1 Ălmăssexităn wi ăkkilătnen i-ăwadĕm, iwar-tăn s-ad-ĕknan asĕmɣar n-mĕssaw-săn. Afăl jăn a-wen, wăr mad-isĕkkufăr ăwadĕm isĕm n-Măssinăɣ, wăr mad-aẓĕmăn daɣ ăddinăt a-wa kăwăn-nĕsaɣra. 2 Wi s-măssi-săn ălmăssexităn a ămoosăn, udaɣ ad-unjĕyăn s-asĕmɣar-năsăn făl-a-s innin oharăn dăr-săn ămăra temiḍt ta n-tassaɣt d-Ɣisa Ălmasex, iwar-tăn s-ad-tajjăn s-ĕnniyăt ălxidmăt wa dăɣ-tăn-jăn mĕssaw-săn ed wi tăn-ăssiixdămnen, imumĕnăn irha Măssinăɣ a ămoosăn. 3 Ǝnta-den-dăɣ a-wa s-leed s-ad-t-saɣred ăddinăt, samătarăd-tăn dăr-s. Ǝllan-t ăddinăt saɣranen bahu wărăn oher hărăt d-tidĕt n-măjrăd n-Emăli-nănăɣ Ɣisa Ălmasex, wăr ĕlkemăn daɣ i-asĕɣăr wa ăddewăn d-ăddin-nănăɣ, 4 ăddinăt-en, ăsidărɣălăn-tăn ibărajăn. Ălžuhal tăssiirhăn tărha n-tamădašt d-amšĕkki n-măjrăd a ămoosăn. Ǝnta-den-dăɣ a-wa dd-itiirĕwăn tismiten d-imšĕwĕllităn d-tĕkkufăra d-tordawen lăbasnen, 5 d-tamădašt wărăt mĕddĕw jer-ăddinăt s-tĕfraɣ tayĕtte-năsăn. Wăr-ĕssenăn tidĕt, jan ăddin ăsaru s-ĕbbăɣărăn. 6 Tidĕt lab a-s uḍĕf n-ăddin itirĕw-dd s-ăwadĕm ărrĕzăɣ măqqoorăn afăl wăr-ăẓoẓ a-wa t-ikfă Măssinăɣ; 7 wăr t-illa a dd-năwway a-s dd-nĕjjăš ăddunya-ta-dăɣ, wăr t-illa daɣ a-s năddobăt aggay-net ašăl wa d-tăt-nĕjammăḍ. 8 A-wen-dăɣ a făl, kunta nĕla a nĕkša d-a nĕlsa, igdăh-anăɣ a-wen-dăɣ. 9 Ăddinăt wi wăren ĕrha ar ad-ăbbăɣărăn, ad-ĕtwirĕmăn s-a ăjjeen, irmĕs-tăn Iblis s-tănḍărbat n-derhanăn ăjjootnen lăbasnen dăɣ-wăr-itiḍĕw ar emeskel. Wăr t-illa a săr-săn dd-išašray a-wen-dăɣ kunta wădden săbxas d-ĕlhĕllak. 10 Tărha n-aẓrĕf tokăyăt ămaku, sajraw hărăt ed, ĕnta a-s ekew n-e d t-illăm ălmăṣṣibăt, oḍăn dăɣ-s ăddinăt ăjjootnen, ănmăšrăyăn i-immun, orăwăn-dd s-iman-năsăn tidij n-tersĕmmawen ăjjootnen. 11 Ămăra, Timoti, kăyy-i n-u-Măssinăɣ a-s ămmijrădăɣ: jawăḍ i-hărătăn-win-dăɣ, ĕmmăɣ i-uḍĕf n-ăddin d-immun d-taẓidert, udaɣ i-a-wa kăy-ĕssăɣrăɣ iket-net, ĕbḍĕw iman-năk d-a-wa lăbasăn. Ǝttăr iqqud d-ălɣădalăt dăɣ-tuksĕḍa n-Măssinăɣ, ĕṭṭĕf immun d-tărha d-tumast n-ăwadĕm ăẓedăn. 