1 Timoti 5

1Timoti! Wăr tăsnărɣămăd făll-ere wăššărăn, ănn-ak, ăj'-as măjrăd šund wa mad-tĕjĕd i-abba-năk. Imawaḍăn ĕntăneḍ, ăj'-asăn măjrăd wa mad-tĕjĕd i-ayĕtma-k, 2tĕjĕd i-timɣaren măjrăd wa mad-tĕjĕd i-matte-k, tĕjĕd daɣ dăɣ-tĕšĕdje i-timawaḍen asĕmmĕtăr wa mad-tĕjĕd i-šătma-k. 3Ɣayĕm tĕssanăd dăɣ-tinuḍăfen, hullan ti n-tilăqqiwen s-wăr t-illa ere lanăt tănăt-idhălăn. 4Afăl la tănuḍăft aratăn meɣ ihăyawăn, ĕlmĕdnet dat-hărăt iket-net a-s dat-Măssinăɣ, ĕntăneḍ-en-dăɣ a iwar ălxaqq n-imărawăn-năsăn. Ǝmmĕk-wen-dăɣ a-s mad-ĕẓĕlĕn i-imărawăn-năsăn d-imărawăn n-imărawăn-năsăn asĕdwal wa tăn-jăn. Ǝnta-den-dăɣ daɣ a-wa ijrăẓăn i-Măssinăɣ. 5Tănuḍăft ta wărăt tĕla ere dăr-s, tăqqimă-dd ĕnta ɣas, tĕzzaɣ d-iman-net, tăjet ăṭṭăma-net dăɣ-Măssinăɣ, tăqqaymet tattăr dăɣ-Măssinăɣ ehăḍ d-ašăl i-ad-tăt-ikkĕs dăɣ-tămăɣatert. 6Măšan, tănuḍăft ta wărăt tĕttăr ar iẓĕjraẓ n-iman-net, ĕlmĕd a-s wăr tĕẓley d-ere ăba kud-dăɣ tĕddar. 7Ǝntăneḍ-den-dăɣ hărătăn wi s-led s-ad tăn-dd-suktĕwăd ăddinăt i-ad-ĕṭṭĕfnăt tinuḍăfen tămudre-ten-dăɣ i-ad-wăr tănăt-itiẓĕm ăwadĕm wăl' iyyăn. 8Ămăra, ere hin-ijjărăn imărawăn-net hullan wi t-orăwnen, ilmĕdet a-s ăkkuddăl immun, iššam-as-in ămăra wăla-dăɣ ănăẓẓalim. 9Ămăra, tănuḍăft ta tărhăt ad-tĕjjĕš tiḍeḍen ti tĕdhăl ălkănisăt, wăr has-t-illa a-wen ar s-ad-tĕla săḍisăt timĕrwen n-awătay d-ad-wăr kăla tĕja ar iyyăn n-adubĕn ɣas. 10La daɣ s-ad-tătiwăzzăy s-imărkedăn wi tamašal d-asĕdwal olaɣăn i-aratăn-net d-ad-tăt-ih' amăjaru d-ad-tăt-iha ălxidmăt i-imĕššeddĕjăn d-ad-kann hărăt i-tilăqqiwen, d-ad-tamašal a-wa olăɣăn iket-net. 11Wăr tăqbelăd s-tadhĕlt n-tinuḍăfen ti măḍroynen făl-a-s afăl tănăt-dd-iqqăl iblis-năsnăt, ad-ĕšlĕynăt i-tabarăt ta n-Ălmasex, umas a-s wăr t-illa a ihan ĕnniyăt-năsnăt kunta wădden adubĕn ăynayăn. 12Ǝnta-den-dăɣ ĕmmĕk wa s-sawarnăt uḍlem iman-năsnăt ed ărkăwăl wa jănăt i-Ălmasex n-a-s ĕnta ɣas a-s mad-ĕddărnăt, ăxdĕmnăt-as, ăqqălnăt săr-s. 13Afăl jănăt a-wen, wăr t-illa a tănăt-išillun kunta wădden tikawt jer-ihănan, d-sendad, a-wen daɣ, ojăr-t a-wa s-wăr tănăt-išla ar aggay n-tinawen, wăr t-illa a-s wădden hanăt-t kud-dăɣ wăr tănăt-iqqel a-wen, wăr tănăt-ăskărakăḍ asĕffĕlɣăɣ. 