1 A-wa măjrăd ănihăjjăn: ere irhăn tumast n-ărrabex-i n-emănnăhăḍ n-ălkănisăt, ilmĕdet a-s ăsidărhăn ămašal ăllullen. 2 A-wen-dăɣ a făl, emănnăhăḍ n-ălkănisăt, ilzam ad-: Wăr t-iwer uḍlem, umaset ăhalĕs n-iyyăt tamăḍt, ere ilan ălxal d-esăwe, inhĕjjet d-semɣar, ijjĕšet-t amăjaru, umaset ere ăddoben asĕɣĕr n-ăddinăt, 3 wăr-itumaset emăsăw n-asmĕd wăla ere ih' ăjaḍ; umaset ere ăẓedăn, ăgg-ălxer, wăr-itumaset emărh n-aẓrĕf. 4 Umaset ere ănnihăḍăn hullan dăɣ-ehăn-net d-ere s-ăsijădăn aratăn-net, ăssiimɣărăn-t dăɣ-hărăt iket-net 5 făl-a-s ere s-indar ad-ănnăhăḍ dăɣ-ejădăš-net, ĕndek ĕmmĕk wa s-mad-udabăt tăzert i-ălkănisăt n-Măssinăɣ? 6 Wăr-itumaset ere s-iket omăn i-ad-wăr t-irĕmmĕs ĕttĕkĕbru, isĕddărɣĕl-t, iḍĕw dăɣ-uḍlem wa dăɣ-oḍa Iblis iman-net. 7 Umaset ere ilan tajuhe tăhusket dat-ăddinăt wi n-ajăma wăren ămoos ălmăssexităn, dihen, wăr mad-itwĕlkăh, wăr mad-iḍĕw dăɣ-tănḍărbaten n-Iblis. 8 Imadhalăn n-ărrabexăn-i n-imănnăhăḍăn n-ălkănisăt, ilzam-tăn ad-: Tăn-iwar sărho, wăr tumasnet ăddinăt n-ĕssin ilsawăn, ĕkrĕšnet tĕnna tĕtbatăt, wăr săsakaynet tesăse n-asmĕd, wăr tămmăɣnet i-terše n-aẓrĕf s-taxărbĕnit, ăsikărakăḍ a-wen. 9 Ǝddăraj n-immun wa tăn-issĕlmăd Măssinăɣ dăɣ-măjrăd-net, ĕṭṭĕfnet-t dăɣ-a-s wăr t-illa a dăɣ-ĕššakăn iman-năsăn. 10 Zĕjjĕzzĕnet-tăn ăddinăt, itwĕlmĕd a-s wăr t-illa uḍlem tăn-iwarăn tĕzzar, ĕjjĕšăn ămašal-wen-dăɣ. 11 Tiḍeḍen daɣ, iwaret-tănăt sărho, wăr tănăt-ităjjăšet ănnămima, ĕkrĕšnet ălxal ăhuusken, ăɣdĕlnet dăɣ-hărăt iket-net. 12 Imadhalăn n-emănnăhăḍ n-ălkănisăt, hak iyyăn, iyyăt tamăḍt, năhăḍnet dăɣ-aratăn-năsăn d-ijĕdšan-năsăn. 13 Ăddinăt-win-dăɣ, wi išla ămašal-năsăn s-iqqud, ad-ĕtwĕsĕmɣărăn, ad-ăbas tăn-ha tasăja dăɣ-tĕssĕba n-immun-năsăn d-tassaɣt ta jăn d-Ɣisa Ălmasex. 14 Timoti, tăkarḍe-ta-dăɣ, kattăbăɣ-ak-tăt-in dăɣ-a-s jarăɣ ăṭṭăma n-ad-kăy-in-asăɣ šik 15 măšan, kunta wăr-otes Măssinăɣ a-wen har hin-ăhojăɣ fălla-k, ărheɣ ad-hak-tilal tăkarḍe-ta-dăɣ i-ad-tĕlmĕdăd ălxal wa s-led s-ad-t-tĕṭṭĕfăd, sĕssiɣĕdăd săr-s tamĕtte ta n-imumĕnăn n-Măssinăɣ, a-wen a t-ămoosăn ălkănisăt n-Măssinăɣ-i iddărăn, ĕnta a-s tămankayt ta tĕbnăt făll tidĕt, wăr t-illa daɣ a dăɣ-s tăt-madăn-ikkĕs. 16 Tidĕt n-Măssinăɣ ta s-ărḍăn ăddinăt dăɣ-isălan n-ĕddăraj wa n-immun, ti-măqqărăt, a-wen a t-ămoosăn a-s: Ɣisa Ălmasex, ănfalăl-dd dăɣ-ăddunya, ămoos-dd ăgg-adĕm, ĕnhăyăn-t daɣ dăgg-adĕm, illăɣăt Unfas Šăddijăn s-idĕm wa ikrăš dat-Măssinăɣ, ăjjunfăn dăɣ-s ănjălosăn, ătwăjjăn isălan-net i-inĕẓẓulam, omănăn săr-s ăddinăt iyyăḍ, immĕḍkăl s-išĕnnawăn s-edăgg wa n-ălxurmăt.