12 Ǝknĕs amjăr wa ufăn dăɣ-imjărăn ihălăn ebre n-ăddin i-ad-tĕjrĕwăd tămudre ta tăɣlălăt s-kăy-dd-iɣră Măssinăɣ. Ăj isălan-win-dăɣ kăyy-dăɣ i-ad-sĕtbĕtăd immun dat-tijuhawen ăjjootnen. 13 Ămăra, ĕfraḍăɣ fălla-k dat-Măssinăɣ-i ihakkăn tămudre i-hărăt iket-net d-Ɣisa Ălmasex-i ăjjĕyhăn dăɣ-isălan n-tihusay n-a-wa ămoos dat-gĕfăr, Bunĕs Bilatĕs. 14 Agĕẓ iman-năk dăɣ-ălɣib iket-net d-a xăramăn iket-net, ĕṭṭĕf iman-năk dăɣ-tĕšĕdje hărkuk i-ad-togaẓăd a-wa fălla-k ifrăḍ Măssinăɣ har ašăl wa dăɣ-dd-mad-infilĕl Ămănokal-nănăɣ Ɣisa Ălmasex. 15 Ašăl-en, ad-hanăɣ-t dd-isuɣĕl Măssinăɣ-i t-illăn jĕnnĕj hărăt iket-net, ĕnta-i ɣur-t-tĕlla tănoflayt ta n-tidĕt, ĕnta-i n-Emăli n-imănokalăn, ĕnta-i n-Emăli n-imălan, 16 ĕnta ɣas a iɣlalăn, wăr fălla-s la tamăttant tărna, izzaɣ dăɣ-ănnur s-wăr hanăɣ-t-illa ăggaḍ-net făl tĕmɣăre d-tihusay-net, wăr t-illa ere s-kăla t-inhăy, wăr-ilkem daɣ ere ăddoben ahănay-net; umaset semɣar d-tărna, i n-Măssinăɣ hărkuk. Amin! 17 Ămăra, ănn i-imărrĕzăɣăn n-ăddunya-ta-dăɣ, ad-ĕjĕn ĕnniyăt, wăr ḍăkkălnet iman-năsăn, wăr tăjjănet fella-năsăn dăɣ-ărrĕzăɣ-năsăn ed a ijăn-dăɣ, ilkam ad-imdĕw, ănn-ak, ĕjĕnet ăṭṭăma-năsăn dăɣ-Măssinăɣ-i hanăɣ-ihakkăn hărăt iket-net s-tănoflayt i-tănoflayt-nănăɣ. 18 Ănn'-asăn, ad-ĕjĕn imărkedăn i-ad-ărzăɣăn dăɣ-imărkedăn, uẓannet d-ăddinăt wi iyyăḍnen tĕla-năsăn, ĕjĕnet isuf janen s-ulh irḍan s-a-wen. 19 Afăl jăn a-wen, ad-ĕtwărăn i-iman-năsăn dăɣ-ăddunya ta dd-malăt ărrĕzăɣ n-imărkedăn, ĕjrĕwăn daɣ tămudre ta n-tidĕt tăɣlălăt. 20 Ya Timoti, ĕkĕn uḍĕf n-a-wa kăy-issăɣlăf Măssinăɣ, ĕšlĕy i-imĕjridăn wi ĕglănen făll-iba n-ăddin, ĕbḍĕw d-anmĕntaš n-măjrăd d-ăddinăt wi s-ălmăt ĕssanăn, a-s ija a-wen, wăr t-illa a ĕssanăn. 21 Ăddinăt iyyăḍ, ija ɣur-săn a-s ăzizăbben musnăt, ere tĕnhăyăd ija a-wen, a-di, ăbas ohar hărăt d-immun. Ăhuulăɣ-kăwăn-in, oyyeɣ-kăwăn d-ănnuɣmăt n-Măssinăɣ. Amin!
