2 Kăl-Kurĕnta 1

1A-wa năkk, Bulĕs, wa ija Ɣisa Ălmasex ănămmašul dăɣ-erhet n-Măssinăɣ hin-iktabăn năkk d-Timoti wa n-ă/n/na-năɣ dăɣ-ăddin i-ălkănisăt n-Măssinăɣ ta hăt aɣrĕm wa n-Kurĕnta. Năhuul-kăwăn-in, năhuul-in daɣ imĕššeddĕjăn wi ĕzzăɣnen ăkall wa n-Akaya, 2ikf'-iwăn Măssinăɣ-i n-Abba-nănăɣ d-Emăli Ɣisa Ălmasex ănnuɣmăt d-ălxer. 3Năkfet Măssinăɣ-i n-Abba n-Emăli-nănăɣ Ɣisa Ălmasex semɣar, namĕlet-t ĕnta-i n-măssi-s n-tăhanint, isasmaḍăn ulhawăn-nănăɣ dăɣ-tersĕmmawen ti hanăɣ-rammăsnen, 4i-ad-nudabăt năkkăneḍ-dăɣ, asĕsmaḍ n-ulhawăn n-ăddinăt wi tărmas tisnant, arĕw-dd săr-săn a-wen-dăɣ, tălawit n-ulh tolăhăt d-ta hanăɣ-ikfa Măssinăɣ. 5Ǝmmĕk-wa-dăɣ s-a ăjjeen dăɣ-a-wa hanăɣ-irammăsăn, irammăs-anăɣ dăɣ-tĕssĕba n-a-wa s-hanăɣ-ila Ălmasex, ĕmmĕk-wen-dăɣ daɣ a-s ikann Măssinăɣ asĕsmaḍ n-ulhawăn-nănăɣ dăɣ-tĕssĕba n-tassaɣt ta nĕja d-Ălmasex. 6A-wen-dăɣ a făl a-wa hanăɣ-irammăsăn năkkăneḍ dăɣ-tisnant, wăr-ămoos ɣas ar a săr-wăn dd-oraw Măssinăɣ i-ad-ismaḍăn ulhawăn-năwăn, tăɣlĕsăm. Ăṣṣahăt daɣ wa hanăɣ-ihakk Măssinăɣ, i n-ad-kăwăn-nĕdhĕl kăwăneḍ-dăɣ i-ad-tudabem ăṣṣăbarăt dăɣ-a-wa hanăɣ-irmăsăn s-ašăl-i-dăɣ, irmas-kăwăn kăwăneḍ-dăɣ. 7Nĕkkas ăššăk dăɣ-isălan-năwăn ed, nĕflas a-s a-wa hanăɣ-irmăsăn dăɣ-tisnant šund ɣas kăwăneḍ a irmăs, a-wa nĕjrăw daɣ năkkăneḍ dăɣ-tălawit, nohar-t dăr-wăn. 8Ayĕtma! Ǝlmĕdăt a-s ăkall wa n-Azya, nĕnhay dăɣ-s ălɣizabăt ăssuksăḍăn, iẓbăb-anăɣ dăɣ-s a hanăɣ-irnan hăr năɣel făw a-s sămdo-nănăɣ, osă-dd. 9Nĕkkăs ăṭṭăma dăɣ-iman-nănăɣ šund ɣas a-s tamăttant a hanăɣ-tătiwăɣtăsăt măšan, a-wen, otăs-t Măssinăɣ i-ad-umas a-s fella-nănăɣ ĕnta, wădden iman-nănăɣ, ed Măssinăɣ, ila tărna n-ad-dd-isĕnkăr inĕmmuttan; 10ĕnta a hanăɣ-dd-intăšăn dăɣ-tamăttant-ten-dăɣ tăssuksăḍăt, ĕnnăr wădden a-wen, ăru d-nĕssĕmda. Nĕflas daɣ a-s ĕnta ɣas a hanăɣ-e-agĕẓăn dăɣ-e d t-illăm ăššar. 11Nĕssan a-s tĕdhalăm-anăɣ s-tittar-năwăn, ĕdhalăn-anăɣ daɣ ăddinăt ăjjootnen hanăɣ-tĕddalnen Măssinăɣ, tittar-năwăn iket-dăɣ-năwăn, a săr-năɣ-dd-orăwnen ănnuɣmăt n-Măssinăɣ, ămoos a-wen-dăɣ ĕssĕbab wa făl tiimĕlĕn ăddinăt ăjjootnen tihusay n-Măssinăɣ, dăɣ-tĕssĕba n-a-wa hanăɣ-ija. 12Kunta ill'-e a-s năddoobăt ad-săr-s năbbărăj, wăr t-illa a ămoos kunta wădden a-s wăr t-illa a dăɣ-nĕššak iman-nănăɣ, tajuhe-ten-dăɣ a hanăɣ-salmadăt a-s a-wa nĕjă dăɣ-ăddunya hakd a-wa nĕjă jere-wăn iket-net, oɣad. A-wen wădden a dd-ifalăn sărho-nănăɣ, Măssinăɣ a t-ijăn dăɣ-ănnuɣmăt-net, ĕnta-i hanăɣ-ikfăn turhajăt n-iji n-a-wen s-ălxal răqqiisăn dăɣ-iman šăddijnen d-tidĕt. 