14Dăɣ-tuksĕḍa n-a-wen-dăɣ a făl tănuḍăft ĕnḍărrăt, ăssofăɣ-as ad-talĕs adubĕn, tĕkrĕš aratăn, tănnăhăḍ dăɣ-ejădăš-net s-sărho i-ad-wăr fălla-năɣ jărrĕwăn făw išĕnja-nănăɣ tašlĕlt s-hanăɣ-ĕssĕḍlămăn. 15A-wa jănneɣ, janneɣ-t făl-a-s a ăjjeen dăɣ-tinuḍăfen-tin-dăɣ măḍroynen, ăru d-ănmăšrăynăt i-tabarăt n-Măssinăɣ, ĕlkămnăt i-Iblis. 16Afăl t-tĕlla tamăḍt hat n-ălkănisăt tĕla tinuḍăfen dăɣ-ehăn-net, tĕdbĕlet-tănăt ĕnta iman-net, wăr tumasnet ăẓuk i-ălkănisăt i-ad-tudabăt ălkănisăt dihen ad-kann hărăt i-ti wăren dăɣ-snăt ila ere hasnăt-iknăn hărăt. 17Imizărăn n-ălkănisăt wi ĕknănen issus dăɣ-ălxidmăt-năsăn s-sărho, sĕnnĕḍfĕsăt-asăn semɣar hullan wi s-ĕntăneḍ a ănnuṭṭăfnen d-ălxidmăt wa iẓẓĕwen ămoos ălxuṭbăt d-asĕssăɣăr n-imumĕnăn. 18Dăɣ-isălan n-a-wen-dăɣ făw a dăɣ-innă ĕlkĕttab n-Măssinăɣ: "E-d šišbăɣtišăd awdes dăɣ-ĕttăɣam i-ad-t-iddĕš, wăr has-jed ăkinbăb." Innă ĕlkĕttab daɣ a-s: "Hak ănaxdim, ăniihăjja d-ălxaqq n-tide-net." 19Wăr tăqbelăd a ătiwănnăn făll-ănušăm n-ălkănisăt ar s-ad-ila sănatăt meɣ kăraḍăt tijuhawen. 20Inušămăn wi ănmăšrăynen, ăɣtĕl-tăn dat-ălkănisăt iket-net, tăllăɣed a-wa dăɣ-ănmăšrăyăn i-ad-ăj a-wen tuksĕḍa dăɣ-ăddinăt wi iyyăḍnen, uksaḍăn ĕntăneḍ-dăɣ amišĕl n-abăkkaḍ šund-wen-dăɣ. 21Ǝttarăɣ dăɣ-k făll-Măssinăɣ d-Ɣisa Ălmasex d-ănjălosăn wi ĕnnĕfrănnen d-ad-tamašalăd hărătăn-wi-dăɣ s-iqqud, wăr tăn-tăsnămajărăd, wăr săr-săn tăẓmăẓlăyăd daɣ ăddinăt. 22Wăr tăsrarădăd aswăr n-ifassăn-năk eɣăf n-ăwadĕm wăl' iyyăn i-ad-has-tĕjĕd ălhimmăt, ijjĕš ălxidmăt wa n-ălkănisăt; hekăyy, wăr tihăr d-ăddinăt ibăkkaḍăn-năsăn, ɣayĕm tĕṭṭafăd iman-năk hărkuk dăɣ-tĕšĕdje. 23Wăr sĕss aman ɣas, sass daɣ dehiyyăn a ĕnḍărrăn dăɣ-aman n-lăɣnăb ăxxiimărnen i-ad-kăy-infĕw a-wen dăɣ-tanănnăɣat ta kăy-rammăsăt d-turhĕnnawen ti iyyăḍnen kăy-jarrăwnen. 24Ăddinăt iyyăḍ, ibăkkaḍăn-năsăn, ănifalălăn harwa wăr dd-ĕmmĕḍkălăn isălan-năsăn măšan, iyyăḍ, tahajen wi-năsăn ĕṣtarăn hundăɣ har ašăl wa dd-e-ĕbboqqen dat-ăddinăt iket-năsăn. 25A-wen-dăɣ daɣ a jan imărkedăn wi tamašalăn ăddinăt, wăr tĕhijin wăr-ătwănhăyăn, kunta daɣ wăr-ătwănhăyăn šik, wăr mad-ăhajĕn ĕṣtarăn.

will be added

X\