2 Kăl-Kurĕnta 10

1Ayĕtma-ɣ, năkk Bulĕs, ĕnnăn dăɣ-wăn iyyăḍ e-d t-ĕlleɣ ɣur-wăn, ad-sĕrĕsăɣ iman-in; e-d kăwăn-ujĕjăɣ, ad-ĕhhulĕsăɣ. Ămăra, hărăt iyyăn a dăɣ-wăn ărheɣ dăɣ-idĕm n-tăẓude d-milɣaw-i ija Ălmasex: 2wăr hi-tăšhăššălăm ad-kăwăn-in-ăkkăɣ sĕlmĕdăɣ-kăwăn a-s hălăɣ. Ăddinăt wi ordanen a-s a-wa hanăɣ-išlăn, a dd-nĕkkas ɣas dăɣ-iɣăfawăn-nănăɣ, ĕlmĕdnet a-s afăl-tăn-in-oseɣ, wăr tăn-e-ăyyăɣ s-ăkall, ad-tăn-sĕlmĕdăɣ a-wa ămoosăɣ. 3Tidĕt a-s dăgg-adĕm ɣas a nămoos măšan, itbat a-s anmănɣ wa nĕha, wăr t-nĕha s-imutaj dd-tĕkna tayĕtte n-ăgg-adĕm, 4ed tăẓoli ta s-nĕknăs, wădden a dd-ikna ăgg-adĕm, Măssinăɣ a hanăɣ-tăt-dd-iknăn i-ad-nĕknĕs s-ăṣṣahăt wa-net, nudabăt terăẓẓe n-iɣallan wi ăṣṣohătnen idăy Iblis, 5nĕsibĕggut ĕttĕkĕbru wa sabdadăn dăgg-adĕm i-ad-ĕgdĕlăn i-ăddinăt muzĕyăt n-Măssinăɣ. Nĕtattăr ad-ănnăhăḍ Măssinăɣ dăɣ-ĕnniyăt n-hak ăgg-adĕm i-ad-ămašăl erhet n-Ălmasex. 6Afăl itbăt a-s kăwăneḍ, tĕmdam-dd dăɣ-amišĕl n-a-wen-dăɣ, ijmaḍ-t ăššăk a-s ăddinăt wi wăren tĕmišil a-wen, ad-ĕnmĕnhĕyăn d-iman-năsăn. 7Sĕjrăhăt dăɣ-tidĕt, wăr tĕḍkelăm ăwadĕm wăl' iyyăn s-a-wa fălla-s hannăyăm, kunta ih'-iwăn ere iflasăn s-tĕla ta t-ija Ălmasex, adiš, ilmĕdet ɣur-iman-net a-s, ĕmmĕk wa s-t-ila Ălmasex, a-s hanăɣ-ila năkkăneḍ-dăɣ 8ed ălxikmăt wa hanăɣ-ikfă Emăli, ikf'-anăɣ-t i-ad-nĕṣṣuhĕt, wădden i-ad-nĕhĕl ider, a-wen-dăɣ a făl a-wa făl tabărajăɣ, wăr hi-ămoos tăkrakiḍt ed Emăli, a dd-ifal. 9Wăr teɣalăt a-s dăɣ-tikarḍiwen-in, wăr tĕttărăɣ ɣas ar asărmaɣ-năwăn; 10ĕsleɣ a-s ĕnnăn iyyăḍ dăɣ-wăn: wa Bulĕs, tikarḍiwen-net ɣas a dăɣ-ihăl, isimăqqĕw fălla-năɣ măšan, e-d t-illa jere-năɣ, ad-t-izjăr aḍu, iqqĕl ăkall. 11Ăddinăt wi jănnănen a-wen, ĕlmĕdnet a-s afăl tăn-in-nosa, ad-tăn-nĕsĕlmĕd a-s a-wa-dăɣ nĕkattăb dăɣ-tikarḍiwen-nănăɣ e-d t-nĕlla ɣur-wăn, ĕnta daɣ a nĕtamašal jere-wăn. 12Ăddinăt-en jănen iman-năsăn hărăt, ijmaḍ-t ăššăk a-s wăr nĕtĕttăr ad-nĕḍkĕl wăla ad-nĕsĕnnĕfăqq iman-nănăɣ dăr-săn, ămoosăn ăddinăt wăr-išla ar utăr n-asĕgdah n-iman-năsăn jer-iman-năsăn, irmas-tăn iba n-tayĕtte. 13Năkkăneḍ, wăr nĕḍĕkkĕl iman-nănăɣ s-ĕmmĕk-wen-dăɣ, wăr nĕtĕjj a săl a-wa s-hanăɣ-ikfa Măssinăɣ turhajăt n-iji-net, ĕnta daɣ a hanăɣ-ijrăwăn s-ad-kăwăn-in-năkk. 14Ašăl daɣ wa d-kăwăn-in-nosa năwway-awăn Ălĕnžil, wăr nĕja jere-wăn a-s wădden Măssinăɣ a hanăɣ-ikfăn turhajăt-net. Tĕssanăm daɣ a-s năkkăneḍ a săr-wăn-in-ăzzarăn i-ad-hawăn-năj isălan n-Ălĕnžil n-Ălmasex. 15Ămăra, wăr nĕtĕbărij s-a wărăn ămmukkăn ija ăwadĕm iyyăn data-năɣ. Dăɣ-a-wa nĕkkăs năxdam jere-wăn, wăr năxdem făll-a ăssinta ăgg-adĕm. Ḍarăt-a-wen daɣ, nĕjar ăṭṭăma n-a-s afăl măqqăr immun-năwăn s-Măssinăɣ, ad-timɣar daɣ tăkost ta nĕla jere-wăn dăɣ-a-s nogaẓ tăkost ta hanăɣ-issăɣlăf Măssinăɣ. 16Dihen, ad-nudabăt axăṭab n-Ălĕnžil dăɣ-tajiwen ti hawăn-in-ĕllanen, wăr nărha făw, ad-nĕḍĕs edăgg iḍas ăwadĕm data-năɣ i-ad-wăr nĕbbărăj făll-a ija ăwadĕm iyyăn data-năɣ. 17Ere itabărajăn dăɣ, ăbbărăjet dăɣ-a-wa ija Emăli. 18Tĕssĕba n-a-wen-dăɣ a făl innă ĕlkĕttab n-Măssinăɣ: "Abăraj wa ijă ăwadĕm i-iman-net, uf'-e wa has-ijă Măssinăɣ."

will be added

X\