăjjootnen, ĕjjăšăɣ miši-wa-dăɣ făl dăroɣ hin-ăssijjăɣ. 24Sĕmmos ihăndăggan, salalăn-ahi kăl-Ălyăhud tiwit ti n-kăraḍăt timĕrwen d-tĕẓẓa wăr dd-išărrĕy ăwadĕm. 25Har kăraḍ ihăndăggan, hakkăn-ahi kăl-Roma tiwit s-ebărtăk wa sĕmmăn, kăla hi-ĕkfăn ăddinăt sămmăjori n-tihun, har kăraḍ ihăndăggan ɣaššăd turăft n-aman ta heɣ făll-ejărew wa sĕmmăn, okăy făll-i ehăḍ d-ašăl heɣ ammas n-aman. 26Ăssekălăɣ făll-iḍarăn s-iɣărman ăjjootnen, dehiyyăn a ĕnḍărrăn ɣas a hin-ăqqiimăn, ĕkšĕn-ahi aman, dehiyyăn inaɣtafăn a făll-i oḍănen, dehiyyăn ăddinăt-wi-dăɣ n-tumast-in, dehiyyăn inĕẓẓulam a făll-i oḍănen i-ad-hi-ănɣĕn. Wăr t-illa aɣăna wăr-ĕnheyăɣ dăɣ-iɣărman wăla dăɣ-tinariwen wăla făll-ijĕrwan, hakd-dăɣ miši wa săr-i dd-tirĕwăn wi jannănen s-bahu a-s ălmăssexităn a ămoosăn. 27Wăr t-illa alĕḍḍeš wăr-ĕnheyăɣ, ĕnhăyăɣ aɣăna, jăn-ahi ihăḍan n-iba n-eḍĕs, jeɣ išilan n-laẓ d-fad, itikĕy făll-i ăzzăman d-wăr jĕrrĕwăɣ a ĕkšeɣ, ăskăbăybăy-ahi esămeḍ, ɣălulăɣ. 28Ill'-e a ăjjeen s-ăddobeɣ tĕnna-net măšan, ufa ad-susĕmăɣ kud-dăɣ a-wen-dăɣ iket-net, irn'-e săr-i a-wa s-hak ašăl-dăɣ, ĕjrawăn-ahi inĕzjam n-ălkănisăten. 29Amumĕn irmăs hărăt-dăɣ, ad-ăjăɣ adăgaẓ-wa-dăɣ s-šund năkk a irmăs a-wa t-irmăsăn, afăl ĕsleɣ-i dăɣ-săn oḍan dăɣ-tanmĕšrayt, ad-ărɣ ulh-in dăɣ-tĕssĕba-net. 30Năkk, kunta ill'-e a tajjăɣ abăraj, wăr t-illa a ămoos kunta wădden iba n-ăṣṣahăt-in. 31Măssinăɣ-i n-Abba n-Emăli Ɣisa-i ănihăjjăn d-tĕmmal hărkuk a ăjjĕyhăn a-s tidĕt a janneɣ. 32Ašăl iyyăn d-heɣ aɣrĕm wa n-Dămašăq, issĕbdăd gĕfăr, wa ăsmănakăl Aritas-i n-ămănokal n-ăkall, ejhăn n-ălgomităn dăɣ-imawăn n-aɣrĕm iket-net i-ad-hi-ăɣtĕfăn, sĕttărmĕsăn-ahi 33măšan, jăn-ahi imumĕnăn wi t-ĕllănen dihen dăɣ-deke hĕrĕwăn, ăstărarăn-ahi s-fĕnetăr ihan aɣălla wa făll-idăy aɣrĕm, ĕmmĕk-wen-dăɣ a dăɣ-ĕzjărăɣ aɣrĕm, ăɣlăsăɣ dăɣ-ăššar n-gĕfăr.

will be added

X\