1 Timoti 4

1Ămăra, dăɣ-isălan-wi-dăɣ n-ajilal n-ăddunya, Unfas Šăddijăn iman-net a innăn, ad-ĕkfĕn ăddinăt iyyăḍ iman-năsăn iba n-ăddin, ĕltăɣăn iyyăḍ tăn-saswadnen. Ăddinăt-en, a-wa săɣren, a săr-săn dd-orawăn alšinăn, 2imăsăɣran n-inĕsbuha n-ălmunafeɣăn s-ăssiikwăl ĕjut-i-dăɣ jăn ibăkkaḍăn-năsăn ulhawăn-năsăn, 3ad-ĕzzĕnăn s-imumĕnăn ĕssannen a-wa ămoosăn tidĕt, săxrĕmăn-asăn adubĕn, ĕgdĕlĕn-asăn tetăte n-imĕnsiwăn iyyăḍ, a-s ija a-wen, hărătăn-win-dăɣ, Măssinăɣ a tăn-dd-ixlăkăn i-tănoflayt n-imumĕnăn i-ad-tăn-ĕkšĕn dăɣ-tămayit-has. 4A-wa dd-ixlăk Măssinăɣ, olaɣ iket-net, wăr t-iha făw a xăramăn, umayet ɣas ăwadĕm i-Măssinăɣ tĕzzar ăkšet a-wa s-irha tetăte-net 5făl-a-s, wăr t-illa amĕnsi s-wădden, ăššiišdăj-t măjrăd n-Măssinăɣ d-tittar. 6Timoti, făssăr i-ayĕtma-k dăɣ-ăddin hărătăn-wi-dăɣ, afăl jed a-wen, ad-tumasăd ănaxdim n-Ɣisa Ălmasex ifranăn, sĕtbĕtăd kăyy-dăɣ a-s a-wa innă măjrăd wa ihakkăn immun a-s tĕddarăd, tĕssanăd daɣ a-wa ĕnnănăt tijĕttewen ti n-teɣăre n-tidĕt ta tădduttet. 7A-wen-dăɣ a făl hak-janneɣ, wăr săjad i-tinfusen ti n-kăl-ăddunya d-ti n-kăl-ibda siɣulnăt timɣaren, mălayăɣna ɣas a-wen wărăn oher hărăt d-Măssinăɣ. 8Kăyy, šĕmmišĕl ăṣṣahăt-năk dăɣ-isălan wi n-ăddin ašĕšrah n-taɣĕssa, wăr-infa s-a ăjjen, a-s ija a-wen, asĕṣṣuhu n-iman dăɣ-ăddin, infa s-a ăjjeen ed ere ăddiinăn, ijraw ɣur-Măssinăɣ ărkăwăl n-tămudre dăɣ-ăddunya hakd-dăɣ ălaxărăt. 9A-wa hak-janneɣ, măjrăd ănihăjjăn d-ad-itwăqbĕl iket-dăɣ-net. 10Tidĕt, nosas dăɣ-ălxidmăt, nĕha amjăr ăṣṣohen ed ăṭṭăma-nănăɣ, Măssinăɣ-i iddărăn a iha, ĕnta a-s Ămaɣlas n-e d t-illăm ăgg-adĕm hullan imumĕnăn. 11Ǝntăneḍ-den-dăɣ isălan wi s-led s-ad-tăn-saɣred, sĕmmĕtărăd ăddinăt dăr-săn i-ad-tăn-ĕknĕn ujreh. 12Wăr kăy-ilăkkăhet ăwadĕm făl-a-s innin măḍrĕyăd, ănn-ak, ĕṭṭĕf dat-imumĕnăn tĕttĕlal dăɣ-măjrăd d-ălxal d-tărha d-immun d-tĕšĕdje n-ulh. 13Iket-di d-kăy-in-tisăɣ, ɣarr ĕlkĕttabăn n-Măssinăɣ dat-ăddinăt, xaṭṭăb-asăn-tăn, tafăssarăd-asăn-tăn. 14Wăr toyyed isuf wi hak-ija Unfas Šăddijăn i-ad-tudabed s-ălxidmăt-năk, isuf-en, Măssinăɣ a hak-tăn-ikfăn, ĕllăɣen-ak săr-săn daɣ ăddinăt s-inna Măssinăɣ a-wen, ăswăr-kăy daɣ ălžămaɣăt wa n-inušămăn ifassăn-năsăn i-ad-dăɣ-k ăj Măssinăɣ ălbăraka. 15Hărătăn-win-dăɣ s-hak-ĕnneɣ, ărḍĕl-tăn, ĕdgĕẓ dăɣ-săn i-ad-dd-ibbuyĕn ehel-năk s-data dat-ăddinăt iket-năsăn. 16Hekăyy! Ăj ĕnniyăt i-iman-năk, tĕjĕd-t daɣ i-a-wa săɣred ăddinăt, kuyĕd dăɣ-taẓidert dăɣ-a-wen. Afăl jed a-wen, ad-tăɣlĕsăd iman-năk, tăɣlĕsăd daɣ iman n-ăddinăt wi hak-ăsijădnen.

will be added

X\