13Nărha ad-tĕssanăm a-s dăɣ-tikarḍiwen-nănăɣ, a-wa ilăn ujreh s-ĕnta a ɣarrăm ɣas a dăɣ-hawăn-năssewăl, wăr hawăn-năssewăl dăɣ-a săl a-wen-dăɣ, ĕflasăɣ daɣ a-s, ad-iwwaḍ hărăt făll-ujreh-năwăn dăɣ-isălan-win-dăɣ. 14Ămăra, wădden hărăt iket-net a săr-wăn ilan ujreh; a-wen-dăɣ a făl ašăl-i-dăɣ, nămoos abăraj-năwăn, mašăn afăl dd-osa ašăl wa issĕbdăd Emăli-nănăɣ Ɣisa, ašăl-wen, kăwăneḍ a he-umasnen abăraj-nănăɣ. 15Tĕssĕba n-taflĕst-ten-dăɣ hawăn-jeɣ a făl hi-dd-ijjăš s-tizarăt derhan n-ad-kăwăn-in ăkkăɣ i-ad-tumas tedăwit-năwăn, tedăwit tĕmdat, 16ed dăɣ-derhan-in, ăɣelăɣ ad-kăwăn-in-ĕmmărăɣ tĕzzar, akĕyăɣ s-teje ta n-Masidunya, alĕsăɣ-kăwăn-dd daɣ umăr afăl tăt-dd-fălăɣ i-ad-hi-tarĕjăm dăɣ-asikĕl-in s-teje ta n-Ălyăhudĕyăt. 17Kunta a-wa ăsdărhănăɣ, wăr-ija, ajăn, ija ɣur-wăn a-s, wăr-ĕjleyăɣ dăɣ-a-wa hawăn-ĕnneɣ? Meɣ ajăn tordam a-s derhan-in, a dd-ĕkkasăɣ ɣas dăɣ-eɣăf-in šund a-wa tăjjăn dăgg-adĕm s-ad-hak-ănn iyyăn: Ǝyya, iglĕw, iqqĕl-kăy-dd a ĕnḍărrăn ḍarăt-a-wen, ănn-ak: Ăbo? 18Măssinăɣ a hi-ăjjĕyhăn dăɣ-a-wa hawăn-nĕjanna, wăr kăla hawăn-nĕssărtăy tidĕt d-bahu. 19A-wen, janneɣ-awăn-t făl-a-s Ɣisa Ălmasex-i n-Rure-s n-Măssinăɣ-i s-hawăn-nĕtajj isălan-net năkk d-Sillas d-Timoti, wăr ămtălla ĕyya-net d-ăbo-net, tidĕt ɣas a ijanna. 20Ǝnta-en-dăɣ, a dăɣ-ăsdăttăt Măssinăɣ a-wa s-ija ărkăwăl-net, a-wen-dăɣ a făl, a nĕttăr dăɣ-Măssinăɣ-dăɣ, isĕm-net a dăɣ-nĕjanna: "A|scMIN|d", i-ad-itwĕsĕmɣăr Măssinăɣ dăɣ-tĕssĕba-net. 21Măssinăɣ iman-net a hanăɣ-osăɣăn s-ăṣṣahăt dăr-wăn d-Ălmasex-i hanăɣ-ijăn inĕmmušal-net ašăl wa d-hanăɣ-ăsnăfrăn. 22Ǝnta daɣ a hanăɣ-iššĕšwălăn s-ešwăl šund wa ităjj ăwadĕm i-tĕla-net, ija daɣ Unfas-net dăɣ-ulhawăn-nănăɣ i-ad-itbat a-s ĕnta a hanăɣ-ilăn, nĕkkĕs ăššăk dăɣ-marušăt wa hanăɣ-itwăr s-ilkam ad-hanăɣ-t-ăkf. 23Măssinăɣ a hi-ăjjĕyhăn wădden ăgg-adĕm, inɣ'-ahi daɣ kunta bahu a hawăn-janneɣ, wăr t-illa a hi-ikkasăn ad-kăwăn-in-ăkkăɣ dăɣ-Kurĕnta ar iba n-tărha n-ad-ănxĕsăɣ iman-năwăn, 24făl-a-s, dăɣ-isălan wi n-immun, wăr-iha ĕnniyăt-nănăɣ ad-fălla-wăn nĕfrăḍ a-wa wăla a-wa, ed nĕkkas ăššăk a-s immun-năwăn, itbat, ănn-ak, a-wa hanăɣ-išlăn, išl'-anăɣ făl-a-s innin, nărh'-awăn ălxer.

will be added

X\